यूहन्ना 16
16
1 “ख्याया़की तेहपा मा़हलोज्यु म़ेदी ङाहगी दि तामया़ माक्यो यिहम्बा। 2खुङगी ख्याला यहूदी छो़खाङले तेन्ज्ये येह। तोहरोङ दि ल़ेहमु ती़हजीॱआङ ओहङज्ये येह, ख्याया़ला सेकेन्दीगी, ‘ङाहगी किन्ज्योला स्याहप्तो स्युहएँराङ येह’ म़ेदी ने़ज्ये येह। 3मिहया़गी याहप दाङ ङाहला ङोह मा़हस्येबा सोङबे ख्याया़ला दि रोहवा पेहच्ये येह। 4यिहॱनाङ दि केच्या ङाहगी ख्याला स्य़े सिहन्दी येह, ओ़ह ती़हजी लेप फान्ज्यो ङाहगी ख्याला च्यि माक्यो येहकें ओ़ह ख्याला टेहम्बा ओहङज्ये येह। तोहङलेराङ ङाहगी ख्याला दि तामया़ मा़हमे, च्यिबेमाना ङाह ख्या ङ्याम्बु येहकें।
नाम्पार-ताहक्पा थुगी छ्या़लेया़
5 ता़ह ङाह, ङाहला ताङ नाङगेन्दी साला डोॱराङ येह, यिहॱनाङ ‘राहङ का़हला फेप नाङगेराङ येहबा लाह?’ म़ेदी ख्या सुज्यीगीॱआङ ङाहला मा़हटीह 6ङाहगी दि ताम माक्यो सोङबे ख्याया़गी सेम तुहङालगी काहङदी येह। 7यिहॱनाङ, ङाह ख्याला तेहन्दामकी ताम माएँ, ङाह डोएँदीलाॱराङ ख्याला खेप्साङ येह। च्यिबेमाना ङाह मेहन्डोना, रो़हराम जे नाङगेन्दी ख्यासाला फेप नाङज्ये म़ेह। यिहॱनाङ ङाह डोसीमाना ङाह मिहरोला ख्यासाला ताङज्ये येह। 8ओहले मिहरो फेप फान्ज्यो मिहरोगी दि जाम्बुलीङला तिहक्पा, तेहन्दाम दाङ किन्ज्योकी ठिमकी तेहन्दाला खुङया़गी ल़ेह नोहर च्य़ूगेनॱराङ येह म़ेदी तेन नाङज्ये येह। 9ङाहला यिह मे़हछ्य़ेएँॱराङ तिहक्पा यिहम्बा म़ेदी मिहरोगी खुङया़ला तेन नाङज्ये येह। 10टाहङदेनगी तेहन्दाला, च्यिबेमाना ङाह याहप्च्येन आबासाला डोएँ, ओहले ख्यागी ङाहला येहपाराङ थोङज्ये म़ेह। 11ओहले ठिमगी तेहन्दाला, च्यिबेमाना दि जाम्बुलीङला ओङ छ्ये़गेन्दीला ङ्य़ेहबा फो़ सिहन्दी येह।”
12 “ङाहगी ख्याया़ला मा कोहएँगी तामया़नी माहङबुराङ येह, यिहॱनाङ ताहन्दा ख्यागी ओ़ह तामया़ ना मी़हखु। 13ओहले मिहरो, पे यिहॱना़: तेहन्दामकी थु फेप फान्ज्यो मिहरोगीॱराङ ख्याला थाम्ज्यी तेहन्दामगी लाहमला ॱठि नाङज्ये येह। मिहरोगी राहङ लाहमले च्यिॱआङ सुङ नाङज्ये म़ेह। मिहरोगी सेन नाङग्योकी स्याहलया़ॱराङ सुङ नाङज्ये येह, ओहले तिङमा ङ्यिहमाया़ला ओहङज्ये पेहक्योगी केच्याया़ ख्याला स्य़े नाङज्ये येह। 14ङाहगी माक्योकी तामया़ ख्याया़ला स्य़े नाङदी मिहरोगी ङाहती ज़िज्यिद जे नाङज्ये येह। 15याहप ङ्याम्बु येहकेन्गी थाम्ज्यीराङ से़हया़ ङाहती यिहन। ओ़ह सोङबे ङाहगी मासीन, ‘का़हन्दी ङाहती यिहम्बा ओ़ह ङाहलेगी नोम्दी नाम्पार-ताहक्पा थुगी ख्याया़ला स्य़े नाङज्ये येह।’
