Shıǵıw 23
23
Ádillik haqqında
1– Mısh-mısh gáp tarqatpań. Jalǵan gúwalıq beriw arqalı, jaman adamǵa qol bermeń.
2Kópshilik jawızlıq islegende, olarǵa qosılmań. Dawlı iste gúwalıq bergenińizde kópshilikti jaqlap, ádillikti burmalamań. 3Kámbaǵal bolsa da, dawda onı jaqlamań.
4Eger dushpanıńızdıń joytılıp ketken ógizin yamasa eshegin tawıp alsańız, onı iyesine qaytarıp beriń. 5Eger dushpanıńızdıń esheginiń júktiń awırlıǵınan jıǵılıp qalǵanın kórseńiz, onı sol halında taslap ketpey, oǵan járdem beriwińiz tiyis.
6Dawda kámbaǵaldıń isin sheshiwde ádillikti burmalamań. 7Jala jabıwdan awlaq bolıń, ayıpsız hám haq adamdı ólimge húkim qılmań. Óytkeni Men nahaq adamdı aqlamayman.
8Para almań. Sebebi para kóretuǵın adamdı soqır etip, haq adamdı nahaqqa shıǵaradı.
9Kelgindi adamǵa jábir bermeń. Ózlerińiz de Mısır jerinde kelgindi bolǵanıńız sebepli, kelgindi adamnıń jaǵdayınıń qanday ekenin bilesizler.
Jetinshi kún hám jetinshi jıl haqqında
10– Altı jıl boyı jerińizge tuqım sewip, zúráát jıynań. 11Al jetinshi jılı jerge dem beriń. Xalqıńız arasındaǵı kámbaǵallar ol jerden azıq tawıp jesin, olardan awısqanın jabayı haywanlar jesin. Júzim baǵıńız benen záytúnzarıńızǵa da solay isleń.
12Altı kún jumısıńızdı islep, jetinshi kúni dem alıń. Usılayınsha ógizińiz hám eshegińiz dem alıp, shorıńızdıń ulı da, kelgindi adamıńız da hállenip alsın.
13Meniń sizlerge aytqanlarımnıń hámmesin orınlań. Basqa qudaylardıń atın aytıp shaqırmań, olardı tilińizge de almań.
Úsh bayram
14– Jılına úsh márte Meniń aldıma kelip bayram qılıń. 15Sizlerge buyırǵanımday, abib ayınıń belgilengen kúnlerinde jeti kún ashıtqısız nan jep, Ashıtqısız nan bayramın bayramlań. Sebebi sizler Mısırdan sol ayda shıqtıńlar.
Hesh kim aldıma qurı qol kelmesin.
16Atızǵa ekken biydaylarıńızdı jıynap baslaǵanıńızda, Zúráát bayramın belgileń.
Al gúzde atızdan barlıq eginlerińizdi jıynap bolǵanıńızda, Jıyın-terim bayramın#23:16 Jıyın-terim bayramı – Keyingi kitaplarda bul «Qos bayramı» dep ataldı. Leb 23:33-36 qarań. belgileń.
17Barlıq erkeklerińiz jılına úsh márte Iyeń bolǵan Meniń, yaǵnıy Jaratqan Iyeniń aldına keliwi kerek.
18Maǵan berilgen qurbanlıqtıń qanın ashıtqı salınǵan nan menen bermeń.
Bayramda Maǵan arnap berilgen qurbanlıqtıń mayı azanǵa deyin qaldırılmasın.
19Jerińizdiń dáslepki óniminiń eń jaqsısın Qudayıńız Jaratqan Iyeniń Úyine alıp keliń.
Ílaqtıń góshin óz anasınıń sútine pisirmeń.
Wáde hám eskertiwler
20– Mine, jolda sizlerdi qorǵawı hám sizlerdi Men tayarlap qoyǵan jerge aparıwı ushın, aldıńızdan bir perishte jiberip atırman. 21Oǵan dıqqatlı bolıp, sózine qulaq salıń. Oǵan qarsı shıqpań. Sebebi Ol Meniń atımnan háreket etkenlikten, qarsılıq kórsetkenińizge sabır etpeydi. 22Biraq onıń sózin dıqqat penen tıńlap, aytqanlarımnıń hámmesin orınlasańız, Men dushpanlarıńızǵa dushpan bolıp, sizlerge qarsı shıqqanlarǵa qarsı turaman. 23Perishtem aldıńızda júrip, sizlerdi amor, xet, periz, qanan, xiw hám ebuslardıń jerlerine alıp barǵanda, Men olardı joq etemen. 24Sizler olardıń qudaylarına tabınıp, xızmet qılmań. Olardıń ádetlerin de úyrenbeń. Kerisinshe, olardıń qudayların qulatıp, kiyeli tasların sındırıp taslań. 25Sizler Qudayıńız Jaratqan Iyege, yaǵnıy Maǵan sıyınıń. Sonda Men sizlerdiń nan-suwlarıńızdı jarılqap, arańızdaǵı keselliklerdi joq etemen. 26Elińizde túsik túsiretuǵın hám biyperzent hayal bolmaydı. Men sizlerge uzaq ómir beremen.
27Sizlerge qarsı shıqqan xalıqlardı Mennen qorqatuǵın qılaman hám olardı albıratıp taslayman. Dushpanlarıńız aldıńızdan qashatuǵın boladı. 28Xiw, qanan hám xet xalıqların aldıńızdan quwıw ushın, eshek hárre jiberemen. 29El qańırap qalıp, sizlerge zıyan beretuǵın jabayı haywanlardıń sanı kóbeyip ketpewi ushın, olardı bir jıl ishinde quwıp jibermeymen. 30Sizler kóbeyip, sol eldi iyelik etemen degenshe, olardı az-azdan quwıp shıǵaraman.
31Shegarańızdı Qızıl teńizden filistler mákan basqan teńizge deyin, qubladaǵı shólden Evfrat dáryasına deyin ornataman. Sol eldiń adamların sizlerge táslim etemen, sizler olardı aldıńızdan quwıp shıǵasızlar. 32Olar hám olardıń qudayları menen kelisim dúzbeń. 33Olardıń jerińizde jasawına jol qoymań. Bolmasa olar sizlerdi óz qudaylarına sıyındırıp, Maǵan qarsı gúna islewge baslaydı hám sizlerdi duzaqqa túsiredi.
Currently Selected:
Shıǵıw 23: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
