Markus 8
8
Jesu so kihh gurum jig feerr
(Mat 15:32-39)
1Dhighin shiiy'teer mihhseh ni mwopp, bhi dw'uu gurum mwopp waaji kang diy kihpee Jesu. Dhangg pee'rooh baah gurum ni mwopp kihh bii w'u p'ee so mou, bhi Jesu nang zheppkamm keeniy lhija, bhi satt mwopp le, 2“Kai, kaah nah dhoonn kih gurum ni mwopp pwetd, p'ee baa mwopp shwat t'eer kunn nihghinse kihpee na diy, dhangg baah mwopp kihh biisoh mou. 3Mihh ih shenn mwopp tuluh kihh kussum, bhi leett p'ee pengg twa mwopp arr, p'ee pakk mwopp tong pwat a pee w'u zhong-zhong.” 4Bhi zheppkamm khinyi mwopp pring nyi le, “Dheeh a wuyeh p'ee mak dum kad gutt a nihyeh nihghinse dh'em tihh pihh mwopp so? ”
5Bhi Jesu nang phi mwopp le, “Wunn kihh gihkhill gutt a k'ong ayeh nhighin se?”
Bhi mwopp satt nyi le, “Munn a kihh gihkhill gutt pwoghovel e'h.”
6Bhi Jesu satt gurum ni mwopp le nw'aa kwangg yill. Kaarooh kok gihkhill gutt wu'pwoghovel ni pihh plangg Naan kaa, bhi trep pihh zheppkamm keeniy tihh mwopp dh'eer kihkyeen gurum ni mwopp, bhi mwopp sh'in kihhsheh. 7Mwopp kihh m'ee dyeen sherep mwopp lee zag; bhi Jesu pihh plangg Naan kaah sherep ni zag, bhi satt zheppkamm keeniy mwopp le nw'aa shap sherep ni gurum ni mwopp. 8Gurum mwopp so abbhal. Bwoonrooh koohweeh so, bhi zheppkamm ni mwopp gam shikkah pwoghovel kihh v'ur bott biisoh ni w'u mwan mak gurum mwopp dheeh l'e. 9Gyet daass mwopp wull kaa jig feerr se nhighin, bhi Jesu shenn mwopp kih arr w'aa dhak ser'seh. 10Kaarooh shenn mwopp, bhi dhel dhighin kong'am kihshag kihh zheppkamm keeniy ni mwopp, mwopp dhel dum koghobyill Dalmanuta.
Farisiiy mwopp kihh t'ang naah bii'kattshiiy
(Mat 12:38-42; 16:1-4; Luk 12:54-56)
11Bwoon bii mihhse, bhi pakk Farisiiy mwopp ja y'aa sh'in t'al phi Jesu tihh mwopp kamm nyi diy. Mwopp satt nyi le gw'ar sh'in m'ee bii'kattshiiy w'u put a kih dhengNaan runn. 12Jesu del n'ook niy pwetd, bhi nang mwopp le, “A mihyeh l'e bhi gangg mhize ni kihh nang a orr bii'aapwoo mhi kattshiiy ayeh? Ih kihh satt a zeenn wunn, baah Naan p'ee dyingg m'ee bii'kattshiiy gangg mhize ni mou.” 13Bhi Jesu yakhal yet mwopp dum dhel kong'am, bhi shan kur taah k'aa niy yit'am wu'zeh.
Pin'shaan khi Farisiiy mwopp kihh mhi Hiridus
(Mat 16:5-12)
14Zheppkamm nyi mwopp munder taah kihh gutt; mwopp a kihh gihkhill gutt kihmeh kyekk w'u dyinn mwopp khinyi dhighin kong'am. 15Jesu satt mwopp le, “Wu kihh kangg kihh kaah wuh kihh pin'shaan khi Farisiiy mwopp kihh mhi Hiridus zag e'h.”
16Bhi zheppkamm ni mwopp y'aa shwan-bhellepp mhizeh kihh shag le, “Nyi phi satt bii mihhse a pee'rooh baah mu taah kihh gutt mou.”
17Kaarooh Jesu man bhellepp w'u mwopp phi shwan ni seh, bhi nang phi mwopp le, “A mihyeh l'e bhi wunn phi l'aa orr shiin gutt ayeh? Harr mwasseh bhi baah wu mak naah, kooh wu mak manshiiy bii mou aa'? Phitukhup wu kudyi a w'u kih-kihkhil harr mwasseh kan e'? 18Wunn kihh yit, dhangg kan wu kihh naahpee mou? Yakhal wunn kihh kom, dhangg kan wu kihh klihngpee mou? Kan wu kihh kakkder bii maah? 19P'ar w'u ih trep gihkhill gutt paad seh p'ee gurum jig paad, bhi wu chakk bott gutt wu gam a shikkah k'ong ayeh dyishig?”
Bhi mwopp lapp nyi le, “A shikkah kaghapaad baa'vel e'h.”
20Jesu nang dyi phi mwopp le, “Dheeh p'ar w'u ih trep gihkhill gutt pwoghovel p'ee gurum jig feerr seh, bhi wu chakk bott gutt wu gam a shikkah k'ong ayeh dyishig?”
