मर्कूस 5
5
ल्हेन्डी स्य़ूहक्यो मिहला येशूगी टा़ह च्य़ू नाङग्यो
(मत्ती ८:२८-३४; लूक ८:२६-३९)
1ओहले येशू स्याहप्च्यीया़ ङ्याम्बु गालील छोगी फार्केन देपकी गेरासेनी माएँ युहलया़ला लेप नाङसीन। 2ओहले येशू टुह-छ्युङले फाप नाङगेमुनी मेहचाङा नाम्स्यी स्य़ूहक्योगी मिह च्यी़ रोह तो़हगेन्गी फुक्पा नाहङले छ्योङदे येशूला थ़ू ओहङसीन। 3ओ़ह मिह रोह तो़हगेन्गी फुक्पाया़ला तेहको येहकें, ओहले खोला च्याल्दागीॱआङ ताहम्दी ज़्या़ मा़हखु येहकें। 4लेहमा माहङबुराङ खोला लाहक्पा दाङ काङबाला च्याल्दागी ताहम्दी ज़्या़ॱनाङ खोगी च्याल्दाया़ राहप-रेहप च्येको येहकें। ओहले सु मिहया़गीॱआङ खोला ताहमला ज़्या़ मा़हखुबा येहकें। 5खो ङ्यिहन-नुहप नाहम माॱनाङ तुहर्साया़ दाङ काहङदोया़ला क़े तेन्दी राहङगी राहङलाराङ तोहगी क्याहप्ती नाहन्दी ताङदे डोउ येहकें।
6ओहले येशूला था़-रिहङबुले थोङ-लुहङ मे़हबाराङ खो छ्योङदी ओहङदी येशूगी दिनला पी़मु च़ूदी 7क़े छ्यिम्बुच्यी तेन्दी मासीन, “ओ़ थाम्ज्यी म़ेदी छ्यिम्बु किन्ज्योगी स़ेबु येशू, राहङगी ङाहला च्यि जेच्ये छोल्ग्यो? किन्ज्योगी छेन लेहन्दी ङाह राहङला थाल्मु च्याहर्के, ङाहला तुहक्पु माहनाङ।” 8च्यिबेमाना येशूगी ओ़ह मेहचाङा नाम्स्यीला तोहङलेराङ थेन्दी स्यो म़ेदी सुङ नाङग्यो येहकें। 9ओहले येशूगी, “ख्येगी मिहन च्यि यिहम्बा?” म़ेदी टी़ह नाङगेमु, “ङाहगी मिहन बुङजी यिहम्बा, ङ्यिहनी माहङबुराङ येहबा!” म़ेदी खोगी मासीन। 10ओहले ओ़ह मेहचाङा नाम्स्यीगी येशूला रे़हदी, “ङ्यिहला दि युहलले ङेती ताङ माहनाङ!” म़ेदी स्युहसीन।
11ओ़ह काहङगी फाच्चीला फा़ बा़ल च्यी़ छ़े तेहती येहकें। 12ओहले ओ़ह ल्हेन्डीया़गी येशूला, “ङ्यिहला ओ़ह फा़ बा़ल नाहङला स्य़ूह च्य़ू नाङदोङ ला़ह!” म़ेदी स्युहसीन। 13ओहले येशूगी खुङया़ला थेन्दी सोङ सुङदी का नाङसीन ओहले मेहचाङा नाम्स्यीया़ ओ़ह मिहलेगी थेन्दी फा़या़ नाहङला स्य़ूहसीन। स्य़ूहलुङ मे़हबाराङ तोङरा ङ्यिचे फा़या़ प्रा़हले माहर रिहल्दी छोला नुप्ती स्यिसीन।
14दि थोङदी फा़ कोहरोवाया़ ओहलेगी छ्योङदी काहल्दी क्याहसा दाङ युहलया़ला ओ़ह केच्या थाम्ज्यीराङ फेल्सीन। ओहले मिह माहङबुराङ, ता़ह च्यि काहल्बा नि म़ेदी येशूला ता ओहङसीन। 15ओहले येशूसाला लेप्ती खुङगी ओ़ह ल्हेन्डी माहङबु स्य़ूहक्योगी मिह टा़हदी, काप्च्या केहन्दी येशू पोहला तेहक्यो थोङसीन। दि थोङदी खुङया़ ज्यी़सीन। 16ओ़हला काहल्ग्योगी केच्याया़ थोङगेन मिहया़गी ल्हेन्डी स्य़ूहक्यो मिह दाङ फा़या़ला च्यि काहल्दी येहकें माएँ ताम थाम्ज्यीराङ स्य़े तेर्सीन। 17ओहले दि ल़ेहमु केच्या थे़दी ओ़ह मिहया़गी येशूला “ङ्यिह युहललेगी थेन्दी फेप नाङदोङ” म़ेदी स्युहसीन।
