ल़ेह-पेन 9
9
शाऊलगी सेम ग्युरक्यो
(ल़ेह २२:६-१६; २६:१२-१८)
1ओहजे ती़हजी थुॱआङ शाऊल चो़वो छ्येवा येशूगी स्याहप्च्यीया़ला सेच्ये म़ेदी खुङया़ला ज्यी़-ङोर तेन्दी खो गो-छ्येवा पूजाहारीसाला काहल्सीन, 2ओहले “दमस्कस छो़खाङगी पोम्बोया़ला ङाहगी ङोहस्यी तेर्ते यिहगी प्री़हदी नाङदोङ,” म़ेदी स्युहसीन। “दमस्कसला काहल्दी ओ़ह थार्पा ज्योर्केन माएँ लाहमला स्युहक्योगी क्येप-ख्योवा दाङ पी़हमी-पेहजा थाम्ज्यीलाराङ छोल्दे छोल्दे ज़ुङदी यरूशलेमला ख्योङ ङ्युहङज्यु,” म़ेदी खोगी गो-छ्येवा पूजाहारी ङ्याम्बु ओङ लाङसीन।
3शाऊल दमस्कस क्याहसाला डोॱराङ येहकें। डोडोपा काहङला क्याहसाकी पोहला लेप्केमु याहङमे-याहङ नामले येहसेर क्याहप्ती खोगी कोर-क्यिहले येहपा छ्या़सीन। 4शाऊल साला च्यार-ताप क्याहप्सीन, ओहले याहङमे-याहङ खोगी दि ल़ेहमु सुङ-क़े च्यी़ थ़ेसीन, “शाऊल, ए शाऊल ख्ये ङाहला च्यिबे तुहक्पु तेर्के?”
5शाऊलगी टी़हसीन, “चो़वो छ्येवा, राहङ सु यिहम्बा?” ओहले ओ़ह सुङ-क़ेगी ल़ेहन क्याहप्नाङसीन, “ङाह येशू यिहम्बा, ओ़हदीला ख्येगी तुहक्पु तेर्केॱराङ येह।
6 यिहॱनाङ लाहङदी क्याहसाला सोङ, ख्येगी पेह कोहकेन्गी ल़ेह ओ़हला ख्येला स्येच्ये येह।”
7शाऊल ङ्याम्बु डोएँगी मिहया़ थामा थोमे पेहती लाहङदी तेहसीन। खुङया़गी क़ेनी थ़ेसीन यिहॱनाङ सुॱलाङ माहथोङ। 8शाऊल सालेगी लाहङसीन ओहले मी़ खा फ़ेगेमु खोगी च्यिॱआङ माहथोङ। ओ़ह सोङबे खोगी रो़हया़गी खोला लाहक्पाला ज़ुङदी ठिती दमस्कसला ख्योङसीन। 9ओहले खोगी ङ्यिहमा सुम थु मी़ थोङ मा़हखु, साहज्येॱआङ माहसे ओहले थुङज्येॱआङ मा़हथुङ।
10ता़ह दमस्कस क्याहसाला हननिया माएँ चो़वो छ्येवा येशूगी स्याहप्च्यी च्यी़ तेहको येहकें। खोला ज्याल्गा नाङसीन, ज्याल्गाला चो़वो छ्येवागी दि ल़ेहमु पेहती के क्याहप्नाङसीन, “ए हननिया!” खोगी मासीन, “चो़वो छ्येवा, ङाह देलाराङ येहबा लाह।”
11ओहले चो़वो छ्येवागी हननिया़ला सुङ नाङसीन, “ख्ये थेका माएँ लाहमला सोङ, ओहले यहूदागी खाङबाला टार्सस क्याहल-खापगी शाऊल माएँ मिहला छोल्दोङ! खो ओ़हला सोल्वाङ ताप तेहती येहबा। 12ओहले शाऊलगी राहङगी मी़ थोङज्यु म़ेदी हननिया मिहन थो़क्यो मेहन्दा च्यी़ नाहङला ओहङदी राहङगी थो़ला लाहक्पा ज़्या़क्यो ज्याल्गाला थोङदी येह।”
