Matiw 13
13
Shumpwoo kaah g'u fwa sherem
(Mar 4:1-9; Luk 8:4-8)
1P'ar mihhseh ni bhi Jesu yakhal tuluh dum tong pwoo kur'am. 2Dw'uu gurum mwopp ja okhor nyi pwetd, harr dhel tong dhighin m'ee kong'am dheeh gurum ni wu'mwopp dheeh dyarrang pwoo'khing. 3Bhi Jesu sh'in kamm mwopp dhess sh'i shumpwoo le, “M'ee gumaarr gyet dum fwa sherem keeniy. 4Kaarooh nyi kaah fwa sherem ni, bhi pakk chaat pwoo arr, bhi bul mwopp chakk sherem ni mwopp dyallang. 5Pakk sherem ni mwopp chaat kih gwakhapp-laar, pee w'u baah mwopp kad loonyill diy pwetd mou. Bhi mwopp shikhir klakk bhee pee'rooh loonyill ni zhurruk mou. 6Dhangg kaarooh puus finn yit ra k'aa, bhi tihrr-puus y'aa mwopp, bhi mwopp shikhir fyaa, p'ee baah mwopp kad pee zhwal seen mou. 7Pakk sherem ni mwopp chaat dhighin ghir, bhi ghir ni mwopp nan, harr mwopp shwaa bhall khimwopp. 8Dhangg pakk sherem dhebhenn ni mwopp chaat kih loonyill wu'rett, bhi mwopp la zhepp, pakk dhaa kihmeh-kihmeh, pakk laar peemeh-peemeh, pakk laar kunn-kunn. 9Gwooh kihh kom klihngpee, bhi klihng oou!”
10Zheppkamm khinyi mwopp ja nang phi nyi mwopp le, “A mihyeh l'e bhi ghi kihh kadpwoo kihh gurum ni mwopp a sh'i shumpwoo ayeh?”
11Bhi Jesu lapp mwopp satt le, “Naan pihh m'an mhi zokk mhi dhenglong keeniy a wunn, baah a mwopp mou. 12Gwooh kihh bii, bhi mwopp p'ee waa pihh bii dyi gwoh ni dyikihh, bhi nyi p'ee kwed kihh bii dhess. Dhangg gwooh noott bii, bhi kooh a bii w'u nyi kihh nyi seh bhi mwopp p'ee y'aa nyi lapp kih nyi. 13Bii w'u l'e tihh ih kihh kadpwoo kihh mwopp a sh'i shumpwoo, a tihh kaa nyi a rih-ran dhighin pwoo khi Naan se le:
“ ‘Kooh bhalang phirooh mwopp kihh naahpee, dhangg mwopp naah mou,
yakhal mwopp kihh klihng dhangg baah mwopp klihng kooh mwopp manshiiy nyi mou.’
14“Ai wanggshiiy khi Ishaya gam kaah gurum mihhse ni mwopp chipp, w'u kihh satt le,
“ ‘Wunn p'ee klihng yid klihng nyi, dhangg wunn p'ee manshiiy nyi mou;
wunn p'ee naah yid naah nyi, dhangg wunn p'ee dyeeshiiy nyi mou.
15P'ee phitukhup gurum mhize ni mwopp baa khikhil,
yakhal kom mwopp lapprau
yakhal mwopp pyat yit ru weett,
tapp'baa mwopp kihh naah kihh yit ru,
kooh mwopp klihng kihh kom ru
kooh mwopp manshiiy nyi dhighin phitukhup ru
harr mwopp shikhir kihpee na tihh ih bar mwopp diy.’#13:15 Ish 6:9, 10
16“M'ee rettyit mug bhi! wunn w'u yit wu naah yakhal kom wu klihng bii mihhse. 17P'ee ih kihh satt wunn, gyet mhi-wanggshiiy kihh mhi-shigrett mwopp dhess kihh t'ang naah bii w'u wunn phi naah mwopp se, dhangg baah mwopp naah mou; yakhal mwopp kihh t'ang klihng bii w'u wunn phi klihng mwopp se dhang baah mwopp klihng mou.
