Shıǵıw 19

Izrail xalqı Sinay tawında

1Izraillılar Mısırdan shıqqannan keyingi úshinshi aydıń birinshi kúni Sinay shóline jetip keldi. 2Olar Refidimnen jolǵa shıqqan bolıp, Sinay shóline jetip kelgen edi. Olar sol jerde, Sinay tawınıń qarsısına shatırların tikti.

3Sonda Muwsa tawǵa, Qudaydıń dárgayına shıqtı. Jaratqan Iye oǵan tawdan bılay dedi:

– Yaqıp násiline, Izrail xalqına bılay de: 4«Mısırlılarǵa ne islegenimdi hám palapanların qanatları menen tasıǵan búrkit sıyaqlı, sizlerdi janıma ákelgenimdi kórdińler. 5Al endi sózlerimdi dıqqat penen tıńlap, kelisimime ámel qılsańlar, sizler barlıq xalıqlar ishinde Meniń ǵáziynem bolasızlar. Sebebi pútkil jer júzi Maǵan tiyisli. 6Sizler Meniń ushın ruwxaniyler patshalıǵı hám muxaddes xalıq bolasızlar». Seniń izraillılarǵa aytatuǵın sózleriń usılar.

7Muwsa kelip, xalıq aqsaqalların shaqırıp aldı da, ózine Jaratqan Iyeniń buyırǵan barlıq sózlerin olarǵa bildirdi. 8Pútkil xalıq bir awızdan: «Jaratqan Iyeniń aytqanlarınıń hámmesin orınlaymız», – dep juwap berdi. Muwsa xalıqtıń juwabın Jaratqan Iyege jetkizdi.

9Sonda Jaratqan Iye Muwsaǵa:

– Seniń menen sóyleskenimdi xalıqtıń esitiwi hám saǵan máńgige iseniwi ushın, Men saǵan bir qalıń bult ishinde kelemen, – dedi. Muwsa xalıqtıń sózlerin Jaratqan Iyege jetkizgende, 10Jaratqan Iye Muwsaǵa bılay dedi:

– Bar, búgin hám erteń xalıq páklensin. Olar kiyimlerin juwıp, 11úshinshi kúni tayar bolsın. Óytkeni úshinshi kúni Men, Jaratqan Iye pútkil xalıqtıń kóz aldında Sinay tawına túsemen. 12Xalıq ushın tawdıń átirapına shegara sızıp, belgile hám olarǵa: «Abaylańlar, tawǵa shıǵıwshı bolmańlar, tawdıń etegine de jaqınlamańlar! Tawǵa bir jerin tiygizgen hár bir adam sózsiz óltiriledi. 13Sol adamǵa qol tiygizilmey, tas boran qılınıp, ya bolmasa oq jay menen óltiriledi. Haywan bolsa da, adam bolsa da, ol tiri qalmaydı», – dep ayt. Tek kárnay uzaq shertilgende ǵana, olar tawǵa kóterile aladı.

14Sońınan Muwsa tawdan xalıqtıń qasına túsip, olarǵa pákleniwdi buyırdı. Hár bir adam kiyimlerin juwdı. 15Muwsa xalıqqa:

– Úshinshi kúni tayar bolıńlar. Bul waqıt ishinde hayallarıńızǵa jaqınlamańlar, – dedi.

16Úshinshi kúni tań atıwdan gúldirmama gúrkirep, shaqmaq shaqtı. Tawdıń ústin qalıń bult qaplap, bálent, kúshli dawıslı kárnay sesti esitildi. Ordadaǵı pútkil xalıq titirey basladı. 17Muwsa xalıqtı Quday menen ushırastırıw ushın, ordadan baslap shıqtı. Olar tawdıń etegine kelip turdı. 18Quday Sinay tawına ot ishinde túskenlikten, pútkil taw tútep turǵan edi. Tawdan peshten shıqqanday tútin shıǵıp, pútkil taw qattı silkinip turǵan edi. 19Kárnay sesti barǵan sayın kúsheye berdi. Muwsa Qudayǵa sóyledi hám Quday da oǵan dawıslap juwap berdi. 20Jaratqan Iye Sinay tawınıń tóbesine túsip, Muwsanı tawdıń tóbesine shaqırdı. Muwsa sol jerge shıqtı. 21Jaratqan Iye oǵan bılay dedi:

– Tómen túsip, xalıqtı eskert. Meni kóriw ushın, shegaradan shıǵıp ketpesin. Bolmasa, kóbisi ólip qaladı. 22Maǵan jaqınlasatuǵın ruwxaniyler de ózlerin páklesin. Bolmasa, olardı qırıp taslayman.

23Muwsa Jaratqan Iyege:

– Xalıq Sinay tawına shıǵa almaydı. Óytkeni Sen: «Tawdıń átirapına shegara sızıp, belgile hám tawdı muxaddes qıl», – dep eskertken ediń, – dedi.

24Jaratqan Iye oǵan:

– Tómen túsip, Xarondı óziń menen birge alıp kel. Biraq ruwxaniyler menen xalıq aldıma keliw ushın, shegaradan ótpesin. Bolmasa, olardı qırıp taslayman, – dedi. 25Solay etip, Muwsa tómen tústi de, xalıqqa usılardı aytıp berdi.

Currently Selected:

Shıǵıw 19: QrqMK22

Highlight

Copy