मर्कूस 12
12
कुहन्डुम स्यिहङ क्याहप्केन मिहया़गी पेताम
(मत्ती २१:३३-४६; लूक २०:९-१९)
1येशूगी खुङया़ला पे ज़्या़दी दि ल़ेहमु पेताम सुङ नाङसीन, “मिह च्यी़गी कुहन्डुम स्यिहङ क्याहप्सीन। ओहले खोगी कुहन्डुम स्यिहङ कोर-क्यिहलेॱराङ ओहर्ताया़ क्याहप्ती सा ओम फ्रिदी कुहन्डुम च्यिर्केन्गी कोल ज़ोसीन ओहले ओ़ह कुहन्डुम स्यिहङ सुङज्येला पालीप जे़दी ओ़ह कुहन्डुम स्यिहङ कामे क्याहप्केन मिहया़ला चि क्याहप्ती खो राहङदी फि-युहलला फार काहल्सीन।#यशै ५:१,२
2 कुहन्डुम छे़गेन ती़हजी काहल फान्ज्यो खोगी राहङगी योक्पु च्यी़ला कुहन्डुमकी स्यिहङला राहङगी बो लेहन्ज्येला ताङसीन। 3यिहॱनाङ ओ़ह स्यिहङ क्याहप्केन मिहया़गी ओ़ह योक्पुला ज़ुङदी तुहङसीन ओहले खोला च्यिॱआङ माहतेर्पा पेहती लाहक्पा तोङबाराङ लो चाहङसीन। 4येहपाराङ खोगी लेहमेन योक्पु च्यी़ला खुङया़साला ताङ चाहङसीन दुबा यिहॱनाङ खुङगी खोला आब्रु तेन्दी गो़ रोप तेर्सीन।
5 ओहले स्यिहङ ताहक्पुगी येहपाराङ लेहमेन योक्पु च्यी़ला ताङ चाहङसीन। खोला नि खुङया़गी सेसीन। ओहले दि ल़ेहमु पेहती स्यिहङ ताहक्पुगी लेहमेन माहङबुराङ योक्पुया़ला ताङसीन यिहॱनाङ खुङया़गी लाहलाला तुहङसीन दुबा लाहलालानी सेसीन।
6 ता़ह ज्युक्स्योलला ओ़ह ताहक्पुदी ज्यिबुराङ च्याहम्बु पेहक्योगी पुह च्यी़ लिहक्यो येहकें। ओहले खोगी ‘ता़ह ङाह पुहलानी खुङया़गी चा़ पेहॱराङ पेहटो’ म़ेदी पुहदीला ताङ चाहङसीन।
7 यिहॱनाङ ओ़ह स्यिहङ क्याहप्केन मिहया़गी राहङ नाहङदुङ दि ल़ेहमु मासीन, ‘लो खो नि स्यिहङ ताहक्पुदीॱराङ पुह यिहम्बा, स्यो ता़ह ओहराङ खोला सेकें ओहले कुहन्डुम स्यिहङ थाम्ज्यीराङ ओहराङदीराङ ओहङज्ये येह’ म़ेदी मासीन दुबा।
8 ओहले दि ल़ेहमु म़ेदी खुङगी ज़ुङदी सेसीन ओहले रोहला कुहन्डुम स्यिहङलेगी फिला ख्येर्ती क्युर चाहङसीन।”
9येशूगी खुङया़ला दि ल़ेहमु सुङदी टी़ह नाङसीन “ता़ह ओ़ह स्यिहङ ताहक्पुगी खुङया़ला च्यि पेहटो? ताहक्पु खोराङॱराङ ओहङदी ओ़ह स्यिहङ क्याहप्केन मिहया़ला सेच्ये येह ओहले राहङगी स्यिहङ लेहमेन मिहया़ला कामे क्याहप्च्येला तेर्च्ये येह।
10 च्यि ख्यागी सुङरापला प्रुहक्योगी दि केच्याया़ टा़हदी म़ेहबा? चिक्सो-खे़बाया़गी फेन मे़हथोएँ म़ेदी क्युर चाहङग्योगी तोहॱराङ तिहरीङ खाङबागी ब्राम तिङगेमु सुहर-तोह काहल्सीन। #भज ११८:२२,२३
11 दि ल़ेहमुनी चो़वो छ्येवा राहङगीराङ जे-नाङदी येहबा,
दि ओहराङगी ताएँमु काहजे याहम्जेम्बागी छ्या़ले दुबा।”
