लूका 7

कप्तानके विश्वास

(मत्ती ८:५-१३)

1अपन सक्कु बात मनैनहे सुनाके सेकके येशू कफर्नहुम नगरमे पैँठ्लाँ। 2सौथो सिपाहिनके एकथो रोमी कमान्डरके एकथो दुलार नोकर रहिस, जे बेमार होके मुए लागल रहे। 3जब येशूक बारेमे ऊ सुनल, तब् ओकर नोकरहे चोख्वादेऊ कहिके ऊ यहूदी दलके नेतनहे बिन्ती करे पठाइल। 4ओइने येशूक थेन अइलाँ, और असिक कहिके हुँकिन्हे बिन्ती करलाँ, “ऊ अप्निक यी दया पैना लायकके बताँ। 5काकरेकी ऊ हमार जातिनहे माया करथाँ, और वहे हमार बैठक भवन बनादेहल रहिँत।” 6येशू ओइन्के संगे गैलाँ। कमान्डरके घरक लग्गे येशू रहलमे कमान्डर अपन संघरियनहे हुँकार थेन असिक कहिके पठाइल, “हे प्रभु, दु:ख ना उठाई। काकरेकी अप्नि मोरिक घरक भित्तर अइना लायकके मै नै हुइतुँ। 7मै अपनहे फेन अप्निक थेन अइना लायकके नै मन्नु। पर वचन कहिदी और मोरिक नोकर चोखाजाई। 8काकरेकी मै फेन अख्तियारके तरे बैठुइया मनैया हुइतुँ, मोरिक अधिनमे सिपाहिन बताँ। मै एकथोहे ‘जा’ कथुँ, तब् ऊ जाइत, और दोसुरहे ‘आजा’ कथुँ तब् ऊ आइत। मोरिक नोकरहे ‘यी कर’ कथुँ और ऊ करत।” 9ओकर यी बात सुनके येशू उहिसे अचम्मित होगिलाँ, और घुमके अपन पाछे अइना भीड़हे कलाँ, “मै तुहुरिन्हे कहतुँ, पूरा इजरायल देशमे एकथो फेन असिन मनैया मै नै भेटैनु, जे यी दोसुर जातिक मनैयक हस मोरिकमे भरोसा करत।” 10जब कमान्डरके संघरियन घरे घुमके गैलाँ ते ओइने उ नोकरहे मजा हुइल भेटैलाँ।

विधवक छावा जित्ती हुइलक

11दोसुर दिन येशू नाइन नाउँक शहरमे गैलाँ, और हुँकार चेलन और एकथो बरभारी भीड़ हुँकार संगे गैलिन। 12जब येशू नगरके दवारीक लग्गे पुगल रहिँत, तब मनै एकथो अर्थीमे धारके मुर्दाहे बाहेर लेके जाइतिहिँत। उ मुर्दा अपन दाईक एक्केथो छावा रहे। और ओकर दाई एकथो विधवा रहिस, और ओकर संग मुर्दाहे माटी देहे नगरके बहुत्ते मनै जाइतिहिँत। 13जब प्रभु उहिहे देख्लाँ ते हुँकिन्हे सोग लग्लिन, और ऊ उहिहे कलाँ, “ना रोऊ।” 14और लग्गे जाके येशू उ अर्थीहे छुलाँ ते अर्थीहे बोकुइयन रुकगिलाँ। तब येशू कलाँ, “ए जवान मनैया, मै तुहिन्हे कहतुँ, उठजाऊ।” 15तब मुअल मनैया उठ्के बैठगिल, और बोले लागल। येशू उहिहे ओकर दाईक जिम्मा लगादेलाँ। 16तब सक्कु जाने डरागिलाँ। और ओइने परमेश्वरके महिमा करलाँ, और कलाँ, “परमेश्वरके एकथो महान अगमवक्ता हमार बिच्चेम आइल बताँ, और परमेश्वर अपन मनैनके सहायता करे आइल बताँ।” 17हुँकार बारेमे यी बात सारा यहूदिया प्रदेशमे और आँजरपाँजरके सक्कु जिल्लामे फैलगिल।

डुब्कि देहुइयक प्रश्न

(मत्ती ११:२-१९)

