Matiw 12

Jesu a Gwoohyon kaah Puus Nookdyi

(Mar 2:23-28; Luk 6:1-5)

1Sh'i pee mhizeh ni bhi Jesu kihh zheppkamm keeniy mwopp kaah mwaan, bhi mwopp waa arr dhighin pakk m'ee bhokk dhebhenn p'ar m'ee Puus Nookdyi. Kaarooh kussum laah zheppkamm khinyi bhi mwopp y'aa challang pakk segher dhebhenn ni mwopp kihh shumm. 2Kaarooh pakk Farisiiy mwopp naah kihhsheh bhi mwopp satt nyi le, “Hah, ghi naah s'ang! Zheppkamm keegha mwopp phi sh'in bii w'u waar'shin p'ar Puus Nookdyi 'y.”

3Jesu pring mwopp satt le, “Kan wu khi cham t'ang bii w'u Dauda gyet sh'in kaarooh kussum laah nyi kihhsheh kihh mwooh dang niy maah? 4Dum Luh khi Naan bhi wu'nyi kihh mwooh dang nyi mwopp so gutt w'u mwopp kihh angg l'e kihkyeen Naan; w'u a gutt w'u w'aar s'o mwopp, seeh a prist mwopp kyekk kihh so. 5H'aa baah wu khi cham t'ang dhighin W'aar khi Naan le prist mwopp kihh tep w'aar Puus Nookdyi kadmihh mwopp dhakk dhighin LuhNaan bhi nyi a m'ee shigbis mou ayeh? 6T'o, ih kihh satt wunn, m'ee gwooh mett LuhNaan ni se. 7Kaddyinn wu manshiiy pwoo w'u satt le, ‘Ih kihh dh'om tihh wu sh'in a kaahdhoonn, baah a wus'biizhukhum mou,#Hos 6:6’ bhi baah dyinn wunn p'ee shem gurum w'u sarrpaad mhize mwopp mou. 8P'ee a'n L'aa khi Gurum a Gwoohyon kaah Puus Nookdyi.”

Jesu bar gurum kih puus Nookdiy

(Mar 3:1-6; Luk 6:6-11)

9Kaarooh Jesu yet pee mhizeh, dum dhel dhighin Luh'kang khimwopp, 10bhi m'ee gurum nhighin w'u m'ee sarr nyi a w'u shi-shwaa. A nyi seh bhi m'ee gurum mwopp kihh t'ang tihh mwopp kad Jesu diy y'aa kihh shig tep w'aar, bhi mwopp nang phi nyi le, “Nyi dihhreh kihh W'aar khi Naan tihh mwopp bar gurum p'ar Puus Nookdyi aa'?”

11Bhi Jesu pring mwopp nang le, “Mihh meeh wuh kihh tihm dhangg tihm ni taah kwal'kong p'ar Puus Nookdyi, bhi diy shang tihm ni s'ang? 12Ai gurum kihh kyeenn mett tihm fwaiy. Pee'mhinyi bhi nyi dihhreh tihh mwopp sh'in dhakk'wurett p'ar Puus Nookdyi.”

13A nyi seh bhi Jesu satt gwooh sarr nyi a w'u shi-shwaa seh le, “Zan sarr gha ni.” Bhi gwoh ni zan sarr niy, bhi sarr nyi ni kakhamm kihhdihng'dihng b'aa ji kop sat kaa wu'zeh. 14Weett kihhsheh bhi Farisiiy mwopp pwat y'aa kukhul-bhellepp p'ee tih'tu Jesu fyaad.

Jesu a gudhakk w'u Naan blihp

15Jesu man bii w'u mwopp kukhul kaah niy seh bhi dhel dum niy m'ee pee wu'dyikk. Dw'uu gurum dhess mwopp dumdang nyi, bhi bar mhi'shwal w'u dhighin mwopp weett. 16Kihh satt kihhkangg mwopp le tapp nw'aa diy fwa-bhellepp kaah niy mou. 17Bii mihhse sh'in a tihh pwoo w'u gyet Naan satt sh'i pwoo khi Ishaya gam diy, wu satt le:

18“Wu naah Gudhakk keena w'u ih blihp,

Gudhakk keena w'u ih kihh wall nyi,

w'u ih kihh klihngshangg kihh nyi pwetd;

a'n p'ee l'e Riin keena kaah nyi,

Nyi p'ee shwanzeenn Seghen'gurum mwopp.

