Ioane 19
19
1Pilato Iesu tegaret, a abi damrik.
2Gaire ares le zegerzeger aper euerare, a abi kerem ge ameare, a abi dameare mam mam am uali;
3A abim tabarki, a detaut, kega, Uaiai, Iudaia giz Opole! Uiaba abi detapiare.
4Pilato iako teosmelu, a uiabi detager, kega, Dasmer, kaka abi tegaret uabim, ueakai uaba dasmer kaka nole nerute uit ardar kak abi dog.
5Iesu teosmeda, zegerzeger aper dameare, a mam mam am uali dameare. Pilato uiabi detager, kega, Le das!
6Gaire zogo tarim le, a gaire asesered le abi dasmer, uiaba elele ereretikri, kega, Satauroem, satauroem. Pilato uiabim detaut, kega, Ua abi egardare, a satauroem: abelelam kaka nole nerute uit ardar kak abi dog.
7Gaire Iudaia le abi detaut, kega, Keriba gelar nagri, abkoreb abele gelar E ko eumida, abelelam tababu akailu Ade ra Uerem.
8Pilato abele mer asoli, E au geum;
9E iako kot meta balu, a Iesuim eutumer, kega, Ma na gedelam? Iesu nole abim etkalu.
10Pilato abi detager, kega, Nako, ma nole karim natkarti? ma nole umele kara nagri adigir ko mari satauroem, a kara nagri adigir ko mari emariklu?
11Iesu detaut, kega, Ese nole mari nakuar kotorlam, Ma nole adigir nagri kari tumge: abelelam au uit abele le kari nakuar marim.
12Abele ge lam Pilato deraimer ko abi emariklu: Iudaia giz elele ereretikri, kega, Ese ma abele le emarida, ma nole Kaisara ra boai: abele le tababu akailu opole, E Kaisara ra keubu le.
13Pilato abele mer asoli, E Iesu adige tegaret, a kot bau ge emerilu, nei atker, Baker esegemelu, a Heberu kodo mer, Gabatha.
14Kerker ge Paseka derser: mokakalam eipu gerger. E Iudaia giz detager, kega, Dasmer, uaba Opole!
15Uiaba elele ereretikri, kega, Egardare, egardare, abi satauroem. Pilato uiabi detager, kega, Nako, kaka uaba Opole satauroem? Gaire zogo tarim le etkalu, kega, Keriba nole opole kak, Kaisara tepteb.
16E abi emarik uiabim, ko satauroem.
17Uiaba Iesu egardare: E osmeda tabara satauro tababu kodorom, a utebem bakeam, nei atker, Kerem lid ra uteb, Heberu nei, Gologotha:
18Abele uteb ge, uiaba abi satauroem, neisi le abi kemem, nerute apek, a nerute apek, a Iesu eipu.
19Pilato atamelam jauali detali, a tumem satauro dikmerik. Abele detali kega, IESU NAZARETA LE, IUDAIA LE GIZ RA OPOLE.
20Dordor Iudaia giz abele jauali detagerare: abelelam maike au uteb abele uteb uiaba Iesu satauroem: emetu detali Heberu, a Helene, a Roma ra kodo mer.
21Iudaia zogo tarim le Pilatoim detaut, kega, Nole autar kak, Iudaia giz Opole; epe tababu detager, kega, Kaka Iudaia giz Opole.
22Pilato detaut, kega, Abele kaka detali, kaka detali.
23Gaire ares le emetu Iesu satauroem, uiaba abara am uali ekadarare, a foa derapeir, abkoreb uiaba ares le; am uali kot ko: abele am uali kot nole adket kak, kemer kemer euer.
24Uiaba mer atagere, kega, Meriba nole aspas kak, a debele lugulug deraimer niti ra lu: ueakai jauali bakedida, kega, Uiaba kara am uali derapeiare, a kara am uali kot lugulug ikeli. Abele gaire lu ares le giz ikeli.
25Iesu ra satauro dege abara apu ekueilu, pako abara apu ra keimer, Maria, Kelopa ra kosker, a Maria Magadalena.
26Iesu abara apu dasmer, pako abele kaimeg E nasge, maike tekueilu, E abara apu detager, kega, Kosker, dasmer mara uerem!
27E ko detager abele kaimeg, Dasmer mara apu! Abele kaimeg abi tegaredelu abara uteb abele haua ge.
28Abele iobaru, Iesu umele, kega, Gaire lu uridili eseemuda. Ueakai jauali bakedida, E detager, kega, Kaka ni ap.
29Abele ge nerute tanelu, mitkar uinega: uiaba sab akmei uinega de, a hisop paikai ge dikmeriklu, a abara te ge agisilu.
30Emetu Iesu uinega erpeilu, E detager, kega, Eseemuda: E abara kerem esorgiru, a lamar emariklu.
31Iudaia giz Pilatoim bareda ko uiaba teter erapei, a uiaba egardare, ueakai uiaba gem nole emerered sabath ge, (abelelam gerger derser, au gerger abele sabath.)
32Uiaba gaire ares le tabakeuare, a kekiam le ra teter erapei, a nerute abi kemem satauro:
33Epe uiaba Iesuim tabarki, a dasmer E eumida, uiaba nole abara teter arapeir kak:
34Epe nerute uiaba gaire ares le abi ber ge dabu ekos, a sobkak mam a ni babuser.
35Le ardali ageakarem, abara mer ageakar: E umele, ageakar E detaut, ueakai uaba oituli.
36Emetu ikeli abele gaire lu, ueakai bakedida abele mer detali, kega, Nole arapeir kak nerute abara lid.
37Nerute mer emetu detali, kega, Uiaba ko abi dasmer uiaba dab akoselam.
38Abele iobaru, Iosefa Arimathea le, nerute Iesu ra kaimeg, E gumik abelelam E Iudaia giz geum, a Pilatoi damos ko Iesu ra gem tegaret: ege Pilato emarik. E tabakeam, a Iesu ra gem egaret.
39Nikodemo ko tabakeam, abele le ki ge Iesuim bakeam, E muro tais a alo atapetem, mokakalam uan handed paun beber.
40Uiaba Iesu ra gem egardare a uali lino de sopem, kemem gaire debe lagelag lu, mokakalam Iudaia giz ra tonar etkobei.
41Abele gedub ge, uteb uiaba Iesu satauroem, nagri kerkar ao, nole eud le akedir kak.
42Uiaba Iesu abele ge ikedilu, abelelam gerger ge derser uiaba Iudaia le, (epe ao maike.)
Currently Selected:
Ioane 19: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
