MAREKO 14
14
1Neis gerger iobaru, paseka akerare, a areto nole isi kak; zogozogo le giz, a aotale giz ko deraimeri abi terpei okardarem, a abi ipit eumida.
2A uiaba detager, kega, Nole abele ikeli uetpur ge, iaueakai abele ged ataperetlam.
3E emri Bethania, muige Simona lepera ra meta, E emri leuer aroem, nerute kosker abim tabakeam nagri alabasa tarpor, muige muro ido lu; E emetu tarpor daraturumda, E abi kerem ge epaiteredelu.
4Uader le urker, a mer mer, kega, Nalugelam abele muro epaitered?
5Abelelam ese emetu terapei, abele bodomalam tumem thri handed denari a ko ikuarare gaire le lu kak. A uiaba abi urker.
6Iesu detager, kega, Nole abi ataperet kak; nalugem uaba abi bamsili? abelelam E debe dorge karim ikeli.
7Abelelam le giz nole lu kak no uabi dog emeri, uaba umele uiabim debe dorge nakeli abele gerger uaba laglag; epe kaka nole niai emeri uabi dog.
8Kosker emetu ikeli abele lu E umele: E kekiam kara gem dedered kari natkobei.
9Ageakar, kaka uabi detagereda, kega, Gaire ged uridili geseb ge ko euangelia marao, abele ko etomeret kosker ra dorge, mena ko dikiapor abim.
10Nerute le, abele tuelf lelam, nei Iuda Isakariota, E bakeam uiabim zogozogo le giz, ko abi keserkeser uiabim.
11Uiaba asereda, uiaba sererge, a abi detager ko mani abi ikuar. E deraimeri ko Iesu keserkeser.
12Abele kekiam gerger areto nole isi kak, abele kerker uiaba paseka ipit, abara kaimeg giz abi detager, kega, Nade uteb mama lag keriba ko paseka ero?
13E neis abara kaimeg giz namariklu, a uiabi detager, kega, Ua bakeamulei utebem, nerute le uabi obapit a nini tarpor erpei: abi irmilei;
14E abele ge badari, uaba meta kemle detagereda, kega, Kole de detager, Nade suble uteb, kaka a kara kaimeg giz paseka eroarem?
15Ege E uabi degeredi nerut au uteb kotor, emetu derser a eseger: a uaba ko derser keribim.
16Abara kaimeg giz neis bakeamulei, a uteb ge tabarki, a erdarei mokakalam E uiabi daratager; epe uiaba paseka derser.
17Kikem Iesu a tuelf le kei tabarkeda.
18Uiaba baido, a leuer eroare, Iesu detager, kega, Ageakar, kaka uabi detagereda, kega, Nerute uabielam kari keserkeser, abele le kari dog eroli.
19Uiaba ditimeda okasosok, a abi detager, kega, Nako kaka? a nerute kega, Nako kaka?
20Iesu uiabim detaut, kega, Nerute uaba tuelf lelam, le itili kari dog tanelu ge.
21Le la Uerem bakeamulu mokakalam abim detali: epe uaiai abele le Le la Uerem keserkeser! debele abele le nole aosmer kak.
22Uiaba eroare, Iesu areto ekao, a esoao, a itur a uiabi nakuarare, a daratagerare, kega, Tekao aroem: kara gem ike.
23E tanelu ekao, a esoao, a uiabi nakuarare: a ui uridili areem.
24E uiabi daratagereda, kega, Kara mam ike, abele kerkar gelar, epaitered uiabim gaire dordor le.
25Ageakar, kaka uabi detagereda, kega, Kaka nole iako aree kak abele uina turumlam, kekiam tabarki abele gerger kaka ko aree kerkar uina Ade ra baselaia ge.
26Uiaba emetu uedakiriare nerute ued, uiaba Oliua paserem bakeamuda.
27Iesu uiabi daratagereda, kega, Uaba uridili ko ezigmada karielam abele ki ge: emetu detali, kega, Kai le mamoe asesered ipit, epe mamoe giz kepu bamarida.
28Emetu kaka eded akaida, kaka kekiam bakeam Galalaiem a uaba keubu.
29Peteru abi detager, kega, Ese ui uridili marim ezigmada, kai nolea.
30Iesu abi detager, kega, Ageakar, kaka mari detager, kega, Thri ma ko kari nasared, abele ki ge, a kimiar faul nole neisi ereretikri kak.
31E iako elele detager, kega, Ese kaka mari kemem naumilu, kaka nole mari asared kak. Uiaba uridili daratagereda abkoreb.
32Uiaba nerute utebem tabaruda, nei Gethesemane: E abara kaimeg giz daratagereda, kega, Uaba bameri ike, kai esorerapare.
33E Peteru, a Iakobo, a Ioane taraisare, a ditimeda ko okasosok, a nerkep okabatageli;
34E uiabi daratagereda, kega, Kara mar au asiasi bakedid abele eud; ua ge bamer, a derser.
35E kebi kebi bakeam, a seb ge etkobeilu, a esorerapare, ko abele haua abielam abi, ese umele.
