Jaratılıs 33
33
Yaqıptıń Esaw menen ushırasıwı
1Yaqıp qarap, Esawdıń tórt júz adam menen kiyatırǵanın kórdi. Sonda Yaqıp balalardı Leaǵa, Rahilaǵa hám eki shorısına bólip tapsırdı. 2Ol eki shorısı menen olardıń balaların aldına, Leanı hám onıń balaların ortaǵa, Rahila menen Yusupti eń sońına qoydı. 3Yaqıptıń ózi hámmesiniń aldına shıǵıp, ájaǵasınıń janına jetkenshe, jerge deyin iyilip, jeti ret tájim etti.
4Biraq Esaw Yaqıptı qarsı alıw ushın juwırıp bardı da, onı moynınan qushaqlap súydi hám olar ekewi de jılap jiberdi. 5Sońınan Esaw qarap, hayallar menen balalardı kórdi hám Yaqıptan:
– Janıńdaǵı bul adamlar kimler? – dep soradı.
Yaqıp oǵan:
– Bular Qudaydıń siziń qulıńızǵa sıylaǵan balaları, – dep juwap berdi.
6Sonda shorılar hám olardıń balaları jaqınlap kelip, tájim etti. 7Keyin Lea hám onıń balaları, eń aqırında Yusup hám Rahila kelip, oǵan tájim etti. 8Esaw Yaqıptan:
– Jolda men ushıratqan adamlar menen padalardı ne mániste jiberdiń? – dep soradı.
Yaqıp oǵan:
– Mırzamnıń kewlin tabıw ushın jiberdim, – dep juwap berdi.
9Biraq Esaw Yaqıpqa:
– Inim, meniń dúnya-malım kóp, ózińdiki ózińe buyırsın, – dedi.
10Yaqıp:
– Yaq, maǵan miyrim kórsetip, sawǵamdı qabıl etiń. Siziń júzińizdi kórip, Qudaydıń júzin kórgendey boldım. Óytkeni siz meni jıllı júzlilik penen qarsı aldıńız. 11Ótinish, sizge jibergen sawǵalarımdı qabıl etiń. Sebebi Quday maǵan jaqsılıq islegenlikten, mende hámme nárse bar, – dedi.
Yaqıp jalınıp qoymaǵanlıqtan, Esaw sawǵalardı qabıl etti.
12Sońınan Esaw:
– Júrińler keteyik. Men seniń aldıńda júremen, – dedi.
13Biraq Yaqıp oǵan:
– Mırzam, ózińiz bilesiz, balalarım jas, qoy hám sıyırlarım da tóllegen. Eger mallardı bir kún qattı aydasaq, hámmesi ólip qaladı. 14Mırzam, qulıńızdan aldın kete beriń. Men mallarımnıń hám balalarımnıń júrisine qarap, áste-aqırın bara beremen. Solay etip, Seirde mırzama jetip alaman, – dedi.
15Esaw oǵan:
– Janımdaǵı adamlardıń bir neshesin saǵan qaldırıp keteyin, – dedi.
Biraq Yaqıp:
– Bunıń hájeti joq. Mırzamnıń maǵan miyrim kórsetkeniniń ózi jetkilikli, – dedi.
16Solay etip, Esaw sol kúni Seirge qaytıp ketti. 17Al Yaqıp Sukkotqa ketip, sol jerde ózi ushın úy, malları ushın qoralar qurdı. Sonlıqtan sol jer Sukkot#33:17 Sukkot – «qoralar» degendi bildiredi. dep ataldı.
Yaqıptıń Shexemge ornalasıwı
18Sońınan Yaqıp Paddan-Aramnan Qanan jeriniń Shexem qalasına aman-esen qaytıp kelip, qalanıń sırtına shatırların tikti. 19Ol shatırların tikken usı jerdi Shexemniń ákesi Xamordıń ullarınan júz kesita#33:19 Kesita – qanday da bir ólshem birlik, onıń awırlıǵı belgisiz. gúmiske satıp aldı. 20Yaqıp ol jerde qurbanlıq orın qurıp, onı El-Elohe-Izrail#33:20 El-Elohe-Izrail – «Quday – Izraildıń Qudayı» degendi bildiredi. dep atadı.
Currently Selected:
Jaratılıs 33: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
