Jaratılıs 35
35
Beyt-Elde Qudaydıń Yaqıptı jarılqawı
1Quday Yaqıpqa: «Qánekey, endi Beyt-Elge bar da, sol jerge ornalas. Ájaǵań Esawdan qashıp baratırǵanıńda saǵan kóringen Qudayǵa arnap, sol jerde qurbanlıq orın qur», – dedi.
2Sonda Yaqıp xojalıǵına hám janındaǵılardıń hámmesine bılay dedi:
– Ózlerińizdegi jat qudaylardıń músinlerin ılaqtırıp taslańlar. Ózlerińizdi páklep, kiyimlerińizdi almastırıńlar. 3Júrińler, bul jerden ketip, Beyt-Elge barayıq. Qıyın kúnlerimde maǵan juwap bergen hám júrgen jollarımda meniń menen birge bolǵan Qudayǵa arnap, men sol jerde qurbanlıq orın qurayın.
4Sonda olar ózlerindegi jat qudaylardıń músinlerin hám qulaqlarındaǵı sırǵaların Yaqıpqa berdi. Yaqıp olardı Shexemge jaqın jerdegi bir terebinftiń túbine kómip tasladı. 5Sońınan olar jolǵa tústi. Quday átiraptaǵı qalalardıń turǵınlarına kúshli qorqınısh jibergenlikten, hesh kim olardıń izine túspedi.
6Solay etip, Yaqıp janındaǵı barlıq adamlar menen birge Qanan jerindegi Luzǵa, yaǵnıy Beyt-Elge jetip keldi. 7Yaqıp ol jerde qurbanlıq orın qurıp, sol jerdi El-Beyt-El#35:7 El-Beyt-El – «Beyt-Eldiń Qudayı» degendi bildiredi. dep atadı. Óytkeni Yaqıp ájaǵasınan qashıp baratırǵanda, Quday sol jerde oǵan kóringen edi. 8Sol arada Rebekkanı emizip baqqan Debora degen hayal qaytıs boldı. Ol Beyt-Eldiń qublasındaǵı bir emen aǵashınıń túbine jerlenip, sol emen aǵashı «Joqlaw emeni» dep ataldı.
9Yaqıp Paddan-Aramnan qaytıp kelgennen keyin, Quday oǵan jáne kórinip, onı bılay dep jarılqadı: 10«Seniń atıń – Yaqıp. Biraq bunnan bılay, seniń atıń Yaqıp emes, al Izrail boladı», – dep, onı Izrail dep atadı. 11Quday oǵan jáne: «Men – Qúdireti kúshli Qudayman. Ósip-ónip, kóbey. Sennen bir xalıq, hátte, kóplegen xalıqlar payda bolıp, seniń urpaǵıńnan patshalar kelip shıǵadı. 12Men Ibrayımǵa hám Ísaqqa bergen bul jerdi saǵan hám sennen keyingi urpaqlarıńa beremen», – dedi. 13Sońınan Quday Yaqıp penen sóylesken jerden joqarı kóterilip ketti.
14Yaqıp Quday ózi menen sóylesken jerde tastan estelik ornatıp, onıń ústine sharap hám záytún mayın quydı. 15Ol Quday ózi menen sóylesken jerdi Beyt-El dep atadı#35:15 Jar 28:19..
Rahilanıń ólimi
16Olar Beyt-Elden shıǵıp, Efrataǵa jetiwge az qalǵanda, Rahilanıń tolǵaǵı tutıp, ol qıyınshılıq penen bosandı. 17Ol azap shegip tuwıp atırǵanda, kindik sheshesi oǵan:
– Qorqpa, sen jáne bir ul tuwdıń, – dedi.
18Rahila ólip baratırıp, sońǵı demin shıǵararda, ulın Benoniy#35:18 Benoniy – «qayǵı ulı» degendi bildiredi. dep atadı. Biraq ákesi onıń atın Benyamin#35:18 Benyamin – «oń qolımnıń ulı» yamasa «baxıt ulı» degendi bildiredi. dep qoydı.
19Solay etip, Rahila qaytıs bolıp, Efrataǵa, yaǵnıy Beytlehemge baratuǵın jol boyına jerlendi. 20Yaqıp onıń qábiri ústine qulpı tas ornattı. Rahilanıń qábiriniń qulpı tası búgingi kúnge shekem bar.
21Sonnan keyin, Izrail jáne kóship, Eder minarasınıń arǵı jaǵına shatırın tikti.
22Izrail sol elde jasap atırǵanda, ulı Ruben ákesiniń toqalı bolǵan Bilha menen jattı. Ákesi bul tuwralı esitti.
Yaqıptıń ulları
Yaqıptıń on eki ulı bar edi. 23Onıń Leadan tuwılǵan ulları: tuńǵıshı Ruben, keyin Shimon, Lebiy, Yahuda, Issaxar hám Zebulon. 24Onıń Rahiladan tuwılǵan ulları: Yusup hám Benyamin. 25Rahilanıń shorısı Bilhadan tuwılǵan ulları: Dan hám Naftaliy. 26Leanıń shorısı Zilpadan tuwılǵan ulları: Gad hám Asher. Bular Yaqıptıń Paddan-Aramda tuwılǵan ulları.
Ísaqtıń ólimi
27Yaqıp ákesi Ísaqtıń úyine, Mamrege keldi. Mamre Kiryat-Arbanıń, yaǵnıy Xebronnıń janında bolıp, ol jerde Ibrayım hám Ísaq kelgindi bolıp jasaǵan edi. 28Ísaq bir júz seksen jıl jasadı. 29Ol mazmunlı ómir súrip, qartayıp, demi tawısılıp, qaytıs boldı hám óz ata-babalarına qosıldı. Ulları Esaw menen Yaqıp onı jerledi.
Currently Selected:
Jaratılıs 35: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