36E detager, kega, Aba, Baba, mama umele gaire lu eseemuda; karielam ekao abele tanelu; epe nole kara lag ikeli mabara lag ikeli.
37E ko akomed a uiabi erdali uteid, E Peteruim detager, kega, Simona, ma uteid? ma nole saserim kak ko derser netat haua ge?
38Ua ko derser, a esorerapare, ueakai uaba nole mirem barot: lamar saserim, epe gem gebgeb.
39Iesu iako bakeam ko esorerapare, a detager abele netat mer.
40E iako takomeda, a uiabi erdali iako uteid, abelelam uiaba pone beber, a uiaba umer kak nerute mer abi detaut.
41Iesu thri tabakeam, a uiabi daratagereda, kega, Ua ko uteid, a nerbazi; sina, haua ike; dasmer, emetu Le la Uerem keserkeser uiabim gaire uit le giz.
42Bako, mi nabakeuare; dasmer, E maike le kari keserkeser.
43E abele mer detager, sobkak Iuda tabarki, nerute le tuelf lelam, a abi kemem gaire le uridili teibur tulik a gabagaba taraisare, uiabielam zogozogo le giz, a aotale giz, a au le giz.
44Abele le abi keserkeser uiabim daratagereda nerute atamelam, kega, Le kaka abi eskos, E dali; uaba abi erpeirare, a elele tegardare.
45E sobkak tabarki, E abim bakeam, a abi detager, kega, Rabi ae; a abi eskos.
46Uiaba abim tag giz itrimuda, a abi terpei.
47Nerute le uiabielam tekue, a teibur aososo tulik iseda, a kole zogozogo le giz ra memeg le ipit, a abara laip ismilu.
48Iesu uiabi daratagereda, kega, Nako, ua tabakeuare karim eruam le ise, a gaire teibur aososo tulik, a gaire gabagaba kari tais?
49Kaka uabi dog gaire gerger giz zogo meta ge okadeskeda, uaba nole kari arpeir kak; bakedilu eski abele zogo mer detali.
50Uiaba uridili abi dekaerti, a koreder bameri.
51Nerute makeriam abi irmili, E aole a uali lino batkam: a makeriam giz abi erpeirare;
52E uali lino igilu, a aole uiabielam koreder ge bakeamulu.
53Uiaba Iesu datkimuardare abim kole zogozogo le giz: gaire kole zogozogo le giz netate gedim abim, a aotale giz.
54A Peteru muriz ge abi irmili, abele uteb meta ge, kole zogozogo le giz ra meta; E kemem emeri uiabi dog memeg le giz, a abi ur ge gebaugeli.
55Gaire kole zogozogo le giz, pako gaire tarim le giz deraimerare abielam nerute tonar, ko abi ipit eumilu; epe nole ardar kak.
56Dordor le abielam bes mer detager, a dordor tonar mer uiaba detagerare.
57Uader le bako, a abielam bes mer detagerare, kega,
58Keriba asereda E detager, kega, Kaka, ko abele meta ezageri, tagu ikeli, a thri gerger kaka ko nerut ikeli, a nole tagu ikeli.
59Epe nole netate gab uiaba mer detagerare.
60Abele kole zogozogo le giz eipu tekue, a Iesuim eutumer, kega, Nako ma nole mer etkalu? nako mer uiaba tais marielam?
61Epe E bazeguar, a nole mer kak. Ege kole zogozogo le giz iako abim eutumer, a abi detager, kega, Ma Keriso nali, Aosperera ra Uerem me?
62Iesu detaut, kega, Kakanali; uaba ko dasmer Le la Uerem adigir tuter tag emeri, a ko tabakeam gaire kotor baz giz ge.
63Abele kole zogozogo le giz tababu tabara am uali etoat, a detager, kega, Epe nalu nerute merume le?
64Uaba emetu asereda Adim op mer detagereda; nalu uaba dikiapor? Uiaba uridili mer nakesmur, kega, Abkoreb E ko eumida.
65Uader le ditimeda abi mos itu, a abara op demdare, a abi detapiare, a abi detager, kega, Ma ko perofeta; a memeg le giz abi ipitare tag de.
66A Peteru lokod ge emeri, nerute neur, abele kole zogozogo le giz ra memeg, tabakeam;
67E Peteru erdali ur ge gebaugeli, E abi dasmer, a detager, kega, Mama nerute le kemem Iesu.
68Epe E asared, kega, Kaka nole umer kak, kaka nole opasereret kak abele lu ma detager. E osmeda abele maisu ge; a kimiar faul ereretikri.
69Neur memeg le iako abi erdali, a ditimeda detager uiabim akuelem, kega, E dali nerute uiabielam.
70E iako asared. Nole uapum kak, gaire akuelem iako abi detager, kega, Ageakar ma nerute le uiabielam, ma Galilaia le, ma uiabim netate kodomer.
71Peteru ditimeda adud mer egali, kega, Kaka nole umer kak abele le uaba detager.
72Kimiar faul neisiem ereretikri. A Peteru dikiapor abele mer Iesu abi detager, kega, Kimiar faul nole neisi ereretikri, ma ko thri kari nasared. E dikiapor, a E bazoli.
Currently Selected:
MAREKO 14: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
