Yuxan 19

Iysanıń ólimge húkim etiliwi

1Sonda Pilat Iysanı uslap, qamshılawdı buyırdı. 2Áskerler tikenli shıbıqlardan taj órip, Iysanıń basına kiygizdi. Sońınan Oǵan shım qızıl shapan japtı. 3Aldına kelip:

– Jasasın, Yahudiylerdiń Patshası! – dep júzine shapalaq penen urdı.

4Pilat jáne sırtqa shıǵıp, yahudiylerge:

– Mine, meniń Onnan hesh bir ayıp tappaǵanımdı sizlerdi bilsin dep, Onı sizlerdiń aldıńızǵa shıǵarıp atırman, – dedi.

5Sonda basında tikenli tajı, ústinde shım qızıl shapanı bar Iysa sırtqa shıqtı. Pilat olarǵa:

– Mine, bul Adam! – dedi.

6Bas ruwxaniyler menen olardıń saqshıları Iysanı kórgende:

– Onı atanaq aǵashqa shegelet, shegelet! – dep baqırıstı.

Pilat olarǵa:

– Onı sizler alıp ketip, atanaq aǵashqa shegeleńler. Óytkeni men Onnan hesh qanday ayıp tappay atırman, – dedi.

7Yahudiy basshıları oǵan juwap berip:

– Bizlerde nızam bar hám sol nızam boyınsha, Ol óliwi shárt. Sebebi Ol Ózin Qudaydıń Ulı dep atadı, – dedi.

8Pilat bul sózlerdi esitkende, burınǵıdan beter qorqıp ketti. 9Qaytadan sarayına kirip, Iysadan:

– Sen qay jerdenseń? – dep soradı.

Biraq Iysa oǵan juwap bermedi. 10Pilat Oǵan:

– Meniń menen sóylespeyjaqsań ba? Seni azat qılıwǵa da, atanaq aǵashqa shegeletiwge de biyligim bar ekenin bilmeyseń be? – dedi.

11Iysa juwap berip:

– Saǵan Qudaydan berilmegende, sende Meniń ústimnen hesh qanday biylik bolmas edi. Sonlıqtan Meni saǵan uslap bergenniń gúnası seniń gúnańnan awırıraq, – dedi.

12Sol waqıttan baslap, Pilat Iysanı azat etiwge tırıstı. Biraq yahudiy basshıları:

– Bul Adamdı azat qılsań, Rim imperatorınıń dostı emesseń. Ózin patsha dep ataytuǵın hár bir adam imperatorǵa qarsı boladı, – dep baqırıstı.

13Pilat bul sózlerdi esitkende, Iysanı sırtqa shıǵardı hám «Tas maydansha», evreyshe Gabbata dep atalǵan jerdegi húkim gúrsisine otırdı. 14Tayarlıq kúni, Qutqarılıw bayramınan bir kún burın saat on ekiler shamasında Pilat yahudiylerge:

– Mine, sizlerdiń Patshańız! – dedi.

15Biraq olar baqırısıp:

– Joq qıl Onı! Joq qıl, atanaq aǵashqa shegele! – dedi.

Pilat olarǵa:

– Sizlerdiń Patshańızdı atanaq aǵashqa shegeleyin be? – dedi.

– Bizlerdiń Rim imperatorınan basqa patshamız joq, – dep juwap berdi bas ruwxaniyler.

16Solay etip, Pilat Iysanı atanaq aǵashqa shegelew ushın áskerlerge tapsırdı.

Iysanıń atanaq aǵashqa shegeleniwi

(Mat 27:32-44; Mrk 15:21-32; Luk 23:26-43)

Áskerler Iysanı alıp ketti. 17Iysa Óz atanaq aǵashın arqalap, «Bas súyek ornı», evreyshe Golgota dep atalǵan jerge keldi. 18Sol jerde Iysanı hám Onıń menen birge eki adamdı atanaq aǵashqa shegeledi. Olardıń birewi oń tárepte, ekinshisi sol tárepte, al Iysa ortada edi.

19Pilat jazıw jazdırıp, onı atanaq aǵashtıń ústine ildirtti. Onda: «NASÍRALÍ IYSA – YAHUDIYLERDIŃ PATSHASÍ», – dep jazılǵan edi. 20Yahudiylerdiń kóbisi bul jazıwdı oqıdı. Óytkeni Iysa atanaq aǵashqa shegelengen jer qalaǵa jaqın edi hám bul jazıw evreyshe, latınsha hám grekshe jazılǵan edi. 21Yahudiylerdiń bas ruwxaniyleri Pilatqa bılay dedi:

– «Yahudiylerdiń Patshası» dep jazba, «Onıń Ózi: Men – Yahudiylerdiń Patshasıman, dedi», – dep jaz.

22– Ne jazajaq bolsam jazdım, – dep juwap berdi Pilat.

23Áskerler Iysanı atanaq aǵashqa shegelegennen soń, Onıń kiyimin aldı hám onı tórt bólekke bólip, hár qaysısı bir bólekten aldı. Kóylegin de aldı. Ol tigilmegen bolıp, bastan-ayaq bir pútin toqıma edi.