18यूहन्नक चेलनके यी सक्कु बातके खबर उहिहे कहिदेलाँ। 19अपन चेलनमेसे दुई जहनहे यूहन्ना प्रभुक थेन यी पुँछे पठाइल, “का अप्नि वहे ख्रीष्ट हुइती, जिहिहे पठैना वाचा परमेश्वर कर्ले रहिँत कि हम्रे दोसुर जहनके असरा हेरी?” 20जब उ मनै येशूक थेन अइलाँ। तब् ओइने कलाँ, “डुब्कि देहुइया यूहन्ना हम्रिहिन्हे यी पुँछे अप्निक थेन पठाइल बताँ, ‘का अप्नि वहे ख्रीष्ट हुइती, जिहिहे पठैना वाचा परमेश्वर कर्ले रहिँत कि हम्रे दोसुर जहनके असरा हेरी?’” 21वहे बेला येशू बहुत्ते जहन रोग, बेथा और भूत्वनसे छुटैलाँ, और बहुत्ते आँधर मनैनहे देख्नाहाँ बनैलाँ। 22तब् येशू ओइन्हे कलाँ, “जाऊ और तुहुरे ज्या देख्लो और ज्या सुन्लो जाके यूहन्नाहे बतादेऊ; आँधर मनै देख्नाहाँ हुइथाँ और नागर मनै नेंग्थाँ। कोढ़ लागल मनै चोखागिल बताँ। बहिर मनै सुने सेक्नाहाँ हुइल बताँ, मुअल मनै जित्ती होके उठल बताँ, और गरीबनहे खुशीक खबर प्रचार कराजाइता।” 23“धन्य हो ऊ, जे मोरिकमे शंखा नै करत।” 24हुलाकी यूहन्नक चेलनके वहाँसे चलगिलाँ ते येशू यूहन्नक बारेमे भीड़हे कहे लग्लाँ, “तुहुरे उजाड़-ठाउँमे का हेरे गैलो? का बयालके हिलैती रहल गौलरहे? 25तब् तुहुरे का हेरे निकरलो? का महिँगा लुग्गा घालल मनैयाहे हेरे? हेरो, महिँगा लुग्गा घालल और सुखचैनमे बैठुइयन ते राजमहलमे बैट्थाँ। 26पर तुहुरे का हेरे निकरलो ते? का परमेश्वरके अगमवक्ताहे? हो मै कहतुँ, तुहुरे परमेश्वरके अगमवक्तासे फेन महान व्यक्तिहे देख्लो। 27यी वहे हुइताँ जेकर बारेमे लिखल बा, ‘हेर, मै हुलाकीहे तोरिक आघे-आघे पठैम, जे तोरिक आघे डगर सोज करी।’ 28मै तुहुरिन्हे कहतुँ, जन्नीकमेसे जल्मलहुँक्रिहिनमे डुब्कि-देहुइया यूहन्नासे महान दोसुर केऊ नै हुइल हो। तभुन फेन परमेश्वरके राजमे जे सक्कुहुनसे छुटी बा, ऊ उहिसे आकुर महान हो।” 29जब मनै और यहाँसम कि कर उठुइयन फेन येशूक कलक बात सुन्लाँ ते, परमेश्वर धर्मी बताँ कहिके ओइने स्वीकार करलाँ। काकरेकी यूहन्ना ओइन्हे डुब्कि देले रहिन। 30पर फरिसीनके और यहूदी कानुनके गुरुनके ओइन्के उप्पर परमेश्वरके रहल इच्छाहे अस्वीकार करदेलाँ और यूहन्नासे डुब्कि लेना नै मन्लाँ। 31येशू कलाँ, “यी पुस्ताके मनैनहे मै किहिसे तुलना करुँ? ओइने का हस बताँ? 32यी ते बजारमे खेलुइया छुटीछुटी लरकन हस हो, जे एकदोसुर जहनहे बलैथाँ और कथाँ, ‘हम्रे तुहुरिन्के लग खुशीक बाजा बजैली, पर तुहुरे नै नच्लो। हम्रे रुवैना गीत गैली, पर तुहुरे नै रुइलो।’ 33यूहन्ना डुब्कि देहे आइल, और ऊ ना ते रोटी खाए, ना अंगुरके रस पिए। तुहुरे उहिहे भूत्वा लागल बतिस कथो। 34मै, मनैयक छावा खैती और पिटी अइनु। तब ओइने कथाँ, ‘हेरो, दलिद्रा, मदुवा, कर उठुइया और पापीनके संघरिया!’ 35पर परमेश्वरके ज्ञान उ मनैनके जीवनमे सहि बिल्गाइत, जे उ ज्ञानके पालन करत।”

