Shıǵıw 3

Qudaydıń Muwsanı shaqırıwı

1Muwsa qáyin atası, Midyan ruwxaniyi Itronıń#3:1 Itro – bul 2:18 ayattaǵı Reueldiń basqa atı. qoyların baǵatuǵın edi. Bir kúni ol súriwdi shóldiń túpkirine jayıp júrip, Qudaydıń tawı Xorebke kelip qaldı. 2Sonda Jaratqan Iyeniń perishtesi oǵan sheńgel putası arasında janıp turǵan ottıń jalını ishinde kórindi. Muwsa putanıń janıp turǵanın, biraq janıp joq bolıp ketpegenin kórdi. 3Muwsa: «Barıp, bul tań qalarlıq nárseni kóreyin. Puta nege janıp, joq bolıp ketpey tur eken?» – dep oyladı. 4Jaratqan Iye Muwsanıń qaraw ushın jaqınlap kiyatırǵanın kórgende, putanıń ishinen:

– Muwsa, Muwsa! – dep shaqırdı.

– Lábbáy! – dep juwap berdi ol.

5Quday oǵan:

– Bunnan artıq jaqınlaspa. Ayaq kiyimińdi shesh, sebebi sen turǵan jer – muxaddes. 6Men seniń ákeńniń Qudayıman, Ibrayımnıń Qudayı, Ísaqtıń Qudayı hám Yaqıptıń Qudayıman, – dedi.

Muwsa Qudayǵa qarawǵa qorqqanlıqtan, júzin japtı.

7Sonda Jaratqan Iye Muwsaǵa bılay dedi:

– Men xalqımnıń Mısırda jábir shegip atırǵanın kórdim hám qul jumsawshıları sebepli dad salıp atırǵanın esittim. Men olardıń azap shegip atırǵanın da bilemen. 8Sonlıqtan Men olardı mısırlılardıń qolınan qutqarıw ushın keldim. Olardı sol elden shıǵarıp, keń hám ónimdar bolǵan jerge, sút hám pal aǵıp turǵan jerge – qanan, xet, amor, periz, xiw hám ebus xalıqlarınıń ellerine aparaman. 9Mine, izraillılardıń dadı Maǵan jetip keldi hám mısırlılardıń olardı qalay ezip atırǵanın Ózim de kórdim. 10Endi Men seni xalqım bolǵan izraillılardı Mısırdan alıp shıǵıw ushın, faraonǵa jiberemen.

11Biraq Muwsa Qudayǵa:

– Faraonǵa barıp, izraillılardı Mısırdan alıp shıǵatuǵınday, men kim bolıppan, – dep juwap berdi.

12Al Quday oǵan:

– Men seniń menen birge bolaman. Seni Meniń jibergenimniń belgisi mınaw boladı: xalıqtı Mısırdan alıp shıqqanıńnan soń, usı tawda Maǵan sıyınasızlar, – dedi.

13Sonda Muwsa Oǵan:

– Men Izrail xalqına barıp: «Meni sizlerge ata-babalarıńızdıń Qudayı jiberdi», – desem, olar mennen: «Onıń atı kim?» – dep sorasa, men olarǵa ne deymen? – dedi.

14Quday Muwsaǵa:

– Men máńgige bar Bolıwshıman. Sen izraillılarǵa: «Meni sizlerge máńgige bar Bolıwshı jiberdi», – dep ayt, – dedi. 15Quday Muwsaǵa jáne bılay dedi:

– Sen izraillılarǵa taǵı: «Meni sizlerge ata-babalarıńızdıń Qudayı Jaratqan Iye: Ibrayımnıń Qudayı, Ísaqtıń Qudayı hám Yaqıptıń Qudayı máńgige bar Bolıwshı#3:15 Bar Bolıwshı – Qudaydıń atı evrey tilinde «Yahwe» bolıp, «bolıw» degen feyilden dóretilgen. Yahwe sózi ulıwma Jaratqan Iye dep alındı. jiberdi», – dep ayt. Meniń atım máńgige usı boladı. Áwladtan-áwladqa Meniń atımdı usılay shaqırsın. 16Sen bar da, Izrail aqsaqalların jıynap, olarǵa bılay de: «Ata-babalarıńız Ibrayımnıń, Ísaqtıń hám Yaqıptıń Qudayı bolǵan máńgige bar Bolıwshı maǵan kórinip, mınalardı ayttı: „Mısırda sizlerge neler islenip atırǵanın kórip, sizlerge názerimdi túsirdim. 17Sizlerdi Mısırdaǵı eziwshilikten qutqarıp, qanan, xet, amor, periz, xiw hám ebus xalıqlarınıń jerlerine, sút hám pal aǵıp turǵan jerge aparıwdı sheshtim“». 18Izraildıń aqsaqalları saǵan qulaq asadı. Sen olar menen birge Mısır patshasına barıp, oǵan bılay deńler: «Evreylerdiń Qudayı Jaratqan Iye bizlerge kórindi. Endi shólde úsh kúnlik jol júrip barıp, Qudayımız Jaratqan Iyege qurbanlıq beriwge ruxsat ber». 19Biraq Men bilemen, kúshli bir qol májbúrlemegenshe, Mısır patshası ketiwińizge ruxsat bermeydi. 20Sonlıqtan Men qolımdı sozaman hám olardıń arasında káramatlar islep, Mısırdı jazalayman. Sonnan keyin, ol sizlerdi azat qıladı. 21Xalıqtı mısırlılarǵa unamlı qılıp kórsetemen. Sizler ketken waqtıńızda, qurı qol ketpeysiz. 22Hár bir hayal mısırlı qońsılarınan hám olardıń úyinde jasaytuǵın mısırlı hayaldan gúmis hám altın bezeniw buyımların, kiyim-kenshekler sorap aladı. Ul-qızlarıńızdı olar menen bezendiresizler hám sol tárizde mısırlılardı tonap ketesizler.

Currently Selected:

Shıǵıw 3: QrqMK22

Highlight

Copy