13ओहजेला हननियागी मासीन, “चो़वो छ्येवा, ओ़ह मिहगी यरूशलेमला राहङगी छार्क्यीनया़ला ज्यिबुराङ तुहक्पु तेरक्यो माएँ ताम ङाहगी मिह माहङबुराङ लाहमले थे़दी येह।”
14दि ग्या़ॱलाङ राहङगी छेन लेहन्गे मिह थाम्ज्यीला ज़ुङदे ख्येर्च्येला पूजाहारी छ्यिम्बुया़ लाहमले खोगी ओङ ज्योर सिहन्दी येह।
15यिहॱनाङ चो़वो छ्येवागी हननिया़ला सुङ नाङसीन, “ख्ये सोङ, च्यिबेमाना लेहमेन क्यिहपाया़ला, क्याहल्बुया़ला ओहले इस्राएली छार्क्यीनया़गी दिनला ङाहगी मिहन ङोह स्य़े च्य़ूज्येला ङाहगी खोला दाम्दी येह।
16 ओहले ङाहगी मिहनगी तेहन्दाला खोगी काहजे तुहक्पु ना़ कोहच्ये येह, ओ़ह ङाहगी खोला तेन्ज्ये येह” म़ेदी चो़वो छ्येवागी सुङ नाङसीन।
17ओहले चो़वो छ्येवागी सुङ नाङग्योकी स्याहल ङ्यिहन्दी हननिया काहल्सीन। ओहले खो खाङबा नाहङला स्य़ूहदी शाऊलगी थो़ला राहङगी लाहक्पा ज़्या़दी मासीन, “नो़ह शाऊल, ख्ये ओहङगे लाहमला थ़ूक्यो चो़वो येशूगीराङ ख्येगी मी़ थोङ ख़ूज्यु ओहले ख्ये नाम्पार-ताहक्पा थुगी काहङ ख़ूज्यु म़ेदी ङाहला ताङ नाङग्यो यिहम्बा।”
18हननियागी दि ताम मा सिहन-लुहङ मे़हबाराङ शाऊलगी मी़ले माहर च्यि रोहवा च्यि ताहप्सीन, ओहले खोगी मी़ थोङसीन ओहले खो लाहङदी बप्तिस्मा लेहन्सीन। 19ओहले तो से़हदीले खोगी स्युक ज्योर्सीन। शाऊल ङ्यिहमा माहङबु थु दमस्कस क्याहल-खापला येहकेन्गी स्याहप्च्यीया़ ङ्याम्बु तेहसीन।
शाऊलगी दमस्कसला किन्ज्योगी लेहङगुया़ स्येक्यो
20ओहले खो लाहम्साङराङ यहूदीया़की छो़खाङया़ला स्य़ूहदी, “चो़वो छ्येवा येशूॱराङ किन्ज्योगी स़ेबु यिहम्बा” म़ेदी स्येच्ये छ़ूसीन। 21खोगी ताम थे़गेन मिह थाम्ज्यीगी ह्अ ल़ेहदी, “यरूशलेमला चो़वो छ्येवा येशूगी छेन लेहङगेन मिहया़ला सेच्ये छोल्गेन्गी मिह दि मिहराङ मिहन ले? खो देला चो़वो छ्येवा येशूगी स्याहप्च्यीया़ला ज़ुङदी पूजाहारी छ्यिम्बुया़ साला ख्येर्च्येला ओहङग्यो मिहन ले?” म़ेदी मिहया़गी मासीन। 22ओहले शाऊलगी तोहरोङॱआङ ओङ छ्यिम्बु ज्योर्ती दमस्कसला तेहकेन्गी यहूदीया़ला चो़वो छ्येवा येशूॱराङ मास्यीका यिहम्बा म़ेदी माहङबुराङ दास्यीया़ तेन्सीन ओहजेला खुङया़गी च्यिॱआङ ल़ेहन क्याहप मा़हखु।