24Sonlıqtan áskerler bir-birine:

– Bunı jırtpayıq, shek taslayıq, kimge tússe, sol alsın, – dedi.

Bul Muxaddes Jazıwdaǵı mına sózlerdiń orınlanıwı ushın boldı:

«Kiyimlerimdi óz ara bólisti,

Lipaslarım ushın shek tasladı»#19:24 Zab 21:19..

Áskerler usı aytılǵandı isledi. 25Iysanıń atanaq aǵashınıń qasında Onıń anası, anasınıń apası, Klopanıń hayalı Máriyam hám magdalalı Máriyam turǵan edi. 26Iysa anasın hám onıń janında turǵan Óziniń súyikli shákirtin kórgende, anasına:

– Apa, mine, seniń ulıń, – dedi.

27Keyin shákirtine:

– Mine, bul seniń anań, – dedi.

Sol waqıttan baslap, sol shákirt onı óz úyine aldı.

Iysanıń jan tapsırıwı

(Mat 27:45-56; Mrk 15:33-41; Luk 23:44-49)

28Sonnan soń, Iysa hámmesiniń tamamlanǵanın bilip, Muxaddes Jazıw orınlanıwı ushın#19:28 Zab 21:16; 68:22.:

– Shóllep turman! – dedi.

29Sol jerde sirke suwına tolı bir gúze tur edi. Áskerler sorǵıshtı oǵan batırıp alıp, mayoran shóbi#19:29 Mayoran shóbi – bul nazbaygúl shóbine tuqımlas ósimlik. shıbıǵına qadadı da, Iysanıń awzına tuttı. 30Iysa onı tatıp kórip:

– Orınlandı, – dedi de, basın iyip, jan tapsırdı.

31Bul tayarlıq kúni#19:31 Tayarlıq kúni – juma kúni. edi. Erteńgi kún Qutqarılıw bayramına tuwra keletuǵın ayrıqsha Shabbat kúni#19:31 Shabbat kúni – shembi kúni. bolǵanlıqtan, yahudiy basshıları denelerdi atanaq aǵashta qaldırıwdı qálemedi. Olar Pilattan shegelengenlerdiń ayaqların sındırıp#19:31 Ayaqların sındırıp – olardıń tezirek óliwi ushın solay islengen., denelerdi alıp taslawdı soradı. 32Sonda áskerler barıp, Iysa menen atanaq aǵashqa shegelengenlerdiń dáslep birinshisiniń, sońınan ekinshisiniń ayaqların sındırıp tasladı. 33Biraq Iysanıń qasına kelgende, Onıń álle qashan jan tapsırǵanın kórip, ayaqların sındırmadı. 34Bunıń ornına, áskerlerdiń biri Onıń búyirin nayza menen testi. Sol waqıtta-aq qan menen suw aǵıp shıqtı. 35Bunı kórgen adamnıń gúwalıǵı haqıyqat. Ol óziniń haqıyqatlıqtı aytıp atırǵanın biledi. Sizler de iseniwińiz ushın ol gúwalıq berdi. 36Bulardıń hámmesi: «Onıń hesh bir súyegi sınbaydı»#19:36 Shıǵ 12:46; San 9:12; Zab 33:21., – degen Muxaddes Jazıwdaǵı sózlerdiń orınlanıwı ushın boldı. 37Muxaddes Jazıwdıń basqa bir jerinde: «Ózleri nayza menen tesken Adamǵa qaraydı»#19:37 Zxr 12:10., – delingen.

Iysanıń qábirge qoyılıwı

(Mat 27:57-61; Mrk 15:42-47; Luk 23:50-56)

38Bunnan soń, arimatiyalı Yusup Iysanıń denesin alıp ketiw ushın Pilattan ruxsat soradı. Yusup Iysanıń shákirti edi. Biraq ol yahudiy basshılarınan qorqqanlıqtan, bunı jasırıp júrgen edi. Pilat ruxsat bergennen soń, Yusup barıp, Iysanıń denesin alıp ketti. 39Burın túnde Iysaǵa kelgen Nikodim de júz qadaqqa#19:39 Júz qadaq – júz «litra» (grek awırlıq ólshemi). Shama menen 34 kg. jaqın mirra#19:39 Mirra – xosh iyisli shayır. menen aloe aralaspasın alıp keldi. 40Yahudiylerdiń jerlew dástúri boyınsha, olar Iysanıń denesin xosh iyisli zatlar sebilgen zıǵır kepinge oradı. 41Iysa atanaq aǵashqa shegelengen jerde bir baǵ bolıp, bul baǵdıń ishinde ele hesh kim qoyılmaǵan bir jańa qábir bar edi. 42Bul kún yahudiylerdiń tayarlıq kúni bolǵanlıqtan, qábir jaqın jaylasqanı sebepli, olar Iysanı sol jerge qoydı.

Currently Selected:

Yuxan 19: QrqMK22

Highlight

Copy