Jaratılıs 42
42
Yusuptiń aǵalarınıń Mısırǵa keliwi
1Yaqıp Mısırda ǵálle bar ekenin bilgende, ullarına:
– Nege bir-birińizge qarap otırsızlar? 2Men Mısırda ǵálle bar ekenin esittim. Ólmey tiri qalıwımız ushın, sizler ol jaqqa barıp, ǵálle satıp alıp kelińler, – dedi.
3Solay etip, Yusuptiń on ájaǵası ǵálle satıp alıw ushın, Mısırǵa ketti. 4Biraq Yaqıp Yusuptiń inisi Benyamindi olar menen birge jibermedi. Sebebi ol ulınıń bir bálege jolıǵıwınan qorqatuǵın edi. 5Solay etip, ǵálle satıp alıwǵa kelgenler menen birge Izraildıń ulları da Mısırǵa keldi. Óytkeni Qanan jerinde de ashlıq bolıp atırǵan edi.
6Yusup Mısır eliniń basshısı bolıp, eldegi pútkil xalıqqa ǵálle satatuǵın edi. Sonda Yusuptiń aǵaları kelip, onıń aldında mańlayları jerge tiygenshe iyilip, tájim etti. 7Yusup aǵaların kórip, olardı tanıdı. Biraq ózin olardı tanımaytuǵınday qılıp kórsetip, qatal sóyledi hám olardan:
– Qayaqtan keldińler? – dep soradı.
Olar Yusupke:
– Bizler azıq-awqat satıp alıw ushın, Qanan jerinen keldik, – dep juwap berdi.
8Yusup aǵaların tanısa da, aǵaları onı tanımadı. 9Yusup olar haqqında kórgen túslerin eslep, olarǵa:
– Sizler jansızlarsız! Bul eldiń hálsiz jerlerin biliw ushın kelgensizler, – dedi.
10Olar Yusupke:
– Yaq, mırzamız! Siziń qullarıńız bolǵan bizler azıq-awqat satıp alıw ushın keldik. 11Bizler hámmemiz bir ákeniń ullarımız. Siziń qullarıńız bolǵan bizler hadal adamlarmız, jansız emespiz, – dedi.
12Yusup olarǵa jáne:
– Yaq, sizler eldiń hálsiz jerlerin biliw ushın kelgensizler, – dedi.
13Olar:
– Siziń qullarıńız bolǵan bizler on eki tuwısqanbız. Hámmemiz Qanan jerinde jasaytuǵın bir ákeniń ullarımız. Eń kishkenemiz házir ákemizdiń janında, al basqa birewi joytılıp ketti, – dedi.
14Yusup olarǵa bılay dedi:
– Áne, aytqanımday, sizler jansızlarsız. 15Endi sizler sınawdan ótesiz. Eger genje inińiz bul jerge kelmese, faraonnıń bası menen ant ishemen, sizler bul jerden ketpeysizler. 16Arańızdan birińizdi jiberiń, ol barıp, inińizdi alıp kelsin. Al qalǵanlarıńız qamaqta turasızlar. Sózlerińizdiń haqıyqat yamasa jalǵan ekenligin tekserip kóremiz. Eger sózlerińiz jalǵan bolsa, faraonnıń bası menen ant ishemen, sizler jansızlarsız.
17Solay etip, Yusup aǵaların úsh kúnge qamatıp qoydı.
18Úshinshi kúni olarǵa:
– Men Qudaydan qorqatuǵın adamman. Eger sizler bılay isleseńiz, bir qasıq qanıńızdan keshemen: 19ózlerińizdiń hadal adamlar ekenligińizdi dálillewińiz ushın, arańızdan birińiz qamaqta qalsın, al qalǵanlarıńız ash qalǵan xojalıqlarıńız ushın ǵálle alıp ketińler. 20Sońınan kishkene inińizdi maǵan alıp kelińler. Sonda sózlerińizdiń haqıyqıy ekenligi dálillenip, ólimnen aman qalasızlar, – dedi. Olar buǵan kelisim berdi.
