युहन्ना 3

येशु अने नीकुदेमुस

1फरीसी मेहे रोत नीकुदेमुस नवाआ एक माहू ओतु जो यहुदीयाआ सरदार ओतु. 2तिया तो राती येशुउ जागे आवीत तियाहा कोयु, ओ गुरुजी, आमाहा मालुम होय का परमेश्वारापोरोत गुरु होतगोयो आवयू होय, काहाके कोडु आव चिन्ह जे तू देखाडत्लू, जर परमेश्वर तियाआ आरी नाहा ताहा नाहा हिकवीही शकत. 3येशु तियाहा उत्तर आप्लु, “आय तुमामे खरोज कोत्लू का, जर कोडु नविनफासो जन्मला नाहा ताहा देवोओ राज्य पालहू नाहा शकत.” 4नीकुदेमुस तियाहा कोयु, “मांहु जांहा डायु ओत गोयो, ताहा केह्काय जोल्मो उवहू शकतो? नाहाकोत तो आपाआ याह्हीई पेटाम ईजी प्रवेश कोईत उवहू शकतो?” 5येशु उत्तर आप्लु, आय तुमामे खरोज कोत्लू, जोपोरोत कोडु मांहु पायोंपोरोत अने आत्माम रोत जोन्म्या वासित ताहा तो देवोओ राज्यम प्रवेश नाहा कोहू शकत. 6काहाके जो डीलोवांही जन्मला होय, तो डील होय; अने जो आत्मा पोरोत जन्मला होय, तो आत्माआ होय. 7सहारू नाहा कोहू का ती तुमामे कोल्यी होय, ताहु नविनफासो जोल्मो घेण्यासाठी गरजेए होय. 8वारू जीई वोहत्लू तीई वोहत्लू अने तू तियाआ शब्द मानत्लू, पण नाहा होमजाडीत का ती कारोन येत अने का जाहो? जो कोडु आत्माम रोत जन्मला होय तो एहलो होय. 9नीकुदेमुस तियाहा उत्तर आप्लु, “आव गोठी केहलो ओवुहू सेकतेहे?” 10ओ होमलित येशु तियाहा कोयु, “तू इस्राएलाआ गुरु ओमेत पोन नाहाकोत आव गोठीकोता नाहा होमजाडीत? 11आय तुमामे खरोज कोत्लू का आमाहा जे होमजीत्लू तोज केते, अने ज्याहा आमाहा पाल्लये होय तियाआ साक्ष आपत्ले, अने तुमु आमाआं साक्ष ग्रहण नाहाकोईत. 12जाहा आय तुमामे धरतीई गोठी कोयु अने तुमु आमाआं साक्ष ग्रहण नाहाकोईत, जर आय तुमामे स्वर्गाची गोठी कोहू ताहा फासाडी केहलु विश्वास कोअनारू? 13कोडु स्वर्गापो नाहा सोड्या, फक्त तोज जो होर्गामरोत उतरीलो, म्हणजे माअहा पोऱ्या जो होर्गाम होय. 14अने ज्या रीतीवाही मोशेवाही जंगलूम सापाला उचो कोअयु, तियाआ रीतीवाही माहा होय का माअहा पोऱ्या पण उसापो सोढया जावा, 15यकोअता का जो कोडु तियापो विश्वास मेकही तियाहा सार्वकालिक जीवोन जोडयो उवे 16काहाके देवूही जुगोपो एहलो प्रेम कोल्यु का तिये आपाआ एखलूच एक पुत्र आप्यू, यकोअता का जो कोडु तियापो विश्वास मेकोहो तिया नाश ओवुहू कायना ताहा तियाहा सार्वकालिक जीवोन जोडीत. 17देवूही आपाआ पोऱ्याहा याकोअता नाहा मोक्ल्यीत का जगाआ न्यायनिवाडा कोइला कोअता नाहा, पण याकोअता का जगोवाही तियाआ व्दारे तारण उवे. 18जो तियापो विश्वास मेकोहो, तिया न्यायनिवाडा नाहा उवनारा, पण जो तियापो विश्वास नाहाकोईत, तो सुकीत जोडत्लू; याकोअता का तिये देवाआ एखलूच एक पुत्राच्या नावापो विश्वास नाहाकोईत. 19अने न्यायनिवाडा मुळे ओ होय का प्रकाश जगात आवयू होय, अने माहुहीई अंधाराहा उजवोडा पेक्षा जाखो प्रिय कोल्यु काहाके तियाआ काम वाईट ओती. 20काहाके जो कोडु वाईट कोअत्लू, तो उजवोडाआ तिरस्कार कोअत्लू, अने उजवोडोओ जागे नाहा आवीत, नाहा एहलो नाहा ओवो का मापो दोष लागाड्यू जानारू. 21पोन जो खोरापोओ चालीलो, तो उजवोडा जागे आवत्लू, याकोअता का तियाआ काम प्रगट उवे का तो देवापो ओवल्यु होय.”

