Shıǵıw 13
13
Tuńǵısh ullardıń Qudayǵa baǵıshlanıwı
1Bunnan soń, Jaratqan Iye Muwsaǵa bılay dedi:
2– Barlıq birinshi tuwılǵanlardı Maǵan baǵıshlańlar. Izrail hayallarınıń da, mallarınıń da qarınnan birinshi shıqqanları Meniki, – dedi.
Tuńǵısh ullardı Qudayǵa baǵıshlaw hám ashıtqısız nan haqqında
3Muwsa xalıqqa bılay dedi:
– Mısırdan, ózlerińiz qul bolǵan elden shıqqan búgingi kúndi este saqlańlar. Óytkeni Jaratqan Iye qúdiretli qolı menen sizlerdi ol jerden alıp shıqtı. Ashıtqı salınǵan hesh nárse jemeńler. 4Búgin abib ayında bul jerden shıǵıp baratırsızlar. 5Jaratqan Iye sizlerdi qanan, xet, amor, xiw hám ebus xalıqlarınıń jerlerine, ata-babalarıńızǵa beremen dep ant ishken, sút hám pal aǵıp turǵan jerge aparǵanda, usı ayda mına rásimdi ótkizińler: 6jeti kún ashıtqısız nan jep, jetinshi kúni Jaratqan Iyege arnap bayram qılıńlar. 7Sol jeti kún ishinde tek ashıtqısız nan jeńler. Ózińizde de, jasap atırǵan pútkil jerińizde de ashıtqı salınǵan nan yamasa ashıtqı bolmasın. 8Sol kúni balalarıńızǵa: «Mısırdan shıqqanımızda, Jaratqan Iye bizler ushın islegen isleri sebepli bulardı islep atırmız», – dep túsindirińler. 9Bul rásim qolıńızda bir belgi, mańlayıńızda saqlanatuǵın yadnama bolsın. Usılayınsha, Jaratqan Iyeniń nızamı awzıńızda bolsın. Sebebi Jaratqan Iye sizlerdi kúshli qolı menen Mısırdan alıp shıqtı. 10Sizler de hár jılı belgilengen waqıtta bul qaǵıydanı orınlańlar.
11Jaratqan Iye sizlerge hám ata-babalarıńızǵa ant ishkenindey, sizlerdi Qanan jerine aparıp, sizlerge sol jerdi bergende, 12qarınnan birinshi shıqqanlardıń hámmesin Jaratqan Iyege baǵıshlańlar. Mallarıńızdıń birinshi tuwılǵan barlıq erkek tólleri Jaratqan Iyege tiyisli. 13Eshektiń hár bir birinshi tuwılǵan tóliniń ornına bir qozı berip, satıp alıńlar. Eger olay etpeseńiz, gúrreniń moynın sındırıń. Barlıq tuńǵısh ullarıńızdıń qunın ótewińiz tiyis.
14Keleshekte ullarıńız sizlerden: «Bunıń mánisi qanday?» – dep sorasa, olarǵa bılay dep juwap berińler: «Jaratqan Iye bizlerdi qúdiretli qolı menen Mısırdan, bizler qul bolǵan elden alıp shıqtı. 15Faraon bizlerdi jibermey, qaysarlıq kórsetkende, Jaratqan Iye Mısırda adamlardıń hám mallardıń barlıq tuńǵıshların óltirdi. Sonlıqtan mallardıń tuńǵısh tóllerin Jaratqan Iyege qurbanlıqqa beremiz, al tuńǵısh ullarımız ushın qun tóleymiz». 16Bul rásim qolıńızda bir belgi, esińizde saqlanatuǵın yadnama bolsın. Sebebi Jaratqan Iye sizlerdi qúdiretli qolı menen Mısırdan alıp shıqtı.
Jaratqan Iyeniń Óz xalqına jol kórsetip barıwı
17Faraon izraillılardı jibergende, Quday: xalıq urısqa duwshar bolatuǵının bilgende ókinip, Mısırǵa qaytıp ketpesin, dep filist xalqınıń jeri arqalı ótetuǵın jol qısqaraq bolsa da, olardı ol jer arqalı alıp júrmedi. 18Quday xalıqtı Qızıl teńizge shól jolı menen aylandırıp apardı. Izraillılar Mısırdan qarıw-jaraq penen shıqqan edi. 19Muwsa Yusuptiń súyeklerin de ózi menen birge alıp shıqqan edi. Óytkeni Yusup izraillılarǵa ant ishtirip: «Quday sizlerge sózsiz názer saladı. Sonda súyeklerimdi bul jerden alıp ketińler», – dep násiyatlap ketken edi.
20Izraillılar Sukkottan shıǵıp, shól shetindegi Etamǵa ornalastı. 21Olardıń kúni-túni jol júriwi ushın, Jaratqan Iye kúndiz minara sıyaqlı bult bolıp jol kórsetip, túnde minara sıyaqlı ot bolıp jollarına jarıq túsirip, olardı baslap júrdi. 22Kúndiz bult, túnde ot xalıqtıń aldınan bir dem de uzaqlamadı.
Currently Selected:
Shıǵıw 13: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
