Ioane 21
21
1Abele lu iobaru, Iesu iako tababu natomertare uiabim kaimeg giz, Tiberia keper ge; abele tonar tabara natomertare.
2Netate gedim Simona Peteru, a Toma, nei atker Didumo, a Nathaniela, Kana Galilaia le, a neisi Zebedaio ra uerem, a neisi abara kaimeg giz.
3Simona Peteru uiabi detager, kega, Kai nabakeamulu net asaperem. Uiaba abi detaut, kega, Ki ko nabakeuare mari kemem. Uiaba bakeuare, a nar ge ekauererti; abele ki ge, uiaba nole lar kak.
4Ege idim ge, Iesu tauer ge tekueilu: kaimeg giz nole umer kak Iesu dali.
5Iesu uiabi detager, Kega, Omasker, nako, uaba leuer nagri? Uiaba abi detaut, kega, Nolea.
6E uiabim detager, kega, Net dikri nar tuter peik, a uaba ko dasmer. Uiaba dikri, epe uiaba umer kak net eguatumur, abelelam lar dordor.
7Abele kaimeg Iesu nasge Peteru detager, kega, Opole pedali. Simona Peteru asoli, kega, Opole pedali, E tabara uali kot ame (abelelam E no gem), E gurim eupamalu.
8Kaier kaimeg giz tabakeuare kebi nar tumge (abelelam uiaba nole muriz geseplam, mokakalam fifte eit fathom), net eguatumur gaire lar kem.
9Uiaba gesepem tabarki, uiaba ur dasmer, a lar tumge, pako leuer.
10Iesu uiabi detager, kega, Uader lar kei tais uaba asaperem peirdi.
11Simona Peteru ekauerelu, a net gesepem eguatumulu, mitkar au larlam, uan handed a fifte thri: a net nole atoat kak au larlam.
12Iesu uiabi detager, kega, Tabakeuare, leuer aroare. Nole nerute uiabielam kaimeg giz saserimem abim eutumer, kega, Ma nete? abelelam uiaba umele Opole dali.
13Iesu tabakeamulu leuer ais, a uiabi ikuar pako lar kem.
14Abele thri Iesu tababu natomertare uiabim kaimeg giz, keubu E eded akaida eudelam.
15Uiaba emetu eroare, Iesu Simona Peteru detager, kega, Simona, Iona ra uerem, ma kari lag uiabi tumge? E abi detager, kega, Eko, Opole; ma umele kaka mari lag. E abi detager, kega, Kara kebi mamoe giz darasisiare.
16E iako neisi abi detager, kega, Simona, Iona ra uerem, ma kari lag? E abi detager, kega, Eko, Opole; ma umele kaka mari lag. E abi detager, kega, Kara mamoe giz darasisiare.
17E iako thri abi detager, kega, Simona, Iona ra uerem, ma kari lag? Peteru okabatageli abelelam E thri abi detager, kega, Ma kari lag? E abi detaut, kega, Opole ma umele gaire lu uridili; a ma umele kaka mari lag. Iesu abi detager, kega, Kara mamoe giz darasisiare.
18Ageakar, ageakar, kaka mari natager, kega, Ma makeriam emeret mabu eso, ma bakeam mabara lag: ma aule mabara tag nagisi, a nerute ko mari uanaso, a mari uanagared abele ma nole la kak.
19E abele detager, abara tonar eud etomet Ade despili. E emetu abele detager, E ko abi detager, kega, Kari narmili.
20Peteru egreamalu, a dasmer abele kaimeg Iesu nasge, E irmili ko; E dali Iesu ra marmot ge uteidilu ki ge eroare, a detager, kega, Opole, nete ko mari keserkeser?
21Peteru abi dasmer, a Iesui detager, kega, Opole, E dali nako?
22Iesu abi detager, kega, Ese kaka lagelag E kari naokaili, nako abele marim? ma kari narmili.
23Abele mer ekoseli uiabim keimer giz, kega, Abele kaimeg le nole eud kak: Iesu nole abi detager, kega, Ma nole eud kak, epe, Ese kaka lagelag E kari naokaili, nako abele marim?
24Abele kaimeg le E ageakarem abele gaire lu, a abele gaire lu detali: a meriba umele ageakar abara ageakar.
25Dordor gaire uader lu Iesu de ikerare, ese detali uridili, kaka dikiapor nole abkoreb gesepem gaire jauali. Amen.
Richard Clay & Sons, Limited, London & Bungay
Currently Selected:
Ioane 21: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
