Génesis 22
22
Diósï juramukuspti Abraamini eska Isaakini uantikupirinka ka ACHAni kéts'ïtakuni
1Enka nitamapkia i ampe, Diosï, Abraamini tsék'uspti ka arhispti:
¡Abraami! Ka ima kurhakuspti: Ixu jarhaska.
2Diósï arhispti: Chéti sapi Isaakini enka mák'ueka ka enkari xáni xénhchaka pa t'únkeni jinkuni Moria. Jimarini chéti sapini kurhiracheaka kéts'ïtani imani juátani enkakini ji arhiaka.
3Pauantekua Abraani k'éri xarheni jauaraspti, ka ch'anchakini tatsuparhakua jatsiparhakuspti, ka pát'aaspti uáp'ani Isaakini ka imeri tsimani jántspirichani. Niraspti jima enka Diósï arhipka ka iuimaspti. 4Tanimu jurhiatekua jimpo, Abraani iauani uératini úspti exeni nani enka niárapirinka. 5Ka Abraani arhiaspti jántspiri jempechani:
Ixuts'ïni eronta je ch'anchaki jinkuni, nipa ji tataka sapi jinkuni jima enkachi uantamukorheaka ka ixuchi k'uanhatseaka.
6Abraani, Isakini imeri uáp'ani ch'kari kuiparhataspti, kachukutarakua ka ch'piri pát'aspti ka nirasptiksï jima niárani. 7Isaaki kurhamarhespti táte jempa Abraanini:
¡Jucheti táte! Ka ima arhispti:
Ixu jarhaska jucheti uátsïti ka Isaaki arhispti:
Ixuchi juáxaka ch'piri ka ch'kari, ka ¿Nani jarhaski karichi enkachi kéts'ïtaaka?
8Abraani arhispti: Diósïts'ïni íntskuati karichini enkachi kéts'ïtaaka jucheti uátsïti. Ka chúnkumasptiksï xanharani.
9Enkaksï niarapka jima enka Diosï arhiapka, Abraani kéts'ïtakua ma úspti jima, ka sési péraspti ch'kari enka kurhirapirinka ka Isaakini jima jótaspti ka kéts'ïtakuarhu péraspti jima enka ch'kari jápka. 10Abraani tarhataspti ják'i kachukutarakua jupikatini ka ísï paspti eska na kachuch'akupirinka uáp'ani. 11ACHAeri ánjeli ma uantap'aspti auantarhu uératini ka arhispti:
¡Abraani, Abraani!
Ka ima arhispti: Ixu jarhaska.
12Ánjeli arhispti:
Ásï ata tataka sapini, ásï ampe ma úku, míteska eskari janhanharhisïnka Diósïni, jimpokari uinhaska chéti tataka sapini enka mák'ueka eskarini mintachepirinka.
13Abraani eraparhaspti ka karichi sapichuni ma exeraspti enka sïuankua jimpo sïnhakirhu atarhukorhetini jápka, Abraani jupikaspti ka imani kéts'ïtataraspti ka no uáp'ani. 14Abraani, jima isï jakankurhitaspti ACHA intspeati jimposï ka íasï jamperi arhinhat'i: Juáta enka ACHA íntspek'a.
15Tsimani úni jamani ACHAeri ánjeli uantap'aspti Abraanini auantarhu uératini. 16Ka arhispti: Ji ACHA, íni jimpo enkari úka, enkarini chéti tataka sapichuni aiacheka kéts'ïtacheni, enka mák'ueka.
17Úch'akurakakini ka uanekuakini sapichani kónteauaka xáni eskaksï jóskueka auantarhu ka xáni eskaksï k'éri japuntarhu uanamukutini kutsari, imaksï méntu isï antaauati imeri ikiatspirichani. 18Iámentu iretechaksï úch'akurhanhaati chéti sïrukua jimpo, jimpokarini janhanharhiska.
19Abraani k'uanhatsentaspti jima enkaksï jántspiricha erontani jápka, ka márkuksï nintaspti Beerseba. Ka Abraani jima pakaraspti irekani.
Naori uáp'echa
20Enka Abraani niántapka nirasptiksï sési ampe aiakuntanti: Milka sapi ma kámaspti ima enka chéti erachi Najori témpeka. 21Usi urheta antap'enusti ka tátsekua Busi ka tátsekua Kemueli, Aramiri táte, 22tátsekua Késedi, jasó, Pildási, Idlafi ka Betueli. 23Betueli, Rebekeri tátespti, iumu tanimuksï uáp'echani káspti Milka ka Najori enka Abraaniri erachi jémpepka.
24Máteru Najoriri uarhiti enka Reumá arhinhempka, imát'u Teba, Gaami, Taasi ka Maakani sapichani kámaaspti.
Currently Selected:
Génesis 22: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
