લુક.ની સુવાર્તા 10

સિત્તેર ચેલાહાને ઇસુ મોકલેહે

1એ ગોઠયા પુર્યા વીયા તાંહા, પ્રભુ ઇસુહુ આજી બીજા સિત્તેર જાંહાને પસંદ કેયા, આને જીયા-જીયા મોડા આને હાના ગાંવુમે તોઅ જાનારો આથો, તીહી તીયાહા પોતા આગલા બેન-બેન જાંહાને મોકલ્યા. 2આને ઇસુહુ તીયાહાને આખ્યો, પરમેહેરુ રાજુમે આવનારે ઈયુ દુનિયા ખુબ માંહે તીયાર હાય; પેન તીયાહાને એકઠે કેનારા સેવક તા થોડાજ હાય, તીયા ખાતુર તુમુહુ દુનિયા માલિક પરમેહેરુલે પ્રાર્થના કેરા, કા તોઅ તીયા માંહાને એકઠે કેરા સેવક મોકલે. 3જાઅ; હેરા આંય તુમનેહે ઘેટા હોચે વરુ વોચ્ચે મોક્લેહે. 4ઈયા ખાતુર તુમુહુ નાય ખીસામ પોયસા, નાય ઢોપટી; આને વાટીપે કેડાલે સાલામ કેરા બી વાદારે સમય માઅ લેતા. 5જીયા કેડા બી કોમે તુમનેહે આવકાર મીલે, તીયા કોમે વિહતા પેલ્લા તુમુહુ આખજા, કા ઈયા કોમે પરમેહેર સુખ શાંતિ આપે. 6જો તીયા કોમે સુખ શાંતિ મિલવા ઈચ્છા રાખનારો માંહુ રેતો વેઅ તા; તુમા આખલી શાંતિ તીયા આરી રીઅ, પેન એહડો માંહુ તીહી નાય રેતો વેઅ તા, તે શાંતિ તીયાલે નાય મિલે. 7તીયાજ કોમે રેજા, આને તીયા કોમેને જો આપે તોઅ ખાજા આને પીજા, કાહાકા જેહકી મોજરી કેનારા પોતા મોજરી મીલવુલો હક હાય, તેહકીજ જીયા લોકુમે તુમુહુ સેવા કેતાહા, તીયાપેને મદદ મિલવા તુમનેહે હક હાય; આને કોઅ-કોઅ ફીરાહા માઅ. 8“આને તુમુહુ જીયા બી ગાંવુમે જાઅ, આને તીહીને લોક તુમનેહે આવકાર કે, તાંહા તે તુમનેહે જો કાય ખાવુલો આપે, તોઅ ખાજા. 9તીયા ગાંવુમેને બીમારુહુને હારે કેજા: આને તીયાહાને આખજા, ‘પરમેહેરુ રાજ્ય તુમા પાહી આવી ગીયોહો.’ 10પેન જીયા બી ગાંવુમે તુમુહુ જાઅ, આને તીહી લોક તુમનેહે આવકાર નાય કેતા, તીયા ગાંવુ બાજારુમે જાયને તીહી લોકુહુને આખજા કા, 11‘તુમા ગાંવુ જો ઉદલો બી આમા પાગુલે ચોટલો હાય, આમુહુ તુમા આગાળી ફોકળી ટાકતાહા, પેન ઓતો જાંય લેજા કા, પરમેહેરુ રાજ્ય તુમા પાહી આવી ગીયોહો.’ 12આંય તુમનેહે આખુહુ, કા ન્યાયુ દિહી પરમેહેર તીયા ગાંવુ લોકુહુને જો દંડ સદોમ શેહેરુ લોકુહુને તીયાહા આપલો, તીયા દંડુ કેતા વાદારે દંડ આપી.”

પસ્તાવો નાય કેનારા ગાંવુહુને હારાપ

(માથ. 11:20-24)

13“હાય, જે લોક ખુરાજીન શેહેરુમે રેતેહે! હાય, બેથસેદા શેહેર! જે પરાક્રમી કામે તુમામે કેયેહે, કાદાચ તે તુર આને સીદોન શેહેરુમે કેરામે આવતે, તા તીહીને લોક ખુબ પેલ્લા ચાદરો ફાંગી લેતા આને પોતા ઉપે ખાઅ ચોપળી લેતે ઇ દેખાવા ખાતુર કા તે પોતા પાપુકી મન ફીરવુતે.” 14પેન ન્યાયના દિહી, પરમેહેર તુર આને સીદોન શેહેરુ લોકુહુને તુમા કેતા ઓછો દંડ કેરી. 15આને ઓ કફર-નુહુમ શેહેરુ, લોકુહુ પરમેહેર તુમનેહે જુગુહી હુદી પોચવી, ઓતા ઉચા કેરી એહેકી તુમુહુ વિચારતાહા કા? તુમુહુ તા નોરકામે હુદી એઠાં જાહા. 16ઇસુહુ ફાચે તીયા ચેલાહાને આખ્યો, “જો કેડો બી તુમા ગોઠ ઉનાહે, તોઅ માઅ ગોઠ ઉનાહે, આને જો કેડો બી તુમા ગોઠ નાહ માનતો, તોઅ માઅ ગોઠ નાહ માનતો; આને જો કેડો બી માઅ ગોઠ નાહ માનતો, તોઅ માન મોક્લુનારા પરમેહેરુ ગોઠ નાહ માનતો.”

