Jaratılıs 32
32
Yaqıptıń Esaw menen ushırasıwǵa tayarlanıwı
1Yaqıp jolın dawam etip baratırǵanda, oǵan Qudaydıń perishteleri dus keldi. 2Yaqıp olardı kórgende: «Bul Quday láshkerleriniń ordası eken-ǵo!» – dep, ol jerdi Maxanayım#32:2 Maxanayım – «qos orda» degendi bildiredi. dep atadı.
3Yaqıp Edom jerinde, yaǵnıy Seir jerinde jasaytuǵın ájaǵası Esawǵa ózinen aldın xabarshılar jiberdi. 4Yaqıp olarǵa buyırıp:
– Mırzam Esawǵa qulı Yaqıptıń usı waqıtqa shekem Labandikinde bolıp, sol jerde jasaǵanın, 5qara mallar, eshekler, qoy-eshkiler, qul hám shorılarǵa iye bolǵanın, endi ol mırzasınıń kewlin tabıw ushın, bul xabardı jollap atırǵanın aytıńlar, – dedi.
6Xabarshılar qaytıp kelip, Yaqıpqa:
– Bizler ájaǵańız Esawǵa bardıq. Ol tórt júz adam menen birge sizdi qarsı alıwǵa kiyatır, – dedi.
7Sonda Yaqıp qattı qorqıp, albırap qaldı. Ol adamların, qoy-eshkilerin, qara malların hám túyelerin eki toparǵa bóldi. 8Yaqıp: «Eger Esaw kelip, bir topardı qırıp taslasa, ekinshi topar qutılıp qalıwı múmkin», – dep oyladı.
9Sońınan Yaqıp bılay dep duwa etti: «Atam Ibrayımnıń hám ákem Ísaqtıń Quday Iyesi! Sen maǵan: „Óz elińe hám tuwǵan-tuwısqanlarıńa qayt, Men saǵan jaqsılıq qılaman“, – degen ediń. 10Mendey qulıńa kórsetken barlıq jaqsılıǵıńa hám sadıqlıǵıńa ılayıqlı emespen. Men Iordan dáryasın kesip ótkenimde, tayaǵımnan basqa hesh nársem joq edi. Endi bolsa, eki topar bolıp qayttım. 11Jalbarınaman, meni ájaǵam Esawdan qorǵa! Óytkeni men onıń kelip, meni hám meniń balalarımdı anaları menen birge óltiriwinen qorqaman. 12Sen maǵan: „Saǵan jaqsılıq qılaman, urpaǵıńdı teńizdiń qumınday sansız etip kóbeytemen“, – degen ediń».
13Yaqıp túndi sol jerde ótkizdi.
Ol ózinde bar zatlardan aǵası Esawǵa sawǵa etiw ushın ajırattı. 14Olar: eki júz bas eshki, jigirma bas teke, eki júz bas qoy, jigirma bas qoshqar, 15otız bas botalı túye, qırıq bas sıyır, on bas buǵa, jigirma urǵashı hám on erkek eshek edi. 16Yaqıp olardı padalarǵa bólip, qullarına tapsırdı hám olarǵa:
– Meniń aldımda júrińler, hár padanıń arasında aralıq bolsın, – dedi.
17Ol birinshi bolıp júretuǵın qulǵa bılay dep buyrıq berdi:
– Ájaǵam Esaw seni ushıratıp, sennen: «Kimniń qulısań? Qayaqqa baratırsań? Aldıńdaǵı mına pada kimdiki?» – dep sorasa, 18oǵan: «Bular qulıńız Yaqıptiki. Olar mırzam Esawǵa jiberilgen sawǵa. Mine, onıń ózi de biziń izimizden kiyatır», – dep ayt.
19Yaqıp ekinshi, úshinshi bolıp kiyatırǵan qullarǵa hám padalardı aydap kiyatırǵanlardıń hámmesine de buyırıp:
– Esaw menen ushırasqanıńızda, sizler de solay aytıńlar. 20«Qulıńız Yaqıp izimizde kiyatır», – deńler, – dedi. Sebebi Yaqıp: «Ózimnen burın jibergen sawǵalarım menen onıń júregin jibitkenimnen soń ǵana, onıń kózine kórineyin, múmkin, sonda ol meni qabıl eter», – dep oyladı. 21Solay etip, Yaqıptıń sawǵaları ózinen aldın jiberildi, al ózi qonıslaǵan jerinde túnep qaldı.
Yaqıptıń Izrail dep atalıwı
22Sol kúni túnde Yaqıp ornınan turıp, eki hayalın, eki shorısın hám on bir ulın janına alıp, Yabboq dáryasınıń ótkelinen ótti. 23Olardı dáryadan ótkizgennen soń, óziniń barlıq zatların da ótkizdi. 24Keyin Yaqıp jalǵız ózi qaldı. Sonda bir adam onıń menen tań atqansha gúresti. 25Ol Yaqıptı jeńe almaytuǵının bilgende, Yaqıptıń jambasına urıp jiberdi hám onıń jambas súyegi shıǵıp ketti.
26Sonda Ol adam:
– Meni jiber, tań atıp kiyatır, – dedi.
Biraq Yaqıp Oǵan:
– Maǵan pátiyańdı bermegenińshe, Seni jibermeymen! – dedi.
27Ol adam Yaqıptan:
– Atıń kim? – dep soradı.
Ol:
– Yaqıp, – dep juwap berdi.
28Sonda Ol adam:
– Bunnan bılay, sen Yaqıp emes, al Izrail#32:28 Izrail – «Quday gúresedi» yamasa «Quday menen gúresedi» degendi bildiredi. dep atalasań. Óytkeni sen Quday hám adamlar menen gúresip, jeńip shıqtıń, – dedi.
29Yaqıp Oǵan:
– Ótinish, atıńızdı aytıńız? – dedi.
Biraq Ol adam:
– Ne ushın Meniń atımdı sorap atırsań? – dedi.
Sońınan Ol sol jerde Yaqıpqa pátiyasın berdi.
30Yaqıp: «Men Qudaydı júzbe-júz kórdim, biraq tiri qaldım», – dep sol jerdi Penuel#32:30 Penuel – «Qudaydıń júzi» degendi bildiredi. dep atadı.
31Ol Penuelden ketip baratırǵanda, kún shıqtı. Jambası awırǵanlıqtan, ol aqsańlap júrdi. 32Yaqıptıń jambas súyegindegi sińiri zaqım kórgenlikten, izraillılar usı kúnge deyin jambas súyektiń sińirin jemeydi.
Currently Selected:
Jaratılıs 32: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