18ओहले येशू टुह-छ्युङला जा़ज्ये जेकेमु ओ़ह टा़हक्यो मिहगी “ङाहॱलाङ राहङ ङ्याम्बुराङ नोम फेप नाङदोङ लाह” म़ेदी स्युहसीन। 19यिहॱनाङ येशूगी खोला राहङ ङ्याम्बु ओहङ च्य़ू माहनाङ ओहले येशूगी खोला दि ल़ेहमु सुङ नाङसीन, “ता़ह ख्ये राहङगी खाङबाला सोङ ओहले किन्ज्योगी ख्येला जे नाङग्यो निङज्यी दाङ किन्ज्योगी जे नाङग्योगी थाम्ज्यीराङ केच्याया़गी तेहन्दाला राहङगी ङयेहवाया़ला स्येतोङ।” 20ओहले ओ़ह मिह काहल्दी येशूगी खोगी तेहन्दाला जे नाङग्योगी याहम्जेन छ्येवागी छ्या़लेगी तेहन्दाला डेकापोलिसला काहल्दे स्य़ेसीन ओहले दि केच्या थे़गे मिह थाम्ज्यीराङ ह्अ ल़ेहसीन।
याइरसगी पोहमो दाङ नेहपा पी़हमी च्यी़
(मत्ती ९:१८-२६; लूक ८:४०-५६)
21ओहले येशू येहपाराङ छोगी छुर्केन देप ङो़ले लो़ह फेप नाङसीन। छुर्केन देपकी छोगी सुहरला येशूगी ति-खिरे मिह मिह-माहङ जोम्सीन। 22छो़खाङगी गोबाया़ नाहङगी याइरस मिहन थो़क्यो मेहन्दा च्यी़ येशूसाला ओहङसीन। ओहले खोगी येशूला थोङ-लुहङ मे़हबाराङ येशूगी स्याहपला खेप्चु क्याहप्सीन, 23ओहले खोगी, “ङाहगी पोहमो पी़हरु ज्यिबुराङ नेहपा येहबा, राहङ फेप नाङदी मोहला दे़ नाङदोङ ओहले मोह टा़हदी थार्च्ये येह” म़ेदी स्युहसीन।
24ओहले येशू याइरस ङ्याम्बु फेप नाङसीन। मिह माहङबुराङ येशूला ताहदा क्याहप्ती ओहङसीन ओहले येशूगी ति-खिरे मिह मिह-माहङ जोम्सीन। 25ओहले ओ़ह मिह मिह-माहङ नाहङला लोह च्यिङ्यी़ यिहन्ज्यु ज़ुबु ली़ह ओहङगेन्गी नाहजा क्याहप्ती तुहक्पु ङ्युङग्यो पी़हमी च्यी़ येहकें। 26ओहले मोहगी राहङगी का़ह येहगेन्गी क्युह नोहरया़ चोङदी माहङबुराङ आम्ज्यीया़ला तेन्सीन यिहॱनाङ मोह टा़ह मा़हखु। तोहरोङ माहङबु थिन्दी काहल्सीन। 27ओहले मोहगी येशूगी तेहन्दाला थे़दी येहकें, ओहले मोह मिह मिह-माहङया़गी क्याहप ङो़ले ओहङदी येशूगी नाहम्साला दे़सीन। 28च्यिबेमाना, “येशूगी नाहम्सा च्यी़ला दे़ ङ्युहनाॱआङ ङाह टा़हज्ये येहकें” म़ेदी मोहगी सेमला ने़क्यो येहकें। 29ओहले येशूगी नाहम्सा दे़-लुहङ मे़हबाराङ मोहगी ज़ुबु ली़ह माहङबु ओहङगेन्दी टा़हदी राहङगी ज़ुबु थाङबु डोएँदी छोर्सीन। 30ओहजेला येशूगी राहङलेगी ओङ थेन्दी काहल्ग्यो छोर नाङसीन ओहले येशूगी ल्होक लो़हदी मिह मिह-माहङला, “सुगी ङाहगी काप्च्या दे़बा?” म़ेदी टी़ह नाङसीन। 