12येशूगी दि स्याहल खुङया़लाॱराङ सुङ नाङग्यो यिहम्बा म़ेदी यहूदी गोबाया़गी ह्अ कोहसीन। ओ़ह सोङबे खुङगी येशूला ज़ुङज्ये छोल्सीन, यिहॱनाङ मिह मिह-माहङगी ज्यी़सुगी पेहती खुङगी येशूला ज़ुङ मा़हखु। ओ़ह सोङबे खुङगी येशूला क्युर ज़्या़दी काहल्सीन।
ठाल तुहएँगी तेहन्दाला टी़हबा
(मत्ती २२:१५-२२; लूक २०:२०-२६)
13ओ़ह तिङले यहूदी गोबाया़गी फरिसी दाङ क्याहल्बु हेरोदगी लाहला मिहया़ला ताम-तामलाराङ येशूला छ्यि-च्य़ूदोङ म़ेदी ताङसीन।
14खुङ येशूसाला ओहङदी मासीन, “लोबेन लाह, राहङगी नाहम-माना तेहन्दामकी स्याहल च्यी़राङ सुङ नाङगे म़ेदी ङ्यिहला क्यी़ह येहबा। मिहया़गी च्यि मारो म़ेदी राहङगी नाङदा जे मेहनाङगे। राहङगी सुतीॱआङ तोहङबाला ज़ी़दी स्याहल सुङ मेहनाङगे। राहङगी तेहन्दाम जेती किन्ज्योगी लाहम तेन नाङगेन। ता़ह ङ्यिहला सुङ नाङदोङ, छ्य़े-ठिमगी सुङग्यो ल़ेहमु रोमी स्युहङला ठाल च्याङगेन्दी ठाबे यिहम्बा नि मिहम्बा?
15ङ्यिहगी ठाल च्याल्दोङ नि माहच्याल?” म़ेदी टी़हसीन। येशूगी खुङगी खोक्पा कोर्ती ताम क़ू छोल्ग्यो ङोह ख्येन्दी सुङ नाङसीन, “तेहन्दा म़ेहबाकी तामया़ म़ेदी ख्या ङाहला च्यिबे फासई तीज्ये छोल्गे? केरे डापाल च्यी़ ख्योङदी तेन्दोङ ले” म़ेदी सुङ नाङसीन।
16ओहले खुङगी डापाल च्यी़ ख्योङदी येशूला स्युहसीन। ओहले येशूगी खुङला, “देला सुगी छेन दाङ पार दुबा?” म़ेदी टी़ह नाङसीन। ओहले खुङगी “दि नि रोमी क्याहल्बु कैसरती यिहम्बा लाह” म़ेदी ल़ेहन क्याहप्सीन।
17ओहले येशूगी, “आहन्डा यिहन्सीमाना कैसरदी कैसरलाॱराङ फुल्दोङ ओहले किन्ज्योदी किन्ज्योलाॱराङ फुल्दोङ” म़ेदी सुङ नाङसीन। येशूगी दि स्याहल थे़दी खुङ ज्यिबुराङ ह्अ ल़ेहसीन।
स्यी़दीले सोम्बो लो़हगेन्गी तेहन्दाला टी़हबा
(मत्ती २२:२३-३३; लूक २०:२७-४०)
18ओ़ह तिङले लाहला सदुकीया़ येशूसाला ओहङसीन। (सदुकी छो़बाकी मिहया़गीदी मिह स्यिदीले सोम्बो लो़हदी ओहङगे माएँ तामला यिह मे़हछ्ये येहकें।) ओहले खुङगी,#ल़ेह २३:८ 19“लोबेन लाह, मोशाकी छ्य़े-ठिमला तासीमाना सुज्यीगी आदा पेहजा म़ेहबा पेहती स्यिसीनमाना आदाकी तेहन्दाला पेहजा ओहङज्यु म़ेदी नो़हगी नामाला पा़हमा पेह कोहकें।#व्य २५:५
20ता़ह खाङबा च्यी़ला आदा-नो़ह पिन तिहन येहकें। ओहले आदा छ्येस्योदीगी पा़हमा पेहसीन ओहले खो पेहजा म़ेहबा पेहती स्यिसीन। 21ओ़ह सोङबे पुह पाहर्पागी नामाला पा़हमा पेहसीन, यिहॱनाङ खोॱआङ पेहजा म़ेहबा पेहतीराङ स्यिसीन। ओहले खो चो़गी नो़हगी नामा ङ्याम्बु पा़हमा पेहसीन खोॱआङ पेहजा म़ेहबा पेहतीराङ स्यिसीन। 22दि ल़ेहमु पेहती पिन तिहनगीॱराङ नामा ङ्याम्बु पा़हमा पेहसीन यिहॱनाङ पेहजा म़ेहबा पेहतीराङ स्यिसीन। ज्युक्स्योलला ओ़ह पी़हमीॱआङ स्यिसीन।
