Luka 17
17
Kamm kaah shigbis, kihh pihhzeenn kihh dhakk'shin
Mat 18:6,7,21,22; Mar 9:42
1Jesu satt zheppkamm keeniy mwopp le, “Nyi a ching tihh v'ur zhwaan'pee w'u kihh mak l'e tihh gurum mwopp sh'in shigbis diy mwopp ja, dhangg mak kihh gwooh zhwaan'pee ni mwopp ja lhiwaa a nyi. 2Nyi p'ee rettmett gwoh ni tihh dyinn mwopp rad a gag m'ee panggfiin tookk nyi mwopp meng nyi dhighin kur'am, kad mihh'pee kihh l'e tihh kooh a kihmeh dhighin zhepp mhize mwopp sh'in shigbis. 3Wu kihh kangg kihh kaah wuh rih-rett.
“Mihh em'nangg sh'in wu'bis, bhi ghi tepbhelepp nyi; mihh tu'wapp, bhi ghi fwa nyi.#Mat 18:15 4Kooh dyinn sh'in wu'bis ni gha a yit pwoghovel p'ar puus w'u kihmeh, dhangg kihh shikhir baa'ji nhighin kihhsheh yit pwoghovel kihh satt gha le, ‘Ih tu'wapp,’ bhi ghi fwa nyi.”
5Bhi zhepp'lop ni mwopp satt Daah Jesu le, “Gwoohyon, ghi l'e tihh pihhzeenn keemu bhall mett mihhse diy 'y.”
6Bhi Daah Jesu pring mwopp satt le, “Ai mihh wunn kihh pihhzeenn w'u kaa reb y'ee sheep mostad se kyekk maah, bhi wunn p'ee mak satt gag tihng lun mhize wu le, ‘Yi paar shik lhiyakhal bihze, dum yi kopp shik lhidharr dhighin kur'am,’ bhi nyi p'ee sh'in bii w'u wu satt seh.
7“A meeh muh wu'rangg w'u kadmihh nyi kihh kromm w'u phi sak maarr riy, h'aa kooh nyi a phi tapp tihm nyi oh, dhangg kromm ni tong yaghal, h'aa kooh tong a kih tapp baa'ji tuluh, bhi kyed gwoh ni diy satt kromm ni le, ‘Ghi tong tihh ghi so soh diy abet,’ a'ng? 8Kooh lee! Guluh ni a p'ee satt kromm ni le, ‘Ghi shed soh'teer maan'nah ghi ji kihh nyi a'n ih so, ih shwaa, dhangg wu'gha ghi so mag'gha dhak ser'seh.’ 9Bhi kyed guluh ni diy cham lappsaamm p'ee dhakk w'u kromm ni sh'in seh, w'u a nyi a dihng dhakk khi kromm ni mihngg? 10Pee'mhinyi, bhi wu'wunn zag, mihh wu sh'in kapp bii w'u Naan le wunn sh'in, bhi w'u satt wu le, ‘Munn a kromm w'u mu mak mee'bii mou, mu sh'in muh a bii w'u Naan le munn shin kyekk.’ ”
Jesu bar mhilokhom mwopp kaghapaad
11Kaarooh Jesu arr mwaan p'ee k'aa dum Urshalima, bhi waa arr kihnaar yill Samariya kihh yill Galili. 12Kaarooh ji p'ee dhel m'ee kwangyill shi, bhi m'ee mhilokhom mwopp kaghapaad mwopp naah nyi. Bhi mwopp dyarrang zhong-zhong, 13mwopp peet satt sh'i dhekheh ruh bhall-bhall le, “Daah Jesu ooiy! Ghi naah chikhirr keemu oou!”
14Kaarooh naah mwopp, bhi satt mwopp le, “Wu dum wu dyingg shuk prist tihh mwopp dyee wunn diy oou!” Kaarooh mwopp arr dum, bhi lokhom khimwopp kyes, mwopp pwat wu'bhangg.#Lev 14:1-32
15Bhi kihmeh dhighin mwopp, kaarooh naah kad ri kad kakhamm, bhi baa'ji, kihh kwoob Naan sh'i waaw chapp-chapp. 16Bhi mett kurum yill kih fr'um niy tekhem Jesu, shup yit niy yill tihh kihh plang nyi diy. Gwoh mhizeh ni gyet wu'nyi a m'ee Gu-Samariya. 17Bhi Jesu nang le, “Dhok a gurum w'u dyinn kaghapaad seh mwopp kad kakhamm, mwopp pwat wu'bhangg e'? Dheeh mwooh pwoghofeerr seh wu'mwopp dheeh a nihyeh? 18Kan kooh kihmeh dhighin mwopp baa'ji tihh kwoob Naan diy maah? Dheeh a gwoh baah wu'nyi a laa'yill se mou, a nyi kyekk baa'ji.” 19Bhi Jesu satt gwoh ni le, “Yakhal yill, mwan gha dhak, pihhzeenn keegha bar gha.”
