लूका 12
12
पेहचीन तेन्गे मिहया़ला ज्यी़-ङोर नाङग्यो
(मत्ती १०:२६-२७)
1मिहया़ तोङरा च्यी़ म़ेदीॱआङ माहङबु जोम्ग्यो सोङबे च्यी़गी च्यी़ला च्येप्ती-च्येप्ती ओहङसीन। ओ़ह ती़हजीला येशूगी तोहङले राहङगी स्याहप्च्यीया़ला सुङ नाङसीन, “ख्याया़ फरिसीया़गी खमिर ङो़ले जेम्दी तेहतोङ! दि माएँगी तेहन्दादी, पेहचीन तेन्गे फरिसीया़ ङ्याम्बु ख्या जेम्दी तेहतोङ म़ेदी माज्ये छोल्ग्यो यिहम्बा।#मत्ती १६:६; मर्क ८:१५ 2च्यिबेमाना उप्ते ज़्या़क्योगी का़ह येहकें केच्याया़ थाम्ज्यीराङ खा फ़ेज्ये येह, ओहले पे़हदी ज़्या़क्योगी का़ह येहकें केच्याया़ थाम्ज्यीराङ ङ्यिहमा च्यी़ क्यी़ह ज्योर्च्ये येह।#मर्क ४:२२; लूक ८:१७ 3ख्यागी ना़-जुबेला माक्योगी ताम ङ्यिहमागी क्या-साङेला थे़ज्ये येह, ओहले ख्यागी खाङबा नाहङला स्युप-ताम लाहप्क्योगी ताम खाङबागी किल्दुङले क़े तेन्दी माज्ये येह” म़ेदी येशूगी सुङ नाङसीन।
सु ङ्याम्बु ज्यी़ कोहएँ माएँगी तेहन्दाला
(मत्ती १०:२८-३३; १२:३२)
4येहपाराङ येशूगी सुङ नाङसीन, “ए रो़हया़, ङाहगी ख्याला माएँ, मिहया़ ङ्याम्बु मा़हन्ज्यी। खुङगी, ख्यागी ज़ुबुला च्यी़राङ से ख़ूएँ ओ़ह म़ेदी ल्हाक्पुनी खुङया़गी च्यिॱआङ पेह मी़हखुएँ। 5सु ङ्याम्बु ज्यी़ कोहएँ मासीमाना ङाहगी ख्याला माएँ, ख्या स्यिदी तिङले ङ्याल्वाला क्युर ख़ूएँगी ओङ येहकेन्गी किन्ज्यो ङ्याम्बु च्यी़राङ ज्यी़ कोहकें। यिहम्बा, ओ़ह किन्ज्यो ङ्याम्बु ज्यी़दोङ। 6च्यि डापाल ङ्यी़ला च्युर्कानी ङा क्युहर मी़हखुएँ ले? च्युर्कानी ओहजे ख्येमु येहॱनाङ किन्ज्योगी च्युर्कानी च्यी़ॱलाङ टेहम्बा च्य़ेह मेहनाङगे। 7तोहरोङ ख्यातीनी किन्ज्योगी टा क्युहङबा रे़ह-रे़हॱआङ टाहङजी क्याहप नाङदी येह। ओ़ह सोङबे ख्या मा़हन्ज्यी, च्युर्कानीया़ म़ेदीॱआङ ख्या जेन माहङबु चा़ छ्यिम्बु यिहन।”
8 “ङाहगी ख्याला माएँ सुगी ङाहला मिहया़गी दिनला ङाहती चो़वो छ्येवा म़ेदी माएँ ओ़हदीला ङाह मिहगी स़ेबुगीॱआङ स्यिहङगामकी स्याहप्च्यीगी दिनला खो ङाहती यिहन म़ेदी माज्ये येह। 9ओहले सुगी ङाहला मिहया़गी दिनला ङोह मे़हस्येएँ माएँ, ओ़हदीला ङाहॱआङ किन्ज्योगी स्यिहङगामकी स्याहप्च्यीया़गी दिनला ङोह मे़हस्येएँ म़ेदी माज्ये येह। 10मिहगी स़ेबुला टाह पेहते स्ये़हन्डील पेहक्योगी तिहक्पा, स्या़बा ज्योर्च्ये येह ओहले नाम्पार-ताहक्पा थुला स्ये़हन्डील पेहक्योगी तिहक्पादी नाहमॱआङ स्या़बा ज्योर्च्ये म़ेह।”#मत्ती १२:३२; मर्क ३:२९
