MAREKO 13
13
1Ege E teosmeda zogo metalam, nerute abara kaimeg giz abi detager, kega, Kole, dasmer, gaire au baker a gaire meta giz!
2Iesu abi detaut, kega, Ma dasmer gaire au meta giz abele? nole nerute baker ko igi tumem nerute baker, a nole abu kak.
3Iesu tumem paser ge Oliua emeri, zogo meta op, Peteru a Iakobo a Ioane a Anederea gumik abim eutumer,
4Ma keribi detagerare abele kerker ko tabarki abele gaire lu, a nalu atamelam abele gaire lu uridili ko tabarki?
5Ege Iesu uiabim detaut, a ditimeda detager, kega, Mamoro dasmer nerute le uabi okardare;
6Abelelam gaire le ko kara nei ge tabarki, a detager, kega, Kakanali Keriso; a gaire le didmirki.
7Uaba barseda aserare, a barseda daratagereda, nole geum kak; abkoreb abele kekiam tabarki; mop uarem.
8Abelelam nerute ged tekue obapit nerute ged, a nerute baselaia obapit nerute baselaia: a demali ko nagri uader ged, a memeig giz tabarki, a urker: abele ditimeda giz gaire asiasi.
9Uaba mamoro dasmer; uiaba uaba kotem emarik; a uaba ipit sunago ge; a uaba tegared gauana giz a au opole giz ra op karielam, uiabim atamelam.
10Abkoreb kekiam euangelia marau uiabim gaire ged uridili.
11Ese uiaba uaba tegared, a uaba emarida, uaba nole kekiam deraimeri a dikiapor na mer ko detager; abele gerger ua ko detager, abele mer uabi nakuar; a nole uaba detager, mamoro Laniar Zogo.
12Nerute keimer abara keimer emarida ko eumida, mokakalam aba abara ueremem; a uerem giz tekue obapit uiaba aba a apu, a ui emarida ko eumida.
13Gaire le ko uabi derar kara neilam, ese nerute le erpei mop ge tabarki, E ko eded.
14Ese uaba uite lu dasmer atkolam, Daniela perofeta emetu detager, tekue nug uteb ge, (le etage mamoro dikiapor,) kerker peik, uiaba gaire le Iudaia emeri ko paser ge koreder:
15Ese le meta tumge emeri, E nole muige meta abu kak, a nole abara meta badari ko nerute lu tais:
16Ese le gedub emeri, E nole akomeret kak, tabara am uali tais.
17Uaiai uiaba gaire kosker kem kem, a uiaba nano emeli abele gerger giz!
18Uaua ko bamereda, ueakai abele lu nole nur ge tabarki.
19Abelelam ko au asiasi abele gerger giz, nole mokakalam ditimeda gaire lu Ade detagem pako irdi, a nole mokakalam niaiem.
20Ese Opole nole tuprik abele gerger giz, nole le kak umele eded: Epe E tuprik abele gaire gerger, uiabielam gaire le depegili, E digmiri.
21Ese nerute le uabi detager, kega, Dasmer, Keriso ike; a dasmer, Keriso idali; nole uaba abi asor kak:
22Abelelam gaire Keriso bes, a gaire perofeta bes ko tabarki, a uiaba natomertare gaire atamelam a gaire adigir, ko didmirki gaire le depegili, ese umele.
23Uaba ko dikiaporare: dasmer, kaka emetu uabi detagereda.
24Keubu abele gaire gerger asiasi, lem au kupikup nole be kak, a meb nole meb gerib kak,
25A kotor uer giz nabuda, a gaire kotor adigir deskerdi.
26A uiaba ko dasmer Le la Uerem baz giz ge tedegemele, kemem au adigir a zorom zorom.
27E tabara angela giz namarida, ko taraisare abara le giz emetu depegili foa uag peklam, ditimeda geseb, paikai ge pako kotor paikai ge.
28Uaba ko ereuerem abele mer babisdarie abele suke: girkupi tam, a lam eperekili, uaba umele bar maike;
29Mokakalam, ese uaba dasmer abele gaire lu tabarki, mamoro dikiapor, abele kerker maike abele gab te.
30Ageakar, kaka uabi detager, kega, Nosik le peik nole abu kak, kekiam abele gaire lu tabarki.
31Kotor ge a geseb ge ko abu; a kara mer giz nole abu kak.
32Epe abele gerger pako haua iamdali le nole umer kak, angela giz kotor ge nole umer kak, a Uerem nole umer kak, epe Aba tepteb.
33Uaba mamoro dasmer, a derser, a esorerapare; abelelam uaba nole umer kak abele gerger.
34Mokakalam le muriz gedim bakeam, tabara meta dekaerti, a tabara memeg giz sirdam nakuarare, a le gab te asesere abi mer tigri ko derser.
35Abelelam ua ko derser: abelelam uaba nole umer kak abele gerger meta ra Kole ko tabarki, ese kikem, ese eip ki, ese kimiar faul ereretikri, ese idim ge:
36Epe E sobkak tarabarakua, a uabi erdali uteid.
37Abele mer kaka uabi detagereda, kaka uiabim gaire le uridili detagereda, Derser.
Currently Selected:
MAREKO 13: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
