मर्कूस 16
16
येशू टोहङग्योलेगी सोम्बो ज़्याङ नाङग्यो
(मत्ती २८:१-८; लूक २४:१-१२; यूह २०:१-१०)
1थाङ सोएँ ङ्यिहमा सिहन फान्ज्यो ओ़ह कुहङमुराङ मरियम मग्दलिनी, याकूबकी आमा मरियम दाङ सलोमीगी येशूगी कुबुरला कुज्येला टिहमा स्यिहम्बु खाएँगी नुमया़ ङ्योहसीन। 2ज़ा-ङ्यिहमा ङ्यिहमु नाहम-सेमुराङ ङ्यिहमा स्यार्केमु खुङ कुबुर तो़ह ज़्या़क्योगी फुक्पाला काहल्सीन। 3ओहले खुङ लाहमला डोॱराङ पेहकेमु राहङ नाहङदुङ, “फुक्पाला क्याहप्क्योगी तोह सुगी खा फे़ तेर्च्ये ता़ह?” म़ेदी ताम मासीन। 4ओहले खुङ फुक्पाला लेप्ती ताएँमुनी फुक्पागी तोह खा फे़ ज़्या़क्यो थोङसीन। ओ़ह तोह ज्यिबुराङ छ्यिम्बु येहकें। 5खुङया़गी फुक्पा नाहङला स्य़ूहदी ताएँमुनी ओ़हला काप्च्या कार्पु केहन्ग्योकी स्यारा च्यी़ फुक्पागी योबा ङो़ले तेहक्यो थोङसीन। दि थोङदी खुङया़ ज्यी़सीन। 6यिहॱनाङ ओ़ह स्यारा मिहगी खुङया़ला, “ख्या मा़हन्ज्यी, ख्या क्याहङस्यीङला सेक्योगी नासरतकी येशूला छोल्ग्यो मिहन ले? यिहॱनाङ त़ेदोङ, येशू देला म़ेह, मिहरो नि सोम्बो ज़्याङदी फेप सिहन्सीन! खुङया़गी येशूला ज़्या़क्योगी ग्या़ दिराङ यिहम्बा, त़ेदोङ! म़ेदी मासीन! 7यिहॱनाङ ता़ह काहल्दी येशूगी स्याहप्च्यीया़ दाङ पत्रुसला ‘येशू नि तोहङलेराङ गालीलला फेप सिहन्दी येह। मिहरोगी सुङ नाङग्यो ल़ेहमुराङ ख्याया़गी येशूला ओ़हलाराङ थोङज्ये येह’ म़ेदी म़े तेर।”#मत्ती २६:३२; मर्क १४:२८ 8ओहजेला खुङया़ ज्यिबुराङ ह्अ ल़ेहदी दार्ती फुक्पालेगी थेन्दी छ्योङसीन, ओहले खुङ दि ल़ेहमु पेहती ज्यी़क्यो सोङबे खुङया़गी ओ़ह केच्या सुॱलाङ माहस्ये।
येशूगी स्याहप्च्यीया़ला ज्याल्गा नाङग्यो
(मत्ती २८:९-२०; लूक २४:१३-५३; यूह २०:११-२३; ल़ेह १:४-११)
[9येशू ज़ा-ङ्यिहमा नाहम-सेमुराङ टोहङग्योलेगी सोम्बो ज़्याङ फान्ज्यो थाम्ज्यी म़ेदी तोहङले मरियम मग्दलिनीसाला फेप नाङसीन। ओ़ह मरियमगी ज़ुबुले येशूगी ल्हेन्डी तिहन थाल तेन नाङग्यो येहकें। 10मोह काहल्दी तोहङले येशूला तिङ ङ्ये़गे मिहया़ला दि केच्या स्येसीन। खुङ खेलाङ पेहती ङी़ह तेहती येहकें। 11ओहले मोहगी येशू सोम्बो ज़्याङ नाङग्यो दाङ राहङगी थोङग्योकी थाम्ज्यी केच्याया़ खुङया़ला स्येसीन। यिहॱनाङ खुङगी मोहगी तामला यिह मा़हछ्ये।
12ओ़ह तिङले युहलला डोज्ये पेहक्योगी स्याहप्च्यी ङ्यी़साला येशू खुङ ङ्यी़गी पाहरक्यीला ङोहॱराङ स्य़े मिहखुएँ छ्याप्स्यी जेती फेप नाङसीन। 13खुङया़गीॱआङ ओहङदी दि केच्या लेहमेन स्याहप्च्यीया़ला स्येसीन। येहपाराङ स्याहप्च्यीया़गी खुङया़गी माक्यो तामला यिह मा़हछ्ये।
14ओ़ह तिङले स्याहप्च्यी च्यिङ्यी़राङ साहज्ये से़हया़ स़ेह तेहकेमु येशू खुङया़गी पाहरक्यीला फेप नाङसीन। राहङ-राहङगी सेम सान्दी पेहती येशूला टोहङग्योलेगी सोम्बो लो़हक्यो थोङगेनया़गी तामला यिह मा़हछ्येबा सोङबे येशूगी खुङया़ला काप्क्येन नाङसीन।
15ओ़ह तिङले येशूगी खुङया़ला सुङ नाङसीन, “जाम्बुलीङ थाम्ज्यीला काहल्दी मिह थाम्ज्यीलाराङ या़हबु लेहङगु स्येतोङ!#ल़ेह १:८ 16यिह-छ्य़े पेहती बप्तिस्मा लेहन्गेनया़गी थार्पा ज्योर्च्ये येह। यिहॱनाङ यिह-छ्य़े मेहबेकेनया़ला किन्ज्योगी ङ्य़ेहबा नाङज्ये येह। 17ओहले यिह-छ्य़े पेहकेनया़ ङ्याम्बु दि ल़ेहमु ताक्छेन ओहङज्ये येह– खुङया़गी ङाहगी मिहनला ल्हेन्डीया़ तेन्ज्ये येह ओहले ताम साम्बा साम्बाया़ माज्ये येह। 18खुङया़गी प्रुहल ज़ुङज्ये येह, तू़ह येहकेन्गी से़हया़ थुङॱनाङ खुङया़ला ओ़ह से़हगी च्यिॱआङ ने क्याल्ज्ये म़ेह ओहले नेहपाया़गी थो़ला लाहक्पा ज़्या़गेमु खुङ टा़हज्ये येह।”
19स्याहप्च्यीया़ ङ्याम्बु दि ल़ेहमु पेहती स्याहल सुङ फान्ज्यो किन्ज्योगी चो़वो येशूला स्यिहङगामला नोम फेप्सीन ओहले मिहरो किन्ज्योगी योबा ङो़ले ज़्य़ू नाङसीन।#ल़ेह १:९-११ 20ओ़ह तिङले स्याहप्च्यीया़गी छ्यो़ ज़्यिगालाॱराङ काहल्दी येशूगी तेहन्दाला स्येसीन। चो़वो छ्येवागी खुङया़ लाहमले छ्या़लेया़ जे नाङसीन ओहले खुङया़गी स्येक्योगी केच्याया़ तेहम्बा-तेहन्सुम यिहन म़ेदी तेन नाङसीन।]#१६:२० आङ-टा़हङ ९ यिहन्ज्यु २० थुकी केच्याया़ माहङबुराङ ग्रीक बाइबलला प्री़हदी म़ेह।
Currently Selected:
मर्कूस 16: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
