लूका 16
16
चलाँख व्यवस्थापक
1येशू अपन चेलनहे यी दृष्टान्त कलाँ, “कौनो एकथो धनी मनैयक एकथो व्यवस्थापक रहे। और ऊ अपन मलिक्वक धन-सम्पति उराइता कहिके मनै ओकर मलिक्वक थेन जाके चिब्ली खादेलाँ। 2तब् मलिक्वा व्यवस्थापकहे बलाके कहल, ‘तोरिक बारेमे मै यी का सुनतुँ? महिन्हे हिसाब देखा कि तैँ मोरिक धन-सम्पति कहाँ काम लगैले बते। आबसे तैँ व्यवस्थापकके पदमे रहे नै सेक्बे।’ 3तब् व्यवस्थापक अपन मनमने कहल, ‘मै आब का करुँ, काकरेकी मोरिक मलिक्वा महिन्से व्यवस्थापकके काम छिने लागल बा। खेट्वा जोँतके खाई सेक्ना मोरिक थेन तागत नै हो, भीख मङना महिन्हे लाज लागत। 4आब महिन्हे का करे परी कहिके महिन्हे पता बा। ताकि जब मै व्यवस्थापकके काममेसे हटजिम कलेसे मनै महिन्हे सहायता करे सेकिँत।’ 5तब् ऊ मलिक्वक कर्जा लेहुइया प्रत्येक जहनहे एक-एक करके बलाइल, और सुरुकहे कहल, ‘तुहिहे मलिक्वक कर्जा कतरा बा?’ 6ऊ कहल, ‘तीन हजार सात सौ लिटर तेल’। तब व्यवस्थापक उहिहे कहल, ‘तोरिक तमसुक नान, और झत्ते बैठके एक हजार आठ सौ पचास लिटर लिख्।’ 7तबजाके दोसुरहे कहल, ‘तोरिक कर्जा कतरा बा?’ ऊ कहल, ‘तीन सौ पचास कुन्टल गोहूँ।’ ऊ उहिहे कहल, ‘तोरिक तमसुक नान, और तीन सौ कुन्टल लिख्।’ 8आब ओकर मलिक्वा उ अधर्मी व्यवस्थापकके तारिफ करल। काकरेकी ऊ चलाँखीसे काम करल रहे। यी जात्तिक हो कि यी संसारमे मनै अपन समयक मनैनसे व्यवहार करेबेर ओजरारके लरकनसे धेउर चलाँख बताँ। 9मै तुहुरिन्हे कहतुँ, संसारिक धन-सम्पति अपन संघरिया बनाइक लग और दोसुर जहनके भलाइक लग प्रयोग करो। काकरेकी जब तुँ मुजिबो, तब तुँ पैँसाहे प्रयोग करे नै सेक्बो। तब परमेश्वर और स्वर्गदूतनके तुहिन्हे स्वर्गक सदाकालके घरेम स्वागत करहीँ।”
छुटी बातमे फेन भर परना
10“जे थोरचे बातमे ईमानदार रहत, ऊ धेउर बातमे फेन ईमानदार रहत। और जे एकदम छुटी चिजमे बेइमान रहत, ऊ भारी चिजमे फेन बेइमान रहत। 11तबेकमारे तुहुरे संसारिक धनमे ईमानदार नै हुइबो कलेसे तुहुरिन्हे स्वर्गीय धनके जिम्मा के दि? 12यदि तुहुरे दोसुर जहनके धनमे ईमानदार नै रबो कलेसे के तुहुरिन्हे अपन धन अप्निहीँ चलाइक लग दि? 13कौनो फेन नोकर एकथो समयमे दुईथो मलिक्वनके सेवा करे नै सेकत। काकरेकी ऊ एकथोहे घृणा करी और दोसुरहे प्रेम करी, या ऊ एकथोहे आदर दि दोसुरहे तिरस्कार करी। अस्तेके तुहुरे फेन एक्केथो समयमे परमेश्वरके सेवा और अपन लग धन-सम्पति जमा करे नै सेक्बो।”
परमेश्वरके राजके मूल्य