स्याहप्च्यीया़की तुहङाल दाङ काहसो
16 याहम्बी तिङले ख्याया़गी ङाहला येहपाराङ थोङज्ये म़ेह, ओहले याहम्बी तिङले ङाहला येहपाराङ थोङज्ये येह।” 17ओहजेला येशूकी लाहला स्याहप्च्यीया़गी राहङ नाहङदुङ मासीन, “मिहरोगी ओहराङला दि च्यि सुङ नाङग्यो यिहम्बानी? ‘याहम्बी तिङले ख्याया़गी ङाहला येहपाराङ थोङज्ये म़ेह, ओहले याहम्बी तिङले ङाहला येहपाराङ थोङज्ये येह,’ ओहले ‘च्यिबेमाना ङाह याहप्च्येन आबासाला डोॱराङ येह’।” 18खुङया़गी मासीन, “मिहरोगी ‘याहम्बी तिङले’ म़ेदी सुङ नाङग्योदी च्यि यिहम्बा? मिहरोगी च्यि सुङ नाङगेनॱराङ येहबा ङ्यिहगी ङोह मा़हस्ये।”
19खुङया़गी दिगी तेहन्दाला टी़हज्ये छोल्गेराङ येह माएँ ताम येशूगी सेन्दी खुङया़ला सुङ नाङसीन, “‘याहम्बी तिङले ख्याया़गी ङाहला येहपाराङ थोङज्ये म़ेह, ओहले याहम्बी तिङले ङाहला येहपाराङ थोङज्ये येह’ माएँ तामगी तेहन्दा च्यि यिहम्बा म़ेदी ख्यागी दिगी तेहन्दालाराङ राहङ नाहङदुङ कालाम पेहक्यो मिहन ले? 20तेहम्बाराङ, ङाह ख्याला माएँ, ख्या ङी़हदी ङुहप्रा तिहङरा पेहच्ये येह, यिहॱनाङ जाम्बुलीङ क़ेहनाङ पेहच्ये येह। ख्याया़गी ङ्याहङेन पेहॱनाङ ख्यागी ङ्याहङेन क़ेहनाङला ग्युर्च्ये येह। 21पेहजा क्येज्ये पेहकेमु आमाला ज्यिबुराङ तुहक्पु ओहङगे, च्यिबेमाना मोहगी सुह ना़ कोहएँगी ती़हजी लेप सिहन्ग्यो ओहङगे, यिहॱनाङ मोहगी पेहजा क्ये फान्ज्यो ओ़ह सुह क्याहप्क्योगी केच्याया़ थाम्ज्यीराङ टेहम्बा च्येहके च्यिबेमाना जाम्बुलीङला पेहजा च्यी़ क्येसीन माएँ तामला मोह ज्यिबुराङ काहसो पेहकें। 22ओ़ह ल़ेहमुराङ ताहन्दा ख्या ज्यिबुराङ ङ्याहङेन पेहकें, यिहॱनाङ ङाह ख्याला येहपाराङ थु ओहङज्ये येह, ओहजेला ख्यागी सेम क़ेहनाङगी काहङज्ये येह। ओहले ओ़ह क़ेहनाङ सुज्यीगीॱआङ ख्या लाहमले फ्रो़दी ख्येर ख़ूज्ये म़ेह। 23ओ़ह ती़हजीला ख्याया़गी ङाहला च्यिॱआङ टी़हज्ये म़ेह। तेहम्बाराङ ङाह ख्याला माएँ, ख्यागी ङाहती मिहनला याहप ङ्याम्बु च्यि लाङगे, ओ़ह मिहरोगी ख्याला नाङज्ये येह। 24ताहन्दा थु ख्यागी ङाहती मिहनला च्यिॱआङ लाङदी म़ेह। लाङदोङ, ओहले ख्यागी ज्योर्च्ये येह, दि ल़ेहमु पेहती ख्यागी काहसो छाङबु डोज्ये येह।
