मत्ती 27
27
येशूला पिलातससाला ख्येर्क्यो
(मर्क १५:१; लूक २३:१-२; यूह १८:२८-३२)
1ङाटु नाहम-सेमुराङ, पूजाहारी छ्यिम्बु दाङ छ्य़ेगी खेम्बुया़गी येशूला सेच्ये म़ेदी टे़ह क्याहप्सीन। 2ओहले खुङया़गी येशूला ताहम्दी रोमी स्युहङ-पेन छ्यिम्बु पिलातससाला ख्येर्ती चि क्याहप्सीन।
यहूदा स्यिक्यो
(ल़ेह १:१८-१९)
3येशूला सेकेन्गी ङ्य़ेहबा काहल्सीन माएँ ताम थे़दी ज़ुङ च्य़ूगे यहूदाला क्येहपा क्येसीन। खोगी ओ़ह ङुल-टाङ कोहर्मु सुम-च्यु लेहन्दी पूजाहारी छ्यिम्बु दाङ यहूदीया़गी एल्डरया़ साला काहल्दी मासीन,#ल़ेह १:१८,१९ 4“ङाहगी ङ्य़ेहबा-छ्यू़बा च्यिॱआङ माहबेबा मिहला सेच्येला ज़ुङ च्य़ूदी तिहक्पा छ्यिम्बुच्यी पेहसीन” म़ेदी मासीन। ओहले खुङया़गी, “ओ़ह तामदी ङ्यिहला च्यि च्योल्दो ले? ओ़हदीनी ख्येगी ताम का यिहन” म़ेदी मासीन। 5दि ताम थे़दी यहूदागी ओ़ह टाङगा छ्योखाङ नाहङला क्युर चाहङसीन ओहले ओहलेगी थेन्दी काहल्दी खो च्याङदी स्यिसीन।
6पूजाहारी छ्यिम्बुया़गी ओ़ह टाङगा ती़हदी मासीन, “दिनी ठा़गी टाङगा यिहम्बा, दि टाङगाला छ्योखाङगी टाङगा ङ्याम्बु से़ज्ये या़हबु मेहयोहङगे” म़ेदी मासीन। 7ओ़ह सोङबे खुङया़गी टे़ह क्याहप्ती छ्यि-क्याहपा मिहया़गी रोह तो़हज्येला सासागी नेक्यी ज़ोएँ मिह ङ्याम्बु स्यिहङ च्यी़ ङ्योहसीन। 8ओ़ह सोङबे ताहन्दा थुॱआङ ओ़ह स्यिहङला “ठा़गी स्यिहङ” म़ेदी माएँ ठिम येहबा।
9दि ल़ेहमु पेहती ओ़ह ती़हजीला यर्मिया लुहङतेम्बागी सुङ नाङग्योकी दि स्याहल तेहन्दा डुप्क्यो यिहम्बा, “इस्राएलगी मिहया़गी मिहरोला क्याहप्क्योगी रिहनदी ङुल-टाङ सुम-च्यु येहकें। ओ़हदी खुङया़गी लेहन्सीन।#जक ११:१२,१३ 10ओहले चो़वोगी ङाहला सुङ नाङग्यो ल़ेहमुराङ पेहती खुङया़गी ओ़ह टाङगा सासागी नेक्यी ज़ोएँ मिहगी स्यिहङगी तेहन्दाला तेर्सीन।”
पिलातसगी दिनला येशू
(मर्क १५:२-१५; लूक २३:३-५,१३-२५; यूह १८:२९–१९:१६)