31ओहजेला येशूगी स्याहप्च्यीया़गी येशूला दि ल़ेहमु म़ेदी ल़ेहन क्याहप्सीन, “ज़ी़-नाङदोङ! दि ल़ेहमु ते़ङेन मिह मिह-माहङ राहङला दे़ज्ये म़ेदी फुल्ज्या-फुल्ज्या क्याहप्ती ओहङग्यो नि राहङगी ज़ी़ नाङदेराङ येहबा ओ़ह सोङबे राहङगी ङ्यिहला काह-ठि पेहती ‘ङाहला सुगी दे़बा’ सुङदी टी़ह ख़ूएँ ले?” 32यिहॱनाङ येशूगी राहङला सुगी दे़बा म़ेदी फार छुर ज़ी़ नाङसीन। 33ओहजेला ओ़ह पी़हमीगी राहङगी ज़ुबुगी नाहजाया़ टा़हक्यो क्यी़ह ज्योर्ती मोह दार्ती ओहङदी येशूगी दिनला खेप्चु क्याहप्सीन, ओहले येशूला थाम्ज्यीराङ तेहन्दामकी केच्याया़ स्य़ेसीन। 34ओहले येशूगी ओ़ह पी़हमीला “ए पोहमो, ख्येगी तेहपागी ख्येला टा़ह च्य़ूक्यो यिहन। ता़ह ख्ये सेम लो तेहमु पेहती सोङ। ख्येगी नाहजा टा़हज्यु” म़ेदी सुङ नाङसीन।
35येशूगी स्याहल सुङगे सुङगेमुराङ मिह छो़एँ खाङबागी गोबागी मिहया़ ओहङदी गोबा याइरसला, “राहङगी पोहमो स्योर्सीन, ता़हनी लोबेनला च्यिबे ओहप्क्याल फुल्ज्ये” म़ेदी स्युहसीन। 36यिहॱनाङ येशूगी खुङगी तामला नाङदा माहताङबा जेती याइरसला, “मा़हन्ज्यी, यिह-छ्य़े च्यी़राङ पेहतोङ” म़ेदी सुङ नाङसीन। 37ओहले येशूगी पत्रुस, याकूब दाङ याकूबकी नो़ह यूहन्नाला मिहम्बा लेहमेन सुॱलाङ राहङ ङ्याम्बु ओहङ च्य़ू माहनाङ। 38ओहले खुङ फ़ेबेॱया छो़खाङगी गोबागी खाङबाला लेप नाङगेमु च्याहउँडा पेहकेया़, ङुहएँया़ ओहले क़े छ्यिम्बु तेन्दी ङुहप्रा तिहङरा पेहकेनया़ला ज़ी़ नाङसीन। 39ओहले येशू खाङबा नाहङला स्य़ूह नाङदी, “ख्या च्यिबे दि ल़ेहमु ङुहप्रा तिहङरा दाङ च्याहउँडा पेहकें? दि पोहमो मा़हस्यी येह, ङ्यिज्यीराङ लो़हक्यो यिहम्बा” म़ेदी सुङ नाङसीन। 40दि स्याहल थे़दी मिहया़ क़ेहमु क्याहप्सीन। ओहले येशूगी थाम्ज्यीलाराङ फिला ताङ नाङसीन ओहले येशूगी ओ़ह पोहमोगी आबा-आमा दाङ राहङगी स्याहप्च्यी सुमला नोम्दे ओ़ह पोहमो ङ्याल ज़्या़क्योगी ङ्याहल-खाङ नाहङला फेप्सीन। 41ओहले येशूगी पोहमोगी लाहक्पाला ज़ुङ नाङदी, “तालिता कूम!” म़ेदी सुङ नाङसीन। तालिता कूम सुङग्योदी तेहन्दा, “ए नुहमु, ङाह ख्येला माएँ, लाहङदोङ!” म़ेदी सुङ नाङग्यो यिहम्बा। 42ओहजेला लाहम्साङराङ ओ़ह पोहमो लाहङदी फार छुर यू़हज्ये छ़ूसीन। दि थोङदी मिह थाम्ज्यीराङ ह्अ ल़ेहसीन। ओ़ह पोहमो ल्हो च्यिङ्यी़ काहल्दी येहकें। 43ओहले येशूगी खुङला, “दि केच्या सुॱलाङ स्येॱराङ माहस्ये!” सुङदी का नाङसीन। ओहले, “दि नुहमुला च्यिरा़ साहज्ये स़ेह तेर्तोङ” म़ेदी सुङ नाङसीन।
Currently Selected:
मर्कूस 5: HYLM
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