21Olar bir-birine: «Shınında da, bizler inimizge islegen isimiz ushın jazalanıp atırmız. Ol bizlerge jalbarınǵanda, onıń qalay qıynalǵanın kórsek te, onı tıńlamadıq. Sol sebepten bizlerdiń basımızǵa da usı qıyınshılıq tústi», – desti.
22Ruben olarǵa:
– «Balaǵa jamanlıq islemeńler», – dep sizlerge eskertpegen be edim? Biraq sizler tıńlamadıńlar. Mine, házir onıń qanınıń qunı bizlerden talap etilip atır, – dedi.
23Yusuptiń ózlerin túsinetuǵının aǵaları bilmedi, sebebi Yusup olar menen dilmash arqalı sóylesken edi.
24Yusup aǵalarınıń janınan ketip, jılap jiberdi. Sońınan qaytıp kelip, olar menen sóylesti hám aralarınan Shimondı tutqınǵa alıp, basqalarınıń kóz aldında baylatıp qoydı.
Yusuptiń aǵalarınıń Qananǵa qaytıwı
25Yusup aǵalarınıń qapların ǵállege toltırıwdı, gúmislerin hár biriniń qabına qaytarıp salıwdı hám jol azıǵın beriwdi buyırdı. Aytılǵan sóz orınlandı. 26Yusuptiń aǵaları ǵállelerin esheklerine artıp, jolǵa tústi.
27Túnegen jerinde olardıń birewi eshegine jem bereyin dep qaptıń awzın ashtı hám óziniń gúmisiniń qaptıń awzında turǵanın kórdi. 28Ol tuwısqanlarına:
– Gúmisimdi qaytarıp beripti. Mine, ol qabımnıń ishinde eken, – dedi. Sonda olardıń júrekleri suwlap, qaltırasıp, bir-birine:
– Qudaydıń bizlerge bul ne qılǵanı? – dedi.
29Olar Qananǵa, ákesi Yaqıpqa qaytıp kelip, baslarınan keshirgenleriniń hámmesin aytıp berip, bılay dedi:
30– Sol eldiń basshısı bizler menen qatal sóylesip, bizlerdi elge kelgen jansızlar dep esapladı. 31Bizler oǵan: «Bizler hadal adamlarmız, jansızlar emespiz. 32Bizler on eki tuwısqan bolıp, bir ákeniń ullarımız. Bir inimiz joytılıp ketti, al kishkene inimiz házir Qananda, ákemizdiń janında qaldı», – dedik. 33Sol eldiń basshısı bizlerge: «Sizlerdiń hadal adamlar ekenligińizdi men mınadan bilemen: tuwısqanıńızdıń birewin qasımda qaldırıń da, al qalǵanlarıńız ash qalǵan xojalıqlarıńız ushın ǵálle alıp, kete berińler. 34Al genje inińizdi maǵan alıp kelesizler. Men sonda sizlerdiń jansız emes, al hadal adamlar ekenligińizdi bilemen hám tuwısqanıńızdı sizlerge qaytarıp beremen. Sonda sizler bul elde sawda isley alasızlar», – dedi.
35Olar qapların bosatıp atırıp, hár qaysısı óz qabınıń ishinen túyiwli gúmisin tawıp aldı. Túyiwli gúmislerin kórgende, olardıń ózleri de, ákesi de qorqıp ketti. 36Sonda Yaqıp ullarına:
– Sizler meni perzentlerimnen ayırdıńlar: Yusup joq, Shimon joq, endi Benyamindi de alıp ketpekshisizler. Mańlayım bunshelli qara bolmasa! – dedi.
37Ruben ákesine:
– Eger men Benyamindi qaytarıp ákelmesem, meniń eki ulımdı óltire ǵoy. Benyamindi maǵan tapsır, men onı saǵan qaytarıp ákelemen, – dedi.
38Biraq Yaqıp:
– Ulımdı sizler menen jibermeymen, óytkeni aǵası ólip, ol jalǵız qaldı. Eger ol jolda bir bálege jolıqsa, sizler meniń ǵarrı basımdı sol qayǵı menen óliler mákanına jiberesizler, – dedi.
