लूका 14
14
येशू फरिसीगी खाङबाला
1थाङ सोएँगी ङ्यिहमा च्यी़ फरिसी गोबा च्यी़गी येशूला राहङगी खाङबाला सोल छ्येच्येला फेप स्युहक्यो सोङबे येशू फरिसीगी खाङबाला फेप नाङसीन। ओहले ओ़हला येहकेन मिहया़गी येशूगी च्यि च्यि जेकु दुबा म़ेदी ङ्याहम च्येती त़ेदी तेहक्यो येहकें। 2काङबा लाहक्पा टाङग्यो मेहन्दा च्यी़ येशूगी दिनला तेहती येहकें। 3ओहले येशूगी छ्य़े-ठिमकी लोबेन दाङ फरिसीया़ला, “थाङ सोएँगी ङ्यिहमाला नेहपाला टा़ह च्य़ूज्ये ओहङगे म़ेदी छ्य़े-ठिमला प्रुहक्यो येहबानी म़ेहबा?” म़ेदी टी़ह नाङसीन। 4ओहजेला खुङगी च्यिॱआङ ल़ेहन माहक्याहप। ओहले येशूगी ओ़ह नेहपाला दे़दी टा़ह च्य़ू नाङसीन ओहले खाङबाला लो़ ताङसीन। 5ओ़ह तिङला येशूगी खुङया़ला सुङ नाङसीन, “थाङ सोएँ ङ्यिहमाला ख्याया़ सुज्यीदीॱआङ पुह-पोहमो, लाङगो दाङ पाहलाङया़ तिहङ रिहङबु छ्यु-कोल्मुला छ्यिसीमाना ख्यागी ग्यो़बाराङ मेहतेन्गे ले?”#मत्ती १२:११ 6येहपाराङ खुङया़गी च्यिॱआङ मा मा़हखु।
7ओ़हला ओहङग्योगी डोम्बोया़गी थो़स्यो टाहल दाम्ग्यो ज़ी़दी येशूगी दि ल़ेहमु पे च्यी़ सुङ नाङसीन, 8“सुज्यीगीॱआङ ख्येला पा़हमागी डेन साहज्येला क़े क्याहप्सीमाना, ख्ये काहल्दी थो़स्यो टाहलला तेहच्ये माहछोल। ख्ये म़ेदीॱआङ मिह छ्यिम्बु फेप स्यी़हदी येहटो।#हितो २५:६,७ 9ओहले ओ़ह मिह लेप फान्ज्यो ख्या ङ्यिकालाराङ पाहङज्येन क्याहप्केन्गी ने़बु ओहङदी, ‘दि रो़हला ग्या़ तेर्तोङ’ म़ेदी ख्येला तेहसा ग्या़ले लाङज्ये येह। ओ़ह ती़हजीला ख्ये ङोह छे़दी तोहङबा माहर्मु माहर्मु पेहती थाम्ज्यी म़ेदी स्याहम्स्योला तेह कोहच्ये येह। 10ओ़ह सोङबे ख्येला पाहङज्येन क्याहप्क्यो येहसीमाना ख्ये काहल्दी चो़स्यो टाहलला तेहतोङ, ओहले पाहङज्येन तेरक्यो ताहक्पु ओहङदी ख्येला ‘फेप नाङदोङ’ म़ेदी थो़स्यो टाहलला फेप स्युहज्ये येह। ओहजेला मिह थाम्ज्यीगी दिनला ख्येला ची़नाङ ओहङज्ये येह। 11च्यिबे मासीमाना, राहङगी राहङला छ्यिम्बु ज़ोएँदी फेमा ओहङज्ये येह, ओहले राहङगी राहङला फेमा ज़ोएँदी छ्यिम्बु डोज्ये येह।”#मत्ती २३:१२; लूक १८:१४