19Baah nyi p'ee sh'in koghor, h'aa kooh lapp dhekheh niy mou;

Baah gwooh p'ee klihng kihh eep dhekheh niy kih tihleng-arr mou.

20Baah nyi p'ee sihkhitt raz w'u baa nwakhal tep mou,

yakhal baah nyi p'ee sihkhitt zaall-wus w'u dheeh kihh yakhal a dyeell kyekk pid mou,

harr seeh l'e tihh zeenn sokokhorong diy.

21Seghen'gurum mwopp kihhdihng p'ee le'pan a dhighin shumm nyi.”#12:21 Ishaya 42:1-4

Farisiiy mwopp le Jesu kihh sh'in dhakk a sh'i bhall khi Beelzebub

(Mar 3:20-30; Luk 11:14-23)

22M'ee gurum mwopp ji kihh m'ee guvughum w'u a pwoobhipp yakhal mumullung dhighin nyi Jesu, bhi bar nyi harr mak kadpwoo yakhal naahpee. 23Bii ni aa'phi gurum w'u mwopp nhighin weett, bhi mwopp kihh nang phishag le, “Diy tong a gwoh mhize ni a Em kih Dauda shi bwaatt, wunn'?”

24Dhangg kaarooh Farisiiy mwopp klihng kihhsheh bhi mwopp satt le, “Ai gwoh mhize ni kihh pwat kihh mumullung mwopp a sh'i maa'pee khi Beelzebub, Miskakhamm khi mumullung mwopp.”

25Jesu man p'an khimwopp bhi satt mwopp le, “Kapp dhenglong w'u shapkaah rah y'aa kob kihh sat, bhi nyi p'ee ky'em; yakhal kooh a dhenglong kooh tuluh wu'aneeh w'u shapkaah dhel dhighin bhi nyi p'ee dharr mou. 26Ai mihh Shetan diy kihh put kihh Shetan, bhi shi-shap shin seh, y'aa kob kihh shin. Mihh sh'in kihhsheh, bhi shitt a rangg tihh dhenglong khinyi dharr diy? 27Mihh kan wu'an ih kihh pwat kihh mumullung mwopp a sh'i maa'pee khi Beelzebub, dheeh zheppkamm keewu mwopp kihh pwat kihh mwopp a sh'i wuyeh? Pee'mhinyi bhi a mwopp sh'i kaah ruh p'ee p'ar kwed a mhi-togdyeell wunn kaah pwoo mihhse ni. 28Dhangg mihh a'n ih kihh pwat kihh mumullung mwopp a sh'i Riin khi Naan, ai bhi kihh kamm le dhenglong khi Naan baa ji-ji putt naar wu.

29“H'aa diy shitt a rangg bhi gurum diy mak dhel luh khi m'ee kokhorong gurum harr fw'oom looh khinyi, kad b'aa dyi-dyan nyi dhangg mou? Mihh mak dyan nyi, bhi nyi p'ee mak fw'oom luh khinyi dhak ser'seh.

30“Gwooh baah nyi kihshag kihh a'n mou bhi nyi a kob kihh a'n; yakhal gwooh baah nyi chakk bii dang na mou, bhi nyi a phi b'er nyi chiit. 31Pee'mhinyi ih kihh satt wunn, kooh a shigbis kooh kas Naan wu'rangg bhi Naan p'ee fwa nyi; dhangg gwooh kas Riin Wu'bhangg bhi baah Naan p'ee fwa nyi gwoh ni mou. 32Koohweeh w'u mihh satt pwoo wu'bis kaah nah L'aa khi Gurum bhi Naan p'ee fwa nyi gwoh ni; dhangg gwooh mihh satt pwoo wu'bis kaah Riin Wu'bhangg bhi Naan p'ee fwa nyi gwoh ni mou, kooh dhighin yill mhize, kooh dhighin yillpwooh w'u kihh ji.

33“A bii vel: kooh wu l'e tihh tihngsheep ni dhen diy a wu'rett, bhi zhepp khinyi mwopp p'ee kwed a wu'rett zag, h'aa kooh wu l'e tihh tihngsheep ni dhen diy a wu'bis, bhi zhepp khinyi mwopp p'ee kwed a wu'bis zag. 34Wunn zhepp khi zom wu'bis! Diy lukk a rangg bhi wunn w'u a gurum wu'bis wu mak satt mee'bii wu'rett ayeh? P'ee bii wu gurum kihh satt weett kihh put a dhighin bii w'u gam phitukhup gwoh ni. 35Gurum wu'rett kihh put kihh bii wu'rett a dhighin bii wu'rett w'u kihh akk dharr dhighin phitukhup niy. A kihhsheh zag, gurum wu'bis kihh put kihh bii wu'bis a dhighin bii wu'bis w'u kihh akk dharr dhighin phitukhup niy. 36T'o, ih kihh satt wunn, p'ar Puus Dyeell bhi koohweeh p'ee samkihshiiy kapp pwoo wu'buu w'u cham satt nyi. 37Dyeell p'ee mett kaah gha kooh y'aa gha a kaah pwoo w'u ghi kihh l'aa.”