Ji khi dhenglong khi Naan
Mat 24:23-28,37-41
20Par'meeh puus shi, bhi m'ee Farisiiy mwopp nang phi Jesu kooh kyed dhenglong khi Naan ni p'ee ji a phirangg oh. Bhi Jesu lapp mwopp le, “Baah dhenglong khi Naan ni p'ee ji a shi'rooh wunn phi lang'bhongg ji khinyi seh mou. 21H'aa kooh a gurum mwopp p'ee satt le, ‘Wu naah, nyi se!’ Kooh ‘Nyi seh!’ mou. P'ee dhenglong khi Naan ni baa a naar wu mwasseh kihhshe se.”
22Bhi Jesu satt zheppkamm keeniy mwopp le, “Pee kihh ji w'u wunn p'ee p'ar chaa wu le dyinn wunn naah kooh a puus kihmeh kyekk dhighin yiiy baa'ji khi L'aa khi Gurum, dhangg wunn p'ee naah nyi mou. 23Pakk gurum mwopp p'ee kihh satt wunn le, ‘Nyi seh!’ Kooh, ‘Nyi se!’ Tapp wu pwat wu duam dang mwopp orr nyi mou. 24P'ee kaa naan'tihngg kihh melleppee koghob phikihtihngg wu'zeh dum putt koghob wu'zeh se, bhi L'aa khi Gurum p'ee kwed a kihhsheh zag p'ar baa'ji keeniy.
25“Dhangg nyi a ching tihh L'aa khi Gurum ni shwaazheell v'ur bii mwopp dhess, yakhal gurum w'u gangg mhize mwopp shiih kihh nyi dhangg. 26Mwoorr kaa gyet mwopp sh'in sh'i gangg mhi Nuhu seh, bhi nyi p'ee kwed a kihhsheh zag sh'i gangg mhi ji khi L'aa khi Gurum.#Shb 6:5-8 27Gyet gurum mwopp kaah so-kihh-shwaa; mwopp kaah lapp shwarab yakhal mwopp kihh shenn zhepp ruh wu'raapp dyik, harr p'ar puus w'u Nuhu dhel diy dhighin kong'am, bhi chlim'am ji twa mwopp kwellelleh.#Shb 7:6-24
28“Gyet nyi a kihhsheh zag sh'i gangg mhi Lot. Gyet gurum mwopp kaah so-kihh-shwaa; mwopp kaah v'ur w'oor; mwopp kaah kopp dhebhenn kihh dyak luh. 29Dhangg p'ar puus w'u Lot yet khishikhitt Sodom diy, bhi Naan wurr wus w'u roob kihh wuspyaah lhisam phikihtihngg kaa fwan se, sam twa mwopp kwellelleh.#Shb 18:20-19:25
30“Nyi p'ee kwed a kihhsheh zag p'ar baa'ji khi L'aa khi Gurum. 31Gwooh tihngg kih daghabluh, dhangg looh khinyi dhighin luh, bhi tapp sam dheeh dhel luh p'ee kok looh ni mou. A kihhsheh zag, tapp gwooh dhighin bhokk dheeh baa'ji tuluh p'ee m'ang mee'bii mou.#Mat 24:17,18; Mar 13:15,16 32Wu kakkder bii w'u gyet kad mat khi Lot!#Shb 19:26 33Koohweeh w'u kihh t'ang kyeer seen niy bhi nyi p'ee bhalangdheng, dhangg koohweeh w'u bhalangdheng seen niy bhi nyi p'ee kyeer nyi.#Mat 10:39; 16:25; Mar 8:35; Luk 9:24; Yoh 12:25 34Ih kihh satt wunn, khipar mhizeh ni; bhi kihh mak kwed a rooh gurum vel p'ee kwed kihh pee'saam wu'khimhi, bhi mwopp p'ee m'ang meeh, mwopp yet wu'zeh. 35Shwarab mwopp vel p'ee kwed phi eesfiin kihshag, bhi mwopp p'ee m'ang m'ee, mwopp yet wu'zeh. 36Gurum vel p'ee kwed yaghal bhokk wu'khimhi, bhi mwopp p'ee m'ang m'ee mwopp yet wu'zeh.” #17:36 Pakk r'an w'u gyet mwopp kihh t'ang w'u 36 mou.
37Bhi zheppkamm khinyi mwopp nang phi nyi le, “Gwoohyon, mwopp p'ee sh'in bii mihhse ni a nihyeh?” Bhi Jesu lapp mwopp le, “Pee w'u mihh kumm-lwaa diy, bhi yer'es mwopp kihh chakk duam kwakhar a nhighin.”
Currently Selected:
Luka 17: Chakfem
Highlight
Share
Copy
Want to have your highlights saved across all your devices? Sign up or sign in
©️2022 Luke Initiative for Scripture Translation
