ल़ेह-पेन 23
23
1पावलगी छो़बागी छ्यो़ ज़्यिलाराङ त़ेदी मासीन, “आदा-नो़हया़, तिहरीङगी ङ्यिहमा थु किन्ज्योगी ज़ी़लुला ङाहगी नावा चाङमा पेहती मिहजी ताङदे येह” 2दिठी माएँमु पूजाहारी गो-छ्येवा हननियागी पावल पोहला लाहङदी तेहक्योगी मिहया़ला, “ओ़ह मिहगी खाला क्याहप्तोङ!” म़ेदी का तेर्सीन। 3ओहले पावलगी हननिया़ला मासीन, “ख्ये सागार कार्पु क्याहप्क्योगी चिक्पा! ख्येॱलाङ किन्ज्योगी तुहङ नाङज्ये येह। ख्ये छ्य़े-ठिमगी तेहन्दाला ङाहला ठिम ताज्येला तेहक्योगी मिह, तोहरोङ ठिमलाॱराङ गोम्दी ङाहला तुहङज्येला च्यिबे का तेर्के?”#मत्ती २३:२७,२८ म़ेदीमाॱराङ पावलगी मासीन। 4पावलगी सुहरला तेहक्यो मिहया़गी, “ख्ये किन्ज्योगी दाम नाङग्योकी पूजाहारी गो-छ्येवाला खा लो़हगे?” म़ेदी पावलला मासीन। 5ओहले पावलगी, “आदा-नो़हया़, खो पूजाहारी गो-छ्येवा यिहम्बा म़ेदी ङाहला क्यी़ह म़ेहबा येहकें। च्यिबेमाना छ्य़ेला, ‘ख्येगी राहङगी मिहया़गी पोम्बोगी तेहन्दाला चोक्पा तामया़ माहमा’#प्रस २२:२८ म़ेदी प्रुहक्यो येहबा। ओ़ह तामया़नी ङाहॱलाङ क्यी़ह येह” म़ेदी मासीन।
6ओहले ओ़ह छो़बाला सदुकी दाङ फरिसी माएँ छो़बा ङ्यिकाराङ येहबा माएँ क्यी़ह येहकें सोङगोराङ पावलगी क़े छ्यिम्बु तेन्दी मासीन, “ए आदा-नो़हया़, ङाह फरिसीगी पुह फरिसीॱराङ यिहम्बा! स्यिक्यो मिह येहपाराङ सोम्बो लो़हज्ये येह म़ेदी रेहवा पेहक्यो सुङगोराङ ङाहला देला ठिम ताङगेराङ येह!” म़ेदी पावलगी मासीन।#ल़ेह २६:५; फिलि ३:५
7ओहले पावलगी माक्योगी दि तामगी पेहती सदुकी दाङ फरिसीया़ नाहङला ठाक-ठुक काहल्सीन ओहले छो़बा नाहङलाराङ ताहम्जी नोहङसीन। 8च्यिबेमाना सदुकीया़गी मिह स्यि फान्ज्यो येहपाराङ सोम्बो लो़हगे माएँ तामला यिह मे़हछ्येएँ येहकें ओहले स्यिहङगामकी स्याहप्च्यी दाङ नाम्स्यी येहॱराङ म़ेह म़ेदी माउ येहकें। यिहॱनाङ फरिसीया़गीदी दि ताम सुमला यिह छ्ये़उ येहकें।#मत्ती २२:२३; मर्क १२:१८; लूक २०:२७ 9ओहले दि तामगी पेहती ओ़ह छो़बाला लोहङटी छ्यिम्बु काहल्सीन। ओहले फरिसी छो़बागी लाहला छ्य़े-ठिम ताङगे लोबेनया़गी लाहङदी सदुकीया़ला ज्यिबुराङ टाह पेहती मासीन, “ङाहगीनी दि मिहगी च्यिॱआङ ङ्य़ेहबा पेहक्यो मेहथोङ दु। का़हलेॱआङ नाम्स्यी दाङ स्यिहङगामकी स्याहप्च्यीगी दि मिहला दि ल़ेहमु सुङ नाङग्यो यिहन्सीमानानी च्यि काहल्बा ले?”
