लूका 22
22
यीशु मारने री सांठ-गांठ
(मत्ती 26.1-5; मरकुस 14.1,2; यूहन्ना 11.45-53)
1अखमीरी रोटी री जाच जासु वै फसह बोला थी, नेड थी। 2होर प्रधान याजक होर शास्त्री एसा गला लोडदे लागे थी, कि यह कैई सावै मारण, पर त्याह लोका का डरा थी।
यहूदा रा बुशाहघात
(मत्ती 26.14-16; मरकुस 14.10,11)
3होर जेबा शैतान यहूदा में नाठअ जासु वै इस्करियोत बोला थी, होर सह बारह चेले में एक थी। 4तेऊ प्रधान याजका पहरुरे सरदारे संघे गला करी की यह केई सावै ढाकणअ। 5त्याह खुश होई, होर तेऊ बे ढबे दीणे रा वचन दीना। 6तेऊ मनु, होर मोके लोढ़अ लागअ की जेबरे एऊ संघे लोका नांई होले तेवरे महा यह ढाकी करे त्यारे हाथे दीणअ।
चेले संघे फसह री त्यारी
(मत्ती 26.17-25; मरकुस 14.12-21; यूहन्ना 13.21-30)
7तेबा अखमीरी रोटी री जाचा रा धियाडा आउया, जासू में फसहे रे गाभु री बलि दिणी जरूरी साहा। 8होर यीशुये पतरसा होर यूहन्ना यह बोली करे भेजी, नाशी करे मेरे खाणे वै फसह तैयार करा। 9त्याहे तेऊका पुछु, तुह कैह चाहंदा कि हामे कैह तैयार करे? 10तेऊ त्याका बोलू, हेरा नगरा नाहंदे ही तमा एक मणश भेटण जासू पांणी रअ घड़अ चुआकूदअ हुणअ; जासू घरे सह नाहलअ तमे तेऊ पीछे नाशे, 11होर तेऊ घरा रे स्वामी का बोले कि गुरु ताहा का बोला कि सह बेशणे रअ कमरअ कही साहा जासू में हाऊं आपणे चेले संघे फसह खाऊ? 12तेऊ तमावै एक सजी धजी दी बडी बाहुड रीहाऊणी; तखी तैयारी करे। 13त्याह नाशी करे, जेहड़ा त्याहा का बोलू, तेहडा ही भेटा होर फसह तैयार करी।
परमेश्वरा रा धाम
(मत्ती 26.26-30; मरकुस 14.22-26; 1 कुरिन्थियों 11.23-25)
14जेबा वक्त आउआ, तेबा सह आपणे प्रेरिता संघे रोटी खान्दअ बैठअ। 15होर तेऊ त्याह का बोलू, महा बखे इच्छा थी, कि दुखा चुआकणे का पहिले तमा संघे फसह खांऊ। 16किबेकी हाऊं तमा का बोला कि ज़ेबरे तणी सह परमेश्वरा रे राज्य में पूरी नांई होली तेवरे तणी महा सह नांई खाणा। 17तेबा तेऊये कटोरे लई करे धन्यावाद करू, एता निआ होर आपु में बांडा। 18किबेकि हाऊं तमावै बोला की जेबरे तक परमेश्वरा रा राज्य नांई ईला तेवरे तक महा दाखरस कधी नांई झुटणा। 19यीशु रोटी आणी, होर धन्यवादा री प्रार्थना करी करे सह चोडी होर यह बोलदे चेले बै दीनी, “यह मेरी देह साहा जो तमाबे दीणी लाईदी साहा एता मेरी यादी में करदे रह।” 20एई सावै तेऊ रोटी बाद कटोरअ भी आणु होर बोलू यह कटोरअ मेरे तेऊ लोहू में साहा जोह तमा वै नई वाचा में दीणादा साहा। 21पर हेरा, महा ढाकण आले रअ हाथ माए संघे साहा। 22किबेकि मणशा रअ शोहरू वै जेड़ा तेऊ संघे हुणा, सह तो हुणा, पर हाय तेऊ मणशा पैंदे जासके हाथे सह ढाकण। 23तेबा चेले आपु में बोलदे लागे कि, हांमा में का सह कुणअ साहा जासू यह काम करणा।
महान कुण? एता पैंदे-विवाद
