Shıǵıw 26
26
Muxaddes shatırǵa tiyisli kórsetpeler
1– Al Muxaddes shatırdı on perdeden qur. Perdeler hasıl zıǵır jipten, júnnen iyirilgen qızǵısh kók, shım qızıl hám qırmızı jiplerden islenip, ústine kerublardıń súwretleri sheberlik penen kestelensin. 2Hár bir perdeniń uzınlıǵı jigirma segiz shıǵanaq, eni tórt shıǵanaq bolsın. Hámme perdeniń ólshemi birdey bolsın. 3Perdeler besew-besewden bir-birine qosıp tigilsin. 4Birinshi bes perdeniń shetine qızǵısh kók jipten ilgekler islet. Ekinshi bes perdeniń shetine de solay islet. 5Birinshi bes perdeniń dáslepki perdesine eliw, ekinshi bes perdeniń sońǵı perdesine eliw ilgek tiktir. Ilgekler bir-birine qarama-qarsı jaylasqan bolsın. 6Jáne de, eliw altın ilmek isletip, olar járdeminde perdelerdi bir-birine biriktir. Sonda shatır bir tutas boladı.
7Muxaddes shatırdıń ústin jabıw ushın, eshki júninen on bir perde islet. 8Hár bir perdeniń uzınlıǵı otız shıǵanaq, eni tórt shıǵanaq bolsın. On bir perdeniń ólshemi birdey bolsın. 9Bes perdeni bir bólek, qalǵan altı perdeni bir bólek qılıp, bir-biri menen biriktir. Altınshı perdeni shatırdıń aldı betine eki qabatlap búklep qoyǵız. 10Solay etip, biriktirilgen eki bólek perdelerdi bir-birine qosıw ushın, hár bir bólektiń shetlerine eliw-eliwden ilgek islet. 11Taǵı da, qoladan eliw ilmek islet. Ilgeklerdi ilmekler menen ildirip, shatırdıń perdelerin bir tutas qılıp biriktir. 12Shatırdıń perdelerinen awısqan yarım perde shatırdıń art jaǵına asıp qoyılsın. 13Al perdelerdiń uzınlıǵınan awısqan bir shıǵanaq tawar shatırdıń eki jaǵınan tómen salbırap, shatırdı jawıp tursın. 14Shatır ushın qızılǵa boyalǵan qoshqar terisinen japqısh, onıń ústine jumsaq teriden sırtqı japqısh islet.
15Akaciya aǵashınan shatır ushın tikkesine turatuǵın taxtaylar islet. 16Hár bir taxtaydıń uzınlıǵı on shıǵanaq, eni bir yarım shıǵanaq bolsın. 17Hár bir taxtaydıń astına bir-birine qatarlastırıp, eki tuyaqtan ózinen shıǵarıp islet. Shatırdıń hámme taxtayların usılay islet. 18Shatırdıń qubla tárepi ushın jigirma taxtay islet. 19Usı jigirma taxtaydıń astına qoyılatuǵın qırıq gúmis ultan islet. Hár bir taxtaydıń tuyaǵınıń astında bir ultannan bolıwı ushın, hár bir taxtayǵa eki ultannan islet. 20Shatırdıń arqa tárepi ushın jigirma taxtay islet. 21Al hár bir taxtaydıń astına eki ultannan qoyıw ushın, qırıq gúmis ultan islet. 22Shatırdıń batısqa qaraǵan art jaǵı ushın altı taxtay, 23shatırdıń artındaǵı múyeshler ushın eki taxtay islet. 24Bul múyeshlerdegi taxtaylar tómennen joqarıǵa deyin juplasıp, joqarıdaǵı bir halqa menen biriktiriledi. Eki múyesh te usılay islensin. 25Solay etip, segiz taxtay hám hár bir taxtaydıń astına eki ultannan qoyıw ushın, on altı gúmis ultan boladı.
26Akaciya aǵashınan shatırdıń bir tárepindegi taxtaylar ushın bes qada, 27ekinshi tárepindegi taxtaylar ushın bes qada hám artındaǵı, yaǵnıy batıs tárepindegi taxtaylar ushın da bes qada islet. 28Al taxtaylardıń orta belinen ótetuǵın qadalardı shatırdıń bir shetinen ekinshi shetine jetetuǵın qılıp islet. 29Taxtaylardı hám qadalardı altın menen qaplatıp, qadalar ótkeriletuǵın halqalardı altınnan islet.
30Muxaddes shatırdı tawda ózińe kórsetilgen úlgi boyınsha islet.
31Júnnen iyirilgen qızǵısh kók, shım qızıl, qırmızı jiplerden hám hasıl zıǵır jipten bir perde islet. Onıń ústine kerublardıń súwretlerin sheberlik penen kestelet. 32Akaciya aǵashınan tórt baqan isletip, olardı tórt gúmis ultanǵa ornat. Baqanlardı altın menen qaplatıp, olarǵa altın ayrı ildirgishler ildir hám usı ildirgishlerge perdeni qıstır. 33Perdeni shatırdıń joqarısındaǵı ilmeklerdiń tómenine, ayrı ilgishlerge ildir hám ishki tárepine Kelisim sandıǵın kirgizip qoy. Bul perde Muxaddes bólme menen Eń muxaddes bólmeni bir-birinen ayırıp turadı. 34Qaqpaqtı Eń muxaddes bólmede bolǵan Kelisim sandıǵınıń ústine qoy. 35Stoldı perdeniń sırtqı jaǵına, shatırdıń arqaǵa qaraǵan tárepine ornalastır. Shıra qoyǵıshtı stoldıń qarsısına, shatırdıń qubla tárepine qoy.
36Shatırdıń kirer awzına júnnen iyirilgen qızǵısh kók, shım qızıl, qırmızı jiplerden hám hasıl zıǵır jipten naǵıslı perde toqıt. 37Perdeni ildiriw ushın, akaciya aǵashınan bes baqan isletip, olardı altın menen qaplat hám ústine altın ayrı ildirgishler ornat. Baqanlar ushın qoladan islengen bes ultan quydır.
Currently Selected:
Shıǵıw 26: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