10ओहले खुङया़गी ठुक्पा तोहरोङॱआङ छ्येरो काहल्सीन। ओ़ह ठुक्पाला यहूदीया़गी पावलला हार-टिह, छुर-टिह पेहती सेटो माएँ ज्यी़सुगी माक्पेन छ्यिम्बुगी माक्मीया़ला माहर काहल्दी पावलला खुङया़गी पाहरक्यीले स्योहक टिहते ख्योङदी माक्मीया़ तेहसा खाङबाला खेर म़ेदी का तेर्सीन।
11ओहले ओ़ह कुहङमुराङ चो़वोगी पावल पोहला फेप नाङदी, “ज्यी़ मेहकोहएँ पावल! दि यरूशलेम क्याहसाला ङाहगी ताम स्येक्यो ल़ेहमुराङ ख्येगी रोम क्याहल-खापलाॱआङ स्ये कोहएँ” म़ेदी सुङ नाङसीन।
पावलला सेच्ये म़ेदी टे़ह क्याहप्क्यो
12ओहले नाहङबार च्युङ ङाटुराङ यहूदीया़ छो़सीम्बाराङ पावलला सेच्ये म़ेदी टे़ह क्याहप्सीन। ओहले खुङगी दिठी म़ेदी ना क्याल्सीन, “पावलला माहसे थु ङ्यिह च्यिॱआङ मेहसाहएँ ओहले छ्यु च्यी़ॱआङ मिहथुङगे!” 13दि रोहवा पेहती सेकें म़ेदी ना क्याल्गेन्गी मिहया़ ज़्यिप-च्यु म़ेदीॱआङ ल्हाक्पु येहकें। 14ओहले खुङगी पूजाहारी छ्यिम्बु दाङ छ्य़े-ठिम ताङगे लोबेनया़ साला काहल्दी मासीन, “ङ्यिहगी पावलला माहसे थु च्यिॱआङ मेहसाहएँ, च्यिॱआङ मिहथुङगे म़ेदी ना क्याल सिहन्दी येह। 15ता़ह राहङ फे़बेया़गी माक्पेन छ्यिम्बुला ‘छो़बा छ्यिम्बु#२३:१५ छो़बा छ्यिम्बु : माक्योदी नेपालीला महासभा म़ेदी माक्यो येहबा। ङो़ले पावलला लेहमेन तामया़ॱआङ टी़ह कोहच्ये येह’ म़ेदी पावलला ओ़ह माक्मीया़गी खाङबाले तेन नाङदोङ। ओहले खो छो़बा छ्यिम्बुला ओहङगे ती़हजी ङ्यिहगी खोला लाहमलाराङ सेकें” म़ेदी मासीन।
16ओहले खुङगी सेच्ये म़ेदी टे़ह क्याहप्क्योगी तामदी पावलगी नुहमुकी पुहगी क्यी़ह ज्योर्सीन। ओहले खो माक्मीया़ तेहकेन्गी खाङबा नाहङला काहल्दी पावलला स्येसीन। 17ओहले पावलगी माक्पेन च्यी़ला क़े क्याहप्ती मासीन, “दि मिह स्यारादी माक्पेन छ्यिम्बु ङ्याम्बु थू़दी ताम मा कोहज्ये येहबा लो, खोला क्याल तेर्तोङ ले” म़ेदी मासीन। 18ओहले माक्पेनगी पावलगी छो़ला माक्पेन छ्यिम्बु साला क्याल तेर्ती मासीन, “चोन-खाङला येहकेन्गी पावलगी ङाहला क़े क्याहप्ती दि स्याराला राहङसाला क्याल तेर म़ेदी माक्यो येहबा, राहङ ङ्याम्बु ओहर-छ्य़े! स्युह कोहएँ ताम च्यी़ येहबा लो” म़ेदीमाॱराङ माक्पेनगी मासीन।
19ओहले माक्पेन छ्यिम्बुगी ओ़ह स्यारागी लाहक्पाला ज़ुङदी ह्अची ख्येर्ती, “म़ेदोङ, च्यि मा कोहज्ये येहबा?” म़ेदी टी़हसीन। 20ओहले स्यारागी मासीन, “नाहङबार यहूदीया़गी, ‘पावलला छो़बा छ्यिम्बुला लेहमेन तामया़ॱआङ टी़ह कोहच्ये येह’ म़ेदी राहङला उर्चु पेहच्येला ताम डी़ सिहन्दी येह। 21खुङगी ताम सेन माहनाङ ला़ह। च्यिबे मासीमाना, मेहन्दा ज़्यिप-च्यु चेगी पावलला माहसे थु तोॱआङ मेहसाहएँ, छ्युॱआङ मिहथुङगे म़ेदी ना क्याल्दी येहबा। खुङ पावलला सेच्येला ठाबे काहल सिहन्दी येहबा, खुङगी राहङगी काला क़ूह तेहती येहबा” म़ेदी पावलगी छो़गी मासीन।
22ओहले माक्पेन छ्यिम्बुगी, “ख्येगी दि ताम ङाहला स्य़ेक्यो म़ेदी सुॱलाङ माहमा!” म़ेदी खोला ताङ चाहङसीन।
