Markus 9
9
Shik Jesu sheedyi
(Mat 17:1-13; Luk 9:28-36)
1Jesu satt dyi gurum ni mwopp le, “Ih kihh satt a zeenn wunn, pakk gurum w'u kihh dyarrang nihghinse mwopp p'ee mwarrap mou, harr seeh mwopp naah dhenglong khi Naan sh'i maa'pee keera.” 2Bwoon t'eer peemeh, bhi Jesu yakhal kihh Bitrus mwopp kihh Yakub, kihh Yohanna emnhikhin Yakub, dhel kihh mwopp k'aa dum kihh mwopp kih m'ee dheng bwumm w'u rhi-reghen pwetd, mwopp kyekk mhishut. Kaarooh mwopp nhighin bhi shik yit nyi sheedyi nhighin kihyit mwopp. 3Looh'lop khinyi yakhal pyaah sakk-sakk mett bhall mhi rooh m'ee gurum w'u dhighin yill mhize p'ee mak vwang nyi wull kihhsheh, kooh dyinn sh'in dhakk a kihh bii-pyaahlooh maah. 4Bhi Iliya mwopp kihh Musa mwopp dyingg shut, mwopp kaah kadpwoo kihh Jesu nhighin kihkyeen zheppkamm ni mwopp. 5Bhi Bitrus satt Jesu le, “Gukamm, ai ji keemu bih'ze rett. Yet tihh mu shett zheb bid kunn nihghinse, kihmeh p'ee wu'gha, kihmeh p'ee Musa, kihmeh p'ee Iliya zag.” 6(Baah Bitrus man bii mhi satt mou, p'ee lukhut t'u mwopp pwetd.)
7Bhi m'ee liw put paah mwopp, bhi m'ee dhekheh put dhighin liw ni le, “A mihhse a L'aa keena, w'u ih kihh wall nyi. Wu klihng nyi!” #2Bit 1:17,18
8Dhangg n'ook wu'khimhi, kaarooh mwopp naahpee shikhir kaat, bhi baah mwopp naah menguh kihpee ru dyi mou, seeh Jesu kyekk.
9Kaarooh mwopp arr tong sam kih dheng bwumm ni, bhi Jesu gab-bhellepp mwopp le, tapp nw'aa diy yakshiiy bii w'u nw'aa naah seh menguh mou, seeh bwoonrooh Naan yakhal kihh riy L'aa khi Gurum kih peemuutt dhangg. 10Bhi zheppkamm nyi mwopp looh bii mihhseh en ru, mwopp kihh shwanshiiy orr yakhal kih peemuutt ni.
11Bhi zheppkamm ni mwopp nang phi Jesu le, “Dheeh a mihyeh l'e bhi Mhikamm-w'aar mwopp kihh satt le a Iliya p'ee shee ji dhangg Kristi kihh ji ayeh?”#Mal 3:1; Mat 11:14
12Jesu lapp mwopp le, “Nyi a zeenn, a Iliya a gwooh p'ee shee ji tihh dhakk bii diy l'e rih-rett. Dhangg yet tihh wu manshiiy rooh nyi a rih-ran le L'aa khi Gurum p'ee shwaazheell pwetd harr mwopp shiih kihh nyi aa'? 13Ih kihh satt wunn, Iliya baa ji, bhi gurum mwopp sh'in bii w'u mwopp naah rett runn khinyi, chiitt kaa nyi a rih-ran kaah nyi seh.” #Mat 17:13
Jesu bar m'ee l'aa w'u kihh mumullung
(Mat 17:14-21; Luk 9:37-43)
14Kaarooh Jesu kihh zheppkamm keeniy w'u kunn seh mwopp sam wull kihpee kakhar zheppkamm ni mwopp diy, bhi mwopp kad dw'uu gurum dhess mwopp okhor mwopp dhen kihnaar ru, yakhal Mhikamm-w'aar mwopp kaah yak kakhann kihh mwopp. 15Kaarooh dw'uu gurum ni mwopp naah Jesu, bhi aa'phi mwopp pwetd, bhi mwopp chaat shu'shu mwopp dum tog kihh nyi.
16Bhi Jesu nang phi mhi-kamm'waar ni mwopp le, “Wunn phi kakhann kihh zheppkamm ni mwopp a kaah mihyeh?”
17Bhi m'ee gurum dhighin dw'uu gurum ni mwopp lapp le, “Gukamm, ih ji a kihh em na gha. Nyi kihh m'ee riin wu'bis w'u l'e tihh baah kihh mak kadpwoo mou. 18Riin ni mihh yakhal k'aa kaah nyi, bhi kihh m'ang nyi shoorr yill; bhi fihhfill kihh k'aa pwoo nyi, kihh shum aghaz niy, bhi shoopshik nyi kihh bhall phi m'ee dhepp mou. Ih dhang phi zheppkamm keegha tihh mwopp pun riin wu'bis ni diy, dhangg baah mwopp mak pun nyi mou.”