11 “मिहया़गी ख्याला ज़ुङदी छो़खाङया़ला, पोम्बोया़गी दिनला, ओहले स्युहङ-पेन दाङ ठिम-पेनया़गी दिनला ख्येर्केमु ओहजेला ख्यागी च्यि मा कोहएँ म़ेदी तुहङाल माहबे। #
मत्ती १०:१९,२०; मर्क १३:११; लूक २१:१४,१५ 12ओ़ह ती़हजीलाराङ ओ़हला मा कोहएँगी ताम नाम्पार-ताहक्पा थुगी ख्याला लोप नाङज्ये येह” म़ेदी येशूगी सुङ नाङसीन।
उल्दुम्बा मिह छ्युक्पुकी पे
13ओहले मिह मिह-माहङ नाहङले मिह च्यी़गी येशूला, “लोबेन ला़ह, ङाहगी आदाला ङाहला फास्यी के़ह तेर्तोङ म़ेदी सुङ नाङदोङ नाह लाह” म़ेदी स्युहसीन। 14ओहले येशूगी, “नो़ह, ख्यागी फास्यी कोहज्येला ङाहला सुगी दि ओङ तेर्पा?” म़ेदी सुङ नाङसीन। 15ओहले येशूगी ओ़हला जोम्ग्यो मिहया़ला सुङ नाङसीन, “जेम्बु पेहतोङ! ना थाम्ज्यीगी ह्अम्बाया़ ङो़ले जेम्दे तेहतोङ, च्यिबेमाना काहजेराङ क्युह येहॱनाङ ओ़हदीगी मिहला तेहन्दामकी मिहली मेहतेर्कें।”
16ओहले येशूगी दि पे स्ये नाङसीन, “मिह छ्युक्पु च्यी़गी स्यिहङला माहङबुराङ तेन्दोया़ या़हसीन दु 17ओहले खोगी साम्लु ताङदे, ‘दि डुया़ का़हला ज़्या़ज्ये, ग्या़ॱआङ म़ेह, ता़ह च्यि पेहच्ये?’ म़ेदी साम्लु ताङसीन दु। 18ता़हनी ङाह फेमा-फेमा ज़ेप दाङ चाहङया़ रोम्दी छ्यिम्बु-छ्यिम्बु ज़ोएँ ओहले थाम्ज्यीराङ डु दाङ पेलाया़ ओ़ह नाहङला ज़्या़गेन। 19ओहले ङाहगी राहङलाराङ माज्ये येह, ‘ए सो! ख्ये काहजे सोदी छ्यिम्बु दु! ख्ये ङ्याम्बु लोह दाङ लोह थुप्कें क्युह येह, क्यिपु पेहते सोह, थुङ ओहले ङ्याहम्साङ पेह’।”
20 ओ़हजेलाराङ किन्ज्योगी खोला सुङ नाङसीन, “ए उल्दुम्बा मिह, तिहरीङ कुहङमुराङ ख्ये स्यिज्ये येह, ख्येगी सी़दे ज़्या़क्योगी क्युहया़ सुगी साहएँ?” 21ओहले येशूगी मिहया़ला, “राहङगी तेहन्दाला क्युह सी़दे ज़्या़एँ मिहगी च्याहवा ओ़ह रोहवाॱराङ ओहङज्ये येह, किन्ज्योगी ओ़ह रोहवा मिहला छ्युक्पु सुङ मेहनाङगे” म़ेदी दि पे था़ च्ये नाङसीन।
तुहङाल माहबे
(मत्ती ६:२५-३४)
22ओहले येशूगी राहङगी स्याहप्च्यीया़ला सुङ नाङसीन, “ओ़ह सोङबे ङाहगी ख्याला माएँ, च्यि साहज्ये, च्यि थुङज्ये ओहले च्यि केहन्ज्ये म़ेदी तुहङाल माहबे। 23च्यिबेमाना मिहली साहएँ स़ेह म़ेदी ओहले ज़ुबु केहन्गेन्गी स़ेह म़ेदी चा़ छ्यिम्बु यिहम्बा। 24च्याहरोया़ला त़ेदोङ, खुङगी नाह च़ूएँ, नाह तेन्दो तुहएँ, नाह खुङया़दी ज़ेप दाङ चाहङया़ येहबा। यिहॱनाङ, किन्ज्योगी खुङला साहज्ये नाङदेराङ येहबा। ख्याया़नी ओ़ह च्याह-च्यिहवाया़ म़ेदीॱआङ ज्यिबुराङ चा़ छ्यिम्बु यिहन!”
