Shıǵıw 15
15
Qutqarılıw jırı
1Sonnan soń, Muwsa hám izraillılar Jaratqan Iyege mına jırdı ayttı:
«Jırlayman Jaratqan Iyeni,
Sebebi eristi Ol saltanatlı jeńiske,
Atlardı da, sawash arbadaǵılardı da ılaqtırdı teńizge.
2Jaratqan Iye kúsh-qúdiretim meniń,
Qutqarıwǵa keldi Ol meni,
Ol meniń Qudayım.
Alǵıslar aytaman Oǵan,
Ol meniń ákemniń Qudayı,
Ullılayman Onı men.
3Jaratqan Iye jawıngerdur,
Atı Onıń – Jaratqan Iye.
4Ol faraonnıń sawash arbaların,
Hám láshkerlerin attı teńizge.
Ǵarq boldı Qızıl teńizge,
Onıń saylandı láshkerbasıları da.
5Tereń suwlar qapladı olardı,
Batıp ketti tas sıyaqlı tuńǵıyıqqa.
6Seniń oń qolıń, Jaratqan Iye,
Qúdiretli kúshke iyedur.
Seniń oń qolıń, Jaratqan Iye,
Tas-talqan eter dushpandı.
7Ájayıp ullılıǵıń menen,
Saǵan qarsı shıqqanlardı,
Jer menen jeksen qılasań,
Jibereseń olarǵa ǵázebińdi,
Saban sıyaqlı kúydirip, kúl qılasań olardı.
8Murnıńnıń deminen,
Jıynaldı suwlar bir jerge.
Diywal sıyaqlı bolıp tolqınlar,
Teńiz qoynında qatıp qaldı.
9Sonda dushpan bılay dedi:
„Uslayman olardı izinen quwıp,
Oljanı bólemen kewlimdi toq qılıp,
Qıraman olardı qılıshımdı jalańashlap“.
10Demiń menen úplep ediń,
Qapladı teńiz olardı.
Qorǵasınday battı ullı suwlarǵa.
11Jaratqan Iye, qudaylar arasında Saǵan uqsaǵanı bar ma?
Sen sıyaqlı muxaddeslikte ullı, aybatı menen alǵısqa ılayıq bolǵan,
Káramatlar jaratıwshı bar ma?
12Sozıp ediń oń qolıńdı,
Jutıp ketti jer olardı.
13Óziń qutqarǵan xalqıńdı,
Jetelediń súyispenshiligiń menen,
Alıp bardıń qúdiretiń menen muxaddes mákanıńa.
14Qaltırasar esitip milletler,
Qorqınısh biyledi Filistiya xalqın.
15Húreyleri ushadı Edom biyleriniń,
Dirildi basar Moab kósemlerin,
Pútkil Qanan turǵınlarınıń ruwxı tústi.
16Júregi suwlar hám qorqıw basar olardı,
Seniń xalqıń ótip ketkenshe, Jaratqan Iye,
Sen iyelik etken xalıq ótip ketkenshe,
Bilegińniń kúshi aldında tas bolıp tilsiz qatıp qalar.
17Jaratqan Iye! Aparasań xalqıńdı Óz tawıńa,
Jaylastırasań Óziń mákan qılıp alǵan jerge,
Qollarıń menen qurǵan muxaddes mákanǵa, Iye!
18Húkimdarlıq qılar sheksiz hám máńgige Jaratqan Iye».
Máriyamnıń jırı
19Faraonnıń atları, sawash arbaları hám onıń ústindegi áskerleri teńiz ishine kirgende, Jaratqan Iye suwlardı olardıń ústine qaytarıp ákeldi. Al izraillılar teńizdiń ishinen qurǵaq jer arqalı júrip ótti.
20Xaronnıń ájapası payǵambar Máriyam qolına dáp aldı. Basqa barlıq hayallar da dáp alıp, oynawı menen onıń izine erdi. 21Máriyam naqırattı qaytalap bılay dep jırladı:
«Jırlań Jaratqan Iyeni,
Sebebi eristi Ol saltanatlı jeńiske.
Atlardı da, atlılardı da ılaqtırdı teńizge».
Ashshı suw
22Muwsa izraillılardı Qızıl teńizden baslap shıqqannan soń, olar Shur shóline bardı hám shólde úsh kún júrse de, suw taba almadı. 23Sońınan olar Mara degen jerge bardı. Biraq Maranıń suwı ashshı bolǵanlıqtan, olar ishe almadı. Sonlıqtan sol jer Mara#15:23 Mara – «ashshı» degendi bildiredi. dep ataldı. 24Sonda xalıq Muwsaǵa: «Ne ishemiz?» – dep narazı bolıp, tońqılday basladı.
25Muwsa Jaratqan Iyege jalbarındı. Jaratqan Iye oǵan bir aǵashtı kórsetti. Muwsa onı suwǵa ılaqtırıp jibergende, suw dushshı bolıp qaldı.
Sol jerde Jaratqan Iye xalıq ushın qaǵıyda hám nızam berdi hám olardı sınadı. 26Jaratqan Iye olarǵa bılay dedi:
– Eger sizler Qudayıńız Jaratqan Iyeniń, yaǵnıy Meniń sózimdi dıqqat penen tıńlap, názerimde tuwrı bolǵan islerdi isleseńler, buyrıqlarıma qulaq asıp, hámme qaǵıydalarımdı orınlasańlar, mısırlılarǵa bergen keselliktiń hesh birin sizlerge bermeymen. Sebebi Men – sizlerge shıpa beriwshi Jaratqan Iyemen.
27Sonnan keyin, olar Elimge keldi. Sol jerde on eki bulaq hám jetpis palma aǵashı bar edi. Solay etip, olar suw jaǵasına ornalastı.
Currently Selected:
Shıǵıw 15: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