Bhi mwopp lapp nyi le, “A shikkah pwoghovel e'h.”
21Bhi Jesu nang phi mwopp le, “Dheeh harr mwasseh bhi wu manshiiy bii mihhse mou aa'?”
Jesu wangg yit m'ee guvughum Betseida
22Kaarooh Jesu kihh zheppkamm keeniy mwopp dum wull Betseida, bhi m'ee gurum mwopp ji kihh m'ee guvughum, mwopp so'kumbokk nyi tihh bwum guvughum ni diy. 23Bhi Jesu y'aa sarr guvughum ni lang'arr kihh nyi lhiput dhighin kwangyill Betseida ni. Kaarooh Jesu p'us l'ii yit gwoh ni, yakhal l'e sarr niy kih nyi, bhi nang phi nyi le, “Ghi naah mee'bii mihngg?”
24Gwoh ni dhighir yit niy bhi satt le, “Ee'h, ih naah gurum, dhangg mwopp lappshag a kihh tihngsheep phi mwaan.”
25Bhi Jesu waa l'e sarr niy dyi kih yit gwoh ni, bhi yit gwoh ni wangg, kihh naah pee rih-rett kop sat, kihh naah koohmeeh bhangg-bhangg. 26Jesu shenn nyi lhidum tuluh keeniy, satt nyi le, “Tapp ghi dhel dyi dhighin kwangyill mhize mou.”
Bitrus sattpwoo le Jesu a Kristi
(Mat 16:13-20; Luk 9:18-21)
27Jesu yakhal mwaan kihh zheppkamm keeniy mwopp p'ee dum v'ur kwangyill w'u mwopp koghob Kaisariya Filippi. Kaarooh mwopp arr, bhi Jesu nang phi mwopp le, “Gurum mwopp kihh satt le a'n a wuyeh?”
28Bhi mwopp lapp nyi mwopp le, “Pakk mwopp kihh satt le gha a Yohanna Gu-Baptisma; pakk kihh satt le gha a Iliya; dhangg harr mwasseh, pakk kihh satt le gha a kihmeh dhighin mhi-wanggshiiy mwopp.”
29Bhi Jesu waa nang dyi phi mwopp le, “Dheeh wu'wunn ee? wu kihh satt wu le a'n a wuyeh?”
Bhi Bitrus lapp nyi satt le, “A gha a Kristi.”
30Bhi Jesu satt kihhkangg mwopp le, tapp nw'aa diy satt bii mihhse menguh mou.
Jesu shep satt or muutt keeniy
(Mat 16:21-28; Luk 9:22-27)
31Jesu y'aa sh'in kamm zheppkamm keeniy ni mwopp le, “Nyi a ching tihh L'aa kih Gurum shwaazheell bii mwopp dhess, yakhal mwoohnan, kihh prist wu'nan, kihh Mhikamm-w'aar mwopp shiih kihh nyi, mwopp t'u nyi, harr waa yakhal dyi kih peemuutt bwoon t'eer kunn.” 32Jesu satt bhellepp mhize bhangg-bhangg noot zok mee'bii, bhi Bitrus del nyi lhidum m'ee koghob, bhi y'aa tepbhellepp nyi. 33Dhangg kaarooh Jesu buakhar naah kakhar zheppkamm keeniy mwopp, bhi tepbhellepp Bitrus le, “Dum ghi dhel kihh nyi pwoo na, gag m'ee Shetan wu'kihhshe! Baah p'an keegha dum kihshag kihh p'an mhi Naan mou, dum kihshag a kihh p'an mhi zhepp gurum mwopp.”
34Bhi Jesu peet dw'uu gurum ni kihshag kihh zheppkamm keeniy mwopp lhija, bhi satt mwopp le, “Koohweeh w'u kihh t'ang langdang na, bhi nyi a ching tihh shiih kihh shin, yakhal m'ang sheepmuutt miin'niy lang'dang na. 35P'ee koohweeh w'u kihh t'ang kyeer seen niy, bhi nyi p'ee bhalangdheng seen niy ni; dhangg koohweeh w'u bhalangdheng seen niy p'ee a'n, kihh orr Pwoo'wurett mhize, bhi gwoh ni p'ee kyeer seen niy ni. 36A mihyeh a kyeenn khi rooh gurum diy kad yill mhize kihhdihng, dhangg bhalangdheng seen niy ayeh? 37H'aa kooh gurum p'ee mak pihh a mihyeh kihphi seen niy? 38Mihh menguh diy kihh klihng yitlwaann kihh a'n kihh pwoo keena dhighin gangg mhize, w'u gam kihh dhakk-gaa kihh v'ur shigbis se, bhi a'n L'aa khi Gurum p'ee p'ar klihng yitlwaann kihh gwoh ni zag, p'ar w'u a ji diy dhighin tihghindhess mhi Daa kihshag kihh mhi'lop wu'bhangg mwopp.”
Currently Selected:
Markus 8: Chakfem
Highlight
Share
Copy
Want to have your highlights saved across all your devices? Sign up or sign in
©️2022 Luke Initiative for Scripture Translation