23ओहले ङ्यिहमा तोबा तिङले यहूदीया़ जोम्दी शाऊलला सेच्ये म़ेदी खुङया़ टे़ह क्याहप्सीन।#२ कोर ११:३२,३३ 24खुङगी सेच्ये छोल्गु दु म़ेदी शाऊलगी क्यी़ह ज्योर्सीन। ओहले यहूदीया़गी शाऊलला सेच्ये म़ेदी ङ्यिहन-नुहपराङ दमस्कस क्याहसाकी कोहया़ला क़ूह तेहको येहकें। 25यिहॱनाङ स्याहप्च्यीया़गी शाऊलला कुहङमुराङ चेल्बाला लू़दी क्याहसागी चिक्पाले माहर पाप तेर्सीन।
शाऊल यरूशलेम क्याहसाला
26खो यरूशलेमला ओहङ फान्ज्यो खोगी स्याहप्च्यीया़ ङ्याम्बु डी़ज्ये छोल्सीन। यिहॱनाङ स्याहप्च्यीया़गी खोला येशूगी स्याहप्च्यी यिहन म़ेदी यिहॱराङ छ्य़े मा़हखु ओ़ह सोङबे खुङया़ शाऊल ङ्याम्बु ज्यी़सीन। 27ओहले बारनाबास माएँ स्याहप्च्यीगी शाऊलला रो़ह पेहती ल़ेह-पेनया़ साला ख्येर्सीन। ओहले शाऊल दमस्कसला डोएँमु लाहमला चो़वो छ्येवा ङ्याम्बु ज्याल्दी चो़वो छ्येवागी खो ङ्याम्बु स्याहल सुङ नाङग्यो दाङ दमस्कसला मा़हन्ज्यीबा पेहती चो़वो छ्येवा येशूगी छेनला सुङ ख्येप्टा तेरक्योगी तामया़ बारनाबासगी स्येसीन। 28ओहले शाऊल यरूशलेमला खुङया़ ङ्याम्बु ज्यिक्पा माहबेबा पेहती फार छुर यू़हज्ये छ़ूसीन, ओहले खोगी मा़हन्ज्यी़बा पेहती चो़वो छ्येवागी छेनला सुङ ख्येप्टा स्येसीन। 29ओहले शाऊल ग्रीक ताम माएँ यहूदीया़ ङ्याम्बु स्येपा तुहर्केन छ़ूसीन, ओहजेला खुङया़गी शाऊलला सेच्ये छोल्गो येहकें। 30दि ताम क्यी़ह ज्योर्ते आदा-नो़हया़गी शाऊलला कैसरियाला ख्योङदी ओ़ह ग्या़ले खोला टार्सस क्याहल-खापला ताङ चाहङसीन।
31ओ़ह तिङला यहूदीया, गालील दाङ सामरिया साने़ला येहकेन्गी थाम्ज्यी छेन्छोकया़ला सेम लो तेहमु काहल्सीन। चो़वो छ्येवागी स्याहप्च्यीया़गी नाम्पार-ताहक्पा थु लाहमले स्युक ज्योर्सीन ओहले छेन्छोकया़ फेल्दी काहल्सीन। स्याहप्च्यीया़ किन्ज्योगी ज्यिक्पा खुर्ती डोउ येहकें ओहले मिहया़ माहङरो माहङरो पेहती काहल्सीन।
पत्रुस लुड्डा दाङ योप्पा क्याहसाला
32ओहले पत्रुस फार छुर थाम्ज्यीराङ ग्या़या़ला डोएँॱराङ लुड्डा साने़ला येहकेन्गी किन्ज्योला यिह-छ्य़े पेहक्यो मिहया़ सालाॱआङ लेप ओहङसीन। 33खोगी ओ़हला एनियास माएँ मिह च्यी़ला थ़ूसीन। एनियास ज़ुबु कुहलॱराङ मी़हखुएँ नाहजागी पेहती ङ्याहल्साला छ्यित्ते लो़ह क्ये़ह काहल सिहन्दी येहकें। 