23ता़ह स्यी़दीले तिङले सोम्बो लाहङगे ती़हजीला खुङया़ नाहङला ओ़ह पी़हमी का़हन्दीती छ्युङमा ओहङडो ले? च्यिबेमाना मोहला नि पिन तिहनगीॱराङ पा़हमा पेह सिहन्दी येहबा” म़ेदी येशूला टी़हसीन। 24येशूगी खुङया़ला ल़ेहन क्याहप नाङसीन, “ख्या ज्यिबुराङ जोल्ग्यो दुबा च्यिबेमाना ख्यागी सुङरापला प्रुहक्योगी तामॱआङ ह्अ मेहकोह दु, किन्ज्योगी ओङलाॱआङ ह्अ मेहकोह दु।
25 स्यिक्यो मिहया़ सोम्बो लाहङ फान्ज्यो नि खुङ पा़हमा पेहकेन दाङ पा़हमा पेह तेर्केन्गी केच्याराङ मेहयोहङगे। खुङ नि स्यिहङगामला ज़्य़ू नाङगे स्यिहङगामकी स्याहप्च्यीया़ ल़ेहमु ओहङगे।
26 स्यिदीले सोम्बो लो़हदी ओहङगेन्गी तेहन्दाला ती़हदी तेहक्यो मेह चेहरेप नाहङले किन्ज्योगी मोशाला च्यि सुङ नाङबा ओ़ह ख्यागी छ्य़ेला मा़हटाहबा? ओ़ह ती़हजीला किन्ज्योगी मोशाला दि ल़ेहमु सुङ नाङसीन, ‘ङाह अब्राहाम, इसहाक दाङ याकूबकी किन्ज्यो यिहम्बा’। #
प्रस ३:६
27मिहरोनी स्यिक्यो मिहया़गी किन्ज्यो मिहम्बा, सोम्बो मिहया़दी गा किन्ज्यो यिहम्बा! ख्या जोल्दी तेहक्यो दुबा” म़ेदी येशूगी सुङ नाङसीन।
थाम्ज्यी म़ेदी छ्येस्यो का
(मत्ती २२:३४-४०; लूक १०:२५-२८)
28छ्य़ेगी खेम्बु च्यी़गी ओ़ह केच्याया़ ङ्यिहन्दी तेहक्यो येहकें। ओहले येशूगी सदुकीया़ला या़हबु जेती ल़ेहन क्याहप्क्यो थोङदी खोगीॱआङ येशूला “लोबेन लाह, किन्ज्योगी नाम्पार-ताहक्पा काया़ नाहङला थाम्ज्यी म़ेदी छ्येस्यो का का़हन्दी यिहम्बा लाह?” म़ेदी टी़हसीन।
29ओहले येशूगी सुङ नाङसीन, “थाम्ज्यी म़ेदी छ्येस्यो का दिराङ यिहम्बा ‘ए इस्राएलीया़ या़हबु पेहती ङ्यिहन्दोङ! ओहराङगी किन्ज्यो च्यी़राङ चो़वो छ्येवा यिहम्बा।#व्य ६:४,५ 30ख्येगी चो़वो छ्येवा राहङगी किन्ज्योला राहङगी थाम्ज्यीराङ निङ थाक्पालेगी, राहङगी थाम्ज्यीराङ सोलेगी, राहङगी थाम्ज्यीराङ रिहक्स्यीलेगी, ओहले राहङगी थाम्ज्यीराङ स्युकगी चेवा डुप्तोङ।’ 31ओहले लेहमेन का दिराङ यिहम्बा– ‘राहङगी टोहङरोला राहङला ल़ेहमुराङ चेवा पेहतोङ’। दि म़ेदी छ्येस्यो का लेहमेन का़हन्दीॱआङ म़ेह” म़ेदी येशूगी सुङ नाङसीन।#लेवी १९:१८
32दि थे़दी छ्य़ेकी खेम्बुया़गी येशूला, “तेहम्बाराङ राहङगी ठाबे सुङ नाङसीन, राहङगी सुङ नाङग्यो ल़ेहमुराङ किन्ज्यो नि च्यी़राङ येहबा, किन्ज्यो म़ेदी लेहमेन सुॱआङ म़ेह।#व्य ४:३५ 33ओ़ह सोङबे मिहगी किन्ज्योला राहङगी निङ थाम्ज्यीगी, रिहक्स्यी थाम्ज्यीगी ओहले ओङ थाम्ज्यीगी चेवा पेह कोहकें ओहले राहङगी टोहङरोला राहङला ल़ेहमुराङ चेवा पेह कोहकें। थाम्ज्यी नामे नाजोकी सेम्ज्येनया़ सेत्ती दोगे सा़दी फुल्गेन मार्च्ये दाङ ठा़ फुल्गेन मार्च्ये म़ेदीॱआङ दि का ङ्यी़ थाम्ज्यी म़ेदी चा़ छ्यिम्बु यिहम्बा।”#होशे ६:६ 34खोगी ज्यिबुराङ जेम्दे दि ल़ेहमु या़हबु ल़ेहन क्याहप्क्यो ज़ी़दी येशूगी सुङ नाङसीन, “ख्ये किन्ज्योगी क्याहल्सीलेगी था़-रिहङबु म़ेह।” ओ़ह तिङले सुज्यीगीॱआङ येशूला ताम टी़हज्येला आ़र पेह मा़हखु।#लूक १०:२५-२८