Kattshiiy sh'i Yunana

(Mar 8:11-12; Luk 11:29-32)

38Pakk m'ee Farisiiy kihh Mhikamm-w'aar mwopp satt Jesu le, “Gukamm, mu kihh t'ang tihh ghi sh'in m'ee bii'kattshiiy munn.”

39Bhi Jesu pring mwopp satt le, “Gangg wu'bis w'u a gangg khi mhigaa mwopp kihh t'ang naah a m'ee bii'kattshiiy. Dhangg baah Naan p'ee pihh m'ee bii'kattshiiy mwopp dhel kih mhi Yunana gu-wanggshiiy mou. 40P'ee kaarooh gyet Yunana shwat witt kunn kihh t'eer kunn bwut gag sherep seh, bhi a'n L'aa khi Gurum p'ee sh'in t'eer kunn kihh witt kunn zag dhighin tukhun. 41P'ar Puus Dyeell, bhi gurum w'u gyet Nenevi mwopp p'ee yakhal dyarrang dyeell kihh gurum w'u gangg mhize ni mwopp harr mwopp trep mwopp, p'ee gyet wu'mwopp tu'wapp kaarooh mwopp klihng pwooNaan w'u Yunana satt. Dhangg wu naah, m'ee gwooh mett Yunana se. 42P'ar Puus Dyeell, bhi Matlong khi yill w'u Koghob Wu'bhakk p'ee yakhal dharr dyeell kihh gurum w'u gangg mhize ni mwopp harr tep mwopp, p'ee gyet wu'nyi tong bhakk yill w'u zhong-zhong k'aa tihh klihng yak'soon khi Miskakhamm Solomon diy. Dhangg wu naah, m'ee gwooh mett Solomon se.

Riin wu'bis kihh mak b'aa ji

(Luk 11:24-26)

43“Mihh riin wu'bis put dhighin gurum bhi kihh mw'aan dhel dum dhighin v'ur yill'fii tihh lyap pee w'u tihh tong diy. Mihh kad wonn, 44bhi kihh satt sh'in le, ‘A'n p'ee baah dum nah luh keena w'u deh ih put diy seh.’ Mihh ji kad luh ni noott menguh, yakhal kad nyi a w'u fih-fett bhangg-bhangg, mwopp dhakk dhen, 45bhi nyi p'ee dum ja kihh m'ee mhinin riin wu'bis dyi mwopp pwoghovel, w'u wu'mwopp mett wu'nyi nyangg; bhi mwopp p'ee dhel tong dhighin gwoh ni; a kihhsheh bhi kyess khi gwoh ni p'ee bis mett sh'ee khinyi. Nyi p'ee kwed a kihhsheh kihh gurum w'u gangg wu'bis mhize mwopp.”

Nhikhin khi Jesu kihh emnhikhin nyi mwopp

(Mar 3:31-35; Luk 8:19-21)

46Kaarooh Jesu kudyi kaah kadpwoo, bhi nhikhin khinyi kihh emnhikhin nyi mwopp ja dyarrang kihtekhell, mwopp kihh t'ang kadpwoo kihh nyi. 47Bhi m'ee gurum satt nyi le, “Nhikhin keegha kihh em'nangg mwopp kihh dyarrang kihtekhell, mwopp kihh t'ang kadpwoo kihh gha 'y.”

48Bhi Jesu pring gwoh ni le, “A wuyeh a n'aah, a mhiranggyeh mwopp a em'naa?” 49Bhi dyingg sarr niy kih zheppkamm keeniy mwopp, bhi satt le, “A mwopp mhize a n'aah mwopp kihh em'naa mwopp. 50P'ee koohweeh w'u kihh sh'in bii w'u Daa w'u tihngg kih dhengNaan kihh dh'om, bhi a nyi a em'naa, a nyi a wu'reep na, a nyi a n'aah zag.”

Currently Selected:

Matiw 12: Chakfem

Highlight

Copy