25 “ख्या नाहङला सुगीॱआङ तुहङाल पेहते राहङगी छे ती़हजी सिपाज्यीॱआङ रिहङबु ज़ो ख़ूएँ ले? 26देजे फेमा ल़ेहॱआङ पेह मी़हखुसीमाना च्यिबे लेहमेन से़हगी तेहन्दाला तुहङाल पेहकें? 27रिहगी मेहन्दोया़ काहन्डुमु पेहते छार्कें म़ेदी साम्लु ताङदोङ। खुङगी नाह ल़ेह पेहकें, नाह काप्च्या थाएँ। यिहॱनाङ, ङाहगी ख्याला माएँ, क्याहल्बु सोलोमन ङ्याम्बु ओहजे क्युह येहनाॱआङ मेहन्दो जेबा ज़ाप्ते म़ेहबा येहकें।#१ राज १०:४-७; २ लुहक ९:३-६ 28यिहॱनाङ तिहरीङ ओहङगे दाङ नाहङबार मेहला क्युर्केन पाङगागी चाया़ॱलाङ किन्ज्योगी दि ल़ेहमु जेती जा़प्नाङगे मासीमाना, च्यि किन्ज्योगी ख्याला केहन्गेन काप्च्या मेहनाङगे ले? के ख्याया़गी यिह-छ्य़े? 29ओ़ह सोङबे च्यि साहज्ये, च्यि थुङज्ये म़ेदी ख्या तुहङाल माहबे। 30किन्ज्योला ङोह मे़हस्येएँ मिहया़ गा दि रोहवा तुहङाल पेहती तेहकें। दि थाम्ज्यीराङ से़हया़ कोहकें म़ेदी स्यिहङगामला ज़्य़ू नाङगेन ख्यागी याहपला थुयी़ येह। 31तोहङस्यो ख्यागी किन्ज्योगी क्याहल्सी छोल्दोङ ओहले किन्ज्योगी दि थाम्ज्यीराङ कोहकेन्गी से़हया़ ख्याया़ला नाङज्ये येह।”
स्यिहङगामला सो़गेन्गी क्युह
(मत्ती ६:१९-२१)
32 “ए छ्ये़मु मिह बा़लया़, ख्या मा़हन्ज्यी! च्यिबेमाना किन्ज्योगी ख्याला राहङगी क्याहल्सी नाङज्येला काहसो जे-नाङदी येह। 33ख्यागी क्युहया़ चोङदी टाङगा प्राङबुया़ला के़हदी तेर! राहङगी तेहन्दाला निङबा मेहन्डोएँगी काहल्दाया़ जे़दोङ। स्यिहङगामला नाहमॱआङ मेहतोङगेन्गी क्युह स्यिहङगामला सी़दोङ। ओ़हला कुमेनॱआङ मेहस्योर्केन ओहले बुगीॱआङ मेहसाहएँ। 34च्यिबे मासीमाना, ख्या राहङगी क्युह-नोहर का़हला येहबा, ओ़हलाराङ सेम छ्या़गे!” म़ेदी येशूगी सुङ नाङसीन।
जेम्बु पेहती तेह कोहएँ
35ओ़ह तिङले येशूगी सुङ नाङसीन, “ख्या कारा च्यिङदी स्याहप्तो स्य़ूहज्येला ठाबे पेहते तेहतोङ ओहले ख्याया़गी लो पार्ते ज़्या़दोङ।#मत्ती २५:१-१३ 36पा़हमाला डेन साह काहल्ग्यो ताहक्पुला योक्पुया़गी कू़हदे तेहकें ल़ेहमुराङ ख्यागीॱआङ ताहक्पुला कू़हदे तेहतोङ। ताहक्पु लो़ह ओहङदी कोह तुहङगेमु खुङगी कोह खा फे़ तेर्के।#मर्क १३:३४-३६ 37ताहक्पु ओहङगेमु ङ्यि मा़हलोहबा पेहते कू़हदे तेहक्यो योक्पुया़ला थोङगेमु ताहक्पुगी सेम ज्यिबुराङ काहसो पेहच्ये येह। तेहम्बाराङ ङाहगी ख्याला माएँ, ओ़ह ताहक्पुगी योक्पुया़ला चा़ पेहती डोम्बोला ल़ेहमु पेहतीराङ क्योङज्ये येह।”
