MAREKO 3
3
1E iako sunago balu; abele nerute le tag euselu.
2Uiaba abi keikei dasmerare, nako, E abi idigiri sabath ge; uiaba ko abara mer atrumda.
3E le tag euselu detager, kega, Eipu ekueda.
4E uiabi detager, kega, Nako, abkoreb debe lu ikeli sabath ge, nako adud lu ikeli? ko idigiri, nako ipit eumid? Uiaba bazeguar.
5E uiabi urkerem deraueli dasmerare, abara nerkep isir uiaba tonarlam bamesili, E le detager, kega, Mara tag uaimari. Abara tag uaimari; ueakai abara tag ekaida debele mokakalam nerute.
6Faresaio giz teosmeda, a sobkak mer atagere, pako Herodiano giz, ko abi ipit eumida.
7Iesu a abara kaimeg giz bakeauda abele keper ge; gaire le abi irmili Galilaialam, pako Iudaialam,
8Pako Ierusalemalam, pako Idumealam, pako Ioridanolam sager op, pako uiaba maike Turo a Sidona, gaire le abim tabakeuare, abelelam uiaba asereda abara dorge ikeli.
9E abara kaimeg giz mer tigri, ko kebi nar tais abi naokaili gaire lelam, uiaba abi atkaplam.
10E gaire le nadgirare; abelelam ui uridili gim nagri abi atkap ueakai abi itutilu.
11Uite lamar giz abi dasmerare, uiaba abim bakesmeri, a ereretikri, kega, Mamanali Ade ra Uerem.
12E uiabim elele mer tigri, uiaba abi atomeret kak.
13E paserem ogi, a dabgeri gaire le E laglag; uiaba abim tabakeuare.
14E depeger tuelf le, ko abi kemem emri, a E uiabi namarkare ko marau.
15Adgiri uiabi nakuarare ko nadgirare gaire gim le, a demoni giz imuda.
16E Simona nei atker Peteru;
17Pako Iakobo Zebedaio ra uerem, a Ioane Iakobo ra keimer; E uiabi nei atker Boanerege, tonar, Girgir ra uerem:
18Pako Anederea, a Filipo, a Batolomaio, a Mataio, a Toma, a Iakobo Alefaia ra uerem, a Tadaio, a Simona Kanana le,
19Pako Iuda Isakariota, abi keser keser: uiaba metaem barot.
20Ege gaire le netat gedim, abelelam uiaba umer kak leuer aroare.
21Abara boai aserare, uiaba tabaos, ko abi terpei; uiaba detager, kega, E paim paim.
22Aotale giz Ierusalemalam tabakeuare uiaba detager, kega, Belezebul abi dog, E demoni giz imuda opolelam demoni giz.
23E uiabi darabgerare, a uiabi daratagerare gaire mer babisdarie, kega, Nako, Satana umele Satana imuda?
24Ese nerute baselaia epuli, abele baselaia umer kak niaiem ekue.
25Ese nerute uteb epuli, abele uteb umer kak niaiem ekue.
26Ese Satana tababu barili, a epuli, E umer kak niaiem ekue, tabara mop tabarki.
27Nerute le umer kak saserim le la meta ge badari, a abara lu itkamri, ese nole kekiam saserim le didbari; iako abara meta itkamri.
28Ageakar kak uabi detagereda, kega, Gaire ezubameli, a gaire uit uerem le giz ko detue:
29Abele le Lamar Zogo ditagi, nole atue kak niaiem, epe abkoreb abim ikuar niai bodomalam;
30Abelelam uiaba detager, kega, Uit lamar abi dog.
31Abara keimer pako apu abim tabakeuare; a adige bako, uiaba namarida abi dabgeri.
32Gaire le netate gedim abi derumeda bameri; uiaba abi detagerare, kega, Ma dasmer, mara apu a mara keimer giz adige, mari naraimeli.
33E uiabi detaut, kega, Nete kara apu a kara keimer giz?
34E dasmerare uiaba abi derumeda bameri, E detagereda, kega, Dasmer, kara apu a kara keimer giz!
35Abelelam abele le Ade ra lag ikeli, E dali kara keimer, a kara berbet, a kara apu.
Currently Selected:
MAREKO 3: ulk1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902.
