Shıǵıw 2

Muwsanıń tuwılıwı

1Lebiy urıwınan bolǵan bir adam urıwlas qızına úylendi. 2Hayal hámiledar bolıp, ul tuwdı hám balasınıń sonday súykimli ekenin kórip, onı úsh ay jasırıp júrdi. 3Biraq hayal balasın bunnan bılay jasırıp júre almaytuǵın bolǵanlıqtan, qamıstan islengen bir sebetti alıp, oǵan shayır hám qara may jaǵıp shıqtı. Keyin ishine balanı saldı da, Nil dáryasınıń jaǵasındaǵı qamıslıqqa qoydı. 4Al balanıń ájapası úkesine ne bolatuǵının kóriw ushın, uzaqtan baqlap turdı.

5Sonda faraonnıń qızı shomılıw ushın dáryaǵa keldi. Al onıń shorıları dárya jaǵasında júrgen edi. Faraonnıń qızı qamıslıqtıń arasında turǵan sebetti kórip qalıp, onı ákeliw ushın shorısın jiberdi. 6Ol sebetti ashıp, jılap atırǵan balanı kórdi hám oǵan janı ashıp:

– Bul – bir evrey balası-ǵo, – dedi.

7Sol waqıtta balanıń ájapası faraonnıń qızına:

– Sizge balanı emizip beriwi ushın, men barıp, evreylerden emiziwli bir hayaldı shaqırıp keleyin be? – dedi.

8Faraonnıń qızı oǵan:

– Yaqshı, bar, – dep juwap berdi.

Qız barıp, balanıń anasın shaqırıp keldi. 9Faraonnıń qızı hayalǵa:

– Mına balanı alıp, maǵan emizip ber, xızmet haqıńdı tóleymen, – dedi.

Hayal balanı alıp, emizdi. 10Bala az-maz óskennen keyin, hayal onı faraonnıń qızına alıp keldi. Faraonnıń qızı balanı asırap aldı hám «Onı suwdan shıǵarıp aldım», – dep, balanıń atın Muwsa#2:10 Muwsa – «shıǵarıp alınǵan» degen mánini beretuǵın sózge uqsaydı. qoydı.

11Muwsa erjetkennen soń, bir kúni óz xalqına barıp, olardıń awır jumıs islep atırǵanın kórdi. Sonda óz xalqınan bolǵan bir evreydi bir mısırlınıń urıp atırǵanına kózi túsip ketti. 12Muwsa átirapına názer taslap, hesh kimniń joq ekenin kórgende, mısırlını óltirip, onı qumǵa kómip jasırdı. 13Erteńine ol jáne shıqqanda, eki evreydiń tóbelesip atırǵanın kórdi. Sonda Muwsa nahaq bolǵan adamnan:

– Nege tuwısqanıńdı urıp atırsań? – dep soradı. 14Sol adam Muwsaǵa:

– Kim seni bizlerdiń ústimizden basshı hám qazı qılıp qoydı? Mısırlını óltirgenińdey, meni de óltirmekshimiseń? – dedi.

Sonda Muwsa qorqıp ketip: «Írasında da, bul is áshkara bolıp qalǵan eken-ǵo», – dep oyladı. 15Bul is haqqında faraon da esitip, Muwsanı óltirmekshi boldı. Biraq Muwsa onnan qashıp, Midyan jerine barıp jasadı.

Bir kúni ol bir qudıqtıń qasında otırǵanda, 16Midyan ruwxaniyiniń jeti qızı kelip, ákesiniń qoyların qudıqtan suwǵarıw ushın, nawalardı toltıra basladı. 17Biraq ayırım shopanlar kelip, olardı quwıp jiberdi. Sonda Muwsa kelip qızlardı qorǵadı hám olardıń qoyların suwǵarıp berdi. 18Qızlar ákesi Reueldiń janına qaytıp barǵanda, ákesi olardan:

– Nege búgin bunsha tez keldińiz? – dep soradı. 19Qızları ákesine:

– Mısırlı bir adam bizlerdi shopanlardan qorǵadı. Bunıń ústine, ol suw alıp, qoylarımızdı da suwǵarıp berdi, – dep juwap berdi.

20Ákesi olarǵa:

– Sol adam qay jerde? Onı nege taslap kettińiz? Barıńlar, onı awqatqa shaqırıp kelińler, – dedi.

21Muwsa Reueldiń mirátin qabıl etip, onıń úyinde jasap qalıwdı sheshti. Reuel oǵan qızı Sipporanı hayallıqqa berdi. 22Sippora ul tuwdı hám Muwsa: «Men jat elde kelgindi adam boldım», – dep, balaǵa Gershom#2:22 Gershom – «ol jerde kelgindi» degen mánini beretuǵın sózge uqsaydı. dep at qoydı.

23Aradan uzaq waqıt ótkennen soń, Mısır patshası óldi. Izraillılar ele qulshılıqtan nala shegip, dad salıp atırǵan edi. Olardıń qulshılıq sebepli salǵan dadı Qudayǵa jetip bardı. 24Quday olardıń nalaların esitip, Óziniń Ibrayım, Ísaq hám Yaqıp penen dúzgen kelisimin#2:24 Jar 12:1-3; 26:2-5; 28:13-15. eske túsirdi. 25Quday izraillılardıń awhalın kórip, olardı ayadı.

Currently Selected:

Shıǵıw 2: QrqMK22

Highlight

Copy