24चेले में यह झगड़ा हुंदा लागा की हामा में बडअ कासु समझे। 25तेऊ त्याह का बोलू, अन्यजाति रे राजा त्याह पैंदे राज करे; होर जोह त्याह पैंदे हक डाहदा, त्याह उपकारक कहलाऊंदा। 26पर तमे एडे नांई होए; पर जोह तमा का बडअ साहा, सह होच्छे बराबर होर जोह प्रधान साहा, सह सेवा बराबर साहा। 27किबेकि बडअ कुण साहा सह जोह रोटी खांदअ बैठदअ, या सह जोह सेवा करदा? कैह सह नांई जोह रोटी खांदअ साहा? पर हाऊं तमा मेंजे सेबका साही साहा। 28पर तमे त्याह साहा, जोह मेरी परीक्षा मे मांई संघे लगातार रही; 29होर जेहड़ा मेरे बापू महा वै एक राज्य डाहुदा साहा, तेडा हाऊं तमावै भी एक राज्य डाहुदा साहा। 30पर तमे मेरे राज्य में मांई संघे मेरी मेजा पैंदे खाये पर सिंहासना पैंदे वैशी करे इस्राएला रे बारह गोत्रा रा न्याय करे।
पतरसा रे नांई करणे री भविष्यवाणी
(मत्ती 26.31-35; मरकुस 14.27-31; यूहन्ना 13.36-38)
31सिमोन! सिमोन! हेर, शैतान तमे लोका महा का मांगीदे साहा कि तमा सह गिहू साही पटके, 32पर मांई ताहवै बिनती करी कि तेरा बुशाह नाठा नांई लोडी; होर जेबरे तुह फिरे तेवरे आपणे भाई पैंदे पाकअ रहे 33तेऊये तेऊबै बोलू हे परमेश्वरा हाऊं तांई संघे जेला नाहणे होर मरने वै भी तैयार साहा। 34तेऊ बोलू, हे पतरसा हाऊं ताहका बोला कि आज मुर्गे बाशणे का पहिले ताह चिण बारी नांई करणा कि तुह महा नांई जांणदअ।
बटु झोली होर तलवार
35तेऊकी तेऊये त्याहा का बोलू, जेबरे माई तमे विना झोली, बूटे होर विना बटुये भेजी थी, तेवरे तमे कीजी सा री कामी होई थी,? त्याहे बोलू, किजी सा री नांई 36तेऊये त्याह का बोलू, पर एवा जासू सेटा बटु साहा त्याह तेऊ निआ तेहड़े ही झोली भी, होर जासू सेटा तलवार नांई साहा त्या आपणे झिकड़े बेची करे लई आणा। 37किबेकी हाऊं तमा का बोला कि यह पवित्र शास्त्र जोह लिखूदा साहा, सह अपराधी संघे गिणू दा साहा, किबेकि तेतका पूरअ हुणा जरुरी साहा; किबेकि मेरे बारे में लिखीदी गला पूरी हुणे आली साहा। 38त्याहे बोलू, हे परमेश्वर अखे हेरा अखे दुई तलबारा साहा। तेऊये त्याह का बोलू, बखे बहू साहा।
जैतुना रे पहाड़ा पैंदे यीशु री प्रार्थना
(मत्ती 26.36-46; मरकुस 14.32-42)
39तेबा सह वागे निख्ली करे आपणी रीति रे साबे जैतूना रे पहाडा पैंदे नाठअ, होर चेले तेऊ पीछे नाठे। 40त्खे पूजी करे तेऊ त्याह का बोलू, प्रार्थना करा की तमे परीक्षा में नांई पड़े। 41होर सह त्याहा का दूर नाशी करे घुटने पेनदे वैशी करे प्रार्थना करदअ लागअ, 42हे बापूआ, अगर तुह चाहे तो एउ कटोरे महा सेटा का दूर कर, तेबा भी मेरी इच्छा नांई पर तेरी इच्छा पूरी हो। 43तेबा तेऊ सरगा का एक दूत हेरू जोह तेऊवै सामर्थ्य दिंदा थी। 44सह बखे संकट मेंज़ा का होई करे प्रार्थना करदअ लागअ होर तेऊरे पसीने माना जेहड़ा लोहू साही बड़े-बड़े टीपू साही धरती पैंदे पड़दे लागे। 45तेबा सह प्रार्थना का उठू होर तेऊ आपणे चेले सुते दे भाली। 46होर तेऊ बोलू, किवै सुते? उठा प्रार्थना करा कि तमे परीक्षा में नांई पड़ी लोडी।
यीशु धोखे संघे ढाकण
(मत्ती 26.47-56; मरकुस 14.43-50; यूहन्ना 18.3-12)
