Ioane 9
9
1Iesu ekas idimirki, E dasmer nerute le sadamer kerker ge osmelu.
2Abara kaimeg giz abi nautmerare, kega, Rabi, nete adud, E dali, nako abara aba a apu, abelelam E esmelu sadamer?
3Iesu detaut, kega, E nole adud, a abara aba a apu nolea: epe Ade ra dorge abi tumge etomeret.
4Meriba dorge ko ikerare abara dorge, kari namarida, gerger ge; ki ko tabarki, nole le umer kak dorge ikeli.
5Kaka geseb datki, abele kerker kaka geseb ge emri.
6E emetu detager abele, E mos ekeilu gesepem, a sep mog detagem moselam, abara pone asauem,
7A abi detager, kega, Bakeam, dirup Siloam keper (tonar abele nei, Namarida). E bakeam, a dirup, iako tabakeam mamoro dasmer.
8Abara boai, pako gaire le, emeret abi dasmer sadamer, uiaba detager, kega, Nako nole E dali lugem bamos?
9Uader detager, kega, Eko, E dali: a uader, kega, Nolea, E abi kaise. E detager, kega, Kakanali.
10Uiaba abi detager, kega, Nako abele tonar mara neisi pone diski?
11E detaut, kega, Abele le, nei atker Iesu, sep mog detagem, a kara neisi pone asauem, a kari natager, kega, Bakeam Siloamem, a dirup: kaka bakeam, a dirup, epe kaka bakaerti.
12Uiaba abi detager, kega, E nade? E detaut, kega, Kaka umer kak.
13Uiaba emeret sadamer le tegardare uiabim Faresaio giz.
14Abele sabath ge Iesu sep mog detagem, a abara neisi pone diski.
15Faresaio giz iako abim bautumer, kega, Nako tonar ma bakaerti? E uiabim detaut, kega, E sep mog kara neisi pone asauem, kaka dirup, epe bakaerti.
16Uader Faresaio giz detager, kega, Abele le nole Adelam, E nole sabath irmili. Uader detaut, kega, Nako, adud le umele ikeli gaire atamelam mokakalam? Uiaba nakesmulu.
17Uiaba iako sadamer detaut, kega, Nako mara mer abim, abelelam E mara neisi pone diski? E detager, kega, E perofeta.
18Iudaia giz nole egaret abele tonar emeret E sadamer le, a peirdi bakaerti, uiaba kekiam abara aba a apu dabgeri,
19A uiaba nautumer, kega, Nako, uaba uerem idali sadamer esmelu? Nalu tonarlam E bakaerti peirdi?
20Abara aba a apu uiabim detaut, kega, Ki umele keriba uerem peik, a E sadamer esmeda:
21Epe ki umer kak nalugelam peirdi E bakaerti; a ki umer kak nete de abara neisi pone diski: E aule, abi itmer; E umele tababu detaut.
22Abara aba a apu abele detaut, abelelam uiaba Iudaia giz geum: Iudaia giz netate mer, kega, Ese nerute le abi abeilu Keriso pedali, uiaba ko abi imuare sunagolam.
23Abelelam abara aba a apu detager, kega, E aule; abi itmer.
24Uiaba iako neisi dabgeri abele sadamer le, a abi detager, kega, Ade despili: keriba umele adud le dali.
25E detaut, kega, Ese E adud le, kaka umer kak: netate lu kaka umele, emeret kaka sadamer, a peirdi kaka bakaerti.
26Uiaba iako abi detaut, kega, Nalu E ikeli marim? nalugem E mara neisi pone diskilu?
27E uiabim detaut, kega, Kaka emetu uabi detager, a uaba nole asor kak: epe nako uaba lagelag ko abara memeg le?
28Uiaba adud mer abim, a detaut, kega, Mama abara memeg le; mamoro keriba Mose ra memeg le.
29Keriba umele Ade Mose detaut: epe ki umer kak nagelam abele le dali.
30Abele le uiabim detaut, kega, Dame lu peik, uaba nole umer kak E nagelam, a E emetu kara neisi pone diski.
31Meriba umele Ade nole adud le asoli: ese nerute le Adim esorerapare, pako abara dorge ikeli, E ko abi asoli.
32Netede asoli emeret ge nerute le umele diski neisi pone abele le sadamer teosmelu?
33Ese nole Adelam abele le, E nole umer kak nerute lu ikeli.
34Uiaba abi detaut, kega, Ma eosmeda uitelam, nako ma keribi okadeskeda? Uiaba abi imuare.
35Iesu asoli uiaba emetu abi imuare; E abi erdali, a abi detager, kega, Nako, ma Ade ra Uerem oituli?
36E detaut, kega, Opole, nete dali, ueakai kaka ko abi oituli?
37Iesu abi detaut, kega, Ma abi umele, a E dali mari mer atagere.
38E detaut, kega, Opole ae, kaka oituli. E abi esorgiru.
39Iesu detager, kega, Kaka geseb ge tabarki ko barditug, ueakai bakaerti gaire le asmer kak; epe gaire le dasmer ko sadamer.
40Uader Faresaio giz abi dog asoli abele, uiaba abi detautare, kega, Nako, keriba ko sadamer?
41Iesu uiabim detaut, kega, Ese uaba sadamer, uaba nole adud nagri; epe uaba detager, kega, Keriba dasmer: uaba uit mena dali.
Currently Selected:
Ioane 9: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
