यूहन्ना 14
14
लाहम, तेहन्दाम दाङ मिहली
1ओहले येशूगी स्याहप्च्यीला सुङ नाङसीन, “ख्याया़गी सेम छाबा-छुबे माहबे, ख्यागी किन्ज्योला यिह छ्य़ेक्यो ल़ेहमु ङाहॱलाङ यिह छ्य़ेदोङ। 2ङाहती याहपकी ज़िम्गाङला तेहसा ग्या़ माहङबुराङ येह, ओहले ङाह ख्याया़की तेहन्दाला ग्या़ ठाबे पेहच्येला डोॱराङ येह। मिहन्नानी ङाहगी ख्याया़ला दि रोहवा ताम माज्येराङ म़ेहबा येहकें। 3ओहले ख्याया़की तेहन्दाला ग्या़ ठाबे पेह सिहन फान्ज्यो ङाह येहपाराङ लो़हदी ओहङज्ये येह, ओहले ख्याया़ला ङाहसाला ख्येर्च्ये येह, ओहले ङाह का़हला येहबा, ओ़हला ख्याया़ॱआङ ओहङज्ये येह। 4ङाह डोज्ये पेहक्यो ग्या़गी लाहमनी ख्याया़ला क्यी़हराङ येह।”
5थोमागी येशूला स्युहसीन, “ओ़ चो़वो, राहङ का़हला फेप नाङगेराङ येहबा, ओ़ह ङ्यिहला क्यी़ह म़ेह ओहले ङ्यिहगी लाहम काह-ठि पेहती ङोह स्य़े ख़ूज्ये ले?”
6ओहले येशूगी खोला सुङ नाङसीन, “लाहम, तेहन्दाम दाङ मिहली ङाहराङ यिहन। ङाह लाहमले पेहती मिहम्बानी सुज्यीॱआङ याहप्च्येन आबासाला लेप मी़हखुएँ। 7ख्याया़गी ङाहला ङोह स्य़ेक्यो यिहन्नानी ङाहती याहपलाॱआङ ङोह स्ये़ज्ये येहकें। ता़ह यिहन्ज्यु ख्याया़गी ङाहती याहपला ङोह स्य़ेदी येह, च्यिबेमाना ख्याया़गी मिहरोला थोङ सिहन्दी येह।”
8फिलिपगी येशूला स्युहसीन, “ओ़ चो़वो, ङ्यिहला याहप तेन नाङदोङ नाह, ओहजे येहना ङ्यिहला दाङगे।”
9येशूगी खोला सुङ नाङसीन, “फिलिप, ओहजे ङ्यिहमा थु ङाह ख्या ङ्याम्बु तेहतीॱआङ तोहरोङॱआङ ख्येगी ङाहला ङोह मा़हस्येबा? ङाहला थोङगेन्दीगी याहपलाॱआङ थोङ सिहन्दी येह। ओ़ह सोङबे ख्ये ‘ङ्यिहला याहप तेन नाङदोङ’ म़ेदी काह-ठि पेहती मा ख़ूएँ? 10ङाह याहप ङ्याम्बु येह, ओहले याहप ङाह ङ्याम्बु ज़्य़ू नाङदी येह म़ेदी च्यि ख्ये यिह मे़हछ्येगे? ख्याया़ला माक्यो ताम ङाहगी राहङगीराङ जे़दी माक्यो मिहन। ङाह ङ्याम्बु ज़्य़ू नाङगे याहपगी राहङगी छ्या़लेया़ ङाह लाहमले जे नाङगेराङ येह। 11ङाह याहप ङ्याम्बु येह ओहले याहप ङाह ङ्याम्बु ज़्य़ू नाङदी येह म़ेदी ङाहला यिह छ्य़ेदोङ। मिहन्सीमाना ङाहगी पेहक्योकी ल़ेहया़ला त़ेदी ङाहला यिह छ्य़ेदोङ। 12तेहम्बाराङ ङाह ख्याया़ला माएँ, सुगी ङाहला यिह छ्य़ेगे, खोगी ङाहगी पेहक्यो ल़ेहमु ल़ेहया़ पेहच्ये येह, ओहले ओ़ह म़ेदीॱआङ छ्यिम्बु ल़ेहया़ पेहच्ये येह, च्यिबेमाना ङाह याहप्च्येन आबासाला डोॱराङ येह। 13ख्याया़गी ङाहगी मिहनला च्यि लाङॱनाङ स़ेबु लाहमले याहपकी ज़िज्यिद ओहङज्यु म़ेदी ङाह ओ़ह पेहच्ये येह। 14ख्याया़गी ङाहगी मिहनला च्यि लाङनाॱआङ ङाह ख्याया़गी तेहन्दाला ओ़ह पेह तेर्च्ये येह।
नाम्पार-ताहक्पा थुकी ताहम्ज्या
