Yuxan 18
18
Iysanıń qolǵa alınıwı
(Mat 26:47-56; Mrk 14:43-50; Luk 22:47-53)
1Iysa duwa etip bolǵannan soń, shákirtleri menen birge Kidron sayınıń arǵı jaǵasına ótti. Ol jerde bir baǵ bar edi. Iysa shákirtleri menen sol baǵqa kirdi.
2Oǵan satqınlıq qılatuǵın Yahuda da bul jerdi biletuǵın edi. Sebebi Iysa shákirtleri menen ol jerde tez-tez ushırasıp turatuǵın edi. 3Solay etip, Yahuda janına bir topar Rim áskerleri menen bas ruwxaniyler hám pariseyler jibergen saqshılardı alıp, sol jerge keldi. Olardıń qollarında panıs, shom hám qurallar bar edi.
4Iysa Ózine bolajaq hámme nárseni bilgenlikten, aldına shıǵıp, olardan:
– Kimdi izlep júrsizler? – dep soradı.
5– Nasıralı Iysanı, – dep juwap berdi olar.
– Men – Solman, – dedi Iysa.
Iysanıń satqını Yahuda da olar menen birge turǵan edi. 6Iysa: «Men – Solman» dewi menen, olar artqa sheginip, jerge jıǵıldı.
7Sonda Iysa olardan jáne:
– Kimdi izlep júrsizler? – dep soradı.
– Nasıralı Iysanı, – dedi olar.
8Iysa juwap berip:
– Sizlerge ayttım-ǵo, Men – Solman. Eger Meni izlep júrgen bolsańlar, bul adamlardı jiberińler, ketsin, – dedi.
9Bul Onıń: «Seniń Maǵan bergenlerińniń hesh birin joytpadım», – dep burın Ózi aytqan sózleriniń orınlanıwı ushın boldı.
10Sonda Shimon Petr janındaǵı qılıshın suwırıp alıp, bir siltep, bas ruwxaniydiń qulınıń oń qulaǵın shawıp tasladı. Quldıń atı Malkus edi.
11Iysa Petrge:
– Qılıshıńdı qınabına salıp qoy! Ákemniń Maǵan bergen azap kesesinen ishpeyin be? – dedi.
12Sońınan áskerler toparı menen olardıń basshısı hám yahudiylerdiń saqshıları Iysanı uslap bayladı. 13Onı dáslep Xannaǵa alıp bardı. Xanna sol jılı bas ruwxaniy bolǵan Kayafanıń qáyin atası edi. 14Yahudiy basshılarına: «Xalıq ushın bir adamnıń óliwi jaqsıraq», – dep keńes bergen usı Kayafa edi.
Petrdiń Iysadan tanıwı
(Mat 26:69-70; Mrk 14:66-68; Luk 22:55-57)
15Shimon Petr menen jáne basqa shákirti Iysanıń izine erip bardı. Bul shákirt bas ruwxaniyge tanıs bolǵanlıqtan, Iysa menen birge bas ruwxaniydiń háwlisine kirdi. 16Al Petr sırtta, qapınıń aldında qaldı. Bas ruwxaniydiń tanısı bolǵan sol shákirt sırtqa shıǵıp, qapını qarawıllaǵan shorı qız benen sóylesti de, Petrdi ishke alıp kirdi.
17Qapını qarawıllaǵan shorı qız Petrden:
– Sen de bul Adamnıń shákirtlerinen emesseń be? – dep soradı.
– Yaq, – dep juwap berdi ol.
18Kún suwıq bolǵanlıqtan, xızmetshiler menen saqshılar kómir jaǵıp, jılınıp turdı. Petr de olar menen birge turıp jılındı.
Bas ruwxaniydiń Iysanı tergewi
(Mat 26:59-66; Mrk 14:55-64; Luk 22:66-71)
19Bas ruwxaniy Iysadan Onıń shákirtleri hám tálimatı haqqında soradı.
20Iysa oǵan bılay dep juwap berdi:
– Men dúnyaǵa ashıq sóyledim. Hámme waqıtta yahudiyler jıynalatuǵın májilisxanalarda hám Ibadatxanada úyrettim. Jasırın hesh nárse aytpadım. 21Nege Mennen sorap atırsań? Sózlerimdi esitkenlerden sora. Olar ne aytqanımdı biledi.
