Shıǵıw 24
24
Kelisimniń tastıyıqlanıwı
1Jaratqan Iye Muwsaǵa bılay dedi:
– Sen, jáne de, Xaron, Nadab, Abihu hám Izrail aqsaqallarınan jetpis adam tawǵa kóterilip, Meniń aldıma kelińler hám uzaqta turıp tájim etińler. 2Tek sen ǵana Maǵan jaqınla, basqa hesh kim jaqın kelmesin. Xalıq seniń menen birge tawǵa shıqpasın.
3Muwsa barıp, Jaratqan Iyeniń barlıq sózlerin hám nızamların xalıqqa bildirdi. Hámme bir awızdan:
– Jaratqan Iyeniń aytqanlarınıń hámmesin isleymiz, – dep juwap berdi. 4Sonnan keyin Muwsa Jaratqan Iyeniń barlıq sózlerin jazıp qoydı.
Ol erteńine azanda tawdıń etegine qurbanlıq orın qurdı. Izraildıń on eki urıwınıń belgisi retinde on eki tas ornattı. 5Sońınan ol Jaratqan Iyege arnap, jandırılatuǵın qurbanlıqlar berip, tatıwlıq qurbanlıǵı ushın buǵalardı soyıwǵa Izraildıń jas jigitlerin jiberdi. 6Muwsa qannıń yarımın lágenlerge quydı. Al qalǵan yarımın qurbanlıq orınǵa serpip jiberdi. 7Keyin kelisim kitabın#24:7 Kelisim kitabı – 20–23 baplarda Qudaydıń Muwsaǵa bergen buyrıq hám nızam-qaǵıydaları usı kitaptıń ishine kirgen (usı baptıń 4-ayatına qarań). alıp, xalıqqa oqıp berdi. Xalıq: «Jaratqan Iyeniń aytqanlarınıń hámmesin isleymiz, Oǵan qulaq asamız», – dedi.
8Sonda Muwsa lágenlerdegi qandı xalıqqa sewip: «Bul – usı aytılǵan hámme sózlerge tiykarlanıp, Jaratqan Iyeniń sizler menen dúzgen kelisiminiń qanı», – dedi.
9Sonnan soń, Muwsa, Xaron, Nadab, Abihu hám Izrail aqsaqallarınan jetpisi tawǵa shıǵıp, 10Izraildıń Qudayın kórdi. Qudaydıń ayaqları astına lazurit tasına uqsas, aspan sıyaqlı tınıq bir nárse tóselgen edi. 11Izrail basshıları Qudaydı kórse de, Quday olarǵa zıyan tiygizbedi. Olar sol jerde iship-jedi.
Muwsa Sinay tawında
12Jaratqan Iye Muwsaǵa:
– Tawǵa, Meniń janıma kelip, usı jerde kútip tur. Xalıqqa úyretiw ushın, tegis eki tasqa jazılǵan nızam hám buyrıqlardı beremen, – dedi.
13Solay etip, Muwsa hám onıń járdemshisi Eshua jolǵa atlandı. Muwsa Qudaydıń tawına shıǵıp baratırıp, 14aqsaqallarǵa:
– Bizler qaytıp kelgenshe, usı jerde kútip turıńlar. Xaron menen Xur sizler menen birge boladı. Kimniń qanday isi bolsa, solarǵa aytsın, – dedi.
15Muwsa tawǵa shıqqanda, tawdı bult qapladı. 16Sonda Jaratqan Iyeniń saltanatı Sinay tawına tústi. Bult tawdı altı kún qaplap turdı. Jetinshi kúni Jaratqan Iye bulttıń ishinen Muwsanı shaqırdı. 17Izraillılarǵa Jaratqan Iyeniń saltanatı tawdıń tóbesinde jalmap jutatuǵın ot sıyaqlı bolıp kórindi. 18Muwsa bult ishine kirip, tawǵa shıqtı. Ol qırıq kún hám qırıq tún tawda qaldı.
Currently Selected:
Shıǵıw 24: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