11येशू रोमी स्युहङ-पेन छ्यिम्बुगी दिनला ज़्याङ फान्ज्यो स्युहङ-पेनगी येशूला, “च्यि ख्ये यहूदीया़गी क्याहल्बु यिहम्बा?” म़ेदी टी़हसीन ओहजेला येशूगी, “ओ़हनी राहङगीराङ सुङ नाङगु दु” म़ेदी ल़ेहन क्याहप नाङसीन। 12पूजाहारी छ्यिम्बु दाङ यहूदीया़गी एल्डरया़गी येशूला माहङबुराङ ङ्य़ेहबा काल्ज्ये छोल्सीन। यिहॱनाङ खुङया़गी काहजे फातुर च़ूॱनाङ येशूगी च्यिॱआङ सुङ माहनाङ। 13ओ़ह सोङबे पिलातसगी येशूला, “दि मिहया़गी देजे माहङा फातुर च़ूक्यो च्यि ख्येगी मे़हथे दु?” म़ेदी मासीन। 14यिहॱनाङ येशूगी स्याहल च्यी़ॱआङ जोप क्याहप माहनाङ। दि थोङदी स्युहङ-पेन पोम्बो छ्यिम्बु ज्यिबुराङ ह्अ ल़ेहसीन।
15थार्पा-ती़हसाङ ङ्यिहमाला स्युहङ-पेन पोम्बो छ्यिम्बुगी मिह मिह-माहङया़गी सेमला ने़क्यो ल़ेहमु चोन-खाङला छ्यिक्यो मिह च्यी़ला ताङगेन्गी ठिम येहकें। 16ओ़ह ती़हजीला बारब्बा मिहन थो़क्यो ज्यी़ज्ये ल़ेहमु मिह च्यी़ चोन-खाङला येहकें। 17ओहले पिलातसगी जोम्ग्यो मिहया़ला, “म़ेदोङ ले, ङाहगी ख्याया़गी तेहन्दाला का़हन्दीला ताङदोङ? बारब्बालानी मास्यीका माएँ येशूला?” म़ेदी टी़हसीन। 18च्यिबेमाना यहूदीया़गी गोबाया़गी येशूला ठादो पेहती चि क्याहप्क्यो यिहन माएँ ताम स्युहङ-पेन पोम्बो छ्यिम्बुला क्यी़ह येहकें।
19पिलातस ठिम ताङज्येला ठिम ताङगेन्गी ज़्य़ू-ठिला तेहक्यो येहकें। ओ़हजेलाराङ खोगी पी़हमीगी खोला दि ल़ेहमु म़ेदी लेहङगु ताङ चाहङसीन, “ओ़ह च्यिॱआङ क्येन म़ेहबाकी मिहला च्यिॱआङ जे माहनाङ च्यिबेमाना तिहरीङ नुहङमु ङाहगी खोगी तेहन्दाला मिलाम थोङदी ज्यिबुराङ तुहक्पु ङ्युहङसीन।”
20यिहॱनाङ पूजाहारी छ्यिम्बुया़ दाङ यहूदीया़गी एल्डरया़गीदी मिह मिह-माहङला क्या़दी दि ल़ेहमु मा च्य़ूसीन, “येशूला से नाङदोङ, बारब्बालादी ताङ नाङदोङ।” 21स्युहङ-पेन पोम्बो छ्यिम्बुगी येहपाराङ टी़हसीन, “तेहम्बाराङ म़ेदोङ ले, का़हन्दीला ताङदोङ?” खुङया़गी “बारब्बालाराङ ताङ नाङदोङ” म़ेदी क़े तेन्दी मासीन।
22ओहले पिलातसगी येहपाराङ टी़हसीन, “ओ़हठी यिहन्सीमानानी मास्यीका माएँ येशूलादी च्यि पेहतोङ ले?” “खोला क्याहङस्यीङला च्याङ नाङदोङ!” म़ेदी खुङया़गी ल़ेहन क्याहप्सीन। 23पिलातसगी टी़हसीन, “च्यिबे? दि खोगी च्यि ल़ेह चोक्पा पेहक्यो येहबा ले?” यिहॱनाङ खुङगी तोहरोङ क़े तेन्दी मासीन, “खोला क्याहङस्यीङलाराङ च्याङ नाङदोङ!”
