Shıǵıw 18
18
Itronıń Muwsaǵa keliwi
1Muwsanıń qáyin atası midyanlı ruwxaniy Itro Qudaydıń Muwsa ushın hám Óz xalqı Izrail ushın islegen hámme islerin, Jaratqan Iyeniń izraillılardı Mısırdan qalay alıp shıqqanın esitti.
2-3Burın Muwsa hayalı Sipporanı eki ulı menen tórkinine qaytarıp jibergende, Itro olardı qabıl etken edi. Muwsa: «Men – jat elde kelgindi adam edim», – dep, ullarınıń birin Gershom dep ataǵan edi. 4Al ekinshi ulına: «Ata-babalarımnıń Qudayı maǵan járdem etip, meni faraonnıń qılıshınan qutqardı», – dep, Eliezer#18:4 Eliezer – «Quday járdem beredi» degendi bildiredi. dep at qoyǵan edi.
5Sonda Muwsanıń hayalın hám ulların ertken qáyin atası Itro Qudaydıń tawına, Muwsa qonıs basqan shólge keldi. 6Ol Muwsaǵa: «Men – qáyin atań Itroman, hayalıń menen eki ulıńdı alıp saǵan kiyatırman», – dep xabar jiberdi.
7Muwsa qáyin atasın kútip alıp, onıń aldında tájim etti hám onı súydi. Olar bir-birinen hal-awhal sorasıp bolıp, shatırǵa kirdi. 8Muwsa qáyin atasına Jaratqan Iyeniń Izrail xalqı ushın faraon menen mısırlılarǵa neler islegenin, ózleriniń jolda kórgen qıyınshılıqların hám Jaratqan Iyeniń olardı qalay qutqarǵanın birme-bir aytıp berdi.
9Itro Jaratqan Iyeniń izraillılarǵa islegen jaqsılıqlarına hám olardı mısırlılardıń qolınan qutqarǵanına quwandı. 10Itro bılay dedi:
– Sizlerdi mısırlılardıń hám faraonnıń qolınan qutqarıp, xalıqtı mısırlılardıń moyıntırıǵınan azat qılǵan Jaratqan Iyege alǵıslar bolsın. 11Endi men Jaratqan Iyeniń barlıq qudaylardan ullı ekenin bildim. Óytkeni Ol izraillılarǵa menmenlik qatnasta bolǵan mısırlılardan ústin shıqtı.
12Itro Qudayǵa jandırılatuǵın qurbanlıq hám basqa qurbanlıqlar ákelip berdi. Xaron hám Izraildıń pútkil aqsaqalları Muwsanıń qáyin atası menen Qudaydıń aldında awqatlanıw ushın keldi.
Itronıń keńesi
13Erteńine Muwsa xalıqqa qazılıq etiw ushın óz ornına otırdı. Xalıq azannan keshke shekem onıń aldında tik ayaqta turdı.
14Qáyin atası Muwsanıń xalıqqa qılǵan bul isin kórip:
– Xalıqqa bul ne islegeniń? Nege jalǵız óziń qazılıq etip otırsań? Nege hámme azannan keshke shekem seniń aldıńda tur? – dedi.
15Muwsa oǵan bılay dedi:
– Óytkeni xalıq Qudaydıń erkin biliw ushın, maǵan keledi. 16Qashan aralarında bir daw shıqsa, olar maǵan keledi. Men eki tárep arasında qazılıq qılıp, olarǵa Qudaydıń qaǵıydaların hám kórsetpelerin málim etemen.
17Qáyin atası oǵan bılay dedi:
– Bul isiń jaqsı emes. 18Sen ózińdi de, janıńdaǵı xalıqtı da sharshatıp taslaysań. Bul is sen ushın júdá awırlıq etedi, ol bir ózińniń qolıńnan kelmeydi. 19Endi maǵan qulaq sal. Eger sen meniń keńesime ámel qılsań, Quday saǵan yar boladı. Sen Quday aldında xalıq ushın wákil bolıp, olardıń dawlı islerin Qudayǵa jetkizip turıwıń kerek. 20Al xalıqqa Qudaydıń qaǵıydaların hám kórsetpelerin úyret. Qanday jol menen júrip, ne islew kerekligin olarǵa kórset. 21Bularǵa qosımsha, xalıq arasınan Qudaydan qorqqan, uqıplı, haram paydanı jek kóretuǵın isenimli adamlardı saylap al. Olardı xalıq ústinen mıńbasılar, júzbasılar, eliwbasılar hám onbasılar qılıp tayınla. 22Olar bárqulla xalıqqa qazılıq etsin. Úlken dawlardı saǵan ákelsin, al kishilerin ózleri sheshsin. Usılay etip, olar awırmanlıqtı seniń menen bólisse, saǵan jeńil boladı. 23Eger sen Qudaydıń buyırǵanınday etip, usılay isleseń, onda shıday alasań hám hámme tınıshlıq penen úylerine qaytadı.
24Muwsa qáyin atasınıń sózin tıńlap, onıń aytqanlarınıń hámmesin orınladı. 25Ol izraillılar arasınan uqıplı adamlardı saylap alıp, olardı mıńbasılar, júzbasılar, eliwbasılar hám onbasılar qılıp, xalıqqa basshı etip tayınladı. 26Olar xalıqqa bárqulla qazılıq etip, qıyın máselelerdi Muwsaǵa alıp keldi. Al kishigirim islerdi ózleri sheshti. 27Keyin Muwsa qáyin atasın jolǵa shıǵarıp saldı. Itro óz eline qaytıp ketti.
Currently Selected:
Shıǵıw 18: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