15 ख्यागी ङाहला तेहम्बाराङ चेवा पेहकें यिहनानी ङाहगी काया़ॱआङ ची़ज्ये येह। 16ओहले ङाह याहप ङ्याम्बु ओहर-छ्य़े स्युहएँ, ओहले मिहरोगी ख्याया़ला लेहमेन रो़हराम जे नाङगेन्दीला ताङ नाङज्ये येह, ओहले मिहरो ख्या ङ्याम्बु नाहम्स्यी किन्दुॱराङ ज़्य़ू नाङज्ये येह। 17मिहरो तेहन्दामकी थु यिहन। यिहॱनाङ जाम्बुलीङगी मिहरोला लोक पेह मी़हखुएँ च्यिबेमाना दि जाम्बुलीङगी मिहरोला नाह थोङगे नाह ङोह स्य़ेगे। यिहॱनाङ ख्यागी मिहरोला ङोह स्य़ेएँ, च्यिबेमाना मिहरो ख्या ङ्याम्बु ज़्य़ू नाङगे, ओहले मिहरो ख्याया़गी पाहरक्यीला ज़्य़ू नाङज्ये येह। 18ङाह ख्याया़ला टो़टे पेहजाया़ला ल़ेहमु पेहती क्युर मे़हज्याएँ, ङाह येहपाराङ ख्यासाला ओहङज्ये येह। 19ता़ह ङ्यिहमा तोबा तिङले जाम्बुलीङगी ङाहला नाहमॱआङ थोङज्ये म़ेह, यिहॱनाङ ख्याया़गी ङाहला थोङज्ये येह। ङाह सोम्बो यिहन्गे सोङबे ख्याया़ॱआङ सोम्बो ओहङज्ये येह। 20ओ़ह ङ्यिहमु ‘ङाह ङाहगी याहप ङ्याम्बु येह, ओहले ख्या ङाह ङ्याम्बु येह, ओहले ङाह ख्या ङ्याम्बु येह’ माएँ ताम ख्यागी ङोह स्ये़ज्ये येह। 21ङाहला चेवा पेहकें मिहगी ङाहती का ङ्यिहन्दी ची़गे। ओहले ङाहला चेवा पेहकें मिहला ङाहती याहपगी चेवा जे नाङगे। ङाह खोला चेवा पेहच्ये येह, ओहले ङाह खोसाला डोज्ये येह।”
22ओहले यहूदागी येशूला मासीन, “चो़वो, च्यिबे राहङ ङ्यिहसाला च्यी़राङ राहङला तेन्ज्येला फेप नाङगे, यिहॱनाङ जाम्बुलीङगी मिहया़ सालाती च्यिबे फेप मेहनाङगे?” (दि यहूदा इस्करियोतती मिहम्बा यिहन्गे।)
23ओहले येशूगी खोला सुङ नाङसीन, “सुगी ङाहला चेवा पेहकें, खोगी ङाहती तामया़ ङ्यिहन्ज्ये येह, ओहले ङाहती याहपगी खोला चेवा जे नाङज्ये येह, ओहले ङ्यिह खोसाला ओहङज्ये येह, ओहले खो ङ्याम्बु तेहच्ये येह। 24ङाहला चेवा मेहबेगेन्दीगी ङाहगी माक्योकी ताम मिहङ्यीहन्गे। ख्याया़गी थे़क्यो दि तामया़ ङाहती मिहन, यिहॱनाङ ङाहला ताङ नाङगे याहपती यिहम्बा।
25 ख्याया़ ङ्याम्बु येहकेमुराङ ङाहगी ख्याया़ला दि तामया़ म़ेदी येह। 26यिहॱनाङ रो़हराम जे नाङगेन्दी, पे यिहॱना़: नाम्पार-ताहक्पा थु, मिहरोला याहपगी ङाहती मिहनला ताङ नाङज्ये येह, मिहरोगी ख्याया़ला ताम थाम्ज्यीराङ लोप नाङज्ये येह, ओहले ङाहगी ख्याला माक्योगी थाम्ज्यीराङ तामया़ टेहम्बा साल च्य़ू नाङज्ये येह।
27 ङाह ख्या ङ्याम्बुराङ स्य़िहदे क्युर ज़्या़एँ, ङाह राहङगी स्य़िहदे ख्याया़ला तेर्के। दि स्य़िहदेती जाम्बुलीङगी तेरक्यो ल़ेहमु मिहम्बा, ख्या सेम छाबा-छुबे माहबे ओहले मा़हन्ज्यी। 28ङाहगी ख्याया़ला ‘ङाह डोॱराङ येह, ओहले ख्यासाला ओहङगे’ म़ेदी माक्यो ख्याया़गी थ़े सिहन्दी येहबा। ख्याया़गी ङाहला चेवा पेहक्यो यिहनानी ङाह याहप्च्येन आबासाला डोॱराङ येह माएँ थे़गेमु ख्या क़ेहनाङ पेहच्ये येहकें, च्यिबेमाना याहप ङाह म़ेदी चा़ छ्यिम्बु ज़्य़ू नाङदी येह। 29ता़ह दि थाम्ज्यीराङ डोएँ म़ेदी तोहङलेराङ ङाहगी ख्याया़ला मा सिहन्दी येह, ओहले दि केच्या तेहन्दा डुप्केमु ख्याया़गी यिह छ्य़ेज्ये येह। 30ता़ह ङाह ख्या ङ्याम्बु ताम माहङबु मेहमाएँ, च्यिबेमाना दि जाम्बुलीङला ओङ छ्य़ेएँगी क्याहल्बु ओहङगेॱराङ येह। यिहॱनाङ खोगी ङाहला च्यिॱआङ पेह मी़हखुएँ। 31यिहॱनाङ ङाह याहपला चेवा पेहकें माएँ ताम मिह थाम्ज्यीगी ङोह स्य़े ख़ूज्यु म़ेदी ङाह याहपकी काया़ ची़गेनॱराङ येहबा। ता़ह लाहङदोङ, ओहराङ दि ग्या़ले डोएँ।”
Currently Selected:
यूहन्ना 14: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