18“T'o, wu lang kom wu tihh wu klihng shiiy shumpwoo kaah g'u fwa sherem ni diy. 19Mihh gurum diy klihng Pwoo kaah Dhenglong, dhangg baah manshiiy pwoo ni mou, bhi Shetan kihh ji yak sherem w'u mwopp fwa dhighin phitukhup gwoh ni lapp sh'i bhall. A mihhse a shiiy khi sherem w'u chaat pwoo arr. 20Shiiy khi sherem w'u chaat kih gwakhapp-laar a gwooh klihng pwoo khi Naan, bhi dhoghol lapp nyi sh'i mhirakhatt weett. 21Dhangg pee'rooh pwoo ni kad pee p'ee zhwal seen dhighin phitukhup gwoh ni mou, bhi gwoh ni kihh dharr pwetd mou. Mihh m'ee l'uk kooh zheell diy yakhal kaah pwoo ni, bhi gwoh ni kihh shikhir pal waa'baa. 22Shiiy khi sherem w'u chaat dhighin ghir a gwooh dhoghol klihng pwoo khi Naan ni weett, dhangg v'ur annshik p'ee bii mhi yill mhize, kihh zhwaan'pee mhi long mwopp mett bhall mhi pwoo khi Naan w'u gwoh ni klihng seh, harr baah pwoo ni putshiin mou. 23Shiiy khi sherem w'u chaat kih loonyill wu'rett a gwooh klihng pwoo khi Naan ni yakhal manshiiy nyi. A nyi kihh sh'in dhakk'wurett kaa dhebhenn w'u pakk kihh la y'ee dhaa kihmeh-kihmeh, kooh laar peemeh-peemeh, kooh laar kunn-kunn mett bii w'u deh mwopp fwa seh.”
Shumpwoo kaah alkama kihh kihn alkama
24Jesu satt m'ee shumpwoo dyi mwopp le, “A'n p'ee kammshiiy dhenglong khi Naan a sh'i m'ee gwooh dhoghol kopp sherem alkama wu'rett bhokk niy. 25Dhangg kaarooh gurum weett mwopp rwa s'aam khipar, bhi m'ee wu'kob gwoh ni teer dum kopp sherem kihn alkama naar alkama ni, bhi dhel niy. 26Kaarooh alkama ni mwopp nan, y'aa shwat y'ee, bhi kihn alkama ni wu'mwopp zag shwat shoolooh dyarrang seh.
27“Mhidhakk khi guluh ni mwopp dum nang phi nyi le, ‘Gwoohyon, dhok deh ghi kopp a sherem shwaahluh wu'rett kyekk bhokk gha 'y? Dheeh kihn alkama mhize mwopp tong a nihyeh pwat diy?’
28“Guluh ni lapp mwopp le, ‘A m'ee wu'kob nah sh'in bii mihhseh ching.’
“Bhi mhidhakk ni mwopp nang phi guluh ni le, ‘Ghi kihh dh'om tihh mu dum mu prap kihn alkama ni mwopp lhiba bwaatt?’