47सह एता बोलदअ ही लागअ, कि एक भीड़ आई, होर त्याहा बारहा में का जासका ना यहूदा थी, त्याह जेह-जेह आउअ थी, सह यीशु सेटा आउअ होर सह चुमू। 48यीशु तेऊवै बोलू, यहूदा कैह तुह मूघी देई करे मणशा रे शोहरू ढाका? 49तेऊरे साथी जेबरे हेरू कि कैह हुणा आल्लअ साहा, तेबा बोलू, परमेश्वरा कैह हामें तलवार चलाये? 50होर त्याहा मेंजा एकी महायाजका रे नोकरा पैंदे तलवार चलाई करे तेऊरअ दाहिनअ कनेट काटू। 51एता पैंदे यीशु बोलू, एवा बस करा। होर तेऊरअ कनेट छुई करे ठीक करू। 52तेबा यीशु प्रधान याजक होर देहुरे रे पहरे रे सरदारे होर त्खले रहण आले प्राचीने जोह त्खे आयदे थी बोलू, कैह तमे महा डाकू जानवरा समझी करे तलवार होर शोठे आणी करे आऊदे? 53जेबा हाऊं देहुरे में रोज तमे संघे थी। तेबा तमे महा वै किछे नांई करू; पर यह थारे वक्ते साहा होर निहारे रा अधिकार साहा।
पतरसा रा नांई करणा
(मत्ती 26.57,58,69-75; मरकुस 14.53,54,66-72; यूहन्ना 18.12-18,25-27)
54तेबा तेऊ ढाकी करे चेले, होर महायाजका रे घरे निउ। पतरसे दूर-दूर तेऊ पीछे नाठअ, 55होर जेबा त्याह खोले आगि छिपते बैठे तेबा पतरस भी त्याहा बीचे बैठअ। 56तेबा एकसा दासी आगि रे प्रियाशे बैठदअ हेरी करे तेऊ फेरा वे हेरी करे बोलू, यह भी तेऊ संघे थी। 57पर तेऊये एडा बोली करे नांई करू, हे नारी, हाऊं तेऊ नांई जांणदअ। 58थोड़ी देरी बाद कासु होरी तेऊ हेरी करे बोलू, तुह भी त्याह मेंजा का एक साहा। पतरसे बोलू, हे मणशा हाऊं नांई साहा। 59एकी घंटे वाद एकी होरी मणशे बोलू, सची तुह त्याह संघे थी किबेकी तुह गलीली साहा। 60पतरसे बोलू, हे मणशा हाऊं नांई जान्दअ कि तुह कैह बोल्दा सह बोलदअ ही लागअ, कि मुर्ग बाठअ। 61तेबा परमेश्वरे तेऊ पतरसा फेरा बे हेरू होर पतरसा परमेश्वर री सह गलअ याद आई जोह तेऊ बोली थी आज मुर्गे बाष्णे का पहिले ताह मेरा चिण बारी नांई करणा। 62होर सह बागे निख्ली करे जोरे-जोरे लेरु।
यीशु री वैइजती
(मत्ती 26.67,68; मरकुस 14.65)
63जुणी मणशे यीशु ढाकुदअ थी त्याहे तेऊरे ठठे करदे लागे; 64होर तेऊरी आंछी बंद करी करे तेऊका पुछु, भविष्यवाणी करी करे खोजू ताह कुणी बाही। 65होर त्याह बहू होर एडी निंदा करी होर तेऊरे बिरोधा में बोली।
महासभा ज़ेह यीशु
(मत्ती 26.56-66; मरकुस 14.55-64; यूहन्ना 18.19-24)
66जेबा धियाड होई तेबा लोका रे धर्मगुरु होर महायाजक होर शास्त्री कठे होई, होर तेऊ आपणी महासभा में आणी करे पुछु, 67अगर तुह मसीहा साहा, तेबा हामा का बोल! तेऊ त्याहा का बोलू अगर हाऊं तमा का बोलू, तमे मेरी गल्ला रा बुशाह नांई करणा। 68होर अगर पुछु, तेबा उतर नांई दिणा। 69पर एवरे पोरी मणशा रअ शोहरू सभी का सर्वशक्तिमान परमेश्वरा री धुरा फेरे वैशणा। 70एता पैंदे सभी बोलू, तेबा कैह तुह परमेश्वरा रअ शोहरू साहा? तेऊये त्याह का बोलू, तमे आपे ही बोला, किबेकि हाऊं साहा। 71तेबा त्याहे बोलू, एवा हांमा गुआही री कैह जरूरत साहा, किबेकि हांमें आपणे कनेटा का आपे ही शुणू।
Currently Selected:
लूका 22: ISJNT
Highlight
Share
Copy
Want to have your highlights saved across all your devices? Sign up or sign in
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