22Iysa usılardı aytqanda, Oǵan jaqın turǵan saqshılardıń biri:
– Bas ruwxaniyge de usılay juwap beriwge bola ma? – dep Onıń betine urıp jiberdi.
23Iysa oǵan:
– Eger Men nadurıs sóylegen bolsam, nadurıslıǵımdı dálille. Biraq durıs sóylegen bolsam, nege Meni urasań? – dedi.
24Xanna Iysanı baylawlı halında bas ruwxaniy Kayafaǵa jiberdi.
Petrdiń Iysadan jáne tanıwı
(Mat 26:71-75; Mrk 14:69-72; Luk 22:58-62)
25Shimon Petr ele otqa jılınıp tur edi.
– Sen de Onıń shákirtlerinen emesseń be? – dep soradı olar.
Biraq ol tanıp:
– Yaq, – dedi.
26Bas ruwxaniydiń qullarınıń biri, Petr qulaǵın shapqan adamnıń aǵayini Petrden:
– Seni baǵda Onıń menen birge kórgen joqpan ba? – dep soradı.
27Petr jáne tandı. Sol waqıtta-aq qoraz shaqırdı.
Iysa Pilat aldında
(Mat 27:1-2, 11-31; Mrk 15:1-5; Luk 23:1-5, 13-25)
28Tań azanda yahudiy basshıları Iysanı Kayafanıń aldınan hákim Pilattıń sarayına alıp bardı. Olar Qutqarılıw bayramınıń asın haramlanbay jew ushın sarayǵa kirmedi. 29Sol sebepten Pilat sırtqa shıǵıp, olardan:
– Bul adamdı ne nársede ayıplap atırsızlar? – dep soradı.
30Olar juwap berip:
– Eger bul adam jınayatshı bolmaǵanda, Onı seniń aldıńa alıp kelmes edik, – dedi.
31Pilat olarǵa:
– Onı ózlerińiz alıp ketip, óz nızamıńız boyınsha húkim etińler, – dedi.
Yahudiy basshıları:
– Bizlerge hesh kimdi óltiriwge ruxsat etilmegen, – dedi.
32Iysanıń Óziniń qanday ólim menen óletuǵını haqqında aytqan sózleriniń orınlanıwı ushın usılay boldı.
33Sonda Pilat jáne sarayına kirdi hám Iysanı ózine shaqırtıp:
– Sen Yahudiylerdiń Patshasımısań? – dep soradı.
34Iysa bılay dep juwap berdi:
– Bunı óziń aytıp tursań ba yamasa Men tuwralı saǵan basqalar ayttı ma?
35Pilat:
– Men ne yahudiymen be? Seni maǵan Óz xalqıń menen bas ruwxaniyleriń tapsırdı. Sen ne islep qoydıń? – dedi.
36Iysa juwap berip:
– Meniń Patshalıǵım bul dúnyada emes. Eger Patshalıǵım bul dúnyada bolǵanda, yahudiy basshılarınıń qolına tapsırılmawım ushın, xızmetshilerim gúreser edi. Biraq Meniń Patshalıǵım bul jerde emes, – dedi.
37– Demek, Sen patsha ekenseń-dá? – dedi Pilat.
Iysa juwap berip:
– Óziń aytqanday, Men Patshaman. Men haqıyqat haqqında gúwalıq beriw ushın tuwıldım hám sonıń ushın dúnyaǵa keldim. Kim haqıyqat tárepinde bolsa, Meniń dawısımdı esitedi, – dedi.
38Pilat Iysaǵa:
– Haqıyqat degen ne? – dedi.
Bunı aytıp bolǵannan soń, Pilat jáne yahudiylerdiń janına shıǵıp, olarǵa:
– Men Onnan hesh ayıp taba almay atırman. 39Biraq sizlerde bar bir ádet boyınsha, men hár Qutqarılıw bayramında sizler ushın bir tutqındı bosatıp beretuǵın edim. Sizler ushın Yahudiylerdiń Patshasın bosatıp beriwimdi qáleysizler me? – dedi.
40Biraq olar jáne:
– Yaq, Onı emes, Barabbanı bosat! – dep baqırıstı.
Al Barabba qozǵalańshı edi.
Currently Selected:
Yuxan 18: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