34ओहले पत्रुसगी एनियासला, “ए एनियास, येशू मास्यीकाकी ख्येला ताहन्दाॱराङ टा़ह च्य़ू नाङगेन। ता़ह ख्ये लाहङदोङ, ओहले राहङगी तेङगो तिहदोङ!” म़ेदी मासीन। ओहले खो ओ़हजेलाराङ ह्ओप लाहङसीन ओहले खो डो ख़ूएँ काहल्सीन। 35ओ़ह मिह ओ़ह ल़ेहमु पेहती टा़हक्यो थोङदी लुड्डा दाङ शारोन साने़या़ला तेहकेन्गी मिह थाम्ज्यीगी चो़वो छ्येवाला सेमले खाल्सीन।
36योप्पा माएँ क्याहसाला ताबीता माएँगी चो़वो छ्येवाला यिह-छ्य़े पेहक्यो नुहमु च्यी़ येहकें। ताबीता माक्योदी डोरकास यिहम्बा। ओ़ह माक्योगी तेहन्दादी “रेहउ” यिहम्बा। ओहले मोह नाहम माॱनाङ लेहमेन मिहया़ला या़हबु पेहको येहकें ओहले प्राङबुया़ला रो़हराम पेहको येहकें। 37ङ्यिहमा च्यी़ मोह नेहपा काहल्दी स्यिसीन। ओहले मिहया़गी मोहगी फुङबु ठी़दी खाङबागी थो़स्यो तेङला ख्येर्ती ज़्या़सीन। 38योप्पा लुहङबाले लुड्डा लुहङबाला डोज्येला था़-रिहङबु म़ेहबा येहकें। ओहले पत्रुस लुड्डाला येहबा माएँगी ताम स्याहप्च्यीया़गी क्यी़ह ज्योर फान्ज्यो खुङया़गी मेहन्दा ङ्यी़ला, “ङ्यिहसाला फिमु जे माहनाङबा ग्यो़बाराङ फेप नाङदोङ।” म़ेदी पत्रुससाला लेहङगु ताङसीन। 39ओहले पत्रुस खुङ ङ्यी़ ङ्याम्बुराङ योप्पाला काहल्सीन। ओ़हला लेप-लुहङ मे़हबाराङ मिहया़गी पत्रुसला थो़स्यो तेङला ख्येर्सीन। ओहले ह्युग्मोया़ डोरकास ङ्याम्बु येहकेमु ताबीतागी चेम तेरक्योगी काप्च्या थो़दी पत्रुसला तेन्दी, ङी़हदी पत्रुसकी पोहला तेह ओहङसीन।
40ओहले पत्रुसकी खुङ थाम्ज्यीला फिला ताङसीन ओहले पी़मु च़ूदी सोल्वाङ ताप्सीन। ओहले पत्रुसगी ओ़ह फुङबु ङो़ले त़ेदी, “ए ताबीता, ख्ये लाहङदोङ!” म़ेदी मासीन ओ़हजेलाराङ मोहगी मी़ खा फ़ेसीन ओहले पत्रुसला थोङदी लाहङदी तेहसीन। 41ओहले पत्रुसगी मोह लाहक्पाला ज़ुङदी लाङसीन। ओ़ह तिङला खोगी चो़वो छ्येवागी नाम्पार-ताहक्पा मिहया़ दाङ ह्युग्मोया़ला क़े क्याहप्ती स्यी़दीॱआङ सोम्बो लो़हक्योगी ताबीता खुङया़ला चि क्याहप्सीन।
42दि ताम योप्पा क्याहसा काहङग्याराङ टाहम्सीन, ओहले मिह माहङबुगीराङ चो़वो छ्येवाला यिह-छ्य़े पेहसीन। 43ओहले पत्रुस ङ्यिहमा तोबाज्यी को़बाकी ल़ेह पेहकें सिमोन ङ्याम्बु योप्पा लुहङबालाराङ तेहसीन।
Currently Selected:
ल़ेह-पेन 9: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