29“Bhi guluh ni lapp mwopp satt le, ‘Haiyou, mee'meehseh mihh wunn kaah shwat kihn alkama ni, bhi wunn p'ee mak prap alkama ni mwopp dang mwopp. 30Wu yet mwopp nan nhighin kihhsheh dangshag harr tarr l'ee alkama ni dhangg. P'ar w'u mihh mwopp yakhal l'ee alkama ni diy bhi a'n p'ee satt mhi'lee alkama ni mwopp ih le mwopp shee chakk a kihn alkam ni kwap l'e kihshag p'ee shaan kihh wus, dhangg mwopp l'ee alkama ni dhak mwopp dum l'e dhighin dyaarr.’ ”
Shumpwoo kaah y'ee sherem mostad kihh pin'shaan
(Mar 4:30-32; Luk 13:18-21)
31Jesu waa satt m'ee shumpwoo dyi gurum ni mwopp le, “A'n p'ee kammshiiy dhenglong khi Naan a sh'i reb sherem mostad, w'u m'ee gurum m'ang dum kopp bhokk niy. 32Kooh bhalang phirooh sherem mostad a sherem w'u katmett kakhar sherem mwopp weett, weett kihhsheh bhi mihh yon, bhi kihh kwed a tihngg w'u mett kakhar dyeen sheep w'u mwopp kihh kopp bongg. Kihh yon put tihngsheep w'u harr bul mwopp kihh ja l'e liz dhighin.”
33Jesu waa satt m'ee shumpwoo diy mwopp vitt le, “A'n p'ee kammshiiy dhenglong khi Naan ni a sh'i pin'shaan w'u m'ee mat roob dhighin gag loonfiin bhi t'en loonfiin ni dhen, harr pin'shaan ni l'e tihh loonfiin ni shaan dumkang.”
34Jesu satt bii mihhse mwopp weett gurum ni mwopp a sh'i shumpwoo; baah mee'bii w'u satt mwopp kad baah a sh'i shumpwoo mou. 35A kihhsheh bhi pwoo w'u gyet m'ee gu'wanggshiiy satt gam, pwoo w'u satt le,
“A'n p'ee kadpwoo a sh'i shumpwoo,
A'n p'ee yak bii w'u zih-zok phi w'u yill ni shee diy.”#13:35 KoogNaan 78:2
Jesu yakshiiy shumpwoo kaah kihn alkama
36Jesu yakhal yet dw'uu gurum ni mwopp bhi dhel dum dhighin luh. Zheppkamm khinyi mwopp ja kihpee nyi, mwopp satt nyi le, “Gwoohyon, ghi yakshiiy shumpwoo kaah kihn alkama w'u mwopp kopp dhighin bhokk seh munn.”
37Bhi pring mwopp satt le, “Gu kopp sherem wu'rett ni a L'aa khi Gurum. 38Bhokk ni a yill mhize, sherem wu'rett ni a zhepp khi dhenglong ni mwopp. Kihn alkama ni a zhepp khi Gwoohbis. 39Wu'kob g'u kopp sherem wu'bis ni mwopp a Shetan. Tarr l'ee alkama a kyess khi yiiy w'u mwasseh; mhi'dyiip ni mwopp a mhi'lop khi Naan.”
40“Chiitt kaa mwopp kihh prap kihn alkama mwopp shaan kihh wus se, bhi nyi p'ee p'ar kwed a kihhsheh zag sh'i kyess khi yiiy w'u mwasseh. 41L'aa khi Gurum p'ee lop mhi'lop keeniy mwopp bhi mwopp p'ee prap kapp bii wu kihh l'e shigbis, kihh kapp mwooh kihh sh'in dhakk'wubis, lhi'ba dhighin dhenglong keeniy. 42Mhi'lop khi Naan mwopp p'ee kor mwopp dhighin gag blam'wus, pee w'u mwopp p'ee nwang wall diy harr mwopp kihh shum aghaz ruh. 43Dheeh mhi-shigrett wu'mwopp p'ee bhanggpee sakk-sakk kaa puus se dhighin dhenglong khi Puup ru. Gwooh kihh kom klihngpee bhi klihng.
Shumpwoo kaah biilong w'u zok sat
44“A'n p'ee kammshiiy dhenglong khi Naan ni a sh'i m'ee biilong w'u kihh zok sat dhighin m'ee maarr, dhangg baah menguh man mou. Kaarooh m'ee gurum dum k'aa dyikihh bhi zok orr nyi kihh gurum mwopp. A nyi seh bhi dum seett kihh kapp bii w'u riy kihh nyi sh'i mhirakhatt, bhi dum seett maarr mhizeh ni.