14धनके लाल्ची फरिसीनके यी सक्कु बात सुनके हुँकार मजाक उराई लग्लाँ। 15तब् येशू ओइन्हे कलाँ, “तुहुरिन्हे मनैनके थेन अपनहे धर्मी ठहरैना मजा लागत। पर परमेश्वर तुहुरिन्के मनके बात जन्थाँ। काकरेकी जोन बात मनैनके लग महत्त्वपूर्ण बा, उ परमेश्वरके नजरमे दुष्ट बा। 16मोशक नियम कानुन और अगमवक्तनके खुशीक खबर, डुब्कि देहुइया यूहन्ना नै आइतसम तुहुरिन्हे डगर देखैलाँ। पर आब परमेश्वरके राजके खुशीक खबरके प्रचार करजाइत, और जे फेन भित्तर जाइक लग चाहत। 17आकाश और धर्ती बितजाई, पर परमेश्वरके नियम कानुनमेसे एकथो मात्रा फेन कब्बु नै मेटी। 18तबेकमारे जे अपन जन्नीहे छुट्पत्तर देके दोसुर स्त्रीसे भोज करत, ऊ व्यभिचार करत। और थरवक छोरल जन्नीहे भोज करुइया मनैया फेन व्यभिचार करत।”
धनी मनैया और लाजरस
19येशू कलाँ, “एकथो धनी मनैया रहे, जे गजब महिँगा और मजा लुग्गा घाले, और रोट्दिन मिठसे फेन मीठ खाना खाए। 20ओकर घरक दवारमे लाजरस नाउँक एकथो गरीब मनैयाहे मनै नानके बैठादिँत। जेकर शरीर खत्रैखतरासे भरल रहिस। 21उ धनी मनैयक खाइबेरिक फेँक्लक डुट्ठा-कुट्ठा खाके लाजरस अपन पेट भर्ना इच्छा करे। यकर बाहेक कुक्कुर फेन आके ओकर खतरा चाटदिँत। 22अन्तिममे गरीब मनैया मुगिल, और स्वर्गदूतनके उहिहे लैजाके अब्राहामके थेन रहक लग लैगिलाँ। उ धनी मनैया फेन मुगिलस और दफ्नागिल। 23नरकमे सहे नै सेक्ना दुःख भोगेबेर ऊ उप्पर हेरल, और दूर अब्राहामहे और ओकर थेन लाजरसहे देखल। 24तब् ऊ चिल्लाके कहल, ‘ए अब्राहाम बाबा, मोरिकमे दया करके लाजरसहे पठादे ताकि ऊ अपन अङग्रिक टिप्पा पानीमे भिजाके मोरिक जीभहे शित्तर पारदेहे। काकरेकी मै यी आगिक दुःखसे तर्पतुँ।’ 25पर अब्राहाम कहल, ‘ए छावा, याद कर, तैँ अपन जीवन कालमे मजै-मजा चिज भेटैले, और ओस्तेके लाजरसहे खराबे खराब चिज मिल्लिस। पर आब यहाँ यी आराममे बा, और तैँ दुःख भेटाइते।’ 26यी सक्कु बात बाहेक यहाँसे तोरिक थेन उपार जाई खोजुइयन जाई ना सेकिँत, और वहाँसे यहाँ हमार थेन आई खोजुइयन फेन इपार आई ना सेकिँत कहिके हमार और तुहुरिन्के बिच्चेम एकथो महा गहिँर गंज्री बा। 27ऊ कहल ‘ए अब्राहाम बाबा, मै तुहिहे बिन्ती करतुँ, तैँ लाजरसहे मोरिक बाबक घरेम पठादे। 28काकरेकी मोरिक पाँचथो भैयन बताँ, और मै चहथुँ कि ऊ वहाँ जाए, और मोरिक भैयनहे चेतावनी देहे। कहुँ असिन ना होजाए कि ओइने फेन यी दुखेदुःख रहल ठाउँमे आजाँइत।’ 29पर अब्राहाम कहल, ‘ओइन्हे चेतावनी देहक लग मोशक नियम कानुन और परमेश्वरके अगमवक्तनके लिखल लेख बतिन। ओइने उहिहे सुने परना हो, और ओकर पालन करे परना हो।’ 30पर ऊ कहल, ‘नाई, बाबा अब्राहाम, पर यदि मुवलमेसे कौनो एकजाने ओइन्के थेन जाई, और ओइन्हे चेतावनी दि कलेसे ओइने अपन मन बदलके पाप करना छोरदिहीँ।’ 31अब्राहाम उहिहे कहल, ‘जब ओइने मोशा और परमेश्वरके अगमवक्तनके आज्ञा नै मन्थाँ कलेसे मुअलमेसे केऊ जित्ती होगिल कलेसे फेन ओइने ओकर विश्वास नै करहीँ।’”
Currently Selected:
लूका 16: DVGNT
Highlight
Share
Copy
Want to have your highlights saved across all your devices? Sign up or sign in
Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.
