Shıǵıw 20

On buyrıq

(Nzm 5:1-21)

1Sonda Quday mına sózlerdi ayttı:

2– Men – seni Mısırdan, qul bolǵan jerińnen alıp shıqqan Qudayıń Jaratqan Iyemen.

3Seniń Mennen basqa qudaylarıń bolmasın.

4Joqarıdaǵı aspanda, tómendegi jer júzinde hám jer astındaǵı suwlarda bolǵan hesh bir nárseniń kórinisin soǵıp, ózińe but jasama. 5Olarǵa tabınba hám xızmet qılma. Sebebi Men – seniń Qudayıń Jaratqan Iye, qızǵanıwshı Qudayman. Meni jek kórgenlerdi ákesiniń gúnası ushın balaların, olardıń úshinshi, tórtinshi áwladına shekem jazalayman. 6Biraq Meni súygenlerge hám buyrıqlarımdı orınlaǵanlarǵa mıńınshı urpaǵına deyin jaqsılıq qılaman.

7Qudayıń Jaratqan Iyeniń atın jónsiz tilińe alma. Óytkeni Jaratqan Iye Óziniń atın bosqa tilge alǵanlardı jazasız qaldırmaydı.

8Shabbat kúnin muxaddes tutıwdı este saqla. 9Altı kún jumıs islep, barlıq islerińdi isle. 10Al jetinshi kún Maǵan, Qudayıń Jaratqan Iyege arnalǵan Shabbat kúni. Sol kúni hesh qanday is qılma. Ulıń da, qızıń da, qulıń da, shorıń da, mallarıń da, arańızdaǵı kelgindi adam da hesh qanday is qılmasın. 11Sebebi Men, Jaratqan Iye altı kún ishinde aspandı, jerdi, teńizdi hám olardaǵı pútkil barlıqtı jaratıp, jetinshi kúni dem aldım. Sonlıqtan Men Shabbat kúnin jarılqap, onı muxaddes qılıp ayırdım.

12Ata-anańdı húrmetle. Sonda Qudayıń Jaratqan Iyeniń saǵan beretuǵın jerinde ómiriń uzaq boladı.

13Adam óltirme.

14Neke hadallıǵın buzba.

15Urlıq isleme.

16Hesh kimge qarsı jalǵan gúwalıq berme.

17Hesh bir adamnıń úyin kúseme. Onıń hayalın, qulın, shorısın, ógizin, eshegin, hesh bir nársesin kúseme.

18Pútkil xalıq gúldirmamanı hám kárnay sestin esitip, shaqmaqtı hám tawdıń basındaǵı tútindi kórgende, qorqqanınan qaltıray basladı. Olar uzaqta turıp, 19Muwsaǵa:

– Bizler menen óziń sóyles. Bizler seni tıńlaymız. Biraq Quday bizlerge sóylemesin. Bolmasa, ólip qalamız, – dedi.

20Muwsa xalıqqa:

– Qorqpańlar! Sebebi Quday sizlerdi sınaw ushın hám Onnan qorqıp, gúna islemewińiz ushın keldi, – dedi.

21Xalıq uzaqta tura berdi, al Muwsa Quday turǵan tas túnek qarańǵılıqqa jaqınlastı.

Qurbanlıq orın haqqında

22Jaratqan Iye Muwsaǵa bılay dedi:

– Izraillılarǵa bılay dep ayt: «Meniń sizlerge aspannan sóylegenimdi esittińler. 23Mennen basqa qudaylarıń bolmasın. Ózlerińizge gúmisten bolsa da, altınnan bolsa da, hesh qanday butlar soǵıp almańlar. 24Meniń ushın topıraqtan qurbanlıq orın isleńler. Ol jerde qoy hám buǵalarıńızdı jandırılatuǵın qurbanlıq hám tatıwlıq qurbanlıǵı etip berińler. Maǵan sıyınıwıńız ushın Ózim tańlaǵan hár bir jerge barıp, sizlerdi jarılqayman. 25Eger Maǵan tastan qurbanlıq orın qurajaq bolsańız, jonılmaǵan taslardı qollanıńlar. Óytkeni tasqa qashaw tiygizseńiz, onı haramlaysızlar. 26Jáne de, Maǵan arnalǵan qurbanlıq orınǵa tekshe arqalı shıqpańlar, bolmasa kóterilgenińizde jalańash jerińiz kórinip qalıwı múmkin».

Currently Selected:

Shıǵıw 20: QrqMK22

Highlight

Copy