સિત્તેર ચેલા ફાચે આલા

17તે સિત્તેર જાંઅ ખુશ વેતા-વેતા ફાચા ઇસુહી આલા, આને તીયાલે આખ્યો, “ઓ પ્રભુ, તોઅ નાવ લેતાજ, પુથ બી આમા આખલ્યો માનતાહા.” 18ઇસુહુ તીયાહાને આખ્યો, “જાંહા પુથુહુ તુમા આજ્ઞા માની, તાંહા માયુહુ શૈતાનુલે અચાનક વીજ પોળેહે તેહકી જુગુમેને પોળતા હેયો. 19હેરા, માયુહુ તુમનેહે હાપળાપે આને વીસીપે ચાલાં આને આપુ દુશ્મન શૈતાનુ બાદા સામર્થુંપે અધિકાર દેદોહો; આને કેલ્લી બી વસ્તુકી તુમનેહે કાયજ નુકશાન નાય વેઅ. 20પેન પુથ તુમા આખલો માનતાહા, તીયા ખાતુર તુમુહુ ખુશ માઅ વેહા, પેન તુમા નાવ હોરગામે લેખાલો હાય, ઈયા લીદે ખુશ વેરા.”

ઇસુ ખુશવીને પરમેહેર બાહકા આભાર માનેહે

(માથ. 11:25-27; 13:16,17)

21તીયા સમયુલે ઇસુ પવિત્રઆત્માકી આનંદુ પોરાય ગીયો, આને આખ્યો, “ઓ બાહકા, જુગ આને તોરતી માલિક, આંય તોઅ ધન્યવાદ કીહુ, કા એ ગોઠ તુયુહુ બુધ્ધિવાલા આને હોમુજદાર લોકુકી દોબાવી રાખી, પેન તુયુહુ એહેડા લોક જે હાના પોયરા હોચે હાય, તીયાહાને તુયુહુ આખી, હોવ, ઓ બાહકા, કાહાકા તુલે ઇંજ હારો લાગ્યો. 22માઅ પરમેહેર બાહકાહા માને બાદોજ હોપી દેદોહો; આને કેડો નાહ જાંતો કા પોયરો કેડો હાય, ખાલી પરમેહેર બાહકોજ જાંહે, આને પરમેહેર બાહકો કેડો હાય, તીયા વિશે કેડોજ નાહ જાંતો, ખાલી પોયરોજ જાંહે, આને તે લોક જાંણી જીયાલે પોયરો જાહેર કેરા પસંદ કેહે.” 23આને ઇસુ ચેલા વેલ ફીરીને તીયાહાને ખાનગીમે આખ્યો, “તુમુહુ આમી જો હેતાહા, તોઅ હેરા ખાતુર તુમુહુ ધન્ય હાય.” 24કાહાકા આંય તુમનેહે આખુહુ કા, “તુમુહુ આમી જો હેતાહા તોઅ હેરા ખાતુર ભવિષ્યવક્તા, આને રાજા લોક ઈચ્છા રાખતલા, પેન તે હી નાય સેક્યા, આને જો આમી ઉનાતાહા તોઅ ઉનાયા ખાતુર બી ઈચ્છા રાખતલા; પેન તે ઉનાય નાય સેક્યા.”