24पिलातसगी ता़ह च्यिॱआङ ला़ खाजे ल़ेहमु माहथोङ। “ता़ह ठू़स्यी-स्यिहङदाॱराङ डोएँ यिहम्बा छे दु” म़ेदी पिलातसगी मिह थाम्ज्यीगी दिनला लाहक्पा ठी़दी मासीन, “त़ेदोङ, दि मिह सेक्योगी ङ्य़ेहबा ङाहला माह फो़ज्यु, ख्याया़लाॱराङ फो़ज्यु!”#व्य २१:६-९ 25“डी़गे-डी़गे, दि मिह सेक्योगी ङ्य़ेहबा ङ्यिह दाङ ङ्यिहगी चावाया़गी थो़लाराङ फो़ज्यु!” म़ेदी मिहया़गी क़े तेन्दी मासीन।
26ओहजेला पिलातसगी बारब्बाला ताङ चाहङसीन। येशूलादी खुङगी ताक्स्यु क्याहप्ती क्याहङस्यीङला च्याङज्येला माक्मीया़ला चि क्याहप्सीन।
माक्मीया़गी येशूला स्ये़हन्डील पेहक्यो
(मर्क १५:१६-२०; यूह १९:२-३)
27ओ़ह तिङले पिलातसगी माक्मीया़गी येशूला क्याहल-गाङ नाहङला ख्येर्सीन ओहले लेहमेन थाम्ज्यी माक्मीया़ला क़े क्याहप्ती ख्योङसीन। 28खुङया़गी येशूगी नाहम्सा पित्ते येशूला क्याहल्बुगी नोम्गे ल़ेहमुराङ माहर्मु नाहम्सा केन तेर्सीन 29छेर्मागी थ़े जे़दी येशूगी उला केन तेर्सीन, ओहले योबा छ्या़ला ङ्युङमागी प्रेहका नोम च्य़ूसीन। ओहले येशूगी दिनला पी़मु च़ूदी, “यहूदीया़गी क्याहल्बुला छ्याक-छालो!” म़ेदी स्ये़हन्डील पेहती मासीन। 30ओ़ह तिङले माक्मीया़गी येशूला थुक्स्याल क्याहप्सीन, ओहले ङ्युङमागी प्रेहका फ्रो़दी येशूगी उला क्याहप्सीन। 31खुङया़गी येशूला दि ल़ेहमु पेहती स्ये़हन्डील पेह सिहन फान्ज्यो माहर्मु नाहम्सा पित्ते येशूगी राहङगी नाहम्साॱराङ केन तेर्सीन। ओ़ह तिङले खुङया़गी येशूला क्याहङस्यीङला च्याङज्येला ख्येर्सीन।
येशूला क्याहङस्यीङला च्याङग्यो
(मर्क १५:२१-३२; लूक २३:२६-४३; यूह १९:१७-२७)
32लाहमला डोएँ डोएँमुॱराङ खुङगी सिमोन मिहन थो़क्यो कुरेनी माएँ लुहङबागी मेहन्दा च्यी़ला थ़ूसीन। खुङया़गी खोला येशूगी क्याहङस्यीङ खुर्च्येला उर्चु पेहसीन। 33ओहले खुङ गल्गथा माएँ ग्या़ला लेप्सीन। गल्गथा माक्योदी “काब्लीगी ग्या़” माक्यो यिहम्बा। 34ओ़हला लेप्तीले खुङया़गी येशूला ठी़बा लू़क्योगी ज़िएँ कुहन्डुमकी-निङगु थुङ च्य़ूसीन। येशूगी प्रे़ह ङ्याम्दी छ्येच्ये थु जे माहनाङ।#भज ६९:२१
35ओ़ह तिङले खुङया़गी येशूला क्याहङस्यीङला च्या़जार तिहप्ती च्याङसीन। येशूगी नाहम्सादी खुङया़गी राहङ नाहङदुङ क्येहन क्याहप्ती कोहसीन।#भज २२:१८ 36खुङया़ ओ़हला येशूला सुङदी तेहसीन। 37येशूगी उ थो़ला खुङया़गी “दि येशू यहूदीया़गी क्याहल्बु यिहम्बा,” म़ेदी फातुर च़ूक्योगी यिहगी च्यी़ प्री़हदी च्याङसीन। 38येशूला च्याङगेमु खुङया़गी च्याहक्पा ङ्यी़ॱलाङ येशूगी योबा दाङ योमा ङो़ले क्याहङस्यीङला च्याङसीन।
