Shıǵıw 27
27
Qurbanlıqlar jandırılatuǵın orın
1– Akaciya aǵashınan tórt múyeshli qılıp, qurbanlıq orın dúzet. Orınnıń uzınlıǵı da, eni de bes shıǵanaq, al biyikligi úsh shıǵanaq bolsın. 2Onıń tórt múyeshine ózinen shıǵıp turatuǵın shaqlar islep, orındı hám shaqların qola menen qaplat. 3Orın ushın kúlge arnalǵan ıdıslar menen belsheler, qan sebetuǵın tabaqlar, shanıshqılar hám shoq salınatuǵın ıdıslar islet. Olardıń hámmesin qoladan islet. 4Qurbanlıq orınǵa qoladan tor sıyaqlı naǵıs hám onıń tórt múyeshine qoladan tórt halqa islet. 5Tor naǵıstı qurbanlıq orınnıń ortasına jetetuǵınday qılıp, jiyeginiń astınan islet. 6Orın ushın akaciya aǵashınan sırıqlar isletip, olardı qola menen qaplat. 7Qurbanlıq orındı kóterip júriw ushın, orınnıń eki qaptalındaǵı halqalardan usı sırıqlardı ótkizip qoy. 8Orın aǵashtan islenip, ishi bos bolsın. Orındı tawda saǵan kórsetilgendey qılıp islet.
Muxaddes shatırdıń háwlisi
9– Muxaddes shatırdıń háwlisin qur. Háwliniń qubla tárepine uzınlıǵı júz shıǵanaq bolǵan, hasıl zıǵır jipten toqılǵan perdeler taq. 10Perdeler ushın qoladan islengen jigirma ultanǵa jigirma baqan ornat. Al baqannıń ayrı ildirgishleri menen karnizleri gúmisten bolsın. 11Arqadaǵı uzın tárepi ushın uzınlıǵı júz shıǵanaq bolǵan perdeler, jigirma baqan hám baqanlar ushın qoladan jigirma ultan islensin. Baqanlardıń ayrı ildirgishleri menen karnizleri gúmisten bolsın.
12Háwliniń batıs tárepindegi eni ushın uzınlıǵı eliw shıǵanaq bolǵan perde, on baqan hám oǵan on ultan islensin. 13Háwliniń shıǵısqa qaraǵan aldınǵı tárepiniń eni eliw shıǵanaq bolsın. 14Usı kirer awızdıń bir tárepinde uzınlıǵı on bes shıǵanaq perde, úsh baqan hám úsh ultan bolsın. 15Onıń ekinshi tárepinde de uzınlıǵı on bes shıǵanaq perde, úsh baqan hám úsh ultan bolsın. Kirer awızdıń eki tárepi de usınday bolsın.
16Háwliniń kirer awzına júnnen iyirilgen qızǵısh kók, shım qızıl hám qırmızı jip hám hasıl zıǵır jipten uzınlıǵı jigirma shıǵanaq bolǵan naǵıslı perde toqıt. Oǵan tórt baqan hám tórt ultan islensin. 17Háwliniń átirapındaǵı barlıq baqanlar gúmis karnizler hám gúmis ayrı ildirgishler menen biriktirilsin. Olardıń ultanları qola bolsın. 18Háwliniń uzınlıǵı júz, eni eliw, al átirapındaǵı hasıl zıǵır jibinen toqılǵan perdelerdiń biyikligi bes shıǵanaq bolsın. Ultanlar qoladan bolsın. 19Shatırǵa tiyisli barlıq zatları, shatırdıń hám háwliniń barlıq qazıqları qoladan bolsın.
Shıralar ushın may
20– Shıralar hár kúni túnde janıp turıwı ushın, Izrail xalqına sapalı záytún mayınan ákeliwdi buyır. 21Xaron hám onıń ulları Ushırasıw shatırında, Kelisim sandıǵınıń aldındaǵı perdeniń sırtında, keshten tańǵa deyin shıralardıń Meniń aldımda janıwın támiyinlesin. Bul izraillılar ushın áwladlar boyı máńgi qaǵıyda bolsın.
Currently Selected:
Shıǵıw 27: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