19Bhi Jesu satt gurum ni mwopp le, “Wunn gangg mhishiin-pihhzeenn, kihh mhi lang kih arr w'u khi'kan! A'n p'ee tong kihh wunn, a kihh g'ung kihh wunn a kaa mihyeh nah se pwetd?” Bhi Jesu sat gwoh ni le, “Ji kihh em gha ni se a'n.”
20Bhi mwopp ji kihh l'aa ni Jesu. Kaarooh riin wu'bis ni naah Jesu, bhi abet l'e tihh l'aa ni y'aa werreng kossok mwarrap. L'aa nyi pal yill, y'aa byirring dum seh b'uu, fihhfill kihh k'aa pwoo nyi.
21Jesu nang phi puup khi l'aa ni le, “Bii mihhse shee kih l'aa ni a phiranggyeh?”
Bhi puup ni lapp Jesu le, “shee khinyi bhi kudyi a l'aa wu'shomm. 22Mihh yakhal bhi riin wu'bis ni kihh brep ni meng wus, kooh dhighin a'm tihh t'u nyi diy. Daah, mihh ghi mak sh'in mee'bii, kum'bokk, bhi ghi naah chikhirr keemu, ghi bham munn.”
23Bhi Jesu lapp nyi le, “Mihh ghi mak pihhzeenn, bhi koohmeeh kihh mak sh'in p'ee gwooh pihhzeenn.”
24Abet bhi puup khi l'aa ni satt kihh dhekheh niy bhall-bhall le, “Ih pihhzeenn; ghi bham a'n tihh a sokokhorong diy kaah shiin-pihhzeenn keena!”
25Kaarooh Jesu naah gurum mwopp kihh shwa ja, bhi tepbhellepp riin wu'bis ni le, “Gha riin w'u a komduakhar kihh pwoobhipp, ih kihh gab-bhellepp gha, ghi put dhighin l'aa ni, yakhal tapp p'ar ghi waa ghi dhel dyi dhighin nyi mou.”
26Riin wu'bis ni m'ang dhekheh niy zhaal, yakhal l'e tihh l'aa ni kihh werreng kossok mwarrap diy, dhang put dhak. L'aa ni zan nhighin yill kaa kumm se, harr pakk gurum kihh satt le, “L'aa ni baa mih'muut.” 27Dhangg Jesu y'aa sarr nyi eep nyi lhiyakhal, bhi l'aa ni yakhal dharr.
28Kaarooh Jesu dhel dhighin luh, bhi zheppkamm khinyi mwopp ji mhishut bhi mwopp nang phi nyi le, “A mihyeh l'e bhi baah dyinn wu'munn mu mak put kihh riin wu'bis ni mou?”
29Bhi Jesu lapp mwopp satt le, “Riin w'u kaa mihhse kihh put mou, seeh a sh'i dhangNaan.”
Jesus waa satt pwoo dyi kaah muutt kihh yakhal kihpee muutt keeniy
(Mat 17:22-23; Luk 9:43-45)
30Jesu mwopp kihh zheppkamm keeniy mwopp yakhal nhighin pee mhize ni, bhi mwopp ji dhel arr yill Galili. Baah kihh dh'om tihh menguh man pee w'u runn diy mou, 31p'ee nyi kaah sh'in kamm zheppkamm keeniy mwopp. Dhighin kamm ni, bhi satt zheppkamm keeniy ni mwopp le, “Mwopp p'ee seett kihh L'aa khi Gurum sarr gurum mwopp, bhi mwopp p'ee t'u a'n dhangg dhighin t'eer kunn bhi a'n p'ee waa yakhal dyi.” 32Dhangg baah zheppkamm ni mwopp manshiiy bii w'u nyi phi satt nyi runn seh mou, dhangg mwopp kihkhir nangshiiy pwoo ni phi nyi.
A wuyeh a wu'yon mett?