12ओहले येशूगी राहङला फेप स्युहएँगी च्यिहन्दाला सुङ नाङसीन, “डेन साहज्येला डोम्बो क़े क्याहप्सीमाना राहङगी रो़हया़, आदा-नो़ह, ङ्येन्जेन-ङ्येहवा दाङ टोहङरो छ्युक्पुया़ला क़े माहक्याहप, खुङगी क्यिम्बा च्याल्ज्येला ख्येॱलाङ क़े क्याहप्च्ये येह। 13ओ़ह सोङबे डेन साहज्येला डोम्बो क़े क्याहप्सीमाना प्राङबु, कुच्या, स्याहर्ना दाङ काङबा लाहक्पा स्योरक्योगी मिहया़ला क़े क्याहप्तोङ। 14ओहले ख्ये सोनाम-साक्पु ओहङज्ये येह। च्यिबे मासीमाना ख्येला क्यिम्बा च्याल्ज्येला खुङ ङ्याम्बु च्यिॱआङ मेहयोहङगे। टाहङबु मिहया़ स्यिदीले सोम्बो लाहङगे ङ्यिहमाला किन्ज्योगी ख्येला च्याहगा नाङज्ये येह।”
डेन छ्यिम्बुगी पे
(मत्ती २२:१-१०)
15येशूगी स्याहल थे़दी लेहमेन डोम्बो च्यी़गी येशूला, “किन्ज्योगी क्याहल्सीला डेन साह ङ्युहङगे मिहया़ काहजे सोनाम-साक्पु!” म़ेदी मासीन। 16ओहजेला येशूगी दि पे ङो़ले ल़ेहन क्याहप नाङसीन, “ङ्यिहमा च्यी़ मिह च्यी़गी ज्यिबुराङ छ्यिम्बु डेन ठाबे पेहते मिह थाम्ज्यीला पाहङज्येन क्याहप्सीन। 17ओहले डेन साएँ ती़हजी काहल फान्ज्यो खोगी राहङगी क़े क्याहप्क्यो डोम्बोया़ला ‘साएँ ती़हजी काहल्सीन’ म़ेदी क़े क्याहप्च्येला राहङगी योक्पुया़ला ताङसीन। 18ओहले ओ़ह डोम्बोया़गी च्यि च्यि तेलेन तेन्दी खुम-लुहङ म़ेह म़ेदी मासीन। ओहले मेहन्दा च्यी़गी, ‘ङाहगी स्यिहङ च्यि ङ्योहक्यो येह, ङाह ओ़ह स्यिहङ ता डो कोहच्ये येह’ म़ेदी मासीन। ओहले लेहमेनदीगी ‘ओहर-छ्य़े! ङाहला कोहङदा नाङदोङ, ङाह ओहङ मी़हखु’ म़ेदी मासीन। 19ओहले राहङसादीगी, ‘ङाहगी लाङगो हाल ङा ङ्योहक्यो येह ओ़ह सोङबे ङाह नाहरेराङ ल़ेह काहन्डुमु पेहकु दुबा म़ेदी ता डो कोहज्ये येह। ओहर-छ्य़े!, ङाहला कोहङदा नाङदोङ, ङाह ओहङ मी़हखु’ म़ेदी मासीन। 20ओहले येहपाराङ लेहमेन मिह च्यी़गी, ‘ङाहगी ताहन्दाॱराङ पा़हमा पेहक्यो येह, ओ़ह सोङबे ङाह ओहङ मी़हखु’ म़ेदी मासीन। 21ओहले योक्पु लो़ह काहल्दी खुङगी माक्योगी ताम थाम्ज्यीराङ ताहक्पुला स्येसीन। ओहले ताहक्पुगी स्यिहताङ लाहङदी मासीन, ‘ग्यो़बाराङ सोङ, ख्ये क्याहसाकी लाहम छ्यिम्बु दाङ फेमाया़ला काहल्दी प्राङबु, कुच्या, स्याहर्ना दाङ केपा कुहर्ती काहल्ग्यो मिहया़ला क़े क्याहप्ती ख्येर-स्यो’!”