39ओ़ह लाहमले डोएँ मिहया़गी गो़ युङदी येशूला स्ये़हन्डील पेहती दि ल़ेहमु मासीन,#भज २२:७; १०९:२५ 40“छ्योखाङ रोम्दी येहपाराङ ङ्यिहमा सुमलाराङ ज़ो ख़ूएँ मिह ख्येराङ मिहम्बा ले? तेहम्बाराङ ख्ये किन्ज्योगी स़ेबुराङ यिहन्सीमानानी राहङला थार च्य़ूदी क्याहङस्यीङले माहर फाप्ती स्यो ले!” म़ेदी मासीन।#मत्ती २६:६१; यूह २:१९
41ओ़ह ल़ेहमुराङ पेहती पूजाहारी छ्यिम्बुया़, छ्य़े-ठिमकी लोबेनया़ दाङ यहूदीया़गी एल्डरया़गीॱआङ येशूला स्ये़हन्डील पेहती, 42“दि मिहगी लेहमेनलानी थार च्य़ूसीन, यिहॱनाङ त़ेदोङ, राहङलानी थार च्य़ू मा़हखु। का़हलेॱआङ दि इस्राएलीया़गी थार्पा नाङगेन्गी क्याहल्बु यिहन्सीमानानी क्याहङस्यीङले माहर फाप्ती ओहङज्यु ओहले का ङ्यिहगी यिह छ्य़ेगे! 43खोगी किन्ज्योला म़ेहबा पेहको येहकें ओहले ‘ङाहनी किन्ज्योगी स़ेबु यिहम्बा’ म़ेदी डोउ येहकें। का़हलेॱआङ किन्ज्योगी थुला ठुङदी येहसीमानानी ता़ह किन्ज्योगीॱराङ खोला थार च्य़ू नाङज्यु” म़ेदी मासीन।#भज २२:८
44ओ़ह ल़ेहमुराङ पेहती येशू ङ्याम्बु च्याङग्योगी ओ़ह च्याहक्पाया़गीॱआङ येशूला स्ये़हन्डील पेहसीन।
येशू टोहङ नाङग्यो
(मर्क १५:३३-४१; लूक २३:४४-४९; यूह १९:२८-३०)
45ङ्यिहमागी छ्युजी च्यिङ्यी़ यिहन्ज्यु छ्युजी सुम थु क्याहल-खाप थाम्ज्यीलाराङ ना़-जुबे काहल्सीन। 46छ्युजी सुमजेला येशूगी सुङ-क़े छ्यिम्बुच्यी तेन्दी दि ल़ेहमु सुङ नाङसीन, “एलोई, एलोई, लामा सबखथनी?” दि स्याहलगी तेहन्दा, “ओ़ ङाहगी किन्ज्यो, ओ़ ङाहगी किन्ज्यो, राहङगी ङाहला च्यिबे क्युर ज़्या़ नाङग्यो?”#भज २२:१ म़ेदी सुङ नाङग्यो यिहम्बा। 47येशूगी दि ल़ेहमु जेती सुङ-क़े तेन्गेन थे़दी ओ़हला लाहङदी तेहकेन मिहया़ नाहङला लाहलागी, “दि मिहगीनी एलियाला गा क़े क्याहप्को दु” म़ेदी मासीन।
48ओहले खुङ नाहङलेगी मिह च्यी़ छ्योङदी काहल्दी काबे ल़ेहमु से़हज्यी क्युर्पु कुहन्डुमकी-निङगुला पा़दी ङ्युङमा च्योदोला केन्दी येशूला छ्येच्येला तेर्सीन।#भज ६९:२१ 49यिहॱनाङ लेहमेनया़गी, “याहम्बी कू़हदोङ, कू़हदोङ नाह का़हलेॱआङ एलिया खोला थार च्य़ूज्येला ओहङगे यिहम्बानी?” म़ेदी मासीन। 50यिहॱनाङ ओ़ह ती़हजीलाराङ येशू येहपाराङ सुङ-क़े छ्यिम्बुच्यी तेन्दी टोहङ नाङसीन।
51ता़ह त़ेदोङ, ओ़ह ती़हजीलाराङ छ्योखाङ नाहङला का़क्योगी योल्बा थो़ यिहन्ज्यु तिहङ थु बो ङ्यी़ पेहती राहल्सीन। ओहले साङगुल ओहङसीन, तोह-पा़राया़ के़हसीन।#प्रस २६:३१-३३ 52ओहले रोह ज़्या़सा फुक्पाया़ खा फ़ेसीन ओहले स्यिदी काहल्ग्यो किन्ज्योगी दाम नाङग्योगी मिहया़ सोम्बो लो़हदी ओहङसीन। 53येशू टोहङदी तिङला सोम्बो ज़्याङ नाङ फान्ज्यो खुङया़ राहङ-राहङगी फुक्पालेगी थेन्दी नाम्पार-ताहक्पा क्याहसाला स्य़ूहसीन ओहले मिह माहङबुगीराङ खुङला थोङसीन।