38 “फिमु काहल्दी नुहप फे़ले फार ओहङदीॱआङ राहङगी योक्पुया़ला ङ्यि मा़हलोहबा पेहती तेहक्यो थोङसीन माना, खुङ काहजे सोदी छ्यिम्बु ओहङज्ये येह।”
39 “ओहले दि केच्या सेमला ङोह स्य़ेदी ज़्यो़, कुमेन देजे ती़हजीला ओहङगे म़ेदी क्यी़ह ज्योर्पा येहनानी खाङबागी ताहक्पुगी कुमेनला नाहङला स्य़ूह च्य़ूज्येॱराङ म़ेहबा येहकें। #
मत्ती २४:४३,४४ 40ओ़ह ल़ेहमुराङ मिहगी स़ेबुॱआङ ख्याया़गी नावा यिहला म़ेहबा ती़हजीला फेप नाङज्ये येह। ओ़ह सोङबे ख्याया़ नाहम पेहॱनाङ ठाबे पेहते तेहतोङ!” म़ेदी येशूगी सुङ नाङसीन।
यिह-छ्य़ेबु दाङ यिह-माहछ्य़ेबु योक्पुगी पे
(मत्ती २४:४५-५१)
41ओहजेला पत्रुसगी येशूला दि ल़ेहमु म़ेदी स्युहसीन, “चो़वो, राहङगी दि स्याहलया़ ङ्यिह च्यी़लाॱराङ सुङ नाङग्यो यिहम्बानी मिह थाम्ज्यीलाराङ सुङ नाङग्यो यिहम्बा?” 42ओहले येशूगी सुङ नाङसीन, “यिह-छ्य़ेबु दाङ रिहक्स्यी छ्यिम्बु येहकेन्गी डु गोबा काहन्डुमु मिह यिहन्डो? खोला ताहक्पुगी राहङ खाङबा मे़हमेया़ला ठाबे ती़हजीला खुङया़गी बोला थोप्केन्गी साहप्च्या क्य़ेज्येला कुलज्ये येह। 43ओहले ताहक्पु कोरा क्याहप्ती लो़ह ओहङगेमु डु गोबाला दि ल़ेहमु ल़ेह पेह तेहक्यो च्य़ेह सिहन्गेमु खो काहजे सोनाम-साक्पु ओहङज्ये येह। 44तेहम्बाराङ ङाहगी ख्येला माएँ, ताहक्पुगी ओ़ह डु गोबाला राहङगी थाम्ज्यीराङ क्युह दाङ नोहरया़ चि क्याहप्च्ये येह। 45का़हलेॱआङ डु गोबागी, ‘ङाहगी ताहक्पु ग्यो़बाराङ लो़ह ओहङज्ये म़ेह’ म़ेदी लेहमेन योक्पु-यो़मुया़ला तुहङदा तेर्ते, ओहले सेमला ने़जेबा से़हदी थुङदी ज़ी़दी तेहसीमानानी, 46ओ़ह डु गोबागी ताहक्पु मेहयोहङगे म़ेदी ने़क्यो ङ्यिहमा दाङ ती़हजीलाराङ खोगी ताहक्पु फोक थेन ओहङज्ये येह, ओहले खोला ङ्य़ेहबा काल्ज्ये येह, ओ़ह ल़ेहमुराङ पेहती यिह-छ्य़े मेहबेगे मिहया़गी च्याहवा ओ़ह ल़ेहमुराङ ओहङज्ये येह।”
47 “ताहक्पुगी सेम ङोह स्य़ेदीॱआङ पेह कोहएँगी ल़ेह मेहबेगे योक्पुया़ला ताहक्पुगी ङ्य़ेहबा छ्यिम्बु काल्ज्ये येह।”
48 “यिहॱनाङ ताहक्पुगी सेम क्यी़ह माहन्ज्योर्बा पेहते तुहङदा साहएँगी ल़ेह पेहकें योक्पुलादी ताहक्पुगी ङ्य़ेहबा ङ्युहङसे़ काल्ज्ये येह। का़हन्दी मिहला माहङबुराङ ज्योर्ती येहबा, ओ़ह मिहगी माहङबुराङ तेर कोहज्ये येह। ओ़हठीॱराङ का़हन्दी मिहला माहङबु च्योल्ग्यो येहबा खोगीॱआङ ओहजेराङ माहङबु लो तेर कोहच्ये येह।”