દયાલા સમરુની દાખલો

25એક દિહી ઇસુ લોકુહુને ઉપદેશ આપી રેહલો, તાંહા યહુદી નિયમ જાંનારો એક જાંઅ ઇસુલે પારખા ખાતુર ઉબી રીને ફુચા લાગ્યો, “ઓ ગુરુજી, અનંત જીવન જીવા ખાતુર આંય કાય કીવ્યુ?” 26ઇસુહુ તીયાલે આખ્યો, “મુસા નિયમશાસ્ત્રા ચોપળીમે કાય લેખલો હાય? તુ તીયાલે કેહકી હોમજોહો?” 27તીયાહા જવાબ દેદો, “તોઅ પ્રભુ, પોતા પરમેહેરુલે પુરા મનુકી આને પુરા જીવુકી આને પોતા બાદી શક્તિકી આને પોતા બાદી બુદ્ધિકી પ્રેમ કે; આને પોતા પડોશીલે પોતા સારકો પ્રેમ કે.” 28ઇસુહુ તીયાલે આખ્યો, “તુયુહુ બરાબર જવાબ દેદોહો, એહકી કેહો તા, તુલે સાદા માટે જીવન મીલી.” 29પેન તીયાહા પોતાલે ન્યાયી હાય, એહકી દેખાવા ખાતુર ઇસુલે ફુચ્યો, “તા માઅ પડોશી કેડો હાય?” 30ઇસુહુ તીયાલે એક દાખલો આપીને જવાબ દેદો, “એક માંહુ યરુશાલેમ શેહેરુહીને યરીખો શેહેરુમે જાતલો, તાંહા બાંડુહુ તીયાપે હુમલો કેયો, આને તીયાપે જો બી આથો, તોઅ બાદો બુચી લેદો, આને તીયા પોતળે બી માગી લેદે, આને તીયાલે ખુબ માર ઠોકીને, મોલા સારકો કીને જાતા રીયા.” 31“આને એહકી વીયો કા તીયુ વાટીલે એક યહુદી યાજક જાતલો, પેન તીયા પોળલા માંહાલે હીને, મદદ નાય કેયી આને બાજુમે રાખીને જાતો રીયો. 32તીયુ રીતે દેવળુમે મદદ કેનારો એક લેવી તીયુજ વાટીલે આલો, તોઅ બી તીયા પોળલા માંહાલે હીને, મદદ નાય કેયી, આને બીજુમે રાખીને જાતો રીયો. 33પેન તીયા બાદ સમરુની વિસ્તારુ એક માંહુ બી તીયુજ વાટીલે આલો, આને તીયા માંહાલે ઘાયલ દેખીને, તીયાલે દયા આલી. 34આને તીયા માંહા પાહી જાયને તીયાહા તીયા ઘાવુપે દાવા તરીકે તેલ આને દારાક્ષારસ રીસવીને પોટ્ટી બાંદી, આને તીયાહા પોતા ફુરક્યાપે બોહાવીને ધર્મસાલામે લી ગીયો, આને તીયા સારવાર કેયી. 35આને બીજે દિહી તીયા સમરુની માંહાહા બેન દિહુ મોજરી કાડીને ધર્મશાળા માલિકુલે આપ્યા, આને આખ્યો, ‘ઈયા સારવાર કેજે, આને જો વાદારે ખોર્ચો વેરી, તોઅ આંય ફાચો આવેહે તાંહા તુલે આપી દેહે.’ 36તાંહા ઇસુહુ તીયાલે ફુચ્યો, આમી તુ કાય હોમજોહો કા, જીયા સમરુની માંહાપે બાંડુહુ હુમલો કીને લુટલો, તીયા તીનુમેને કેડો તીયા પડોશી વીયો?” 37તીયાહા આખ્યો, “જીયાહા તીયાપે દયા કીને સારવાર કેયી તોજ,” ઇસુહુ તીયાલે આખ્યો, “જો, તુ બી એહકીજ કે.”

માર્થા આને મરિયમુ કોઅ ઇસુ

38જાંહા ઇસુ આને તીયા ચેલા યરુશાલેમ વાટીપે જાતલા, તાંહા તે એક ગાંવુમે પોચ્યા, તીહી માર્થા નાવુ એક બાયુહુ તીયુ કોઅ તીયાહાને ગોવારા રાખ્યા. 39આને તીયુ હાની બોહી જીયુ નામ મરિયમ આથો, તે ઇસુ પાગુહી બોહીને તીયા ઉપદેશ ઉનાતલી. 40પેન માર્થા માંડો બોનાવતા-બોનાવતા કાબરાય ગીયી, આને ઇસુહી આવીને આખા લાગી, “ઓ પ્રભુ, માઅ બોંહી માને કામ કેરા ખાતુરે માને મદદ નાહ કેતી, કાય તુલે ચિંતા નાહ? ઈયા ખાતુરે તીયુલે આખ કા તે માને કામુમે મદદ કે.” 41પેન પ્રભુ ઇસુહુ, તીયુલે જવાબ દેદો, “માર્થા, ઓ માર્થા; તુ ખુબુજ ગોઠી ખાતુર ચિંતા કેહો, આને કાબરાહો. 42ફક્ત એકુજ ગોઠી ચિંતા કેરુલો યોગ્યો હાય, તે ગોઠ મરિયમુહુ હોદી લેદીહી, આને માઅ ઉપદેશ ઉનાયને જો આશીર્વાદ તીયુલે મીલનારો હાય, તોઅ આશીર્વાદ કેડો બી નાય લી સેકે.”

Currently Selected:

લુક.ની સુવાર્તા 10: DUBNT

Highlight

Copy