54साङगुल काहल्ग्यो दाङ ओ़हला काहल्ग्योगी थाम्ज्यीराङ से़हया़ थोङदी येशूला सुङदी तेहक्यो माक्मीया़ दाङ खुङया़गी माक्पेन ज्यिबुराङ ज्यी़सीन। ओहले खुङया़गी, “तेहम्बाराङ खोनी किन्ज्योगी स़ेबुराङ यिहम्बा दुबा” म़ेदी मासीन।
55पी़हमी-पेहजा माहङबुराङ ग्याङलेॱराङ लाहङदी ते़ तेहती येहकें। खुङ गालील साने़लेगी येशूला ताहदा क्याहप्ती स्याहप्तो स्यी़हदी ओहङग्यो यिहन्गे।#लूक ८:२,३ 56खुङ नाहङला मरियम मग्दलिनी, याकूब दाङ योसेफकी आमा मरियम दाङ जब्दियागी पुह पिन ङ्यी़गी आमा यिहन्गे।
येशूगी कुबुर फुक्पाला तो़हक्यो
(मर्क १५:४२-४७; लूक २३:५०-५६; यूह १९:३८-४२)
57कुहङॱसेला योसेफ मिहन थो़क्योगी अरिमाथिया क्याहसागी मिह छ्युक्पु च्यी़ ओहङसीन। खोॱआङ येशूगी स्याहप्च्यी यिहन्गे। 58ओहले खोगी पिलातससाला काहल्दी येशूगी कुबुर लाङसीन। पिलातसगीॱआङ खोला येशूगी कुबुर ख्येर च्य़ूसीन। 59योसेफगी येशूगी कुबुर ख्येर्ती साम्बा रे़ह कार्पु च्यी़गी टिल्सीन, 60ओहले ओ़ह कुबुरला ताहन्दा च्यी़राङ तोह-पा़रा फ्रिदी ज़ोक्योगी राहङदीराङ साम्बा फुक्पाला तो़हसीन ओहले तोह छ्यिम्बु च्यी़ लो़री क्याहप्ती फुक्पागी कोह का़ ज़्या़दी खो ओहलेगी थेन्दी काहल्सीन। 61मरियम मग्दलिनी दाङ लेहमेन मरियमदी फुक्पा पोहलाराङ तेहती येहकें।
माक्मीया़गी येशूगी फुक्पा सुङग्यो
62नाहङबार च्युङ थाङ सोएँ ङ्यिहमाला पूजाहारी छ्यिम्बुया़ दाङ फरिसीया़ डी़दी पिलातससाला काहल्दी, 63“लाहसो लाह, ङ्यिहगी टेहम्बा साल्देॱराङ येहबा, ओ़ह ह्आउस्या़गी सोम्बो येहकेंमुराङ ‘ङाह स्यी़दीले ङ्यिहमा सुमला येहपाराङ सोम्बो लो़हज्ये येह’ म़ेदी माक्यो येहकें।#मत्ती १६:२१; १७:२३; २०:१९; मर्क ८:३१; ९:३१; १०:३३,३४; लूक ९:२२; १८:३१-३३ 64ओ़ह सोङबे ङ्यिहमा सुम माहकाहल थु ओ़ह फुक्पा या़हबु पेहती सुङ च्य़ूदोङ। मिहन्नानी खोगी स्याहप्च्यीया़गी ओहङदी रोह कुमेन क्याहप्ती ख्येर्वा, ओहले ‘ओ़ह खोनी स्यिदीले सोम्बो लाङसीन’ म़ेदी मिहया़गी माज्ये येह! मिहन्नानी तोहङले चिहन क्याहप्क्यो म़ेदीॱआङ ओ़हदी चोक्पा ओहङज्ये येह।” 65ओ़ह सोङबे पिलातसगी खुङया़ला, “माक्मीया़ला ख्येर्ती ला़ खाजेबा या़हबु पेहती फुक्पा सुङ च्य़ूदोङ” म़ेदी मासीन। 66ओहले खुङया़गी काहल्दी फुक्पा या़हबु पेहती ज़्या़ज्येला फुक्पागी कोहला थे़जी क्याहप्सीन ओहले माक्मीया़ला सुङ च्य़ूसीन।
Currently Selected:
मत्ती 27: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