22 “ओहले योक्पुगी ताहक्पुला मासीन, ‘ने़बु लाह, राहङगी सुङ नाङग्योया़ला ङाहगी क़े क्याहप्ती ख्योङसीन। यिहॱनाङ तोहरोङॱआङ तेहसा ग्या़ नि माहङबुराङ येह’।”
23 “ओहले ताहक्पुगी योक्पुया़ला मासीन, ‘क्याहसाले माहर डोसा लाहम दाङ युहलया़ला काहल्दी मिहया़ला उर्चु पेहती क़े क्याहप्ती ख्येर-स्यो, ङाहगी खाङबा काहङॱराङ कोहएँ!’ 24ङाहगी पाहङज्येन क्याहप्क्योया़ नाहङला सुज्यीगीॱआङ ङाहती डेनगी प्रे़ह ङ्याम ङ्युहङज्ये म़ेह।”
स्याहप्च्यीया़गी पाङ कोहएँगी से़हया़
(मत्ती १०:३७-३८)
25ङ्यिहमा च्यी़ मिह मिह-माहङ छ्यिम्बुज्यी येशू ङ्याम्बु डोॱराङ येहकें। ओहले येशूगी खुङ ङो़ले लो़हदी सुङ नाङसीन, 26“ङाह ङ्याम्बु डोज्ये सेम पेहकेनया़गी राहङगी आबा-आमा, पी़हमी, पुह-पोहमो, आदा-नो़ह, आज्यी-नुहमुया़, ओहले राहङला म़ेदीॱआङ माहङबु ङाहला चेवा पेह कोहएँ मिहन्सीमाना खो ङाहगी स्याहप्च्यी ओहङ मी़हखुएँ।#मत्ती १०:३७ 27राहङगी क्याहङस्यीङ खुर्ती ङाहगी तिङदा तिङ मेहयोहङगेनया़दी ङाहगी स्याहप्च्यीया़ ओहङ मी़हखुएँ।
28 पे यिहॱना़: ख्या सुज्यीगीॱआङ दुम्दुम ज़ोएँ सेम पेहसीमाना, टाङगा दाङगे नि मेहन्दाङगे, टाङगा काहजे डोएँ म़ेदी तोहङलेराङ थाम्ज्यीराङ चिदुङ मेहक्याहप्कें ले? 29यिहॱनाङ खोगी दुम्दुम्गी ब्राम तिङदी सिहन्दा च्ये मी़हखुसीमाना मिहया़गी खोला स्ये़हन्डील पेहती माज्ये येह, 30‘ओ़ह मिहगी ज़ोज्ये नि छ़ूसीन, यिहॱनाङ सिहन्दानी च्ये मा़हखु।’ 31येहपाराङ पे यिहॱना़: क्याहल्बु च्यी़गी लेहमेन क्याहल्बु ङ्याम्बु मा़ क्याहप डोएँमु, ‘ॱठि च्यी़ माक्मीया़ ख्येर्ती ङाह लेहमेन ॱठि ङ्यी़ येहकेन्गी क्याहल्बु ङ्याम्बु मा़ क्याहप ख़ूएँ नि मी़हखुएँ’ म़ेदी तोहङलेराङ तेहती साम्लु मेहताङगे ले? 32ला़ खाज्ये मे़हसीमाना, टाहया़ था़-रिहङबु येहकेमुराङ खोगी राहङगी पाहङजेम्बाया़ ताङदी ‘ता़हनी ओहराङ मा़ मेहक्याहप्कें, ता़ह ओहराङ थिन कोहएँ’ म़ेदी ओहर-छ्य़े स्य़ूहज्येला ताङज्ये येह। 33ओ़ह ल़ेहमुराङ पेहते ख्या नाहङला सुगी ङाहगी तेहन्दाला थाम्ज्यी से़हया़ मे़हपाङगे, खो ङाहगी स्याहप्च्यी ओहङ मी़हखुएँ” म़ेदी येशूगी सुङ नाङसीन।
प्रे़ह म़ेहबा छागी तेहन्दाला
(मत्ती ५:१३; मर्क ९:५०)
34 “छा फेन थो़एँगी स़ेह यिहम्बा, यिहॱनाङ छागी प्रे़हराङ याहल्सीमाना ओ़हदी च्यि से़हगी छा प्रे़ह ज़ोज्ये ले? 35ओ़ह ल़ेहमु छानी नाह सासाला फेन थोएँ, नाह ली़हला फेन थोएँ, ओहले मिहगी ओ़ह छाला क्युर चाहङज्ये येह। सु ङ्याम्बु नाम्ज्यो येहबा, खोगी ङ्यिहन्ज्यु।”
Currently Selected:
लूका 14: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