Currently Selected:
Jaratılıs 42: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
Jaratılıs 42
42
Yusuptiń aǵalarınıń Mısırǵa keliwi
1Yaqıp Mısırda ǵálle bar ekenin bilgende, ullarına:
– Nege bir-birińizge qarap otırsızlar? 2Men Mısırda ǵálle bar ekenin esittim. Ólmey tiri qalıwımız ushın, sizler ol jaqqa barıp, ǵálle satıp alıp kelińler, – dedi.
3Solay etip, Yusuptiń on ájaǵası ǵálle satıp alıw ushın, Mısırǵa ketti. 4Biraq Yaqıp Yusuptiń inisi Benyamindi olar menen birge jibermedi. Sebebi ol ulınıń bir bálege jolıǵıwınan qorqatuǵın edi. 5Solay etip, ǵálle satıp alıwǵa kelgenler menen birge Izraildıń ulları da Mısırǵa keldi. Óytkeni Qanan jerinde de ashlıq bolıp atırǵan edi.
6Yusup Mısır eliniń basshısı bolıp, eldegi pútkil xalıqqa ǵálle satatuǵın edi. Sonda Yusuptiń aǵaları kelip, onıń aldında mańlayları jerge tiygenshe iyilip, tájim etti. 7Yusup aǵaların kórip, olardı tanıdı. Biraq ózin olardı tanımaytuǵınday qılıp kórsetip, qatal sóyledi hám olardan:
– Qayaqtan keldińler? – dep soradı.
Olar Yusupke:
– Bizler azıq-awqat satıp alıw ushın, Qanan jerinen keldik, – dep juwap berdi.
8Yusup aǵaların tanısa da, aǵaları onı tanımadı. 9Yusup olar haqqında kórgen túslerin eslep, olarǵa:
– Sizler jansızlarsız! Bul eldiń hálsiz jerlerin biliw ushın kelgensizler, – dedi.
10Olar Yusupke:
– Yaq, mırzamız! Siziń qullarıńız bolǵan bizler azıq-awqat satıp alıw ushın keldik. 11Bizler hámmemiz bir ákeniń ullarımız. Siziń qullarıńız bolǵan bizler hadal adamlarmız, jansız emespiz, – dedi.
12Yusup olarǵa jáne:
– Yaq, sizler eldiń hálsiz jerlerin biliw ushın kelgensizler, – dedi.
13Olar:
– Siziń qullarıńız bolǵan bizler on eki tuwısqanbız. Hámmemiz Qanan jerinde jasaytuǵın bir ákeniń ullarımız. Eń kishkenemiz házir ákemizdiń janında, al basqa birewi joytılıp ketti, – dedi.
14Yusup olarǵa bılay dedi:
– Áne, aytqanımday, sizler jansızlarsız. 15Endi sizler sınawdan ótesiz. Eger genje inińiz bul jerge kelmese, faraonnıń bası menen ant ishemen, sizler bul jerden ketpeysizler. 16Arańızdan birińizdi jiberiń, ol barıp, inińizdi alıp kelsin. Al qalǵanlarıńız qamaqta turasızlar. Sózlerińizdiń haqıyqat yamasa jalǵan ekenligin tekserip kóremiz. Eger sózlerińiz jalǵan bolsa, faraonnıń bası menen ant ishemen, sizler jansızlarsız.
17Solay etip, Yusup aǵaların úsh kúnge qamatıp qoydı.
18Úshinshi kúni olarǵa:
– Men Qudaydan qorqatuǵın adamman. Eger sizler bılay isleseńiz, bir qasıq qanıńızdan keshemen: 19ózlerińizdiń hadal adamlar ekenligińizdi dálillewińiz ushın, arańızdan birińiz qamaqta qalsın, al qalǵanlarıńız ash qalǵan xojalıqlarıńız ushın ǵálle alıp ketińler. 20Sońınan kishkene inińizdi maǵan alıp kelińler. Sonda sózlerińizdiń haqıyqıy ekenligi dálillenip, ólimnen aman qalasızlar, – dedi. Olar buǵan kelisim berdi.