मे़हमेया़ नाहङला ठ़ूस्यी
(मत्ती १०:३४-३६)
49ओहले येशूगी सुङ नाङसीन “ङाह जाम्बुलीङला मे़हरा ताङज्येला ओहङग्यो यिहम्बा, ओ़ह म़ेह तोहङलेराङ ती़हक्यो यिहनानी या़हबु ओहङज्ये येहकें। 50ङाहगी तुहक्पुगी बप्तिस्मा च्यी़ ल़ेहन कोहच्ये येह ओहले ओ़ह बप्तिस्मा माहलेहन थु ङाहला सेम लो तेहमु ओहङज्ये म़ेह।#मर्क १०:३८ 51च्यि ङाह जाम्बुलीङगी मिहया़ला थिन च्य़ूज्येला ओहङग्यो यिहम्बा म़ेदी ख्यागी ने़उ दुबा? मिहम्बा, ङाहनी मिहया़ला खा फे़ज्येला गा ओहङग्यो। 52ता़ह यिहन्ज्यु खाङबा म़ेहमे ङा नाहङलाराङ ठ़ूस्यी ओहङज्ये येह, ओहले मेहन्दा सुमगी मेहन्दा ङ्यी़ला टाह पेहच्ये येह ओहले मेहन्दा ङ्यी़गी मेहन्दा सुमला टाह पेहच्ये येह। 53ओहले आबागी पुहला, पुहगी आबाला, आमागी पोहमोला, पोहमोगी आमाला ओ़ह ल़ेहमुराङ पेहते क्यू़हमुगी नामाला ओहले नामागी क्यू़हमुला टाह पेहच्ये येह” सुङदी येशूगी सुङ नाङसीन।#मीका ७:६
ती़हजीगी ताक्छेन
(मत्ती १६:२-३; ५:२५-२६)
54ओहले येहपाराङ येशूगी मिह मिह-माहङया़ला सुङ नाङसीन, “नुहपले मुक्पा नाहक्पु लाहङ फान्ज्यो, ‘ता़हनी नाम क्याहप्कें’ म़ेदी माएँ, ओहले क्याहपॱआङ क्याहप्कें। 55ओहले ल्होलेगी ल्हा़बा लुङजी ओहङसीमाना, ‘ता़हनी छेपा ओहङगे’ म़ेदी माएँ, ओहले छेपा ओहङॱआङ ओहङगे। 56ए खोक्पा नाहक्पु मिहया़, जाम्बुलीङ दाङ नामला त़ेदी नाम क्याहप्कें नि मेहक्याहप्कें म़ेदीनी ख्यागी ह्अ कोह खू़उ दु। ओहले दि ती़हजीला ओहङज्ये पेहक्योगी ताक्छेनया़दी ख्यागी च्यिबे ह्अ मेहकोहएँ? 57का़हन्दी ल़ेह ठाबे यिहम्बा म़ेदी ख्याया़गी च्यिबे ह्अ मेहकोहएँ?”
58 “क्येन ता़गे मिहगी ख्येला ठिम ताङगेन ग्या़ला ख्येर्च्ये पेहसीमाना, ख्येगी लाहमलाराङ खो ङ्याम्बु थिन्ज्ये छोल्दोङ मिहन्नानी खोगी ख्याला ठिम-पेनगी दिनला लाहङ च्य़ूज्ये येह ओहले खोगी माक्मीया़ला च्योल्ज्ये येह, माक्मीया़गी ख्येला ख्येर्ती चोन-खाङला लू़ज्ये येह। 59ङाहगी ख्येला माएँ, डेन्डागी रे़ह-रे़ह टाङगा ख्येगी माहच्याल थु ख्ये ओ़ह नाहङले थेन ङ्युहङज्ये म़ेह!”
Currently Selected:
लूका 12: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
