Luka 10
10
1Keubu, Opole depegeli uader sefenti, E uiabi namarida neisi a neisi le kekiam abara opem, gaire uteb uridili, E keubu.
2Ege E uiabi daratagerare, kega, Abele saito itraker au kase, neisi a neisi le uiaba dorge ikeli: debele uaba damosi Opole abara saito itraker, iaueakai gaire le namarida ikeli abara dorge.
3Ua obakeauare: dasmer, kaka uiabi namarida mokakalam kebi mamoe giz eipu luko.
4Uaba bakeauare, nolea ais mani epei, a pako epei, a teter gab: uaba nolea damareda omare le uabi obapit gab ge.
5Ese uaba barot nerute meta ge, uaba kekiam meta kemle abi detager, kega, Uerkab uabim.
6Ese le debele uabim, a uaba abim debele; ese nolea uabim debele, uaba ko takomeda.
7A uaba emeri abele meta, eroli a ereli abele gaire lu uiaba uabim uadaisuerare: abelelam abkoreb bodomalam le dorge ikeli. Uaba nolea bakeauare nerute meta a nerute meta.
8Ese uaba nerute uteb ge barot, a uiaba omare uabim, a ua eroare gaire leuer uiaba uabim derseri:
9Uaba nadgirare uader gim le, a ua daratagerare, kega, Ade ra baselaia maike uabi dog.
10Ese uaba nerute uteb ge barot, a uiaba nole uabi omare, debele ua bakeauare giz akos uteb, kega,
11Abele sep uaba uteb, ege sep batagerda keribi dog, a keriba ditkeda uabim: debele uaba umele abele lu, ege Ade ra baselaia maike uabi dog.
12Kaka uabi detager, kega, Abele gerger kebi bodomalam Sodomaem abele uteb ge.
13Korasina ae; kaka au nasenase marim! Bethesaida ae; kaka au nasenas marim! abelelam ese ikeli Turo a Sidonaim atamelam emetu ikeli uabim, nako, emeretelam uiaba emetu obazgeda, emeri mokakalam zegerzeger uali pako tibitibi uali.
14Kebi bodomalam Turo a Sidona abele gerger ia uabi itimer.
15Marim Kaperenauma, uige mari uanageserare armem, a keubu ma ekesmeri muige abele Hedisge.
16Ese le asoli uabim, mokakalam kari asoli; ese nerute le uabi dituaki, mokakalam kari natuaki; ese nerute le kari natuaki, epe E natuaki abele le kari namarida.
17Ui ge ko tabakomeret, abele sefenti gaire le, uiaba sererege, kega, Opole, ege demoni giz uiaba asoli keribi, mara nei ge.
18Ege E uiabim daratagerare, kega, Kaka erdali Satana, E ekesmeri kotorlam, mokakalam perper ise.
19Dasmer, kaka uabi ikuar abele sirdam ko tabo E sapiri pako bokani, pako saserim uridili le tekelar: nole nerute lu adud uabim.
20Uaba nole sererege abele lu, ege demoni giz uabi asoli; debele uaba sererege abele lu, iaueakai uaba nei emetu uadetar kotor ge.
21Peike abele haua ge, Iesu ra lag au sererege, Lamar Zogolam, kega, Kaka mari esoao, kara Aba, kotor Opole pako geseb ge, abelelam ma ispilu abele lu uader umele pako pardar, a natomertare abele lu kebi uerem ge: uao, kara Aba, abele mara lag peike.
22Ege kara Aba gaire lu E kari naisuer: nole le ardar kak abele Uerem, epe abara Aba; nole le erdali abele Aba epe abara Uerem, pako nerute le abara Uerem E lagelage abi etomeret.
23Ege E basker taba kaimegem, a kebi mer uiabim, Uerkab abele pone emetu erdali uader lu uaba erdada:
24Abelelam kaka uabim detager, kega, Gaire perofeta pako opole giz, ui lagelage uaerdarare abele lu ua erdada, a uiaba nole ardar kak; a uiaba lagelage asoli abele lu uaba emetu asoli, a uiaba nole asor kak.
25Dasmer, ege nerute le ekuei, ereuerem gelar giz, E abi mirem, kega, Ereuer le, nalu lu kaka ikeli ueakai kaka nagri eded niaiem niai karem?
26Ege E abi detager, kega, Nalu detali muige abele gelar? nalu mer ma etag?
27Ege E etkalu, kega, Ma omare Opole mara Ade, mara nerkep kemerkemer, mara mar kemerkemer, mara saserim kemerkemer, mara akiapor kemerkemer; ma omare le mai kes mari dog, mokakalam mari omare.
28Ege E abi detager, kega, Mara mer barkak: ma ikeli abkoreb mokakalam, ueakai ma eded nagri.
29Epe E lagelage tababu barkakem, E Iesui detager, kega, Kaka umele, na le mai kes kari dog?
30Ege Iesu de detaut, kega, Nerute le tabakeamu Ierusalemlam Ieriko ge; ege uader lu gatkamer le giz abi erpeirare, abara ame uali digirare, a ipitare, a ui ga bakeuare, ege imereder maike eud.
31Ege nerute zogo le, E bakeamulu abele gab ge: E abi erdar, a abielam degab etaruklu.
32A mokakalam, nerute Leui le, E osmelu abele uteb gab ge, E bakeamulu E erdali, abielam degab etaruklu.
33A nerute Samaria le, E bakeamulu abele uteb gab ge: E erdar abele le emeri, E au omare abi,
34Ege E bakeamu, erep abara ziz, a lukup epaitered pako uaina; ege E agisilu ebur sor ge igimulu, E ais nerute meta, E abi asesered.
35Nerute idim ge, E meme demareredlu, ege E ikuar neisi denari meta kemleim, a abi detager, kega, Ma abi asesered; ese nerute lu E lagelage, ma terapei abi ikuar, ka iako tarakomelu, mari bodomalam.
36Uiabielam neis netate le, nete le mai kes darali abim nerute le lu gatkamer le giz erepeidarda?
37Ege abim detaut, kega, Le abi omare. Ege Iesu de abi detager, kega, Ma ko bakeam mokakalam ikeroa.
38Ui ge bakeuare, ege bakeamulu nerute uteb: nerute kosker, abara nei Maretha, E tegaredlu Iesu tabara meta.
39Tabara berbet, nei atker Maria, ege emereder maike Iesui teter ge, E lagelage uaeasor Iesu ra mer.
40Ege Maretha de sagim deger taba boaiem; ege E ekueilu, a abi detager, kega, Opole, nalu, ma nole kari dikiapore, epe kari le lut nakuar peike tepteb derser gaire lu? ma ge abi detager, kari upinati.
41Ege Iesu de abi detager, kega, Maretha, Maretha, ma lu lag gesebge, no pama geseb lu dikiapoare:
42Nerute lu pe debele; ege Maria de dikiapore debe lu, nole nerute le abielam ais.
Currently Selected:
Luka 10: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