21Olar bir-birine: «Shınında da, bizler inimizge islegen isimiz ushın jazalanıp atırmız. Ol bizlerge jalbarınǵanda, onıń qalay qıynalǵanın kórsek te, onı tıńlamadıq. Sol sebepten bizlerdiń basımızǵa da usı qıyınshılıq tústi», – desti.
22Ruben olarǵa:
– «Balaǵa jamanlıq islemeńler», – dep sizlerge eskertpegen be edim? Biraq sizler tıńlamadıńlar. Mine, házir onıń qanınıń qunı bizlerden talap etilip atır, – dedi.
23Yusuptiń ózlerin túsinetuǵının aǵaları bilmedi, sebebi Yusup olar menen dilmash arqalı sóylesken edi.
24Yusup aǵalarınıń janınan ketip, jılap jiberdi. Sońınan qaytıp kelip, olar menen sóylesti hám aralarınan Shimondı tutqınǵa alıp, basqalarınıń kóz aldında baylatıp qoydı.
Yusuptiń aǵalarınıń Qananǵa qaytıwı
25Yusup aǵalarınıń qapların ǵállege toltırıwdı, gúmislerin hár biriniń qabına qaytarıp salıwdı hám jol azıǵın beriwdi buyırdı. Aytılǵan sóz orınlandı. 26Yusuptiń aǵaları ǵállelerin esheklerine artıp, jolǵa tústi.
27Túnegen jerinde olardıń birewi eshegine jem bereyin dep qaptıń awzın ashtı hám óziniń gúmisiniń qaptıń awzında turǵanın kórdi. 28Ol tuwısqanlarına:
– Gúmisimdi qaytarıp beripti. Mine, ol qabımnıń ishinde eken, – dedi. Sonda olardıń júrekleri suwlap, qaltırasıp, bir-birine:
– Qudaydıń bizlerge bul ne qılǵanı? – dedi.
29Olar Qananǵa, ákesi Yaqıpqa qaytıp kelip, baslarınan keshirgenleriniń hámmesin aytıp berip, bılay dedi:
30– Sol eldiń basshısı bizler menen qatal sóylesip, bizlerdi elge kelgen jansızlar dep esapladı. 31Bizler oǵan: «Bizler hadal adamlarmız, jansızlar emespiz. 32Bizler on eki tuwısqan bolıp, bir ákeniń ullarımız. Bir inimiz joytılıp ketti, al kishkene inimiz házir Qananda, ákemizdiń janında qaldı», – dedik. 33Sol eldiń basshısı bizlerge: «Sizlerdiń hadal adamlar ekenligińizdi men mınadan bilemen: tuwısqanıńızdıń birewin qasımda qaldırıń da, al qalǵanlarıńız ash qalǵan xojalıqlarıńız ushın ǵálle alıp, kete berińler. 34Al genje inińizdi maǵan alıp kelesizler. Men sonda sizlerdiń jansız emes, al hadal adamlar ekenligińizdi bilemen hám tuwısqanıńızdı sizlerge qaytarıp beremen. Sonda sizler bul elde sawda isley alasızlar», – dedi.
35Olar qapların bosatıp atırıp, hár qaysısı óz qabınıń ishinen túyiwli gúmisin tawıp aldı. Túyiwli gúmislerin kórgende, olardıń ózleri de, ákesi de qorqıp ketti. 36Sonda Yaqıp ullarına:
– Sizler meni perzentlerimnen ayırdıńlar: Yusup joq, Shimon joq, endi Benyamindi de alıp ketpekshisizler. Mańlayım bunshelli qara bolmasa! – dedi.
37Ruben ákesine:
– Eger men Benyamindi qaytarıp ákelmesem, meniń eki ulımdı óltire ǵoy. Benyamindi maǵan tapsır, men onı saǵan qaytarıp ákelemen, – dedi.
38Biraq Yaqıp:
– Ulımdı sizler menen jibermeymen, óytkeni aǵası ólip, ol jalǵız qaldı. Eger ol jolda bir bálege jolıqsa, sizler meniń ǵarrı basımdı sol qayǵı menen óliler mákanına jiberesizler, – dedi.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022