येशूगी जाम्बुलीङला क्याहल सिहन्दी येह
25 दि केच्या ङाहगी ख्याला पे लाहमले म़ेदी येह। यिहॱनाङ ती़हजी ओहङगेॱराङ येह, ङाह येहपाराङ ख्या ङ्याम्बु पे लाहमले ताम माज्ये म़ेह, यिहॱनाङ याहपगी तेहन्दाला ङाह ख्याया़ला छ्यिसाल-नाहङसाल पेहती स्येच्ये येह। 26ओ़ह ती़हजीला ख्यागी ङाहती मिहनला लाङज्ये येह। ङाह ख्यागी तेहन्दाला याहप ङ्याम्बु ओहर-छ्य़े स्यी़ह तेर्च्ये येह म़ेदी ङाह ख्याला मेहमाएँ। 27च्यिबेमाना याहप राहङगीराङ ख्याला चेवा जे नाङगे, च्यिबेमाना ख्यागी ङाहला चेवा पेहती येह, ओहले ङाह किन्ज्यो लाहमले ओहङसीन म़ेदी ख्यागी यिह छ्य़ेक्यो येह। 28ङाह याहप लाहमले दि जाम्बुलीङला ओहङसीन, ओहले ता़ह येहपाराङ ङाह दि जाम्बुलीङला क्युर ज़्या़दी याहप्च्येन आबासाला डोॱराङ येह।”
29ओहले स्याहप्च्यीया़गी येशूला स्युहसीन, “नाहरे गा राहङगी ङ्यिहला पे ज़्या़ माहनाङबा जेती थेका सिरेराङ सुङ नाङसीन। 30ता़ह ङ्यिहगी ङोह स्य़ेसीन, राहङला थाम्ज्यीराङ से़हया़ थुयी़ येहबा, ओहले राहङला सुज्यीगीॱआङ टी़ह कोहबा म़ेह। ओ़ह सोङबे राहङ किन्ज्यो लाहमलेॱराङ फेप नाङग्यो यिहन म़ेदी ङ्यिह यिह छ्य़ेगे।” 31ओहजेला येशूगी ल़ेहन क्याहप नाङसीन, “ताहन्दा गा ख्याया़गी यिह छ्य़ेसीन!” 32“त़ेदोङ, ती़हजी ओहङगेॱराङ येह, माज्येराङ माना ओहङ सिहन्दी येह, ख्या फेतोर कोहतोर काहल्दी राहङ-राहङगी ग्या़ला डोज्ये येह ओहले ङाहला च्यी़राङ क्युर ज़्या़ज्ये येह। यिहॱनाङ ङाहनी च्यी़राङ म़ेह, च्यिबेमाना याहप ङाह ङ्याम्बु ज़्य़ू नाङदी येह।”
33 “ङाह ङ्याम्बु तेहती ख्यागी स्य़िहदे ज्योर ख़ूज्यु म़ेदी ङाहगी ख्याया़ला दि केच्याया़ माक्यो यिहम्बा। जाम्बुलीङला ख्याला ज्यिबुराङ तुहक्पु ओहङज्ये येह, यिहॱनाङ मा-फाम्बु माहबे, ङाहगी जाम्बुलीङला क्याहल सिहन्दी येह।”
Currently Selected:
यूहन्ना 16: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
