Génesis 16
16
Agari ka Israeli
1Sarai, enka Abramiri témpepka no úsïrempti sapicha káani, Sarai jántspirini ma kámasïrempti enka Agari jakankurhiempka. 2Sarai arhispti Abramini: Exeskiria eskarini ACHA no kóntexaka charhakuni, uékapirinka eskari jucheti jántspiri nanaka jinkuni charhakuni kámapirinka ka tátsekua ji t'arhexeraaka imani charhakuni. Ka Abrami úspti ísï eska Sarai na arhipka.
3Enka Abrami témpeni uéxurhini páni jápkia Kanaa irekani, Sarai, Agarini kúrhetaspti Abramini enka imeri uámpepka. Agari, Sarairi jántspirispti ka Ejiptu anapuespti. 4Abrami, Agarini kúrhespti ka no ióni jimpo charhakuni ma erokorhexaptia. Enka Agari mítepka eska charhakuni ma erokorhexapka, uénaspti Saraini ikiakuni ka ísterku exeni. 5Sarai arhispti Abramini: ¡Chéti jimporini Agari ikiasïnti exeni! Jíkini sési jasï jimpo íntskuska Agarini, ka iásï enka ima charhakuni erokorheni jaka, ikiasïntirini jínteni exeni. ¡ACHA mítesti nésï nósesi úni jaki ampe, ji o t'u!
6Abrami arhispti Saraini: Chétisti jántspiri, uák'ari úkuni ampe enkari t'u uékaaka. Sarai kánekua nósesi kámasïrempti, jimposï ima sïpakorhekupti.
7ACHAeri ánjeli ma itsï uératirhu xéntaspti jima enka no nema irekaka, ima itsï uératirhu imani xanhari jimpo jarhasti enka Xuri isï nirak'a, 8ka arhispti: Agari, Sarairi jántspiri, ¿Naniri uératini jurhaxamki ka naniri niraxamki?
Ka ima arhintaspti: Saraini sïpakorhekuxampka, imani enka jucheti ánchetpirika.
9ACHAeri ánjeli arhispti: K'uanhatsentsï chéti ánchetpiri Sarai jinkuni ka kurhantiraku.
10Ka ACHAeri ánjeli ménteru arhispti:
Jikini xáni uáneraaka chéti sïrukuani
enkari no jamperi uák'a miiuani.
11Ka ACHAeri ánjeli arhispti ménteru:
Ima charhaku enkari erokorheni jaka tatakeuati
ka Ismaeliri jakankurhitaaka,
jimpokakini ACHA kurhach'aska enkari kómu arhika.
12Ima kánekua uiuinhaxeati
eska juátarhu anapu ch'anchaki
ka tsíueati ka iámentuechani uékaati t'auarheani,
ka iámentuecha jinkuni kuáp'ekorheati
ka méntku isïksï uarhiperani jauati
erachi jémpechani jinkuni.
13Jimpoka ACHA uantaxekuspka Agarini, jimposï ima ísï jakankurhitapti: T'úri Diósïska enkarini exek'a. Nótchani jítuni ixu exeski imani enkarini exek'a. 14Ka itsï uératirhu ísï jakankurhitaspti: Itsï uératirhu enka tsípitirika enka exek'a. Ima itsï uératirhu Kadési ka Beredi teruk'ani jarhasti.
15Agari tataka sapichuni ma kámaspti enka Abramiripka ka Ismaeli jakankurhitaraspti. 16Abrami t'ámu ekuatse ka kuímu (86) uéxurhini jatirispti enka Agari jinkuni Ismaelini kámapka.
Currently Selected:
Génesis 16: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