45“Dyi zag, a'n p'ee kammshiiy dhenglong khi Naan ni a sh'i m'ee gu'woor w'u phi lyap m'ee pangg'krhim w'u rih-rett. 46Kaarooh g'ung kad meeh w'u krhim pwetd, bhi dum seett kihh kapp bii w'u riy kihh mwopp bhi dum seett pangg'krhim mhizeh ni.
Shumpwoo kaah tenggsherep
47“Harr vitt, a'n p'ee kammshiiy dhenglong khi Naan ni a sh'i tenggsherep w'u mwopp meng lhisam dhighin a'm, bhi pwoorr kooh sherep wu'kaarangg yak. 48Kaarooh tenggsherep ni gam bhi mhi-yaksherep ni mwopp del lhi'kaa phi'khing, bhi mwopp kwangg yill, mwopp y'aa wakharr sherep wu'rett mwopp l'e dhighin shikkah, dhangg mwopp kor sherep wu'bis ni mwopp. 49Nyi p'ee p'ar kwed a kihhsheh sh'i kyess khi yiiy w'u mwasseh. Mhi'lop khi Naan mwopp p'ee sam wangg gurum wu'bis lhi'baa naar mhi-shigrett mwopp. 50Bhi mwopp p'ee pwoorr mwoohbis ni mwopp kor dhighin gag blam'wus, pee w'u mwopp p'ee nwang wall diy harr mwopp kihh shum aghaz ruh.”
51Jesu nang phi zheppkamm keeniy ni mwopp le, “Wu manshiiy bii w'u ih yak wunn se weett aa'?”
Bhi mwopp lapp nyi mwopp le, “Ee'h.”
52Bhi satt mwopp le, “Kapp gukamm W'aar mhi Musa w'u mwopp kamm pwookaah dhenglong khi Naan nyi rih-rett, bhi nyi p'ee dhen a kaa guluh w'u kihh mak put kih long wu'pwooh kihh wu'sihkhir dhighin dyaarr-zokk keeniy se.”
Mwopp kihh lapp gu'wanggshiiy kih yill miin'niy mou
(Mar 6:1-6; Luk 4:16-30)
53Kaarooh Jesu kyes yak shumpwoo mihhse weett, bhi yakhal nhighin dhel. 54Kaarooh ji wull dihng tughuzyill miin'niy, bhi y'aa sh'in kamm gurum ni mwopp dhighin Luh'kang khimwopp, bhi aa'phi mwopp pwetd kihh nyi. Mwopp kihh nang phishag le, “Gwoh mhize ni dum kad man'soon kihh maa'pee mhi sh'in bii'aapwoo wu'kihhshe a nihyeh? 55A gwoh mhize ni a em khi Kafinta mou aa'? Shumm nhikhin khinyi a Maryamu mou aa'? Yakhal emnhikhin nyi wu'daass mwopp a Yakub kihh Yusufu, kihh Siman, kihh Yahuda mou aa'? 56Harr emnhikhin nyi wu'raapp mwopp nihghinse kihh munn mou aa'? Dheeh wu'nyi yakhal dum kad n'an bii wu'kihhshe a nihyeh?” 57Bhi shaan mwopp harr laahyit mwopp kihh nyi pwetd.
Bhi Jesu satt mwopp le, “Mwopp kihh bheez gu'wanggshiiy a tughuzyill miin'niy, kihh tuluh miin'niy zag.”
58A kihhsheh bhi baah Jesu sh'in bii'aapwoo dhess nhighin mou lhiwaa shiin-pihhzeenn khimwopp.
Currently Selected:
Matiw 13: Chakfem
Highlight
Share
Copy
Want to have your highlights saved across all your devices? Sign up or sign in
©️2022 Luke Initiative for Scripture Translation