पावलला स्युहङ-पेन छ्यिम्बु फेलिक्स साला ताङ चाहङग्यो
23ओहले ओ़ह माक्पेन छ्यिम्बुगी माक्पेन ङ्यी़ला क़े क्याहप्ती मासीन, “कैसरियाला डोज्येला माक्मी ङ्यी़क्या, ओहले ताबुला स्येहन्दी डोएँ मेहन्दा खाल फेदाङ ज़्यि, ओहले दुङ थो़दी डोएँ माक्मी ङ्यी़क्या ठाबे पेहतोङ! ख्या तिहरीङ कुहङमुराङ छ्युजी कुहला थेन्दी डो कोहएँ। 24पावलला स्येहन्ज्येला ताबुॱआङ ठाबे पेहतोङ। ओहले खोला या़हबु पेहती सुङदी स्युहङ-पेन छ्यिम्बु फेलिक्स साला क्याल्दोङ!” म़ेदी माक्पेन छ्यिम्बुगी मासीन। 25देजे मा सिहन फान्ज्यो ओ़ह माक्पेन छ्यिम्बुगी स्युहङ-पेन छ्यिम्बु फेलिक्सला दिठी म़ेदी यिहगी च्यी़ प्रुहसीन–
26“स्युहङ-पेन छ्यिम्बु फेलिक्स लाह, ङाह क्लौडियस लुसियस ङो़ले राहङला टास्यी-देले! 27पावल माएँ दि मिहला यहूदीया़गी सेच्ये म़ेदी ज़ुङसीन दुबा, यिहॱनाङ खोदी रोम क्याहल-खापगी नागरिकता ज़्योरक्योगी मिह दुबा। दि ताम क्यी़ह ज्योर फान्ज्यो ङाहगी राहङदीराङ माक्मीया़ ख्येर्ती दि मिहला या़हबु पेहती ओ़ह ग्या़लेगी खा फ़ेदी ख्योङसीन। 28ओहले खोगी च्यि ल़ेह नोङग्यो दुबा म़ेदी ह्अ-कोहच्येला ङाहगी खोला यहूदीया़की छो़बागी दिनॱलाङ ख्येर्सीन। 29यिहॱनाङ खोगी स्यिॱराङ कोहकें थुकी ङ्य़ेहबा दाङ चोन-खाङला तेह कोहकेन्गी ल़ेहया़ च्यिॱआङ पेहक्यो मिहन्दु। खोगी ङ्य़ेहबा खुङया़दीॱराङ छ्य़े-ठिमगी टी़हदापगी तेहन्दाला दुबा। 30ओहले यहूदीया़गी सेच्ये छोल्गु दु माएँ थे़गोराङ ङाहगी दि मिहला राहङसाला ताङ चाहङदी येहबा। ओहले फातुर च़ूगे यहूदीया़लाॱआङ राहङलाराङ म़ेदोङ म़ेदी माक्यो येह” म़ेदी फेलिक्स स्युहङ-पेनला यिहगी प्रुहसीन।
31ओहले माक्पेन छ्यिम्बुगी माक्यो ल़ेहमुराङ पेहती माक्पेन दाङ माक्मीया़गी पावलला ख्येर्ती काहल्सीन। ओहले खुङया़गी पावलला ओ़ह कुहङमुराङ एन्टिपाट्रिस माएँ ग्या़ थु क्याहल्सीन। 32ओहले नाहङबार च्युङ काङबागी डोएँ माक्मीया़गी पावलला ताबुला स्येहन्दी डोएँ माक्मीया़ला चि क्याहप्ती यरूशलेमला लोह ओहङसीन। 33ओहले ताबुला स्येहन्दी डोएँ माक्मीया़ कैसरिया क्याहसाला लेप्ती पावलला स्युहङ-पेन छ्यिम्बु साला च्योल्दी खुङ माक्पेन छ्यिम्बुगी ताङग्योगी यिहगीॱआङ तेर्सीन। 34ओहले स्युहङ-पेन छ्यिम्बुगी ओ़ह यिहगी टा़ह सिहन्दी पावलला टी़हसीन, “ख्ये का़हन्दी लुहङबादी यिहम्बा?” म़ेदी टी़हएँमु “ङाह किलिकिया लुहङबादी यिहम्बा ला़ह” म़ेदी पावलगी मासीन। 35“ओ़हठी यिहन्सीमाना ख्येला क्येन ता़गे मिहया़ ओहङज्यु, ओहले ङाहगी ख्येगी ताम ङ्यिहन्गे लोह!” म़ेदी स्युहङ-पेन छ्यिम्बुगी मासीन। ओहले स्युहङ-पेन छ्यिम्बुगी पावलला या़हबु पेहती सुङदी तेहतोङ म़ेदी क्याहल्बु हेरोदकी क्याहल-गाङ नाहङला ज़्या़ज्येला का तेर्सीन।
Currently Selected:
ल़ेह-पेन 23: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
