Jaratılıs 34
34
Dinanıń namısınıń buzılıwı
1Bir kúni Yaqıptıń Leadan tuwılǵan qızı Dina sol jerdiń qızların kóriw ushın shıqtı. 2Ol jerdiń biyi xiw xalqınan bolǵan Xamordıń ulı Shexem Dinanı kórgende, onı uslap alıp, oǵan zorlıq isledi. 3Jigittiń Yaqıptıń qızı Dinaǵa kewli ketip, onı súyip qaldı hám oǵan jıllı sóyledi. 4Shexem ákesi Xamorǵa:
– Bul qızdı maǵan hayallıqqa alıp ber, – dedi.
5Yaqıp qızı Dinanıń namısı ayaq astı etilgenin esitkende, ulları jaylawda mal baǵıp júrgen edi. Sonlıqtan Yaqıp olar qaytıp kelgenshe úndemedi.
6Sol waqıtta Shexemniń ákesi Xamor Yaqıp penen sóylesiw ushın, onıń aldına bardı. 7Al Yaqıptıń ulları bolǵan waqıyanı esite sala, jaylawdan qaytıp keldi. Olar ashıwlanıp, ǵázepke mindi. Óytkeni Shexem Yaqıptıń qızın zorlap, Izraildıń abırayın tókken hám islewge bolmaytuǵın isti islegen edi.
8Sonda Xamor olarǵa bılay dedi:
– Ulım Shexemniń kewli qızıńızda, qızıńızdı oǵan hayallıqqa beriń. 9Bir-birimiz benen quda-tamır bolayıq. Qız alısıp, qız beriseyik. 10Bizler menen birge jasay berińler. Elimizdiń qálegen jerinde emin-erkin jasap, sawda-satıq qılıńlar hám múlik iyeleńler.
11Keyin Shexem de qızdıń ákesi menen ájaǵalarına:
– Kewlińiz tolıwı ushın, sizlerge qálegenińizdi beremen. 12Mennen qansha qalıń mal hám sawǵa talap qılsańlar da, hámmesin beremen. Tek qızıńızdı maǵan hayallıqqa berseńiz bolǵanı, – dedi.
13Yaqıptıń ulları qarındası Dinanıń namısın ayaq astı etkeni ushın Shexemge hám onıń ákesi Xamorǵa hiyle menen juwap berip, 14olarǵa bılay dedi:
– Yaq, bizler bunday qıla almaymız. Qarındasımızdı súnnet etilmegen adamǵa bere almaymız, óytkeni bul bizler ushın shermendelik boladı. 15Tek mına shártimizdi qabıl etseńiz ǵana ırazı bolamız: sizlerdiń hár bir er adamıńız bizler sıyaqlı súnnet etilse, 16bir-birimizge qız berip, qız alısamız. Sizler menen birge jasap, bir xalıq bolamız. 17Eger súnnet bolıwǵa kelisim bermeseńiz, qızımızdı alıp qaytamız.
18Bul sózler Xamor menen onıń ulı Shexemge maqul tústi. 19Ákesiniń úyinde hámmeden kóp húrmetke iye bolǵan jas jigit Shexem bul talaptı orınlawdı tezlestirdi. Sebebi ol Yaqıptıń qızına ashıq edi. 20Solay etip, Xamor hám onıń ulı Shexem qala xalqı menen sóylesiw ushın qala dárwazasına bardı hám olarǵa bılay dedi:
21– Bul adamlar bizlerge doslıq qarım-qatnasta. Olar jerimizde jasap, sawda-satıq qılsın. Jer keń, olarǵa da jetedi. Olar menen qız alısıp, qız beriseyik. 22Olar tek mına shárt penen ǵana bizler menen birge jasap, bir xalıq bolıwǵa ırazı boladı: bizlerdiń hár bir er adamımız olar sıyaqlı súnnet etiliwi kerek eken. 23Eger solay islesek, olardıń súriwleri, mal-múlikleri hám barlıq malları bizlerdiki bolmay ma? Kelińler, olarǵa kelisim bereyik, olar bizler menen birge jasap qalsın.
24Qala turǵınlarınıń hámmesi Xamordıń hám onıń ulı Shexemniń sózlerin qabıl etti hám qaladaǵı barlıq er adamlar súnnet etildi.
25Úshinshi kúni, olar awırıp jatırǵanda, Yaqıptıń eki ulı – Dinanıń ájaǵaları Shimon hám Lebiy qılıshların asınıp alıp, qalaǵa irkinishsiz kirdi de, barlıq er adamlardı qılıshtan ótkerdi. 26Olar Xamordı hám ulı Shexemdi de qılıshtan ótkizip, Dinanı Shexemniń úyinen alıp ketti. 27Qarındasınıń namısın ayaq astı qılǵanı ushın, Yaqıptıń ulları ólgenlerdi tonap, qalanı talan-taraj etti. 28Olardıń iri-mayda malların hám esheklerin, qaladaǵı da, jaylawdaǵı da barlıq nárselerin alıp ketti. 29Jáne de, olardıń balaların hám hayalların tutqın qılıp, pútkil baylıǵın hám úylerindegi barlıq zatların olja etti.
30Yaqıp Shimon hám Lebiyge:
– Sizler usı jerdiń turǵınları bolǵan qanan hám periz xalıqların maǵan dushpan qılıp qoyıp, basıma bále arttırdıńız. Meniń adamlarım az. Eger olar birigip, maǵan qarsı shıqsa, meni xojalıǵım menen birlikte joq qıladı, – dedi.
31Biraq olar:
– Qarındasımızǵa buzıq hayalǵa qatnas jasaǵanday qatnas jasawǵa jol qoyıwǵa bola ma? – dedi.
Currently Selected:
Jaratılıs 34: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
