Jaratılıs 48
48
Yaqıptıń Efrayım menen Menashshege pátiyasın beriwi
1Bunnan bir qansha waqıt ótkennen soń, Yusupke: «Ákeń awırıp atır», – degen xabar jetkende, ol ulları Menashshe menen Efrayımdı ertip, ákesine ketti. 2Yaqıpqa: «Ulıńız Yusup keldi», – dep xabarlaǵanda, Izrail kúshin jıynap, tóseginde turıp otırdı.
3Yaqıp Yusupke:
– Qúdireti kúshli Quday Qanan jerindegi Luzda maǵan kórindi hám meni jarılqap, 4maǵan: «Men seni ósip-óndirip, kóbeytemen. Urpaǵıńnan kóplegen xalıqlar jarataman. Bul jerdi sennen keyingi urpaqlarıńa máńgige menshik etip beremen», – degen edi. 5Men Mısırǵa kelmesimnen aldın, seniń bul jerde tuwılǵan eki ulıń Efrayım menen Menashshe endi meniki bolıp esaplanadı. Olar men ushın Ruben hám Shimon menen teńdey. 6Olardan keyin tuwılatuǵın balalarıń ózińdiki boladı. Olarǵa Efrayım hám Menashshe arqalı miyras ótedi. 7Men Paddannan qaytıp kiyatırǵanımda, Qanan elinde, Efrataǵa jetiwge az qalǵanda, Rahila qaytıs bolıp, men onnan ayırılıp qaldım. Onı Efrataǵa, yaǵnıy Beytlehemge baratuǵın jol boyına jerledim, – dedi.
8Izrail Yusuptiń ulların kórip:
– Bular kimler? – dep soradı.
9Yusup ákesine:
– Bular – Qudaydıń maǵan Mısırda bergen ulları, – dedi.
Sonda Izrail oǵan:
– Olardı maǵan jaqınlat, olarǵa pátiyamdı bereyin, – dedi.
10Qartayǵanlıqtan, Izraildıń kózleri ázzilep, jaqsı kórmeytuǵın edi. Yusup ulların ákesine jaqınlatqanda, ákesi olardı súyip, qushaqladı. 11Sońınan Izrail Yusupke:
– Men seniń diydarıńdı kóriwden úmitimdi úzgen edim, biraq, minekey, Quday maǵan seniń perzentlerińdi de kórsetti, – dedi.
12Yusup ákesiniń dizesinde otırǵan ulların shetke aldı da, mańlayı jerge tiygenshe iyilip, ákesine tájim etti. 13Sońınan Yusup Efrayımdı oń jaǵına alıp, Izraildıń shep qolına tuwrılap, al Menashsheni shep jaǵına alıp, Izraildıń oń qolına tuwrılap turǵızdı. 14Biraq Izrail qolların ayqastırıp, tuńǵısh ul Menashshe bolıwına qaramastan, oń qolın kishi ul Efrayımnıń basına, al shep qolın tuńǵısh ul Menashsheniń basına qoydı.
15Keyin Yusupke pátiyasın berip bılay dedi:
– Atalarım Ibrayım menen Ísaqtıń xızmet etken Qudayı, usı kúnge deyin, ómirim boyı meniń shopanım bolǵan Quday, 16meni barlıq jamanlıqlardan saqlap kelgen perishte bul óspirimlerdi jarılqasın! Meniń atım hám atalarım Ibrayım menen Ísaqtıń atları olar arqalı dawam etsin. Olar jer betinde esap-sansız bolıp kóbeysin.
17Ákesiniń oń qolın Efrayımnıń basına qoyǵanı Yusupke unamadı. Sonlıqtan ol ákesiniń qolın Efrayımnıń basınan alıp, Menashsheniń basına qoymaqshı boldı. 18Yusup ákesine:
– Áke, olay emes, tuńǵısh ul Menashshe boladı, oń qolıńdı onıń basına qoy, – dedi.
19Biraq ákesi kelisim bermey:
– Bilemen, ulım, bilemen. Menashsheden de ullı bir xalıq shıǵadı. Biraq onıń inisi onnan da ullıraq bolıp, urpaqlarınan kóp xalıqlar kelip shıǵadı, – dedi.
20Sol kúni Izrail olarǵa pátiyasın berip, bılay dedi:
– Izraillılar pátiya bergende: «Quday seni Efrayım hám Menashshedey qılsın!» – dep sizlerdiń atıńız benen pátiya beretuǵın boladı.
Usılayınsha Yaqıp Efrayımdı Menashsheden joqarı qoydı. 21Soń Izrail Yusupke:
– Meniń ólimim jaqınlastı. Quday sizler menen birge bolıp, sizlerdi ata-babalarıńızdıń jerine qaytaradı. 22Saǵan tuwısqanlarıńnan bir pay artıq etip, taw etegindegi jerdi de beremen. Onı men qılısh hám sadaǵım menen amor xalqınan tartıp alǵan edim, – dedi.
Currently Selected:
Jaratılıs 48: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
