Jaratılıs 49
49
Yaqıptıń ullarına pátiyasın beriwi
1Yaqıp ulların janına shaqırıp alıp, bılay dedi:
– Janıma jıynalıńlar, men keleshekte sizlerge ne bolatuǵının bildireyin.
2Jıynalıp qulaq salıńlar,
Háy, Yaqıp ulları,
Tıńlańız ákeńiz Izraildı!
3Háy sen, Ruben, meniń tuńǵıshım,
Erkeklik kúshimniń dáslepki jemisi,
Sen húrmet hám kúsh jaǵınan eń ústinseń.
4Biraq tasqanıń ushın suw sıyaqlı,
Ústem bolmaysań hesh qashan endi.
Óytkeni kirdiń sen ákeńniń tósegine,
Tósegime kirip, haramladıń onı.
5Aǵayinli Shimon hám Lebiy,
Qılıshları – jawızlıq quralı.
6Olardıń jasırın jobasına sherik bolmayın,
Jıyınına da qatnaspayın men.
Sebebi olar ashıwǵa minip, adam óltirdi,
Kewli kúsegenin qılıp,
Kesti buǵalardıń tirseklerin.
7Nálet jawsın olardıń rehimsiz ashıwına,
Nálet jawsın olardıń jawız ǵázebine!
Olardı bólip jiberip, Yaqıp xalqınıń arasına,
Tarqataman Izrail xalqınıń arasına.
8Háy Yahuda, tuwısqanlarıń seni maqtaydı.
Qolıń jawıńnıń jelkesinen túspeydi,
Tuwısqanlarıń aldıńda bas iyedi.
9Yahuda, sen jas arıslansań,
Ulım meniń! Ań awlap qayttıń,
Jatasań arıslan sıyaqlı shirenip,
Mazańdı alıwǵa kimniń batılı jeter?
10Haqıyqıy iyesi kelgenge deyin,
Patshalıq hasası alınbas sennen.
Biylik bárqulla seniki bolıp,
Xalıqlar saǵan boysınar.
11Baylarsań eshegińdi júzim aǵashına,
Gúrreńdi miyweli shaqasına.
Juwarsań kiyimlerińdi sharapqa,
Shapanıńdı júzimniń qanına.
12Sharaptan nurlı bolar kózleriń,
Sútten aq bolar seniń tisleriń.
13Zebulon jasaydı teńiz boyında,
Kemelerge jaǵıs bolar ol,
Mákanlaǵan jeri bolar Sidonǵa shekem.
14Júkler arasında jatırǵan,
Issaxar – bir kúshli eshek.
15Ol qashan dem alatuǵın jaqsı jer,
Unaytuǵın bir el kórse,
Júkti kóteriw ushın ıyıǵın tutıp,
Erksiz xızmetshige aylanar.
16Dan da Izraildıń bir urıwı bolıp,
Óz xalqına qazılıq eter.
17Dan – jol shetindegi jılan,
Ol – soqpaqta jatırǵan bir uwlı jılan.
Ol attıń tabanınan shaqqanda,
Atlını shalqasına jıǵıltar.
18Seniń qutqarıwıńdı kútpektemen, Jaratqan Iye!
19Gad basqınshılar hújimine ushırar,
Biraq olardıń izinen quwıp, shabıwıl jasar.
20Asherdiń azıq-awqatı toyımlı keler,
Ol patshaǵa say lázzetli taǵam jetistirer.
21Naftaliy – bir azat suwın,
Onnan ájayıp balalar tuwılar.
22Yusup – miyweli aǵash,
Ol – bulaq basındaǵı jemisli terek.
Shaqaları diywaldan asıp óter,
23Oǵan sadaqshılar rehimsiz hújim etti,
Dushpanlarsha ústine oqlar jawdırdı.
24Biraq Izraildıń Qorǵawshı jartası hám Shopanı bolǵan,
Yaqıptıń Kúshli Qudayınıń járdeminde,
Qolları onıń qarıwlı hám shaqqan boldı,
Sonlıqtan ol sadaǵın bekkem usladı.
25Ákeńniń Qudayı seni qollap turar,
Joqarıdaǵı aspannıń bereketi menen,
Jerdegi tereń bulaqlardıń bereketi menen,
Kókirek súti hám ana qursaǵınıń bereketi menen,
Qúdireti kúshli Quday seni jarılqar.
26Ákeńniń bergen pátiyaları,
Ullıraq bolar áyyemgi tawlardıń bereketlerinen,
Eski tóbeshikler molshılıǵınan da.
Pátiyalarım tuwısqanları ishinen tańlanǵan Yusupke qonsın!
27Benyamin – ash qasqır,
Ol awlaǵan ańın azanda jep,
Keshte oljanı bóliser.
28Izraildıń on eki urıwı usılar. Ákesi olarǵa bul sózlerdi aytıp, hár birine minásip bolǵan pátiyanı bergen edi.
Yaqıptıń ólimi
29Bunnan keyin, Yaqıp ullarına bılay dep wásiyat etti:
– Men ólip, ata-babalarıma qosılajaqpan. Meni ata-babalarımnıń janına, xet xalqınan bolǵan Efronnıń atızındaǵı úńgirge aparıp qoyıńlar. 30Bul úńgir Qanan jerinde, Mamrege jaqın jerdegi Maxpela atızında jaylasqan. Onı Ibrayım xet xalqınan bolǵan Efronnan mazar qılıw ushın satıp alǵan edi. 31Ol jerge Ibrayım hám onıń hayalı Sara, Ísaq hám onıń hayalı Rebekka qoyılǵan. Men Leanı da sol jerge qoydım. 32Bul atız hám ondaǵı úńgir xetlerden satıp alınǵan edi.
33Yaqıp ullarına bul wásiyat sózlerin aytıp bolǵannan soń, tóseginde ayaqların jıynap jattı da, demi tawısılıp, óz ata-babalarına qosıldı.
Currently Selected:
Jaratılıs 49: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
