Jaratılıs 38
38
Yahuda hám Tamara
1Sol waqıtları Yahuda tuwısqanlarınan bólinip, adullamlı Xira degen adamnıń qasına barıp ornalastı. 2Yahuda sol jerde Shua degen qananlı bir adamnıń qızın ushıratıp, oǵan úylendi. 3Hayal hámiledar bolıp, ul tuwdı. Yahuda oǵan Er dep at qoydı. 4Hayalı jáne hámiledar bolıp, ul tuwdı hám oǵan Onan dep at qoydı. 5Ol taǵı bir ul tuwıp, onıń atın Shela dep qoydı. Ol tuwılǵanda, Yahuda Kezibte edi.
6Yahuda tuńǵıshı Erdi bir qızǵa úylendirdi. Qızdıń atı Tamara edi. 7Yahudanıń tuńǵıshı Er Jaratqan Iyeniń názerinde nahaq adam bolǵanlıqtan, Jaratqan Iye onıń janın aldı.
8Sonda Yahuda Onanǵa:
– Qáyinlik wazıypańdı orınlap, jeńgeńe úylen hám ájaǵańnıń urpaǵın dawam ettir, – dedi. 9Biraq Onan Tamaradan tuwılǵan balalardıń óziniki bolmaytuǵının biletuǵın edi. Sonlıqtan ol ájaǵasınıń hayalı menen jatqanda, ájaǵasınan urpaq qalmasın dep, urıǵın jerge tógip jiberetuǵın edi. 10Onıń bul isi Jaratqan Iyeniń názerinde nahaqlıq bolǵanlıqtan, Jaratqan Iye onıń da janın aldı.
11Sonda Yahuda kelini Tamaraǵa:
– Ákeńniń úyine qaytıp, ulım Shela erjetkenshe, sol jerde jesir bolıp jasay tur, – dedi. Sebebi Yahuda: «Shela da ájaǵaları sıyaqlı ólip qalar», – dep oylaytuǵın edi. Solay etip, Tamara ákesiniń úyine qayttı.
12Aradan kóp waqıt ótkennen soń, Shuanıń qızı, yaǵnıy Yahudanıń hayalı qaytıs boldı. Azalaw múddeti tamam bolǵannan soń, Yahuda dostı adullamlı Xira menen birge Timnaǵa, óziniń qoyların qırqıp atırǵan adamlarǵa ketti.
13Tamaraǵa: «Qáyin atań qoyların qırıqtırıw ushın Timnaǵa ketip baratır», – degen xabar jetti. 14Shela erjetse de, Yahuda Tamaranı Shelaǵa hayallıqqa alıp bermegen edi. Sonlıqtan Tamara ústindegi jesirlik kiyimlerin sheship, júzin jawlıq penen jawdı da, Timnaǵa baratuǵın jol boyındaǵı Enayım dárwazasınıń aldına barıp otırdı.
15Yahuda Tamaranı kórgende, onı buzıq hayal dep oyladı. Óytkeni onıń júzi jabıq edi. 16Yahuda joldan hayal tárepke burılıp keldi de, onıń óziniń kelini ekenin bilmey, oǵan:
– Seniń menen jatayın, – dedi.
Hayal oǵan:
– Meniń menen jatsańız, maǵan ne beresiz, – dep soradı.
17Yahuda:
– Súriwimnen saǵan bir ılaq berip jiberemen, – dedi.
– Ílaǵıńızdı jibergenińizshe, kepillikke bir nárse beresiz be? – dedi hayal.
18Yahuda onnan:
– Kepillikke ne bereyin? – dep soradı.
Tamara oǵan:
– Mórińizdi jibi menen hám qolıńızdaǵı hasańızdı beriń, – dedi.
Yahuda sol nárselerdi berip, onıń menen jattı. Tamara onnan hámiledar boldı. 19Tamara úyine qaytıp kelip, júzindegi jawlıǵın sheship tasladı da, jáne jesirlik kiyimlerin kiyip aldı.
20Sol arada Yahuda kepillikke qaldırǵan nárselerin qaytarıp alıw ushın, adullamlı dostı arqalı hayalǵa bir ılaq jiberdi. Degen menen, dostısı hayaldı taba almadı. 21Sonda dostısı sol jerdiń adamlarınan:
– Enayımda, jol shetinde bir buzıq hayal bar edi, ol qayaqta? – dep soradı.
Olar:
– Bul jerde onday hayal joq, – dep juwap berdi.
22Dostısı Yahudanıń janına qaytıp kelip:
– Hayaldı taba almadım. Sol jerdiń adamları da ol jerde hesh qanday buzıq hayaldıń bolmaǵanın ayttı, – dedi.
23Yahuda:
– Meyli, sol zatlar hayalda qala bersin. Tek hesh kimge masqara bolmasaq bolǵanı. Men ılaqtı jibergen edim, biraq sen hayaldı taba almadıń, – dedi.
24Shama menen úsh ayday waqıt ótkende, Yahudaǵa: «Keliniń Tamara buzıqshılıq islepti, ol házir hámiledar», – degen xabar jetti. Sonda Yahuda:
– Onı dalaǵa alıp shıǵıp, jaǵıp jiberińler, – dedi.
25Tamaranı dalaǵa alıp shıqqanda, ol qáyin atasına: «Men mına zatlardıń iyesinen hámiledar boldım. Anıqlap qarań, bul mór, onıń jibi hám hasa kimdiki?» – dep xabar jiberdi.
26Yahuda zatlardı tanıp: «Haqıyqatlıq ol tárepte, sebebi men onı ulım Shelaǵa alıp bermedim», – dedi. Sonnan keyin, Yahuda Tamara menen qaytıp jaqınlasqan joq.
27Tamaranıń tuwıw waqtı kelgende, qarnında egiz bala barlıǵı málim boldı. 28Ol bosanıp atırǵan waqıtta, egizlerdiń biri qolın sırtqa shıǵardı. Kindik sheshesi balanıń qolın uslap:
– Bul birinshi bolıp tuwıldı, – dep onıń bilegine qırmızı jip baylap qoydı. 29Biraq ol qolın ishke tartıp aldı hám sol waqıtta onıń sıńarı tuwıldı. Sonda kindik sheshesi:
– Sen qalayınsha tosqınlıqtı buzıp óttiń? – dedi. Sonlıqtan oǵan Peres#38:29 Peres – «buzıp ótiw» degendi bildiredi. dep at qoyıldı. 30Sońınan bilegine qırmızı jip baylanǵan onıń sıńarı tuwıldı. Oǵan Zerax dep at qoydı.
Currently Selected:
Jaratılıs 38: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