येशुउ विषय युहन्नाआ गवाही

22तिया फासाडी येशु अने तियाआ शिष्य यहुदिया प्रांतात आव्ये; अने तो तीइही तियाआ आरी रोत बाप्तिस्मे कोअला लाग्यू. 23योहान पण शालिमा जागऱ्या एनोन गावोम बाप्तिस्मे कोईत ओतु, काहाके तीइही खूप पाई ओते, अने मांहे आविलो बाप्तिस्मे लेत ओते. 24योहान त्या टायमोहो पर्यंत जेलूम नाहा टाक्यू गोल्यो ओतु 25तीइही यूहन्ना शिष्यांआ कोडला यहुदीआरी शुद्धी कोइला विषयि वादविवाद ओवयू, 26अने ते योहानाही आविलो तियाहा कोयु, “ओ गुरुजी, जो माहहू यरदोनो जागे ताआ आरी ओतु, अने ज्याआ साक्ष आप्यी ओती; पाला, ते बाप्तिस्मे आपित, अने आखे जोओ तियाआ जागे आवत्ले.” 27योहानाई उत्तर आप्लु, “जो पर्यंत मांहाहा होर्गामरोत नाहा आप्या जानारू, तोपोरोत तो किबी नाहा मेलवूहु शकत.” 28तुमु ताहा स्व ताच माआ साक्ष होय का आय कोयु, आय ख्रिस्त नाहा, पण तियाआ आगाडी मोकलील्यो गोल्यू होय. 29ज्याआ लाडी होय, तोज वर होय, पण वरोओ हेगांति जो उभे रोत तियाआ मानत्लू, तियाहा वोरोओ शब्दापोरोत जाखो आनंद ओतू ओमे माआ ओ आनंद पुरो उवे होय. 30अवश्य होय का तो वोड़े अने आय कोम उवे. 31“जो उसेरोत आवत्लू आखाआ उपो होय, जो धरतीपोन आवत्लू तो धोरतीई होय, अने धोरतीइ गोठी कोतले जो होर्गापोरोत आवत्लू तो, धरतीई उपो होय.” 32जे किबी तिये पालील्यो अने होमल्या होय, तीयाआज साक्ष आपोहो; अने कोडु तियाआ साक्ष ग्रहण नाहाकोईत. 33जीयाई तियाआ साक्ष ग्रहण कोईत लेदि तिये आव गोठीपोरोत शिक्का लागाडी आप्यी का देव खोरो होय. 34कोईत ज्याहा परमेश्वराने मोक्ल्यीत होय, तो परमेश्वरोओ गोठी कोत्लू; काहाके तो आत्माआ परिमित नाहा आपित. 35बाह्हू पोऱ्यापो प्रीती कोअत्लू जीआ आखे वस्तू तियाआ आथे आप्यी होय. 36जो पोऱ्यापो विश्वास मेकोहो, सार्वकालिक जीवोन तियाआ होय; पण जो पोऱ्याआ नाहा होमलीतु, तो जीवनाहा नाहा पालीलो, पण देवाआ राग तियापो रोतलू.

Currently Selected:

युहन्ना 3: NOINT

Highlight

Copy