(Mat 18:1-5; Luk 9:46-48)
33Jesu kihh zheppkamm keeniy mwopp dum wull Kafarnahum. Kaarooh nyi luh bhi nang phi zheppkamm keeniy ni mwopp le, “Dyinn wunn kakhan a mihyeh arr?” 34Bhi zheppkamm ni mwopp kwangg dh'ok, pee'rooh dyinn mwopp kaah kakhann a orr kooh kyed a meeh ruh wu'rangg a gwoohyon w'u mett kakhar ruh weett oh.#Luk 22:24
35Kaarooh Jesu tong yill, bhi peet zheppkamm keeniy w'u kaghapaad baa'vel ni mwopp lhija, bhi satt mwopp le, “Kapp gwooh kihh t'ang dheeh gu-kihkyeen, bhi ching tihh dhen shin a w'u kihbwoon, kihh laa'dhakk keewu weett.” #Mat 20:26,27; 23:11; Mar 10:43,44; Luk 22:26
36Bhi Jesu m'ang reb m'ee l'aa wu'shomm dhen lhidharr kihnaar mwopp. Kaarooh m'ang l'aa ni sarr niy, bhi satt mwopp le, 37“Koohweeh w'u mihh lapp kihmeh dhighin zhepp wu'dyeen mhize mwopp dhighin shumm nah, bhi lapp a a'n; yakhal koohweeh w'u lapp a'n, bhi lapp a a'n kyekk mou, lapp a gwooh lop a'n.” #Mat 10:40; Luk 10:16; Yoh 13:20
Gwooh phi tonn kihh munn mou bhi nyi a dang mu
(Luk 9:49-50)
38Bhi Yohanna#9:38 Yohanna mhize a kihmeh dhighin zheppkamm khi Jesu, baah a Yohanna Gu-Baptisma mou. satt Jesu le, “Gukamm, deh mu naah menguh shi phi put kihh mumullung mwopp sh'i shumm gha bhi mu satt nyi mu le nook, p'ee baah nyi munn dang gha maah.”
39Bhi Jesu satt nyi le, “Tapp wu d'aam nyi mou, p'ee baah m'ee gwooh sh'in m'ee bii'aapwoo dhighin shumm nah w'u nyi p'ee shikhir satt pwoo wu'bis kaah nah mou. 40P'ee kapp gwooh baah nyi tonn kihh munn mou, bhi nyi a dang mu.#Mat 12:30; Luk 11:23 41Ih kihh satt a zeenn wunn, koohweeh w'u mihh pihh zhangg a'm wunn dhighin shumm nah pee'rooh wunn a mhi Kristi, bhi baah nyi p'ee langdheng lebhed keeniy mou.#Mat 10:42
Zheell kaah gwooh l'e tihh gurum sh'in shigbis diy
(Mat 18:6-9; Luk 17:1-2)
42“Dhangg gwooh mihh l'e tihh m'ee mwoohdyeen mhize mwopp sh'in shigbis diy, ai bhi rettmett gwoh ni tihh dyinn mwopp rad a gag m'ee panggfiin tookk nyi mwopp meng nyi dhighin kur'am. 43Mihh a sarr gha kihh l'e gha shigbis, bhi ghi gab lhi'baa. Ai gyall ghi dhel dhighin seen w'u harr ngaa-ngaa a sarr-kihmeh, kad mihh'pee ghi kihh dhel a dhighin wusbleng, pee w'u wus ni kihh cham pid diy mou.#Mat 5:30 44[Baah nhiyett w'u kihh so seen mwopp kihh cham m'uut mou, yakhal baah wus ni kihh p'in pyid mou.]#9:44 Pakk r'an w'u gyetshak mwopp kihh t'ang w'u laar feerr ni mou. 45Mihh a shiiy gha kihh l'e gha shigbis, bhi ghi gab lhi'baa. Ai gyall ghi dhel dhighin seen w'u harr ngaa-ngaa a duang'lang, kad mihh'pee ghi kihh dhel a dhighin wusbleng kihh shiiy gha weett vel, pee w'u wus ni kihh cham pid diy mou; 46pee w'u baah nhiyett khimwopp kihh cham mwarrap mou, yakhal baah wus ni kihh pid mou. 47Yakhal mihh a yit gha kihh l'e gha shigbis, bhi ghi pun ghi meng kyekk. Ai gyall ghi dhel dhighin dhenglong khi Naan a vyangg kad mihh'pee mwopp kihh meng gha dhighin wusbleng kihh yit weett vel. 48Dhighin wus mhizeh ni, bhi
“ ‘baah nhiyett w'u kihh arrap mwopp kihh mwarrap mou,
yakhal baah wus ni kihh cham pid mou.’#9:48 Ish 66:24
49“Wus zheell a kiihn w'u Naan p'ee dhakk kooh meehmuh wu'rangg dyishig. 50Kiihn a bii wu'rett; dhangg kiihn mihh shaall nook shangg, bhi wunn p'ee sh'in a rangg kihh nyi tihh waa shangg dyi kop satt? Pee'mhinyi, bhi w'u dhen kihh kiihn dhighin shuk, yakhal wu tong sh'i tongkakhamm kihh shag.”
Currently Selected:
Markus 9: Chakfem
Highlight
Share
Copy
Want to have your highlights saved across all your devices? Sign up or sign in
©️2022 Luke Initiative for Scripture Translation