थार्पा नाङगेन मास्यीकाकी तेहन्दाला टी़हबा
(मत्ती २२:४१-४६; २३:१-३६; लूक २०:४१-४७)
35छ्योखाङला लुहङ नाङगेराङ जेकेमु येशूगी मिहया़ला, “काह-ठि पेहती मास्यीका दाऊदकी स़ेबु यिहम्बा म़ेदी छ्य़ेकी खेम्बुया़गी मा ख़ूएँ ले? म़ेदी टी़ह नाङसीन। 36च्यिबेमाना किन्ज्योगी नाम्पार-ताहक्पा थु लाहमले दाऊद खो राहङगीराङ दि ल़ेहमु सुङ नाङदी येहबा–
चो़वो छ्येवागी ङाहगी चो़वोला सुङ नाङसीन,
‘ङाहगी ख्येगी टाहया़ला ख्येगी काङबा चो़ला छ्यि मा़हच्यु थु
ख्ये ङाहगी योबा ङो़ले तेह!’ #
भज ११०:१
37 दाऊद राहङगीराङ मास्यीकाला ‘चो़वो’ म़ेदी मा फान्ज्यो काह-ठि पेहती मास्यीका दाऊदकी छार्क्यीन ओहङ ख़ूएँ ले?” मिहया़गी येशूगी सुङदेनला ज्यिबुराङ क़ेहनाङ पेहती ङ्यिहन तेहती येहकें।
38येहपाराङ सुङदेन नाङगेराङ येशूगी सुङ नाङसीन, “छ्य़ेकी खेम्बुया़ यिहन्ज्यु जेम्दी तेह। खुङया़ रिहङबु-रिहङबु या़हबु काप्च्याया़ केहन्दी कोरा क्याहप्च्ये सेम पेहकें, छोङ-ठोमया़ला मिहया़गी राहङला चा़ पेहती ज्याल्ज्यु माएँ छोल्गे। 39ओहले छो़खाङ दाङ डेन साहएँ ग्या़या़ला थो़स्यो टाहलला तेहच्ये छोल्गे। 40ओहले खुङया़गी ह्युग्मोया़गी खाङबा स्यिहङया़ फ्रो़गे ओहले मिहया़ला तेन्गेनज्यी पेहती रिहङबु-रिहङबु सोल्वाङ ताप्कें। दि ल़ेहमु मिहया़ला जेन छ्यिम्बु ङ्य़ेहबा फो़ज्ये येह।”
ह्युग्मोगी फुल्ग्योगी डेल्बा
(लूक २१:१-४)
41येशूगी छ्योखाङला डेल्बा फुल्गे काहम पोहला ज़्य़ूदी मिहया़गी डेल्बा फुल्ग्यो ज़ी़ नाङसीन। छ्युक्पु मिहया़गी डेल्बा माहङबुराङ फुल्सीन। 42ओहले ख्योवा स्यिक्यो प्राङबु पी़हमी च्यी़ ओहङदी साहङमागी टाङगा ङ्यी़ फुल्सीन। 43ओहले येशूगी राहङगी स्याहप्च्यीया़ला क़े क्याहप नाङदी, “तेहम्बाराङ ङाह ख्याला माएँ, दि प्राङबु ह्युग्मोगी लेहमेनया़गी म़ेदी डेल्बा माहङबुराङ फुल्सीन। 44च्यिबेमाना लेहमेन मिहया़गी नि राहङला बोल्बु येहकेन टाङगालेगी सिपाज्यी च्यी़राङ फुल्सीन, यिहॱनाङ दि पी़हमीगी नि राहङ प्राङबु येहतीॱआङ राहङगी टेहपा सोज्येला ङ्ये़हदी साह कोहएँगी टाङगा थाम्ज्यीराङ फुल्सीन” म़ेदी येशूगी सुङ नाङसीन।
Currently Selected:
मर्कूस 12: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