पापी जन्नीहे माफ हुइलक

36फरिसीनमेसे एक जाने येशूहे खाना खैना नेउँता देहल, और ऊ वहे फरिसीक घरेम जाके खाई बैठ्लाँ। 37उ नगरमे एकथो जन्नी मनैया रहे, जे छिनार काम करके पापके जीवन बिताइतेहे। जब ऊ पता पाइल कि येशू फरिसीक घरेम खाना खाई बैठल बताँ। तब् उ जन्नी मनैया एकथो सिंगमरमर नाउँक पठरालेके बनल शीशीमे शुद्ध बहुमूल्य महँकना तेल लेके घरेक भित्तर आइल। 38और हुँकार गोरा थेन ठरह्याके रुई लागल, और अपन आँसेलेके हुँकार गोराहे भिजाई लागल। और अपन कपारिक भुट्लालेके हुँकार गोराहे पोँछे लागल। और येशूक गोरामे चुम्मा खाके बहुमूल्य महँकना तेल घाँसे लागल। 39येशूहे नेउँता देहुइया फरिसी दलके मनैया यी देख्के मनमने असिक कहे लागल, “यदि यी परमेश्वरके अगमवक्ता रताँ कलेसे हिँकिन्हे छुउइया छिनारी जन्नी हो कहिके जान लेताँ।” 40येशू फरिसी दलके मनैयक मनके बात जानके कलाँ, “ए सिमोन, महिन्हे तुहिन्से कुछु बात कना बा।” ऊ कहल, “कही, गुरुजी।” 41तब येशू यी दृष्टान्त कलाँ, “कौनो जिम्दरवक दुईथो ऋणीन रहिँत, ओम्नेमेसे एकथो पाँच सौ चाँदीक सिक्का और दोसुर पचासथो चाँदीक सिक्का कर्जा लेहल। 42पर जब ओइन्के थेन तिरक लग कुछु नै रहिन ते, उ जिम्दरवा दुनु जहनके कर्जा मिनाहाँ करदेहल। तबेकमारे तुँ कहो ते, यी दुनु जहनमेसे कोन मनैया उहिहे धेउर प्रेम करी?” 43सिमोन कहल, “मोरिक विचारमे, जेकर धेउर कर्जा मिनाहाँ हुइलिस।” येशू उहिहे कलाँ, “तुँ ठिक कलो।” 44और उ जन्नीक ओहोँर घुमके येशू सिमोनहे कलाँ, “यी जन्नीहे देख्लो कि यी महिन्हे का करल? मै तोहाँर घरक भित्तर अइनु, पर तुँ हमार चलन अनुसार महिन्हे गोरा धुइक लग पानी फेन नै देलो। पर यी मोरिक गोरा आँश लेके भिजाइल, और अपन भुट्लालेके पोँछल। 45हमार चलन अनुसार तुँ महिन्हे चुम्मा नै खैलो। पर यी ते जबसे मै यहाँ अइनु, तबसे यी मोरिक गोरामे चुम्मा खाई नै छोरल हो। 46तुँ मोरिक कपारमे तेल नै लगा देलो। पर यी ते मोरिक गोरामे बहुमूल्य महँकना तेल लगादेहल बा। 47तबेकमारे मै तुहिन्हे कहतुँ, यकर कर्लक बहुत्ते पाप माफ होगिल बतिस। काकरेकी यी जन्नी महिन्हे बहुत्ते माया करल। पर जेकर थोरचे पाप माफ हुइल बा, ऊ थोरचे माया करत।” 48और येशू उ जन्नीहे कलाँ, “तोहाँर पाप माफ होगिल बा।” 49हुँकार संग खाई बैठुइयन आपसमे कहे लग्लाँ “पाप माफ करुइया यी के हो, काकरेकी पापहे माफ करुइया परमेश्वर किल हुइताँ?” 50येशू उ जन्नीहे कलाँ, “परमेश्वर तुहिन्हे बँचालेहल बताँ। काकरेकी तुँ मोरिकमे विश्वास कर्ले बतो, शान्तिसे जाऊ।”

Currently Selected:

लूका 7: DVGNT

Highlight

Copy